இன்று ஆசியஜோதி சித்தார்த்தன் கவுதமப் புத்தர் பிறந்த நாள்

புத்த பூர்ணிமா! 

இன்று ஆசிய ஜோதி சித்தார்த்தன் கவுதமப் புத்தர் பிறந்த நாள் (கி.மு.480) புத்த பூர்ணிமா என்றும், விசாகம் என்றும் உலகம் முழுவதும் உள்ள பவுத்தர்கள் கொண்டாடுகிறார்கள். நிர்வாணா என்று கூறப்படும் அவர்தம் மறைவு நாளையும் அனுசரிக்கிறார்கள்.

1950 மே மாதத்தில் கொழும்பில் கூடிய உலகப் புத்த அறிஞர்கள் மாநாட்டில் புத்தர் பூர்ணிமா நாள் உறுதி செய்யப்பட்டது.

1. நீ கேட்டது என்பதற்காகவே எதையும் நம்பிவிடாதே!

2. தலைமுறை தலைமுறையாக நடந்துவருகிற பழக்கம் என்பதற்காக எதையும் ஒத்துக்கொள்ளாதே!

3. பலர் பேசுகிறார்கள்; பலர் ஏற்றுக் கொண்டிருக்கி றார்கள் என்பதற்காக மட்டும் எதையும் நம்பிவிடாதே!

4. உன்னுடைய மத நூல்களில் கூறியிருக்கிறது என்பதற்காக மட்டும் எதையும் நம்பி விடாதே!

5. உனக்கு மூத்தவர்களும், உன் ஆசிரியர்களும் சொல்கிறார்கள் என்பதற்காக மட்டும் ஒன்றை நம்பிவிடாதே!

6. ஒரு சங்கதியை உற்றுக் கவனித்து, ஆராய்ந்து பார்த்து, உன் பகுத்தறிவுக்கு ஏற்றது என்றும், பிரத்தியட்ச அனுபவத்திற்குத் தெளிவாக உள்ளது என்றும் உனக்குத் தோன்றுமானால், அதனை ஏற்றுக்கொண்டு அதன்படி நட.

இவைதாம் உலக மானுடத்திற்குக் கவுதம புத்தர் பிரகடனப்படுத்திய அறிவு நெறிகள்.

இவற்றில் தெளிவாக ஊடுருவி நிற்பது பகுத்தறிவுச் சிந்தனை என்பது வெளிப்படை.. மதம் என்றால் நம்பு! நம்பினால் மோட்சம் - நம்பாவிட்டால் நரகம் என்றுதானே கூறுகிறது! தலைவிதி, கர்மப் பலன் என்று கூறும் எந்த மதத்தின் ஆணிவேரையும் வீழ்த்தக்கூடிய அறிவாயுதமே இவை என்பது தெரியவில்லையா?

புத்தர் கோசல நாட்டில் பயணம் மேற்கொண்டபோது ஒரு பார்ப்பனர் ஆத்மா பற்றி உங்கள் கருத்தென்ன? என்று கேட்டார். அதற்குப் புத்தர் சொன்ன பதில்: 

ஆத்மா எதையும் அறியக்கூடியது என்று வாதத்திற்காகவே வைத்துக்கொள்வோம்;கண்களைத் தோண்டிவிட்டால் அந்த ஆத்மாவால் பார்க்க முடியுமா? காதுகளைச் செவிடு ஆக்கிவிட்டால் ஆத்மாவால் கேட்க முடியுமா? மூக்கை எடுத்துவிட்டால் நாற்றத்தை ஆத்மாவால் உணர முடியுமா? நாக்கை அறுத்து விட்டால் ருசி அறியுமா அந்த ஆத்மா? என்று கேள்விக்குக் கேள்விகள் மூலம் விடையிறுத்தார் கவுதம புத்தர்.

புத்தர் என்றால் யார் என்ற வினாவுக்குப் பகுத்தறிவுப் பகலவன் தந்தை பெரியார் பளிச்சென்று பதில் பகன்றார். புத்தியைப் பயன்படுத்துபவன் ஒவ்வொருவனும் புத்தனே! என்றார்.

ஆரியர்களின் வருணாசிரமத்தையும், யாகப் பண் பாட்டையும் கடுமையாக எதிர்த்தவர் புத்தர். கவுதம புத்தர் சகாப்தத்தில் ஆரியம் வீழ்ச்சியுற்றது. அரசர்கள் பலர் பவுத்த மார்க்கத்தைப் பின்பற்றினர். பிற்காலத்தில் ஆரியத்திற்கே உரிய வஞ்சக - தந்திர முறைகளால் மன்னர்களைக் கைக்குள் போட்டு, பவுத்தத்தை அதன் சுவடு தெரியாமல் அழித்து முடித்தனர் இந்நாட்டில்.

பவுத்தர்கள், சமணர்கள் கழுவில் ஏற்றப்பட்டனர். பவுத்த பள்ளிகள் இந்து மதக் கோவில்களாக மாற்றப்பட்டன. இன் றைக்கு இருக்கும் திருப்பதி ஏழுமலையான் கோவில்கூட  புத்தரின் நின்ற கோலம் என்று ஆய்வு நூல்கள் வெளி வந்துவிட்டன.

தமிழ்நாட்டில் எந்தெந்த பவுத்தப் பள்ளிகள் எல்லாம் இந்துக் கோவில்களாக உருமாற்றப்பட்டன என்பதை ஒரு நீண்ட பட்டியல்மூலம் ஆய்வின் அடிப்படையில் நிறுவி வெளியிட்டுள்ளார் மயிலை சீனி.வேங்கடசாமி - பவுத்தமும் தமிழும் என்ற நூலில்.

புத்தர் போதித்த அறநெறிக் கோட்பாடுகள் மக்கள் மத்தியில் வேரூன்ற ஆரம்பித்த நிலையில், ஊடுருவல், அணைத்து அழிக்கும் கலையில், வல்லதாகிய ஆரியம், புத்தரை மகாவிஷ்ணுவின் அவதாரம் என்று ஆக்கிக்காட்ட ஆரம்பித்தது. பல புத்த ஜாதகக் கதைகள் கட்டிவிடப் பட்டன.

இதோ தினமலர் - வாரமலர் வெளியிட்ட ஒரு தகவல் இதற்குச் சான்றாகும்.

லடாக்கின் லூப்ரா பள்ளத்தாக்கின், திஸ்கித் மடத்தின் அருகே, அமர்ந்த நிலையில், 32 மீட்டர் உயரமுள்ள மைத்ரேய புத்தர் சிலை உள்ளது. இதன் அருகிலேயே, சியோக் நதி ஓடுகிறது.

யார், இந்த மைத்ரேய புத்தர்? புத்தர், இதுவரை நான்கு அவதாரங்களை எடுத்து முடித்துவிட்டார். அய்ந்தாவது அவதாரமே இந்த மைத்ரேய புத்தர். உலகில், புத்தரின் போதனைகளுக்கு மதிப்பு குறைந்து, கொலை, கொள்ளை, அட்டூழியம், அநியாயம் தலைவிரித்தாடும் போது, இவர் உலகிற்கு வருவார்.

அதுவும், காசியில் தான் பிறப்பார். ஏழு நாட்களில், ஞானம்  பெற்று, உலகத்திற்கே போதிக்கும் ஆச்சாரியராக மாறுவார்; உலகில் அநியாயத்தை முடிவுக்குக் கொண்டு வந்து அமைதியை நிலைநாட்டுவார் என்கின்றனர் புத்தமத துறவிகள்.

இந்து மதத்தில் விஷ்ணுவின் பத்தாவது அவதாரமான கல்கி அவதாரம் நினைவுக்கு வருகிறதா? இதுவும் அது போலத்தான் என்பது தினமலர் வெளியிட்டுள்ள தகவல்.

ஆரியம் என்றாலே பித்தலாட்டம் என்பதற்கு இந்த எடுத்துக்காட்டு ஒன்று போதாதா?

தமிழ்நாட்டில் புத்தர் கொள்கையைப் பரப்புவதை முன்னெடுத்தவர் பகுத்தறிவுப் பகலவன் தந்தை பெரியாரே! 1954 இல் ஈரோட்டில் புத்தர் மாநாட்டைக் கூட்டி, இலங் கையிலிருந்து பேராசிரியர் மல்லலசேகரா, வடநாட்டைச் சேர்ந்த ராஜ்போஜ் எம்.பி., போன்றவர்களை எல்லாம் அழைத்து அரிய தீர்மானங்களை நிறைவேற்றியவர் தந்தை பெரியாரே,

உருவ வணக்கப் பித்தலாட்டத்தை அம்பலப்படுத்தும் வகையில் இதே புத்தப் பூர்ணிமா நாளில்தான் (1952 இல்) ஆபாச விநாயகர் பொம்மைகளை உடைக்கும் போராட் டத்தை நடத்தினார் தந்தை பெரியார்.

புத்தர் கொள்கை என்றாலும், தந்தை பெரியார் கொள்கை என்றாலும், அம்பேத்கர் சிந்தனை என்றாலும் ஒரே அச்சுதான்.

மதவெறி சக்திகள் தலைதூக்கும் இந்தக் காலகட்டத்தில் இந்தச் சிந்தனையாளர்களின் அறிவாயுதங்களை ஏந்திடுவோம்! ஏந்திடுவோம்!!

                       --------------------”விடுதலை” தலையங்கம் 14-05-2014

Read more: http://viduthalai.in/page-2/80214.html#ixzz31h7UmSVi