"பெரியாருக்கு சிலை ஏன்? மாலை ஏன்? ----இஸ்லாமிய தோழர்களுக்கு பதில் -- 2"

அபு அய்யா அவர்களுக்கு வணக்கம்.

தங்களின் பின்னூட்டத்தை பார்த்தேன். நீங்கள் கேட்ட கேள்விக்கும்,தற்போது எழுப்பிய கேள்விக்கும் ஏற்கனவே பெரியாரைக் கொண்டு விடையளித்துவிட்டேன். திரும்பவும் அதே கேள்வியை கேட்டுள்ளீர்கள். அது இதோ"

"சிலை வடிப்பது எந்த அளவுக்கு மடமையோ அது போன்ற, அதையும் மிஞ்சுகின்ற மடமைதான் சிலைகளுக்கு மாலை அணிவிப்பது.

பெரியாரின் பெயரால் மூடத்தனமாக நிறுவப்பட்ட ஒரு சிலைக்கு இவர்கள் மாலை அணிவிக்கிறார்களே இந்த மாலை அணிவிப்பதை அந்தச் சிலை உணருமா? அல்லது அந்தச் சிலையின் மூலம் யாரை நினைக்கிறார்களோ அந்தப் பெரியார்தான் இதை உணருவாரா?

பெரியார் கூறியதாக நீங்கள் அளித்த பதில்

//இந்த ஊரில் எனக்குச் சிலை வைத்தார்கள் என்றால் இந்தச் சிலை என்ன மணியடிக்கிற சிலை இல்லை, பூசை செய்கிற சிலை இல்லை, கடவுள் இல்லை என்று சொல்கின்றவன் சிலை. இந்தச் சிலை ராமசாமியின் சிலையில்லை - கடவுளைக் கற்பித்தவன் முட்டாள், கடவுளைத் தொழுகிறவன் காட்டுமிராண்டி என்று சொல்லுபவனுடைய சிலையாகும். கடவுள் உண்டு என்பவர்களுக்கு இல்லை என்பதைக் காட்டுவதற்காக இது அமைக்கப்பட்டதாகும். இந்த ஆட்சி இன்னும் 10 வருஷம் இருந்தால் கோயில்களை எல்லாம் அவர்களாகவே இடித்து விடுவார்கள்.//


நீங்கள் அளித்த இதே பதிலைக் கூறி ஒரு இந்து நண்பர் தன் செயலை இவ்வாறு நியாயப் படுத்தலாம்


இந்த ஊரில் பிள்ளையாருக்குச் சிலை வைத்திருக்கிறார்கள் என்றால் இந்த சிலை பகட்டுக்காக மரியாதை செய்யப்படுகிற சிலை இல்லை. கடவுள் உண்டு என்பதற்கான சிலை. ஆன்மீகச் சிலை. மணியடிக்கக்கூடிய பூஜை செய்யக் கூடிய சிலை. கடவுள் இல்லை என்று சொல்லக் கூடியவன் காட்டு மிராண்டி முட்டாள் என்று சொல்லக் கூடிய சிலை.

மேற்கண்ட வரிகள் கற்பனைதான் எனினும் நீங்கள் அளித்த பதில் அடிப்படையற்றது என்பதற்காகவே குறிப்பிடப்பட்டுள்ளது. சிலைக்கு மாலை போட்டு மரியாதை செய்வதை பகுத்தறிவு கொண்டு நிருபியுங்கள் பார்க்கலாம்."

தாங்கள் வைக்கும் நேர்மையான நியாயமான எந்த விமர்சனத்தையும் எதிர் கொள்ள எப்போதும் அணியாமாக இருக்கிறேன் தோழரே. சரி விசயத்திற்கு போவோம்.

பிள்ளையார் சிலை என்பது கற்பனை.நம்பிக்கை சார்ந்தது.

பெரியாரின் சிலை என்பது ரத்தமும் சதையுமாக 1973 ஆம் ஆண்டு வரை நம்மோடு வாழ்ந்தவர்,அவரால் தமிழும் தமிழினமும் குறிப்பாக பார்ப்பனரல்லாத( இஸ்லாமிய கிறித்துவ தோழர்கள் உடபட ) அனைத்து மக்களின் முன்னேற்றத்திற்கு அரும்பாடுபட்ட ஒரு தலைவரை எதிர்கால சந்ததியினருக்கு அடையாளம் காட்டுவதற்கு ஏற்படுத்தப்படதாகும்.

அதோடு கடவுள் இல்லை என்று சொன்ன பெரியார் எப்படியிருப்பார் என்பதை மக்களுக்கு உணர்த்தும் பொருட்டு சிலை வைக்கப்படுகிறதே தவிர அவரை வணங்குவதற்கு அல்ல.

இதைக்கூட முன்பு நான் சுட்டிக்காடிய உரையில் பெரியார் தெளிவுபடுத்தியிருப்பார். மீண்டும் ஒருமுறை அதை உங்கள் பார்வைக்கு வைக்கிறேன்.

"இந்தச் சிலை வைப்பது, படம் திறப்பது, ஞாபச் சின்னம் வைப்பது போன்ற இவையெல்லாம் பிரச்சார காரியமே தவிர இது பெருமையல்ல. ஒருவன் இது யார் சிலை என்றால் இது பெரியார் சிலை என்று ஒருத்தன் பதில் சொல்வான். பெரியார் என்றால் யார் என்று கேட்பான்? உடனே அவன் பெரியாரைத் தெரியாதா? அவர்தான் கடவுள் இல்லை என்று சொன்னவராவார் என்று சொல்லுவான் இப்படி நம் கருத்தானது பரவிக் கொண்டிருக்கும். அதற்கு ஒரு வாய்ப்புத் தான் இந்தச் சிலையாகும்".

நம்பிக்கைசார்ந்ததற்கும் வரலாற்றுக் குறிப்புகளுக்கும் ஆழ்ந்த வேறுபாடு உண்டு தோழரே.

இந்து நண்பர் சொன்னது நியாயமான பதில் அல்ல என்பது உங்களைப் போன்ற நல்லதொரு தர்க்கவாதிக்கு எளிதாக புலப்பட்டிருக்கும்.

மீண்டும் சொல்கிறேன். பெரியாருக்கு சிலை வைப்பது, மாலை அணிவிப்பது என்பது கொள்கைப் பரப்பலுக்கானதே தவிர அதில் எந்த புனிதமும் கிடையாது.

மாலை அணிவிப்பது என்பது கூட தினமும் "சாமி" சிலைகளுக்கு செய்வது போல் (ஒரு புரிதலுக்காக சொல்கிறேன்) யாரும் செய்வது கிடையாது.

பிறந்தநாள் மற்றும் நினைவுநாள்களில் மட்டும்தான் அணிவிக்கிறார்கள். அது பெரியார் உண்ர்வதற்காக அல்ல.

சிலைக்கு மாலை அணிவித்திருப்பதை பார்க்கும் மக்கள் இன்று பெரியார் பிறந்த நாள் அல்லது நினைவு நாள் என்று அறிந்து கொள்வதற்காகவே. அது ஒரு பிரச்சார யுக்திக்காக செய்யப்படுவதே தவிர வேறு எதற்காகவும் அல்ல.

அவசியம் பெரியாரை வாசியுங்கள். உங்களுக்கே பல உண்மைகள் புலப்படும் .

ஆரோக்கியமாக விவாதிக்கும் உங்களுக்கு நன்றி.