பெரியாரைப் பற்றி ஆச்சாரியாரின் மதிப்பீடு

முக்கியமான தமிழ்நாடு தேச பக்தர்கள் மீது வழக்குத் தொடரப்பெற்று வந்த காலம் 1924 ஜூன். அவ்வாறு வழக்குத் தொடரப்பெற்றவர்களில் பெரியார் ஈ.வெ.இராமசாமி ஒருவர். பம்பாய்க்குச் சென்றிருந்த ராஜாஜி, பெரியார் ஈ.வெ.ராமசாமி மீது தொடர்ந்த வழக்கு விசாரணை அக்டோபர் 18ஆம் தேதியன்று வருகிறது என்பதற்காக, அவசரமாகத் திரும்பி வந்தார். தேவதாஸ் காந்தி மேலும் ஒரு நாள் தங்கியிருந்து விட்டுப்போகுமாறு சொன்னதைக் கூட அவர் ஏற்கவில்லை.

சென்னைக்கு நான் 18ஆம் தேதி போயாக வேண்டும். அன்றுதான் இராமசாமி நாய்க்கரின் வழக்கு இறுதி விசாரணை. அவர் மீது அரசத்துரோகக் குற்றம் சாட்டப்பெற்றிருக்கிறது என்பது உங்களுக்குத் தெரியும். அவருக்கு நீண்ட காலச் சிறைத் தண்டனை கிடைக்கலாம். எங்களுடைய காங்கிரஸ் நடவடிக்கைகளுக்குத் தீவிரம் நிறைந்த தலைவராக (head and active master) அவர் இருந்து வந்திருக்கிறார் என்று ராஜாஜி இரயிலிருந்து 16.10.1924ஆம் தேதி காந்திஜிக்கு எழுதிய கடிதத்தில் குறிப்பிட்டிருக்கிறார்.

--------------நூல்:-"தமிழ்நாட்டில் காந்தி" -பக்கம் 391, 392