பெரியார் விருதுக்கு உரியார் கலைஞரே!

பெரியார் விருதுக்கு முதலமைச்சர் மானமிகு மாண்புமிகு கலைஞர் உரியார் என்பதற்கான காரணத்தை, தந்தை பெரியார் அவர்கள் கூறிய, எழுதியவற்றை எடுத்துக்காட்டி திராவிடர் கழகத் தலைவர் கி. வீரமணி அவர்கள் உரையாற்றினார்.

திருச்சியில் நேற்று (21.9.2008) மாலை தி.மு.க. சார்பில் நடை பெற்ற முப்பெரும் விழாவில் திராவிடர் கழகத் தலைவர் கி. வீரமணி அவர்கள் உரை யாற்றியதாவது:

கலைஞர் அறிவாலயத்தை அற்புதமாக அமைத்து, இன்றைக்கு மாநாடு போல நிகழ்ச்சி களை தமிழகப் போக்குவரத் துத் துறை அமைச்சர் அருமைச் சகோதரர் கே.என். நேரு ஏற்பாடு செய்துள்ளார். பெரியார் விருதை இன்றைக்குத் தலைவர் கலைஞர் பெற்றிருக்கிறார். கலைஞர் அவர்கள் குறித்து நாம் என்ன சொல்கிறோம் என்பதைவிட, பெரியார் என்ன கூறுகிறார் என்பதை நாம் அறிந்து கொள்ள வேண்டும். ஏனென்றால் பழைய வரலாறுகள் இன்றைய இளைஞர்களுக்குத் தெரிந்திருக்க வாய்ப்பில்லை.

நம் சமூகத்தில் ஒரு தவறான மூடநம்பிக்கை இருக்கிறது. அதாவது ஒருவர் உயிருடன் இருக்கும்போது பாராட்டக் கூடாது என்று நினைக்கின்றனர். வாழும் போதும் பாராட்ட தவறுபவர்கள் இச்சமூகத்தில் நிறையவுள்ளனர்.

ஆனால் இன்றைக்கு அதற்கு மாறாகப் பெரியார் விருது பெறும் கலைஞர் அவர்கள், பலராலும் சரியான நேரத்தில் பாராட்டப்படுகிறார். சென்னையில் எப்படி அண்ணா அறிவாலயம் இருக்கிறதோ, அதைப்போல தந்தை பெரியார் தலைமையிடமாகக் கொண்ட திருச்சியில் கலைஞர் அறிவாலயம் எழுப்பப்பட்டுள்ளது. இந்நிலையில் வாழும்போது கலைஞர் அவர்கள் சிறப்பாகப் பாராட்டுப் பெறுகிறார்கள்.

அதேநேரம் எந்தப் பெரியார் விருதை கலைஞர் அவர்கள் பெறுகிறார்களோ, அதே பெரியார் 1967ஆம் ஆண்டு கலைஞர் குறித்து என்ன பேசினார் தெரியுமா?

அறிஞர் அண்ணா ஆட்சியில், கலைஞர் அவர்கள் அப்போது பொதுப்பணித்துறை அமைச்சராக இருந்தார். அப்போது, திட்டக்குடி ஊராட்சி மன்றத்தில் கலைஞர் படத்தினை 12.06.1967இல் பெரியார் திறந்து வைக்கிறார்.

நாங்களெல்லாம் பெரியார் குருகுலத்து மாணவர்கள். அப்படிப்பட்ட மாணவரான கலைஞரின் படத்தைத் தலைவர் பெரியார் திறந்து வைக்கிறார் என்றால், இதிலிருந்தே கலைஞரின் சிறப்புகளை அறிய முடியும்.

இதோ பெரியார் பேசுகிறார், கேளுங்கள்.

ஒருவருடைய படத்தினைத் திறப்பதென்றால் அவரைப் பற்றி அவரது தொண்டுகளைப் பற்றி சிலவற்றைச் சொல்ல வேண்டியது அவசியமும், சம்பிரதாயமும் ஆகும். நண்பர் கருணாநிதி திராவிட முன்னேற்றக் கழகத்தில் உள்ள அறிவாளிகளில் முன்வரிசையில் உள்ள அறிவாளி ஆவார். தி.மு.கழகம் இந்த அளவு பரவுவதற்கு அவரது முயற்சியும், அறிவும்தான் காரணமாகும். அண்ணாதுரை கழகத்தின் தலைவராக இருந்தார்; அவரும் கழகத்தைப் பரப்பினார் என்றாலும், கருணாநிதியின் உழைப்பும், முயற்சியும் இல்லாவிட்டால் கழகத்தின் செல்வாக்கு இந்த அளவு வளர்ந்து இருக்காது. இதைச் சொல்வதால் அண்ணாதுரையை நான் குறைத்துச் சொல்வதாகாது. அண்ணா துரைக்குப் பல வேலை, பல கருத்து! அவர் ஒருவராலேயே கழகத்தை இந்த அளவு பரப்பி இருக்க முடியாது. கருணாநிதி அவர்கள் அண்ணாதுரைக்கு வலது கையாக இருந்து உதவி வந்திருக்கிறார்.

அண்ணாதுரை மிகவும் கெட்டிக்காரர்தான், ஆனால் கருணாநிதிக்கு இருக்கிற முன் யோசனை அவருக்குக் கிடையாது. நண்பர் இளம்வழுதி சொன்னது போல, பள்ளிக் கூடத்தை விட்டதும் என்னிடம் நேராக வந்தார். எனக்கு பொதுத்தொண்டு செய்ய ஆவலாக இருக்கிறது என்று கூறினார். நானும், என்னிடம் எத்தனையோ பேர் இருக்கிறார்கள் நீங்களும் இருங்கள் என்று சொன்னேன். எனது வீட்டிலேயே இருந்தார் குடிஅரசு அலுவலகத்திற்குப் போய் வந்துகொண்டிருந்தார். பிறகு எழுதவும், மேடையில் பேசவும் ஆரம்பித்தார். நல்ல கருத்தாளர் ஆனார். எழுச்சியுள்ளவரானார். வர வர நல்ல கருத்து பிடிபட்டது. பிரசாரக் கலையும் பிடிபட்டது.

பின்னர் எங்களை விட்டு விலகினாலும் அண்ணாதுரைக் கூறாமல், அவர்தான் எங்கள் தலைவர், அவரது கொள்கைதான் எங்களுக்கும் என்று சொல்லி நல்ல அளவு மக்களிடையே செல்வாக்குப் பெற்றுவிட்டனர்.

அண்ணாதுரையாவது, கருணாநிதியாவது என்னைக் குறிப்பிட்டு என் காரியத்தைக் குறிப்பிட்டு இதுவரை ஒரு சிறு குறைகூட கூறியது கிடையாது. இன்றைக்கும் அண்ணாதுரை என் தலைவர் பெரியார்தான் என்று கூறுகிறார்.

அதேபோல் கருணாநிதியும், என்னை எங்கு கண்டாலும் செல்லப்பிள்ளை மாதிரி நெருங்கி, மிக உரிமையோடு உரையாடுவார். இன்னமும் தி.மு.கவுக்கு கருணாநிதியின் தொண்டு பயன்படத் தக்கதாகும். அவரது தொண்டும், முயற்சியும் பிறர் கடைப்பிடிக்க வேண்டியதாகும் என அவரது படத்தைத் திறந்து வைத்துப் பாராட்டினார்.

அதேபோல் 03.06.1972 இல் இன்றைய முதல்வர் கலைஞர், அன்றைக்கும் முதல்வராக இருக்கிறார். அப்போது கலைஞரின் வயது 43. அவரைத் தந்தை பெரியார் எப்படி வாழ்த்தினார் தெரியுமா?

பெரியார் விருதுக்கு உரியார் இவரை விட்டால் பிறர் யார்? என்பதை இக் கடிதம் பறைசாற்றும்.

இதோ படிக்கிறேன், கேளுங்கள்!

மாண்புமிகு கலைஞர் டாக்டர் கருணாநிதி அவர்களுக்கு 49ஆவது ஆண்டு பிறந்தநாள் விழா நடப்பது குறித்து நான் மிகுதியும் மகிழ்ச்சியடைகிறேன்.

டாக்டர் அவர்களது வாழ்நாள் ஒவ்வொன்றும் மக்கள் நலம் பற்றி சிந்திப்பதிலும், தொண்டாற்றுவதிலுமே நடந்த கழிவதை நான் மனப்பூர்வமாக உணர்கிறேன். மனம் பூரித்து திருப்தி அடைந்து வருகிறேன். டாக்டர் செய்து வருகிற காரியங்கள் பெரிதும் மற்றவர் சிந்திக்கக்கூட பயப்படும்படியான காரியங்கள் என்பதோடு அவைகளை வெகு எளிதிலே செய்தி முடித்துவிடுகிறார்.

இதன் பயனாகவே அரசியல் உலகில் அவருக்கு எதிர்ப்பாளர்கள் அதிகமாகி வருகிறார்கள். காரணம் டாக்டர் அவர்களது ஆட்சி நீண்ட நாளைக்கு நிலைத்து விடுமோ என்கின்ற பொறாமையும், வேதனையும்தான் என்றாலும் டாக்டர் அவர்கள் யாருடைய எதிர்ப்புக்கும் பயப்படாமல் எப்படிப்பட்ட தொல்லைக்கும் சளைக்காமல் துணிந்து காரியமாற்றி வருகிறார். பொதுவாகவே சமுதாயத்துறையில் சீர்திருத்தத் தொண்டு ஆற்றினால் யாருக்கும் சுயநலக்காரருடையவும், பழைமை விரும்பிகளினுடையவும் எதிர்ப்பு ஏற்பட்டுத்தான் தீரும். கலைஞர் டாக்டர் அவர்களுடைய புரட்சிகரமான தொண்டுக்கு எதிர்ப்பும், தொல்லையும் ஏற்படுவது அதிசயமல்ல. அவற்றைப்பற்றி சிறிதும் இலட்சியம் செய்யாமல் துணிந்து தொண்டாற்றி வரும் டாக்டர் அவர்களை மனதாரப் பாராட்டி அவர் வாழ்வு எல்லையற்று நீண்டு மக்களுக்கு புதிய உலகம் ஏற்படவேண்டுமென்று ஆசைப்படுகிறேன்.
என அற்புதமாக பெரியார் குறிப்பிடுகிறார்.

பெரியார் விருது பெற கலைஞர் அவர்களுக்கு முழு சிறப்பும் உண்டு என்பதைப் பெரியார் பேச்சுகளே நமக்கு உணர்த்துகின்றன. அதேபோல் இளைஞர்களின் நம்பிக்கை நட்சத்திரம் மு.க. ஸ்டாலின் அவர்களுக்கு, கலைஞர் விருது வழங்குவது மிகவும் பொருத்தமாகும். மு.க.ஸ்டாலின் எப்போதுமே எதிர்ப்புகளைக் கண்டு அஞ்சாதவர். மிசாவின் போது சிறையில் அடைக்கப்பட்டிருந்த ஸ்டாலினை, அவரின் உறுதியை, திறமையை நான் நேரில் கண்டிருக்கிறேன்.

அதேபோன்று ஆர்க்காடு வீராசாமி அவர்களுக்கு அண்ணா விருதும், துரைமுருகன் அவர்களுக்குப் பாவேந்தர் பாரதிதாசன் விருதும் வழங்கப்பட்டு, சிறப்புச் செய்வது சாலப் பொருத்தமாகும். சென்னையில் அண்ணா அறிவாலயம் போல, திருச்சியில் கலைஞர் அறிவாலயம் பெரும் வரலாறாய் நிமிர்ந்து நிற்கிறது. நீங்கள் தி.மு.கழகத்தைப் பாதுகாக்கின்ற வாளாக இருங்கள். நாங்கள் அதைக் காக்கின்ற கேடயமாக இருப்போம் என்று திராவிடர் கழகத் தலைவர் கி. வீரமணி அவர்கள் பேசினார்.

--------------------------நன்றி: "விடுதலை" 22-9-2008