தந்தைபெரியார் தமிழரா? நாயக்க தெலுங்கரா?

கேள்வி: தந்தை பெரியார் தமிழரா? நாயக்க தெலுங்கரா?

பதில்: என்ன கொடுமை சார் இது! சாதி மத பேதங்களை எதிர்த்துப் போராடுவதற்கு தனது வாழ்க்கையை அர்ப்பணித்துக் கொண்ட பெரியாரையே தமிழரா ? தெலுங்கரா என்று கேட்பதா? பெரியார் என்பவர் சுயமரியாதை நிறைந்த மாமனிதர். அதுதான் அவருடைய அடையாளம். திராவிடர் இனம் என்பது தான் அவரது இனம். இவற்றைக் கடந்து பெரியாரை கணிக்க வேறு எந்த அளவுகோலும் தேவைப்படாது.

கேள்வி: பெரியாரிடம் உங்களுக்குப் பிடித்தமான அம்சம் என்ன?

பதில்: மகாத்மா காந்தி கள்ளுண்ணாமை கொள்கையை அறிவித்து பிரசாரம் செய்தபோது, தனது தென்னந்தோப்பு முழுவதையும் வெட்டி சாய்த்து மகாத்மா காந்தியின் கொள்கைக்கு ஆதரவாக இருந்தாராம். பேச்சு ஒன்றும் செய்கை ஒன்றுமாக வாழாதவர் தந்தை பெரியார். ஒரு கன்னத்தில் அறைந்தால் மறு கன்னத்தைக் காட்டச் சொன்னார் ஏசு. ஒரு செருப்பை கழற்றி வீசியவரிடம், உன்னிடம் ஒன்றும் என்னிடம் ஒன்றுமாக இருப்பதால் அந்த செருப்புகள் யாருக்குமே பயன்படப் போவதில்லை, எஞ்சி இருக்கும் செருப்பையும் வீசியடி, அதையும் பெற்றுக் கொள்கிறேன் என்று சொன்னவர் பெரியார். அவருடைய அந்த நெஞ்சுரம் எதிர்ப்புகளை அலட்சியப்படுத்தியே தோற்கடிக்கும் அவரது வல்லமையும் எனக்குப் பிடிக்கும்.

-------------- நன்றி:- "சங்கமணி" (மலேசிய இதழ்) 3,10,17 ஜூலை 2009