பகவத் கீதையைவிட உயர்ந்தது திருக்குறள்

குறளும் - கீதையும்!

பெங்களூருவில் நடைபெற்ற திருவள்ளுவர் சிலை திறப்பு விழாவில் பங்குகொண்டு உரையாற்றிய எதிர்க்கட்சித் தலைவர் சித்தராமையா (காங்கிரஸ்) ஓர் அருமையான கருத்தை சரியான இடத்தில் நறுக்கென்று பொருத்தமாகக் கூறியுள்ளார்.

திருக்குறளில் ஜாதி, மத வேறுபாடுகள் இல்லை. ஆனால், பகவத் கீதையில் ஜாதி அமைப்பு வலியுறுத்தப்பட்டுள்ளது. எனவே, பகவத் கீதையைவிட உயர்ந்தது திருக்குறள் என்ற உண்மையை ஓங்கி ஒலித்துள்ளார். அதற்காக அவரை வெகுவாகப் பாராட்டக் கடமைப்பட்டுள்ளோம்.

பொதுவாக திருக்குறளை எந்தப் பார்ப்பனரும் ஏற்றுக்கொள்வதில்லை. மறைந்த காஞ்சி சங்கராச்சாரியார் திருவாளர் சந்திரசேகரேந்திர சரஸ்வதி என்பார் தீக்குறளைச் சென்றோதோம் என்ற ஆண்டாளின் திருப்பாவை பாடல் வரிக்குப் பொருள் சொல்லும்போது தீங்கான திருக்குறளை ஓதமாட்டோம் என்று கூறினார்.

உண்மைப் பொருள் அதுவன்று, குறளை என்றால் கோள் சொல்லுதல் என்று பொருளாகும். கோள் சொல்லமாட்டோம் என்ற பொருளை மாற்றி தம் உள்ளத்தில் குடிகொண்டிருந்த பார்ப்பன உணர்வை இவ்வாறு வெளிப்படுத்திக் கொண்டார்.

அவரது வாரிசான ஜெயேந்திர சரஸ்வதிகூட திருக்குறளில் அறத்துப்பாலில் முதல் பத்துக் குறள்களை மட்டும் படித்தால் போதும் மற்றவை தேவையில்லை என்று கூறவில்லையா?

பார்ப்பனர்கள் இவ்வாறு திருக்குறள்மீது வெறுப்புக் கொள்வதற்கே காரணம், அது பிறவிப் பேதத்தை எதிர்ப்பதுதான் பிறப்பொக்கும் எல்லா உயிர்க்கும் என்ற கருத்தை வலியுறுத்துவதுதான்.

பார்ப்பனர்கள் பிறவியிலேயே உயர்ந்தவர்கள் பிரம்மாவின் நெற்றியில் இருந்து பிறந்தவர்கள், சூத்திரர்கள் பிரம்மாவின் பாதத்தில் இருந்து பிறந்தவர்கள் இழிந்தவர்கள் என்ற இந்து மதக் கூற்றுக்கு மனுதர்மம் வேதங்களின் புளுகுக்கு கீதையின் சரக்குக்கு திருக்குறள் மரண அடி கொடுக்கிறது என்கிறபோது குறளை எப்படி ஏற்பார்கள் பார்ப்பனர்கள்?

அதுவும் இந்துத்துவா கோட்பாடு கொண்ட பாரதீய ஜனதா ஆளும் ஒரு மாநிலத்தில், இன்னும் சொல்லப்போனால், அரசு (பா.ஜ.க.) விழாவாகவே நடத்தப்பட்ட அந்நிகழ்ச்சியில் சித்தராமையா திருக்குறளையும், கீதையையும் ஒப்பிட்டு, குறளின் உயர்ந்த சீலத்தை வெளிப்படுத்தி, பகவத் கீதையின் கீழ்மைத் தன்மையை வெளிப்படுத்திய விதம் இருக்கிறதே அது சாதாரணமானதல்ல.

நான்கு வருணங்கள் என்னால் உண்டாக்கப்பட்டவை; அவரவர்களுக்குரிய கருமங்களை அவரவர் மீறாமல் செய்யவேண்டும். அதனை மாற்றிச் செயல்பட வைக்க அந்த வர்ணதர்ம உற்பத்தியாளனாகிய என்னால்கூட முடியாது. (கீதை, அத்தியாயம் 4, சுலோகம் 13).

ஜாதி தருமம் என்பது தன்னால் உண்டாக்கப்பட்டது என்றும், ஜாதியை உற்பத்தி செய்த பகவான் கிருஷ்ணனாலேயே அதனை மாற்றியமைக்க முடியாது என்றும் கூறும் கீதை எங்கே?

பிறப்பொக்கும் எல்லா உயிர்க்கும் சிறப்பொவ்வா

செய்தொழில் வேற்றுமை யான்

(திருக்குறள் 972)

பிறப்பு என்பது எல்லா மக்களைப் பொறுத்தும் ஒன்றுதான்; அதில் ஏற்றத் தாழ்வு கிடையாது என்று கூறும் திருக்குறள் எங்கே?

வருண தன்மையில் பிராமணன், சூத்திரன் என்ற பேதத்தைக் கற்பிப்பதோடு கீதை நின்றுவிடவில்லை; ஆண் பிள்ளைகளையும் ஈன்று புறந்தரும் பெண்களை பாவ யோனியில் பிறந்தவர்கள் என்றும் கேவலப்படுத்துகிறது.

அதனால்தான் பாபாசாகேப் அண்ணல் அம்பேத்கர் அவர்கள் கீதை என்பது ஒரு முட்டாளின் உளறல் என்று முகத்தில் அடித்ததுபோல விமர்சித்தார்.

கீதை என்பது கர்மபலன், விதியை வலியுறுத்தக் கூடியது. ஊழையும் உப்பக்கம் காண்பர் என்று முயற்சிக்கும், உழைப்புக்கும் முன்னுரிமை தருவது திருக்குறளாகும்.

எந்த வகையில் பார்த்தாலும் குறள், குன்றின்மேல் விளக்குப் போன்ற உயர்ந்த சீலத்தை உடையதாகும். கீதையோ கீழ்மைத்தன்மை கொண்டதாகும்.

பகுத்தறிவாளரான சித்தராமையா வெளியிட்ட கருத்து நூற்றுக்கு நூறு சரியேயாகும்.

-------------"விடுதலை"தலையங்கம் 12-8-2009