வானவில்லில் மட்டும் இனிமேல் வர்ண பேதம் இருக்கட்டும்!

பெரியார் திரைப்படப் பாடல்

கண்ணீர் விழுந்தும் கரையவில்லையே....

பல்லவி

கடவுளா நீ கல்லா
கடவுளா நீ கல்லா
மேலோர் என்று
சிலரைப் படைத்து
கீழோர் என்றுபலரை படைத்தால்

குழு: கடவுளா நீ கல்லா

குழு: நாயும் பூனையும்
நடந்தால் புண்ணியம்
மனிதர் நடந்தால்
பாவம் என்றால்
கடவுளா நீ கல்லா

குழு: தண்ணீர் விழுந்தால்
பாறையும் கரையும்
கண்ணீர் விழுந்தும்
கரையவில்லையே
கடவுளா நீ கல்லா

சரணம் - 1
எங்கள் நிலங்களை அபகரித்தீர்!

குழு: அபகரித்தீர்... அபகரித்தீர்...
எங்கள் குளங்களை மறுதலித்தீர்!

குழு: மறுதலித்தீர்... மறுதலித்தீர்...
கால்நடை உலவிடும் வீதியில் எங்களின்
கால்களை அபகரித்தீர்!
வவ்வால் நுழைகிற கோயிலில் எங்களின்
வாசலை அடைத்து விட்டீர்! - அங்கு


சூத்திரன் நுழைந்திட சாத்திரம் இல்லை - என்று
சூத்திரம் எழுதி விட்டீர்!

குழு: சூத்திரம் எழுதி விட்டீர்!

நீங்கள் மட்டும் நீங்கள் மட்டும்
விந்து விழுந்து பிறந்தவர்கள்
நாங்கள் என்ன நாங்கள் என்ன
எச்சில் விழுந்தா பிறந்தவர்கள்?

குழு: எச்சில் விழுந்தா பிறந்தவர்கள்?


(கடவுளா...

சரணம் - 2

இந்தக் கோயிலை அமைத்தது யார்?

குழு: அமைத்தது யார்... அமைத்தது யார்...
உச்சியில் கோபுரம் சமைத்தது யார்?

குழு: சமைத்தது யார்... சமைத்தது யார்...

எங்கள் கைகளும் கால்களும் தீண்டியிராவிடில்
கோயில்கள் ஏதுமில்லை
எங்கள் தோள்கள் தொடாவிடில் கடவுளர் யாருமே
கருவறை சேர்வதில்லை
புழுதியில் உழுதவன் வேர்வை இல்லாவிடில்
பூசைகள் ஏதுமில்லை

குழு: பூசைகள் ஏதுமில்லை

மனிதர் தர்மம் பொதுவாகட்டும்
மனு தர்மங்கள் உடையட்டும்!
வானவில்லில் மட்டும் இனிமேல்
வர்ண பேதம் இருக்கட்டும்!