தேர்தல் வெற்றி தோல்வி கலைஞரிடம் பாதிப்பை ஏற்படுத்தாது அவர் மானமிகு சுயமரியாதைக்காரர்!

தேர்தல் வெற்றி தோல்வி கலைஞரிடம் பாதிப்பை ஏற்படுத்தாது

தேர்தல் வெற்றி தோல்வி கலைஞரிடம் பாதிப்பை ஏற்படுத்தாது
அவர் மானமிகு சுயமரியாதைக்காரர்!
தண்டையார்ப்பேட்டையில் தமிழர் தலைவர் முழக்கம்

- நமது சிறப்புச் செய்தியாளர்

சென்னை, ஜூன் 19- முத்தமிழ் அறிஞர் கலைஞர் மானமிகு சுயமரியாதைக்காரர், வெறும் தேர்தல் வெற்றி - தோல்வி அவரைப் பாதிக்காது என்றார் திராவிடர் கழகத் தலைவர் கி.வீரமணி அவர்கள்.

தி.மு.க. தலைவர் முத்தமிழ் அறிஞர் மானமிகு கலைஞர் அவர்களின் பிறந்த நாள் விழா இவ்வாண்டு வெகு எழுச்சியோடு நடைபெற்று வருகிறது.

91 ஆம் ஆண்டில் கலைஞர்

91 ஆம் ஆண்டில் ஜூன் 3 இல் அடியெடுத்து வைத் தார். நடைபெற்ற 16 ஆவது மக்களவைத் தேர்தல் தி.மு.க. வுக்கு அதிர்ச்சி தரத்தக்க தோல்வியாக அமைந்த நிலையில், தலைவரின் பிறந்த நாள் அதனைத் தூக்கி நிறுத்திய அதிசயம் தமிழ்நாட்டில் நடந்திருக்கிறது.

வேறு ஒரு கட்சியாக இருந்தால், அது துவண்டு போயி ருக்கும். தி.மு.க.வுக்கு உள்ள அடிக்கட்டுமானமும், தொண் டர்களின் பலமும், அரசியல் கட்சியாக இருந்தாலும் அதற் கென்றுள்ள சமுதாயக் கொள்கையும், சமூகநீதித் தத்துவ மும்தான் தோல்விகளைத் துச்சமாகத் தூக்கி எறியச் செய்திருக்கிறது. வடசென்னையில் சேணியம்மன் கோவில் தெருவில் சட்டமன்ற முன்னாள் உறுப்பினர் பி.கே.சேகர் பாபு அவர்களால் முன்னின்று நடத்தப்பட்ட கட்சித் தலை வரின் விழா உண்மையிலேயே வித்தியாசமாக அமைந்தது.

ஆக்கப்பூர்வமான விழா!

ஆர்ப்பாட்டம், வாணவேடிக்கை, மின் அலங்காரம், மிகப்பெரிய சுவரொட்டிகள் இவைதான் விழாவுக்கான அடையாளம் என்ற மனப்பான்மையை மாற்றிக் காட்டி விட்டது இவ்விழா.

391 பெண்களுக்கு இலவசப் பயிற்சி

391 பெண்களுக்குத் தொழில் முனைவோர் பயிற்சி அளிக்கும் தொடக்க விழாவாக, இது அமைந்திருந்தது தனித்தன்மையானதாகும்.

தையல் பயிற்சி, அழகு கலைப் பயிற்சி, கணினிப் பயிற்சி என்ற மூன்று முத்தான பயிற்சிகள் 391 பெண்களுக்கு இல வசமாக அளிக்கும் ஏற்பாடு என்றால், என்ன சாதாரணமா?

ஒரு நாள் வாணவேடிக்கையுடன் முடிந்துவிடாமல் ஆறு மாதப் பயிற்சிக்குப்பின் தன் கையில் ஒரு தொழில் இருக்கிறது என்ற பக்கபலத்துடன் பெண்கள் தலைநிமிர்ந்து நடந்து செல்லும் ஒரு தைரியத்தையூட்டும் நிகழ்ச்சி என்றால், மிகையாகாது.

நாட்கள் 10; நிகழ்ச்சிகள் 16

கலைஞர் அவர்களின் பிறந்த நாள் 10 நாள்கள் - அதில் 16 தொடர் நிகழ்ச்சிகள் வடசென்னையில் என்றாலும், நேற்று நடைபெற்ற நிகழ்ச்சியின் கருப்பொருளும், உள் ளடக்கமும் உன்னதமானது -  தொலைநோக்குச் சிந்தனை யானதாகும்!

391 பெண்களுக்குத் தொழில் முனைவோர் இலவசப் பயிற்சியினைத் தொடங்கி வைக்க திராவிடர் கழகத் தலைவர் மானமிகு கி.வீரமணி அவர்களை ஏன் அழைத்தார் கள்? என்பதற்கான காரணத்தை மாசில்லா மா.சுப்பிரமணி யம் என்று அன்போடு அழைக்கப்படுபவரும், சென்னை மாநகர மதிப்புறு முன்னாள் மேயரும், தி.மு.க. இளைஞரணியின் மாநிலத் துணைச் செயலாளருமான மானமிகு மா.சுப்பிர மணியம் அவர்கள் மிக அழகாகக் குறிப்பிட்டார்.

தந்தை பெரியார் அவர்களின் கொள்கை என்று வரும்பொழுது அதில் பெண்ணுரிமைக்கு முன்னுரிமை உண்டல்லவா! அதனால்தான் அந்தத் தாய்க் கழகத்தின் தலைவரை அழைத்திருக்கிறோம் என்று பொருத்தமாகச் சொன்னார். இந்த விழாவில் ஆண்களைவிட பெண்களின் எண்ணிக்கைதான் பெரிய அளவில் இருந்தது.

அதனையே முன்னிறுத்தி திராவிடர் கழகத் தலைவர் தன் உரையை தொடங்கினார்.

கண்ணுக்கு எட்டியவரை பெண்களாகக் காட்சி அளிக் கிறீர்கள். நாற்காலிகளை எல்லாம் பெண்களாகிய நீங்கள் ஆக்கிரமித்துக் கொண்டுவிட்டீர்கள்.

பெரியாரின் சாதனையல்லவா!

இங்கே ஆண்கள் நின்று கொண்டு இருக்கிறார்கள். பெண்கள் நாற்காலிகளில் அமர்ந்துகொண்டு இருக் கிறீர்கள். பெண்கள் வர வர ஏற்கெனவே நாற்காலியில் உட்கார்ந்திருந்த ஆண்கள் எழுந்திருந்து பெண்களுக்கு நாற்காலிகளை விட்டுக் கொடுத்து நிற்கிறார்கள்!

ஒரு அய்ம்பது, அறுபது ஆண்டுகளுக்கு முன் இதனை நினைத்துப் பார்க்க முடியுமா? ஆண்கள் எதிரில் பெண்கள் உட்கார்ந்திட முடியுமா?

இன்றைக்கு இந்த மாற்றம் வந்தது எப்படி? அதற்குக் காரணம் யார்? பாடுபட்டவர்கள் யார்? என்பதை ஒரு கணம் எண்ணிப் பார்க்க வேண்டும்.

தந்தை பெரியாரும், சுயமரியாதை இயக்கமும், திராவிட இயக்கமும் அல்லவா இந்த மாற்றத்திற்குக் காரணம்!

1929 செங்கற்பட்டு மாநாட்டுத் தீர்மானம்

1929 ஆம் ஆண்டிலேயே செங்கற்பட்டில் நடைபெற்ற சென்னை மாகாண முதல் சுயமரியாதை மாநாட்டில் பெண்களுக்குச் சொத்துரிமை தேவை என்ற தீர்மானம் நிறைவேற்றப்பட்டது. அதற்குமுன் அப்படி ஒரு குரல் யாராவது கொடுத்தார்கள் என்று சொல்ல முடியுமா?

1929 இல் தந்தை பெரியார் தீர்மானம் நிறைவேற்றினார் என்றால், அவர் சீடர் கலைஞர் முதலமைச்சராக வந்து 1989 இல் பெண்களுக்குச் சொத்துரிமை சட்டத்தை நிறைவேற்றினார் என்று குறிப்பிட்டார் திராவிடர் கழகத் தலைவர்,

(இந்த இடத்திலே நினைவூட்டத்தக்கது. 1989 மே 6 இல் ஆண்களுக்கு நிகராக பெண்களுக்குச் சொத்துரிமை வழங்கிய சட்டத்தை நிறைவேற்றிக் கொடுத்தபோது, செங்கற்பட்டு மாநாட்டைப்பற்றியும், அதில் நிறைவேற்றப் பட்ட தீர்மானத்தையும் விளக்கிக் கூறியதோடு, மறக்காமல் நன்றி உணர்வின் வெளிப்பாடாக முதலமைச்சர் கலைஞர் என்ன சொன்னார் தெரியுமா?

இந்தச் சட்டம் நிறைவேறுகிற இந்த நேரத்தில், இதற்கு அடிகோலிய பழம்பெரும் தலைவர்கள் அத்தனைப் பேருக்கும் இந்தத் தீர்மானங்கள் செங்கற்பட்டு சுயமரி யாதை மாநாட்டிலே அன்றைக்கு முன்மொழிந்த சபாபதி முதலியார், இன்று இல்லை என்றாலுங்கூட, அவர்களு டைய திக்கு நோக்கி, தெண்டனிட்டு, வணக்கம் தெரிவித்து, அந்தச் சுயமரியாதை மாநாட்டுக்கு அடிகோலிய தந்தை பெரியார் அவர்கள் வாழ்க! அவருடைய வழித் தோன்றல் பேரறிஞர் அண்ணா அவர்கள் வாழ்க, வாழ்க! என்றுகூறி, இந்தச் சட்டத்தை நிறைவேற்றித் தரவேண்டுமென்று கேட்டுக்கொள்கிறேன் என்றாரே, அது என்ன சாதாரணமா?)

கலைஞரின் நகைச்சுவை

 

கலைஞர் அவர்களிடம் இயல்பாகவே அமைந்துள்ளது நகைச்சுவையாகும். எந்த நிலையிலும் அந்த உணர்வை அவர் வெளிப்படுத்தக் கூடியவர்.

மருத்துவமனையில் முதுகுத் தண்டுவடத்தில் மிகப்பெரிய அறுவைச் சிகிச்சை நடந்தது. மயக்கம் தெளியவில்லை. கலைஞரைக் கவனித்துக் கொள்ள மூத்த செவிலியரை ஏற்பாடு செய்திருந்தார்கள். 

கலைஞர் மயக்கம் தெளிந்து, கண் விழித்தவுடன், தாக உணர்வு அதிகமாக இருக்கும் இதுபோன்ற அறுவை சிகிச்சை செய்துகொண்டவர்களுக்கு. அந்த நிலை ஏற்படும். அப்பொழுது அதிகமாக தண்ணீரைக் கொடுத்துவிடக் கூடாது என்று அறிவுரை கூறியிருந்தனர் அறுவை சிகிச்சை செய்த மருத்துவர்கள்.

அதுபோலவே, மயக்கம் தெளிந்து, கண் விழித்தபோது கலைஞர் அவர்கள் செவிலியரை அழைத்துத் தண்ணீர் கேட்டுள்ளார். அந்தச் செவிலியர் என்ன செய்தார்? தண்ணீரில் பஞ்சை நனைத்து, நாக்கில் தடவியுள்ளார். மறுபடியும் தண்ணீர் கேட்டபோது முன்பு செய்ததுபோலவே செய்திருக்கிறார் அந்தச் செவிலியர். அந்த நிலையிலும் கலைஞர் அந்தச் செவிலியரைப் பார்த்து, ஏனம்மா - உன் பெயர் காவேரியா? என்று கேட்டு இருக்கிறார். அந்தப் பெண்ணுக்கு ஒன்றும் புரியவில்லை. என் பெயர் காவிரி இல்லை அய்யா என்று சொல்லியிருக்கிறார்.

கடுமையான அறுவை சிகிச்சை நடந்த நிலையிலும்கூட அவரிடம் உள்ள அந்த நகைச்சுவை உணர்ச்சி அதுவும் நாட்டு நலனோடு கலந்த நகைச்சுவை குன்றிடவில்லை. நகைச்சுவை உணர்வு ஒவ்வொரு மனிதனுக்கும் அவசியம்; கலைஞர் அவர்கள் 91 வயது என்றாலும், அதனைத் திருப்பிப் போட்டால் 19 - என்கிற அளவுக்குத் துடிப்போடு இருப்பதற்கான காரணங்களுள் ஒன்று அந்த நகைச்சவை உணர்வாகும்.

- கலைஞர் விழாவில், திராவிடர் கழகத் தலைவர், 18.6.2014

மேலும் கழகத் தலைவர் குறிப்பிட்டதாவது:

தமிழ்நாட்டில் தி.மு.க. ஆட்சியில் இந்தச் சட்டம் நிறைவேற்றப்பட்டதற்குப் பிறகுதான் நாடாளுமன்றத்தில் கூட பெண்களுக்குச் சொத்துரிமை வழங்கும் சட்டம் நிறைவேற்றப்பட்டது என்பதுதான் உண்மை வரலாறு!

சொந்தக்காலில் நிற்கவேண்டும் பெண்கள்

ஒரு வீட்டில் நான்கு குழந்தைகள் இருந்தால், முதலில் பெண் குழந்தையைப் படிக்க வையுங்கள் என்றார் பெரியார். பெண்கள் சொந்தக்காலில் நிற்கவேண்டும் - வருவாய் ஈட்டவேண்டும் என்று சொன்னவரும் பெரியாரே!

இன்றைக்கு நமது சேகர் பாபு அவர்கள் பெண்களுக் காக ஏற்பாடு செய்துள்ள தொழில் முனைவோர் பயிற்சி என்பது தந்தை பெரியார் அவர்களின் கொள்கைக்கு உகந்த ஒன்றே!

பெண்மையைப் போற்றுவோம் - பேதமை நீக்குவோம்! என்று அழைப்பிதழிலே கருத்துச் செறிவான வாசகத்தை அச்சிட்டுள்ளனர்.

பேதமில்லாப் பெருவாழ்வு என்றார் தந்தை பெரியார்; இந்து வருணாசிரமத் தன்மைப்படி நம் நாட்டுப் பெண்கள் பிராமண, சத்திரிய, வைசிய, சூத்திரர், பஞ்சமர்களுக்கும்கீழ் நிறுத்தப்பட்டவர்கள்தான் நம் நாட்டுப் பெண்கள்.

அப்படி உரிமை மறுக்கப்பட்ட, இழிவுபடுத்தப்பட்ட மக்களைத் தூக்கி நிறுத்துவதும், உரிமையைப் பெற்றுத் தருவதும்தான் சுயமரியாதை இயக்கம் - திராவிடர் கழகம்.

அந்த இயக்கத்தின் வழிவந்தவர்களாகிய நாம் பிறந்த நாள் விழா கொண்டாடிக் கொண்டு இருக்கிறோமே முத்தமிழ் அறிஞர் கலைஞர் அவர்களுக்கு!

ஒரு வார இதழ் கலைஞரைப் பேட்டி கண்டது.

உங்களைப் பற்றி நீங்கள் ஒரு வரியில் சுய விமர்சனம் செய்யுங்களேன் என்பது கேள்வி.

கலைஞர் அவர்களின் பதில் என்ன தெரியுமா?

பொத்தானைத் தட்டினால் கணினியிலிருந்து வெளிவருவது போன்ற பதில் அது.

மானமிகு சுயமரியாதைக்காரன்! என்பதுதான் அந்தப் பதில். இந்த ஒரே வரியில்தான் முழுக் கலைஞரும் ஒளிர்கிறார்.

இந்த நிலையுடைய கலைஞரை வெறும் தேர்தல் தோல்வி பாதிப்பை ஏற்படுத்த முடியுமா? என்ற வினாவை எழுப்பினார்.

(கலைஞர் அவர்களே, பின்வருமாறு கூறுகிறார்:

நாம் எதிர்பார்க்கின்ற தேர்தல் சிம்மாசனத்தில் அமர்வதல்ல. இவைகளையெல்லாம் விடப் பெரியது சமுதாயத்தை எழுச்சியுள்ளதாக ஆக்குவது. தமிழன் தமிழனாக வாழ்கிறான் என்ற நிலையை அவனிக்கு எடுத்துக்காட்டுவதுதான் நாம் வெற்றி பெறவேண்டிய தேர்தல் என்பதை மறந்துவிடாமல்,  நீங்கள் பணியாற்றவேண்டுமென்று கேட்டுக்கொள்கிறேன் - என்று 2.6.2008 இல் சென்னையில் நடைபெற்ற தி.மு.க. பொதுக்குழுவில் கலைஞர் அவர்கள் குறிப்பிட்டுள்ளார் என்பது குறிப்பிடத்தக்கது - திராவிடர் கழகத் தலைவர் கூறிய கருத்தினை இத்துடன் ஒப்பிட்டுப் பார்த்துக் கொள்வது பொருத்தமானது).

மேலும் திராவிடர் கழகத் தலைவர் சுட்டிக்காட்டியது,

கலைஞருக்குப் பிறந்த நாள் விழா என்பது அவருக்குப் புதிதாகப் பெருமை சேர்ப்பதற்காக அல்ல.

இத்தகு விழாமூலம் அவர் கடைப்பிடித்துவரும் கொள்கைகளை மக்கள் மத்தியில் எடுத்துச் சொல்ல - நம் மக்கள் - நம் இளைஞர்கள் எழுச்சி பெறுவதற்காகவே தான்.

பதவிக்கும் - தொண்டுக்கும் சம்பந்தம் கிடையாது

பதவியில் இருந்தால்தான் தொண்டு செய்ய முடியும் என்று கருதத் தேவையில்லை. இன்னும் சொல்லப்போனால், நாம் நினைக்கிற - விரும்புகிற தொண்டினைச் செய்ய சில நேரங்களில் பதவிகள் தான் தடையாகக் கூட இருக்கும்.

இங்கே பெண்களுக்குத் தொழில் முனைவோர் பயிற்சி அளிக்கும் திட்டத்தைத் தொடங்கியுள்ளார் நமது சேகர்பாபு என்றால், பதவியில் இல்லாத நிலையில்தானே!

ஜெர்மனியில் நமது கொள்கைப் பிரச்சாரம்

ஒவ்வொரு ஆண்டும் கலைஞர் அவர்களின் பிறந்த நாள் விழாவில் நான் கலந்துகொண்டுதான் வந்திருக்கிறேன். இவ்வாண்டு நான் இருக்க முடியாத நிலை - ஜெர்மனியில் உள்ள பல்கலைக் கழகங்களின் அழைப்பை ஏற்றுச் சென்றிருந்தேன். சுற்றுலாவுக்காகச் செல்லவில்லை; தந்தை பெரியாரின் தத்துவம், திராவிடர் இயக்கச் சாதனைகள், கொள்கைகள்பற்றியும், அங்குள்ள பல்கலைக் கழகங்களில் சிறப்புரையாற்றினேன்.

கலைஞர் பிறந்த நாள் அன்று அங்கு அவரைப்பற்றிப் பேசினேன். அவருடைய நகைச்சுவை உணர்வுகளை எடுத்துக்காட்டியபொழுது அவர்கள் எல்லாம் மகிழ்ச்சி அடைந்தார்கள்.

கலைஞர் அவர்களுடைய இந்தப் பிறந்த நாளை ஆக்கப்பூர்வமான செயல்பாடாக ஆக்கி இருப்பது பாராட்டுக்குரியது.

அதற்காக நமது சேகர்பாபு அவர்களையும், அவருக்கு ஒத்துழைத்த கழகத் தோழர்களையும் பாராட்டுகிறேன்.

தேர்தல் வெற்றியை விட வாழ்க்கையில் நமது கொள்கையில் வெற்றி பெறவேண்டும் - அதுதான் முக்கியம் என்று கூறினார் திராவிடர் கழகத் தலைவர்.

நிகழ்ச்சி

தி.மு.க. தலைவர் - முத்தமிழ் அறிஞர் கலைஞர் அவர் களின் 91 ஆம் ஆண்டு பிறந்த நாள் விழா வடசென்னை - தண்டையார்ப்பேட்டை ஆர்.கே.நகர் சேணியம்மன் கோவில் தெருவில் நேற்று (18.6.2014) மாலை 6 மணிக்குச் சிறப்புடன் நடைபெற்றது.

391 பெண்களுக்குத் தொழில் முனைவோர் பயிற்சி (தையல் பயிற்சி, அழகுக் கலைப் பயிற்சி, கணினிப் பயிற்சிகள்) தொடக்க விழாவாக எழிலுடன் நடைபெற்றது. அவற்றைத் தொடங்கி வைத்து சிறப்புரை ஆற்றுவதற்காக திராவிடர் கழகத் தலைவர் கி.வீரமணி அவர்கள் அழைக்கப்பட்டு இருந்தார்.

விழாவிற்குப் பல வகைகளிலும் உதவி புரிந்த தோழர்கள் அனைவருக்கும் விழாக் குழுவின் சார்பில் தமிழர் தலைவர் பயனாடை அணிவித்துப் பாராட்டினார்.

திராவிடர் கழகத் துணைத் தலைவர் கவிஞர் கலி. பூங்குன்றன், வடசென்னை மாவட்ட திராவிடர் கழக செயலாளர் எண்ணூர் மோகன், ஏழுகிணறு கோ.கதிரவன் மற்றும் கழகத் தோழர்கள் வந்திருந்தனர்.

பயிற்சி நடக்கும் இடத்தையும், பயிற்சிகளுக்கான ஏற்பாடுகளையும் தமிழர் தலைவர் பார்த்துப் பாராட்டினார். இரவு 8.30 மணிக்கு விழா நிறைவுற்றது.
தி.மு.க. கழக வட்ட செயலாளர் ப.குமார் தலைமை வகித்தார். பொதுக்குழு உறுப்பினர் பார்வதி நாராயணசாமி, செங்கை சண்முகம், ந.மனோகரன், மா.நெடுமாறன், சட்டமன்ற முன்னாள் உறுப்பினர்கள் இரா.மதிவாணன், செங்கை சிவம், சேகர்பாபு ஆகியோர் உரையாற்றிய பின், பெண்களுக்கான தொழில் முனைவோர் பயிற்சியைத் தொடங்கி வைத்து திராவிடர் கழகத் தலைவர் கி.வீரமணி சிறப்புரையாற்றினார்.

சேகர் பாபு அல்ல - சேவை பாபு

நண்பர் சேகர் பாபு என்று கூறுவதைவிட சேவை பாபு என்று சொல்லும் அளவுக்கு அவரின் செயல்பாடுகள் அமைந்துள்ளன.

தொடர்ந்து 10 நாள்கள் கலைஞர் விழாவைச் சிறப்புடன் நடத்தி வருகிறார். ஆக்கப்பூர்வமாகவும் நடத்துகிறார்.

இந்த அழைப்பிதழில் இடம்பெற்றுள்ளவர்களின் பட்டியலைப் பார்த்தேன், எண்ணியும் பார்த்தேன் - 300 பேர்கள் இடம்பெற்றுள்ளனர். கழகத்துக்காகப் பாடுபடும் தோழர்களை மறக்காமல் பதிவு செய்துள்ளார். தொண்டர்களை மதித்தால்தான் நம் தொண்டுக்கும் மரியாதை என்பதை நன்கு உணர்ந்தவர் சேகர்பாபு. ஓர் அருமையான கருத்தினை அவர் எடுத்துச் சொன்னார். பேச்சு எப்பொழுது தேவைப்படுகிறது என்றால், நமது செயல்பாட்டை விளக்கவே என்றாரே - மிகச் சிறப்பான கருத்து - வெறும் பேச்சு செயலாகாது - செயல் இருக்கும் இடத்தில் இருக்கும் பேச்சுதான் முக்கியம். அதற்கொரு எடுத்துக்காட்டுதான் நமது சேகர் பாபு என்ற சேவை பாபு.

- சேணியம்மன் கோவில் தெரு கூட்டத்தில் தமிழர் தலைவர்

---

அச்சம், மடம், நாணம், பயிர்ப்பு என்றால் என்ன?

நம் பெண்களுக்கு இலக்கணம் சொன்னவர்கள் எதைச் சொல்லி வைத்தார்கள்? அச்சம், மடம், நாணம், பயிர்ப்பு என்று சொன்னார்கள். பெண் என்றால், அச்சப்பட்டுக் கொண்டுதான் இருக்கவேண்டுமாம்! அடங்கி ஒடுங்கிக் கிடக்கவேண்டும் என்ற பொருளில்தான் அதனை முதலில் வைத்தார்கள். அடுத்தது மடம் என்ற சொல்லுக்குப் பல பொருள் உண்டு. என்றாலும், மடமை, அறியாமை என்றும் சொல்லி வைத்துள்ளனர்.

அடுத்து நாணம் - எதற்கெடுத்தாலும் பெண்கள் வெட்கப்பட்டுக் கொண்டே வெளியில் வராமல் முடங்கிக் கிடக்கவேண்டும்.

நான்காவது பயிர்ப்பு! அந்தச் சொல்லுக்கு என்ன பொருள் என்று தெரியாமலேயே சொல்லிக் கொண்டிருக்கிறோம்! பயிர்ப்பு என்றால், அகராதி என்ன சொல்லுகிறது?

அசுத்தம், அருவருப்பு, குற்சிதம் இதுதான் பயிர்ப்பு என்பதற்கான பொருள்.
குற்சிதம் என்றாலும் இதே பொருள்தான்.

பெண் என்பவர் அசுத்தமாக இருக்கவேண்டுமா?

அருவருப்பாகத்தான் இருக்கவேண்டுமா?

இங்கே நமது சேகர்பாபு அவர்கள் அழகுக் கலை பயிற்சியை ஏற்பாடு செய்துள்ளார்.

பெண் என்றால் அவருவருப்பாக இருக்கவேண்டும் என்பதற்கு எதிரானது இது. அந்த வகையிலும் வரவேற்கத்தக்கது. இப்பொழுதெல்லாம் திருமண வரவேற்பு மாலை 6 மணி என்று அழைப்பிதழில் போட்டியிருந்தாலும், 6 மணிக்குச் சென்றால் மணமகன் இருப்பார், மணமகள் இருக்கமாட்டார். கேட்டால், பியூட்டி பார்லருக்குச் சென்றுள்ளதாகக் கூறுவார்கள். அந்த அளவுக்கு இந்தக் கலை முக்கியத்துவம் பெற்றுள்ளது. வருவாய் ஈட்டக்கூடிய ஒரு தொழிலாக வளர்ந்துள்ளது.

கணினிப் பயிற்சியும் இங்குத் தொடங்கப்படுகிறது. இன்றைக்குக் கணினிதான் உலகம் என்றாகிவிட்டது. பெண்கள் சமைக்கவேண்டும் என்றாலும், அதற்கும் கணினியில் இடம் உண்டு. எந்தக் குழம்பு வைப்பது - எந்தக் கறி சமைப்பது என்று முடிவு செய்வது என்பதைக் கணினியைத் தட்டினால் விவரங்கள் கிடைக்கின்றன.

உப்பு எவ்வளவு? கடுகு எவ்வளவு? மிளகு எவ்வளவு? என்று அளவுவரை தகவல்களைக் கூறும் வேலையைக் கணினி எடுத்துக்கொண்டு இருக்கிறது. பெண்கள் என்றால் கூலியில்லாத சமையற்காரர்கள் என்ற பத்தாம் பசலித்தனத்துக்கு விடை கொடுக்கிறது இத்தகைய பயிற்சிகள்.

பெண்களுக்குக் கொடுக்கப்படும் இந்தப் பயிற்சிகளுக்கு எங்களது பெரியார் மணியம்மை பல்கலைக் கழகமோ, பெரியார் நூற்றாண்டு நினைவுப் பாலிடெக்னிக்கோ, சமுதாயப் பாலிடெக்னிக்கோ எந்த வகையில் உங்களுக்கு உதவலாம் என்று சம்பந்தப்பட்ட வர்களுடன் கலந்து பேசி, வேண்டிய உதவிகளைச் செய்யத் தயாராக இருக்கிறோம் (பலத்த கைதட்டல்).

கலைஞர் பிறந்த நாள் விழாவில், தமிழர் தலைவர்

                        “விடுதலை ” 19-06-2014

Read more: http://viduthalai.in/e-paper/82444.html#ixzz355n7CRev