ஈழத்தில் முழுப் போர் நிறுத்தம் கோரி கி.வீரமணி அவர்கள் ஆற்றிய உரை

கலைஞர் - ஆட்சியை இழந்துவிடக் கூடாது
என்று குறுக்கே நின்று தடுத்தவர்கள் நாங்கள்

சென்னை கூட்டத்தில் தமிழர் தலைவர் உரை


முதல்வர் கலைஞர் அவர்கள் எந்தக் காரணத்தைக் கொண்டும் ஆட்சியை இழக்கக் கூடாது என்று குறுக்கே நின்று அணை போட்டு தடுத்திருக்கின்றவர்கள் நாங்கள் என்று திராவிடர் கழகத் தலைவர் தமிழர் தலைவர் கி.வீரமணி அவர்கள் கூறி விளக்கவுரையாற்றினார்.

ஈழத்தில் முழுப் போர் நிறுத்தம் கோரி சென்னை பெரியார் திடலில் 21.4.2009 அன்று நடைபெற்ற சிறப்புப் பொதுக் கூட்டத்தில் திராவிடர் கழகத் தலை வர் தமிழர் தலைவர் கி.வீரமணி அவர்கள் ஆற்றிய உரை வருமாறு:

சரியான நேரத்தில் சரியானவர்களைக் கொண்டு, சரியான கருத் துகளைச் சரியான மக்களுக்குக் கொண்டு போய் சேர்க்க வேண்டும் என்பதற்காக சரித்திரத்தில் இடம் பெறக்கூடிய அளவிற்கு இன்றைக்குக் கூட்டப்பட்டுள்ள இந்தக் கூட்டத்திலே ஆயுதம் ஏந்தாத புலி என்று தன்னை அறிமுகப் படுத்திக் கொண்ட எனது அன்புச் சகோதரர் (கைதட்டல்) பாராட்டுதலுக்கும், பெருமிதத்திற்குமுரியவர் - என்றென் றும் எங்களிலே ஒருவர், எங்கள் ரத்தத்தின் ரத்தம் - குருதியின் குருதி உணர்வின் உணர்வு என்ற நிலையிலே இருக்கக் கூடிய தொல்.திருமா அவர்களே! (கைதட்டல்) அவர்களை நாங்கள் பார்க்கிற பொழுது, திராவிடர் கழகம் வேறு, விடுதலைச் சிறுத்தைகள் வேறு என்று பிரித்துப் பார்ப்பதே கிடையாது (கைதட்டல்).

கழகத்தின் கொள்கையைச் சொல்லுவதற்கு பல அரசியல் அணிகள் உருவாகியிருக்கின்றன. அந்த அரசியல் அணியிலே திராவிட முன்னேற்றக் கழகம் முதல் என்று சொன்னால் அதற்கு இணைப்பாக இருக்கக் கூடிய அந்த நீண்ட ரயில் பயணத்திலே ஒரு பெட்டியாக இருக்கக்கூடிய, கவிழாத, பெட்டியாக இருக்கக் கூடியவர் தொல்.திருமாவளவன் அவர்கள். ரயில் துறையிலே சில நேரங்களில் தமிழ்நாட்டில் உட்பட விபத்துக்கள் ஏற்பட்டு விடுகின்றன (கைதட் டல்).

அப்படிப்பட்ட சூழழிலே என்றைக்கும் இருக் கக்கூடிய எங்களுடைய சகோதரர் தொல்.திருமா அவர்கள் ஓர் அற்புத மான உரையாற்றியிருக் கின்றார்கள்.

இந்த உரையால் அவர்கள் தீட்டிய ஓவியத்தை நான் கலைக்க விரும்பவில்லை (கைதட்டல்). எனவே நான் நீண்ட நேரம் பேசுவேன் என்று நீங்கள் பார்க்க வேண்டிய அவசியமில்லை.

அவருக்கு முன்னாலே என்னுடைய அருமைச் சகோதரர் எங்கள் குடும்பத்துத் தங்கம், சுயமரியாதை சொக்கத் தங்கம் அன்பிற்குரிய சுப.வீரபாண்டியன் அவர்கள் திராவிட இயக்க தமிழர் பேரவையை உருவாக்கியது மட்டுமல்ல, மனசாட்சியை எந்தக் காலத்திலும் மாற்றாருக்கு அடகு வைக்கத் தெரியாத ஒரு மகத்தான இலட்சிய வீரர் அருமைப் பேராசிரியர் சுப.வீரபாண்டியன் அவர்கள்!

இந்த நிகழ்ச்சிக்குத் தலைமை ஏற்றிருக்கின்ற கழகத்தினுடைய ஆற்றல் மிகு பொருளாளர் வழக்குரைஞர் சாமிதுரை அவர்களே!

எங்களை வரவேற்று அறிமுக உரையாற்றிய கழகத்தின் பொதுச் செயலாளர் மானமிகு கலி. பூங்குன்றன் அவர்களே!

எண்ணத்தால் நாம் அனைவரும் ஒருவரே என்று இணைந்திருக்கக் கூடிய தாய்மார்களே! பெரியோர்களே! நண்பர்களே!

இந்த நேரத்திலே நமக்கு உள்ளத்தில் இரத் தக் கண்ணீர் வடிந்து கொண்டிருக்கிறது. ஆனாலும் நமக்குள் வடிகின்ற இரத்தக் கண்ணீரை உள்ளுக்குள்ளே நாம் புதைத்துக் கொள்ளலாமே தவிர, தமிழன் கண்களிலே இருந்து இனிமேல் எப்படிப் பட்ட செய்தி வந்தாலும் கண்ணீர் வர வேண்டிய அவசியமில்லை. நெருப்புப் பொரிகள் தான் பறக்க வேண்டும் (பலத்த கைதட்டல்) என்பதை அறிவிக்கின்ற கூட்டம் இந்தக் கூட்டம்.

எம் தமிழ் இனத்தைப் பற்றி இன்றைக்கு மாலையிலே செய்தி வந்திருக்கிறது. இன்று காலையிலே இருந்து எங்களுடைய உள்ளம் பதறிப் போயிருக்கிறது. எங்கள் குருதியின் ஓட்டம் இங்கேயிருக்கின்ற வெப்பத்தைவிட கடும் வெப்பத்தோடு இருக்கக்கூடியதாக இருக்கின்றது. எரியும் நெருப்பிலே பெட்ரோலை ஊற்று வதைப் போல துன்பச் செய்திகள் அடுக்கடுக்காக வந்து கொண்டிருக்கின்றன. எம் தமிழ் இனம் அப்பாவி மக்கள் தமிழர்களாகப் பிறந்த ஒரே குற்றத்திற்காக அவர்களுக்கு வாழ உரிமை இல்லையா?
பக்குவப்படுத்தப்பட்ட சொந்த மண்ணில் அவர்கள் வாழ உரிமை இல்லையா? தமிழ் இனம் நாதியற்றுப் போன ஓர் இனமாக ஆகிவிட்டதா? என்பதை எல்லாம் நினைத்துக் குமுறிக் குமுறி, குலுங்கிக் குலுங்கி அழுவதைத் தடுத்து நிறுத்திக் கொண்டு, நாம் அழக் கூடாது. நாம் அழுபவர்களுக்கு ஆறுதல் சொல்ல வேண்டிய இடத்திலே இருக்கின்றோம். அழுகையைத் துடைக்க வேண்டிய இடத்திலே இருக்கின் றோம். அழுகை வராமல் தடுக்க வேண்டிய இடத்திலே இருக்கின்றோம் என்ற அந்த உணர்வோடு பார்க்கின்ற நேரத்திலே வந்திருக்கின்ற செய்திகளைப் பாருங்கள்.

அருமைத் தோழர்களே! தோழியர்களே! பெண்களும், குழந்தைகளும், மூச்சுத் திணறிப் பலியாகிக் கொண்டிருக் கின்றார்கள். பலர் பதுங்கு குழியிலேயே சமாதி ஆனார்கள்.

ஆங்காங்கே பிணங்கள் சிதறிக் கிடக்கும் அவலம். கொழும்பு, ஏப். 21. வெளிவந்த பத்திரிகையின் செய்தி - சிங்கள இராணுவத் தாக்குதலால் பலியான தமிழர்களின் எண்ணிக்கை 1500-அய் எட்டியது. 3000த்திற்கும் மேற்பட்டோர் காயமடைந்தனர். இந்தத் தாக்குதலின் போது தடை செய்யப்பட்ட விஷ வாயு குண்டுகளையும் இராணுவம் பயன்படுத்தியுள்ளது.

நாப்பாம், பாஸ்பரஸ் விஷ வாயுக் குண்டுகள் வீசப்பட்டிருக்கின்றன. ஹிரோஷிமா, நாகசாகி பகுதியிலே வீசப்பட்ட அணுகுண்டுகளை விட ஆயிரமாயிரம் சக்தி வாய்ந்த நெருப்புக் குண் டுகள் - விஷ வாயுக் குண் டுகள்.

அப்படிப்பட்ட அந்த விஷ வாயுக் குண்டுகளை சிங்கள இராணுவம் தமிழர்கள் மீது வீசியிருக்கிறது. சீனத்திலிருந்து பெற்று இந்தியாவிலே இருந்து பெற்று, பாகிஸ்தானிலே இருந்து பெற்று ஏன், இங்கே யிருந்தும் பெற்று தமிழர்கள் மீது அந்த குண்டுகளை வீசியிருக்கிறது.

சிங்கள ராஜபக்சே கெடு வைக்கிறான். கெடு வைத்து உங்களை அழிக்கிறோம் என்று சொல்லுகின்றான்.
அது மட்டுமல்ல; இங்கேயிருந்து அழுத்தம் செலுத்துகிறபொழுது, நம்முடைய முதலமைச்சர் நம்முடைய மத்திய அரசு இவைகள் எல்லாம் சொன்னால் அதை அவர்கள் ஏற்கிறார்களா? என்ன செய்கிறார்கள்?
போர்ப் பகுதியிலி ருந்து தமிழர்களை வெளியேற்றுகிறோம். தமிழர்களைப் பாதுகாப்பான பகுதிக்குக் கொண்டு போகிறோம் என்று சொல்லி அங்கே யிருக்கின்ற விடுதலை புலிகள் ஏதோ தமிழர்களைத் தடுத்து நிறுத்துவதைப் போல ஒரு பாசாங்கு தனத்தை உலக மக்கள் மத்தியிலே உலக நாடுகள் மத்தியிலே கண் ணில் மிளகாய்ப் பொடி யைத் தூவிவிட்டு அவர் களை தனியே அழைத்துப் போகிறோம் என்று ஒரு சாக்கு சொல்லி யூதர்களை நடத்தியதை விட, நாஜிக்கள் நடத்தியதைவிட கொடுமையாகத் தமிழர்களை நடத்துகின்ற அவலம் அங்கே இருக்கிறது.

மனிதாபிமானமிக்க உலக நாடுகளில் இருக்கின்ற மனிதர்களே! அவர்களைப் பார்த்து நாம் கேட்கிறோம், எங்காவது வேடந்தாங்கலுக்கு வந்த பறவைகளை வேட்டையாடிய வரலாறு உண்டா?
வேட்டையாடக் கூடியவர்கள் கூட காட்டுக்குப் போவார்கள். வேடந்தாங்கலுக்கு வர மாட்டார்கள்.
ஆனால், இங்கே நடக்கின்ற கொடுமை எவ்வளவு பெரிய அநீதியானது என்பதை எண்ணிப் பார்க்க வேண்டும்.

இதற்காக ஆரம்பத்திலிருந்து என்றைக்கும் கருமத்திற்குரியவர்கள், கடைசி வரையிலே இருப்பார்கள் என்பதற் கொப்ப இந்த இயக்கங்கள் இருக்கின்றன.

தேர்தல் வரலாம். போகலாம். அது இடை யிலே நடக்கக்கூடிய ஒரு சம்பவம். ஆனால் இனப் போராட்டம் என்பதிருக்கிறதே, இது இராமாயண காலந்தொட்டு விபீஷணர்கள் வளர்ந்த காலத்திலேயிருந்து கலைஞர் காலம் வரையிலே, இன்று வரையிலே தொடரக் கூடியது.
நாளைக்கும் தொடர லாம். சரித்திரத்தைப் புரட்டிப் பார்க்க வேண்டும். நமது முதல்வர் கலைஞர் ஒரு தொலைக் காட்சிக்குப் பேட்டி கொடுக்கின்றார். சகோதரர் சுப.வீ. அவர்கள் சொன்னதைப்போல, பிரபாகரன் என்னுடைய நண்பர் என்று முதல்வர் அவர்கள் சொன்னால் அது என்ன தேசிய குற்றமா?
தமிழனை - தன்னுடைய சகோதரனை பின் எப்படிச் சொல்வார் (கைதட்டல்). வேண்டுமானால் ஜெயலலிதா வாயிலே அது வராது. நாம் அதைப் புரிந்து கொள்ளக் கூடியவர்கள்.
ஆனால் கலைஞர் அவர்களுடைய வாயிலே அதைத் தவிர வேறு என்ன வரும்? அதற்காக கலைஞர் அவர்கள் ஆட்சியை இரண்டு முறை இழந்ததுண்டு. நாளைக்கும் இழக்கத் தயாராக இருப்பவர்தான் நம்முடைய கலைஞர்.

ஆனால் கலைஞர் அவர்கள் ஆட்சியை இழப்பதால் நமக்குப் பயன் இல்லை. இந்த சமுதாயத்திற்குப் பயனில்லை என்று சொல்லி எங்களைப் போன்றவர்கள் திட்டவட்டமாக குறுக்கே அணை போட்டு நிறுத் தியிருக்கின்றோம் என்பதை பகிரங்கமாக இந்த நேரத்திலே நான் சொல்லிக் கொள்கின்றேன் (கைதட்டல்).

ஏனென்றால், பெரியார் தொண்டர்களுக்கு அந்தக் கடமை உண்டு. ஓர் ஆட்சி பாதுகாக்கப்பட வேண்டும். சில பல நிலைமைகளுக்காகவே.

நம்முடைய சகோதரர் திருமாவளவன் அவர்கள் தெளிவாகச் சொல்லி விட்டார். என்ன நடக்கும்? யாருக்கு என்ன திட்டம், உள்நோக்கமென்ன?

நாங்கள் இங்கே பேசுகிறோமே, எங்களுடைய மனதில் ஏதாவது சிறு தடங்கல்கள் இருக்கிறதா? காரணம் நாங்கள் மனசாட்சியை விற்று விட்டு இந்த மேடைக்கு வந்தவர்கள் அல்லர். (கைதட்டல்).
அல்லது சில இடம் தேடிகள் அல்ல. அதற்காக காத்திருக்கக் கூடியவர்கள் அல்லர். மூன்று எழுத்துக்காக நீங்கள் இப்படி மாறலாமா? என்று சகோதரர் தொல். திருமாவளவன் அவர்கள் சொன்னபொழுது உங்களிலே சிலர் சிரித்தீர்கள்.

நான் கொஞ்சநேரம் யோசித்தேன். அவர் எதைச் சொல்லுகிறார் என்று. உடனே மானம் என்று சிலர் குரல் கொடுத்தார்கள் (கைதட்டல்) அதுவும் சரிதான் (கை தட்டல்).

அதுமட்டுமா மூன்று எழுத்து. பணம் என்பதும் மூன்றெழுத்து தான். (பலத்த கைதட் டல்) பதவி என்பதும் மூன்றெழுத்துதான். கூட்டு என்பதும் மூன்றெழுத்துதான்.

எனவே மக்கள் இதைத் தெளிவாகப் புரிந்து கொள்வார்கள். ஆனால் ஒன்றை நீங்கள் நன்றாக நினைவில் வைத்துக் கொள்ள வேண்டும்.

பிரபாகரன் தீவிரவாதியா? வேண்டுமென்றே சிக்கலான கேள்வியைக் கேட்டு, அவருக்கு ஒரு சங்கடத்தை தேர்தல் நேரத்திலே உருவாக்கி, தேர்தல் உறவுகளை சிதைக்க வேண்டும் என்பது கேள்வி கேட்ட வருடைய நோக்கம்.

அதற்கு கலைஞர் அவர்கள் மிகத் தெளிவாகச் சொன்னார். இன்றைக்கு பிரபாகரனை மற்றவர்கள் தீவிரவாதி என்று அழைக்கலாம். ஆனால் அவர்பிறக்கும்பொழுதே தீவிரவாதியாகப் பிறக்கவில்லை.
அவர் தீவிரவாதி என்று மற்றவர்கள் சொல்லும் அளவுக்கு தள்ளப்பட்டார். அவருடைய இயக்கம் எப்படிப் பட்டது? என்ற வரலாற்றை எடுத்துச் சொன்னார்கள்.

நீண்ட விளக்கமாக அவர்கள் சொல்ல வில்லை. சுருக்கமாகச் சொன்னார்கள். நாங்கள் சொல்லுகிறோம், கலைஞர் அவர்கள் பொறுப்பிலே இருக்கக் கூடிய வர்கள்.

ஆகவே எதையும் அளந்து பேச வேண்டிய நிர்ப்பந்தத்திலே இருக்கக் கூடியவர்கள். ஒரு எல்லையை வைத்துக் கொண்டிருக்கின்றவர்கள்.

எங்களைப் போன்று எதுவும் இல்லாமல் கழற்றுகின்றோமே; நாங்கள் சொல்லுகின்றோம் சாதாரண எளிய சாமானி யர்கள் சொல்லுகிறோம்.

பிரபாகரன் தீவிரவாதியாக இருந்தால் உனக்கென்ன நட்டம்? (பலத்த கைதட்டல்). தீவிரவாதிதான். அவனுடைய இனத்தை விடுதலை செய்வதற்காக அவன் ஏற்பது தீவிரவாதம் என் றால், அவன் இருக்கும் திசை நோக்கி நாங்கள் தண்டனிட்டு வணங்கத் தயார் தயார்! என்பதை அறிவிக்கின்றோம் (பலத்த கைதட்டல்).


-------------தொடரும் .........."விடுதலை"24-4-2009