கலைஞர் பேனரை, உருவ பொம்மையை தீயிட்டுக் கொளுத்திய கன்னடர்கள்

தமிழர்களை வம்புக்கு இழுக்காவிட்டால் கன்னட அமைப்புகளுக்குத் தூக்கமே வராது போலிருக்கிறது. தமிழக முதல்வர் சமீபத்தில் டெல்லிக்குச் சென்றிருந்த போது அங்குள்ள தமிழ்ச் சங்கத்தில் பேசுகையில் பெங்களூருவில் திறக்கப்படாமல் உள்ள திருவள்ளுவர் சிலை குறித்தும், அதேபோல் செய்தியாளர்களுக்குப் பேட்டியளிக்கும் போது ஒகேனக்கல் திட்டம் குறித்தும் சில கருத்துக்களைக் கூறினார். அதையே மையப்படுத்தி கர்நாடக அமைப்புகள் கலைஞருக்கு எதிராக கோஷங்களை எழுப்பியிருக்கின்றன.

கர்நாடக ரட்சண வேதிகே என்கிற அமைப் பின் தலைவர் நாராயணகவுடே. இவரது ஒரே குறிக்கோள் கர்நாடகாவில் உள்ள தமிழர்களை இம்சிப்பது. அப்புறம் தமிழ்நாட்டுத் தலைவர்களை எதிர்த்து ஆர்ப்பாட்டங்களையும் மறியல் போராட்டங்களையும் நடத்துவது.... அந்த வகையில்தான் கடந்த சனிக்கிழமை காலையில் தமிழர்களுக்கு எதிராக ரயில் மறியல் போராட்டம் நடைபெறும் என்று அறிவித்தார் இவர். அதை அதிரடியாகச் செய்தும் முடித்தார். அன்று விடியற்காலை ஐந்து முப்பது மணிக்கு சென்னைக்குப் புறப்படத் தயாராக இருந்த லால்பாக் விரைவு ரயிலை போகவிடாமல் தடுத்து தமிழகத்துக்கு எதிரான கோஷங்களை எழுப்பி அந்தக் காலை வேளையை களேபர வேளையாக்கிவிட்டனர்.

தமிழக முதல்வர் கலைஞர் சமீபத்தில் தலைநகர் டெல்லிக்குச் சென்றிருந்த போது பத்திரிகையாளர்களிடம், `ஒகேனக்கல் திட்டம் பல ஆண்டுகளுக்கு முன்பே எங்களுக்கும் கர்நாடக மாநிலத்திற்கும் ஏற்பட்ட ஒப்பந்தப்படி உருவானதாகும். அதில் மீண்டும் உரிமை கோரி, ஒகேனக்கல் திட்டத்தை நிறைவேற்றக்கூடாது என்று தடுப்பது முறையல்ல. அது சட்டப்படியும் முறையல்ல, தார்மீக நெறிப்படியும் முறையல்ல' என்று பேசியிருந்தார்.

அதேபோல் டெல்லியில் இருக்கிற தமிழ்ச் சங்கத்தில் பேசும்போது, `பெங்களூரூவில் இருக்கிற திருவள்ளுவர் சிலை கடந்த இருபது ஆண்டுகளாக திறக்கப்படாமல் மூடியே கிடக்கிறது. அந்தச் சிலையைத் திறப்பதில் மேலும் தாமதம் ஏற்படுமேயானால், சிலையை மூடியுள்ள அழுக்குத் துணியையாவது அகற்றுங்கள்' என்று பேசினார்.
அதன் விளைவுதான் இந்த ரயில் மறியல். கூடவே கலைஞருக்கெதிராக அநாகரிக கோஷங்களை எழுப்பினர். இதனை கவனித்த வட்டாள் நாகராஜ் அவர் பங்குக்கு கலைஞர் பேனரை தீயிட்டுக் கொளுத்தி வழக்கம் போலவே போட்டோக்களுக்கு போஸ் கொடுத்துவிட்டு அங்கிருந்து அகன்றிருக்கிறார்.

இந்நிலையில், கர்நாடகா ரட்சண வேதிகேவின் தலைவர் நாராயணகவுடாவிடம் பேசினோம். "கருணாநிதி அரசியல் ஆதாயத்திற்காக கர்நாடக மக்களின் உணர்வைத் தூண்டுகிறார். திருவள்ளுவர் சிலையைத் திறந்து வைக்க வேண்டும் என்கிறார்கள். வேண்டுமானால் சிலையை சென்னையில் வைத்துக் கொள்ளட்டும். அவர் செய்கிற தந்திரத்தால், ஒன்றாக இருக்கும் கர்நாடக மக்களும் தமிழர்களும் வேறுபடுகிறார்கள்.

மக்களைக் குழப்பவே இந்தப் பிரச்னையை அவர் கையில் எடுத்திருக்கிறார். இரு மாநில மக்கள் மனதிலும் விஷத்தைக் கலக்கிறார். எங்களுக்குத் தமிழ் மக்கள் இலக்கு அல்ல. தமிழகத்தை ஆளும் தி.மு.க. தலைவர் கருணாநிதிதான் இலக்கு. அவருக்கெதிராகத்தான் போராட்டங்களை நடத்துகிறோம். கருணாநிதி அரசியல் நடத்துவதற்காக தமிழ், தமிழ் என்று மக்களை ஏமாற்றுகிறார்.

ஒகேனக்கல் பிரச்னையில் கூட அந்தப் பகுதி யாருடையது என்பதில்தான் பிரச்னையைக் கிளப்புகிறோமே தவிர, தமிழ்நாட்டுக்குக் குடிக்கத் தண்ணீர் தரக்கூடாது என்று கர்நாடக ரட்சண வேதிகே அமைப்பு ஒருபோதும் சச்சரவு செய்த தில்லை; இனியும் செய்யாது. அந்த ஒகேனக்கல் நிலப் பரப்பு கர்நாடக மாநிலத்துக்குட்பட்டதா அல்லது தமிழக எல்லையில் வருகிறதா என்று மத்திய அரசு சார்பாக சர்வே செய்ய வேண்டும். இரண்டு மாநிலத் தினரின் முன்னிலையில் மத்திய சர்வேயினர் வந்து அளந்து கொடுக்கட்டும். அவர்கள் எது சரியானது என்கிறார்களோ அதற்குக் கட்டுப்படுகிறோம்'' என்றார்.

அவரைத்தொடர்ந்து கன்னட சலுவாலி கட்சியின் தலைவர் வட்டாள் நாகராஜைத் தொடர்பு கொண்டு பேசினோம். "நீங்க தமிழ்ப் பத்திரிகையாளர். நாங்கள் சொல்வதைக் கேட்கப் போவதில்லை. தமிழ்நாட்டுக்காரர்களுக்கு ஆதரவாகத்தான் எழுதப்போகிறீர்கள். எங்கள் மாநிலத்தில் உள்ள விஷயங்களுக்காக நாங்கள் இப்படிப்பட்ட ஆர்ப்பாட்டங்களைச் செய்ய வேண்டியதாக இருக்கிறது. ஆரம்பம் முதற்கொண்டு கர்நாடக மாநில மக்களின் உரிமைகளுக்காகக் குரல் கொடுப்பவன் நான். அதே மாதிரிதான் தற்போதும் கருணாநிதியின் டெல்லிப் பேச்சுக்கு எதிராக அவரது உருவ பொம்மையை எரித்து எங்களுடைய எதிர்ப்பைத் தெரிவித்துள்ளேன்'' என்றார்.

முதல்வர் கலைஞர் பங்கு பெற்ற டெல்லி தமிழ்ச் சங்க விழாவில் கவிப்பேரரசு வைரமுத்துவும் கலந்துகொண்டு பேசினார். அப்போது அவர், "இந்தக் காரணத்தினால்தான் கடந்த இருபது ஆண்டுகளாக நான் பெங்களூருவுக்கே செல்வதில்லை(!?) புதிதாக உள்துறை அமைச்சர் பதவியை ஏற்றுக்கொண்டிருக்கும் ப.சிதம்பரம் அவர்கள், திறப்பு விழாவைக் காண கடந்த இருபது ஆண்டுகளாக பெங்களூருவில் காத்துக்கிடக்கும் திருவள்ளுவர் சிலையைத் திறக்க முதல் நடவடிக்கை எடுக்க வேண்டும்'' என்கிற கோரிக்கையை முன்வைத்தார். என்ன நடக்கிறதென்று பொறுத்திருந்துதான் பார்க்க வேண்டும்!

------------------------நன்றி:- "குமுதம் ரிப்போர்டர்" 14-12-2008


கருநாடகத்தில் உள்ள அனைத்து அமைப்பினரும் ஒன்றாகச் செயல்படுகிறனர். அவர்களுக்கு எந்த பாதிப்பும் இல்லாதபோது கூட அவர்கள் ஒற்றுமையுடன் ஓரணியில் நின்று குரல் கொடுக்கிறார்கள்.

இங்கு தமிநாட்டிலோ பாதிப்புக்கு மேல் பாதிப்பு வந்தாலும் ஓரணியில் செயல்படாமல் சிதறிக்கிடக்கிறார்கள். ஒரே பிரச்சனைக்கு தனித் தனியாக போராடி ஒற்றுமையை சீர் குலைத்து பாதிப்பை மேலும் பாதிப்புக்குள்ளாக்குவதை பார்த்து வேதனையடைய வேண்டிய நிலையில் உள்ளோம்.


இநிலையை மாற்ற நம்மாலான பங்களிப்பை செலுத்தி அனைவரும் ஓரணியில் திரள ஒவ்வொருவரும் முயற்சிக்க வேண்டும்.