ஈழத்தில் தமிழர்களுக்கு இழைக்கப்படும் கொடுமை உச்சக்கட்டத்தில்..

தமிழ்நாடு அதிர்கிறது!

ஈழத்தில் தமிழர்களுக்கு இழைக்கப்படும் கொடுமை ஓர் உச்சக்கட்டத்தை அடைந்திருக்கிறது.

இதனைக் கண்டித்து தமிழகமே கிளர்ந்துள்ளது. பல்வேறு கட்சிகளும் தத்தம் உசிதப்படி போராட்ட வடிவங்களை அமைத்துச் செயல்பட்டு வருகின்றனர்.

இன்று மாலை தி.மு.க. தலைவரும், தமிழ்நாடு முதலமைச்சருமான மானமிகு மாண்புமிகு கலைஞர் அவர்களின் தலைமையில் சென்னையில் மன்றோ சிலையிலிருந்து சேப்பாக்கம் வரை மாபெரும் பேரணி நடத்தப்பட உள்ளது.

இங்கிலாந்தில் மூன்று நாள்களாகக் கடும் குளிரையும் பொருட்படுத்தாது இங்கிலாந்து வாழ் தமிழர்களால் முதன் முறையாக நாடாளுமன்றமுன் முற்றுகையிடப்பட்டுள்ளது.

பிரான்சு, சுவீடன், கனடா, நெதர்லாந்து நாடுகளில் தமிழர்கள் தொடர் போராட்டங்களை நடத்தி வருகின்றனர்.

ஈழத் தமிழர் நிலைமை குறித்து அமெரிக்க வெளியுறவுத் துறை அமைச்சர் ஹிலாரி கிளிண்டன் - நார்வே வெளியுறவுத் துறை அமைச்சர் ஜோன்ஸ் கார்ஸ்டோருடன் உரையாடியுள்ளார். இலங்கையில் தமிழர்களுக்கு எதிராக நடத்தப்படும் போரை முடிவுக்குக் கொண்டு வருவதற்கான முயற்சிகளில் ஈடுபடுவோம் என்று கூறியுள்ளனர்.

அய்.நா. மன்றம் தொடர்ந்து சிங்கள அரசுக்கு வேண்டுகோளை விடுவித்து வருகிறது.

இலங்கையில் போரை நிறுத்துமாறு - இந்தியப் பிரதமர், வெளியுறவுத் துறை அமைச்சர், அய்க்கியக் கூட்டணியின் தலைவர் திருமதி சோனியா காந்தி ஆகியோருக்கு முதலமைச்சர் என்ற முறையில் தந்திகளைக் கொடுத்துள்ளார் கலைஞர் அவர்கள்.

இந்த நிலையில், இலங்கைப் பிரதமர் விக்கிரம நாயகா கூறுகிறார்:

தோல்வி அடையும் விடுதலைப்புலிகளைக் காப்பாற்ற அனைத்துலக ராஜதந்திரிகள் முயற்சித்தனர். அவர்களின் நடவடிக்கைக்கு அரசு ஒருபோதும் இடம் கொடுக்காது என்று திமிரோடு கூறியுள்ளார்.

இதற்கிடையே விடுதலைப்புலிகளுடன் நடத்தும் போரில் இந்திய வீரர்களும் இருக்கின்றனர் என்ற ஒரு கருத்தும் வந்துள்ளது. அதுமாதிரி எதுவும் கிடையாது என்று இந்தியப் பாதுகாப்புத் துறை அமைச்சர் ஏ.கே. அந்தோணி குறிப்பிட்டதுண்டு.

உலகின் பல்வேறு நாடுகளும் இந்தப் பிரச்சினையில் போர் நிறுத்தத்துக்குக் குரல் கொடுத்தாலும் பக்கத்து நாடான இந்தியாவின் குரலில்தான் ஆளுமையும் அழுத்தமும் அதிகமாக இருக்கமுடியும் என்ற எதிர்பார்ப்பு இருந்து வருகிறது.

தமிழ்நாட்டில் நடந்துவரும் போராட்டங்கள், பேரணிகள் எதை உணர்த்துகின்றன? இதனை இந்தியா வெளிப்படையாக இலங்கை அரசுக்கு இதுவரை தெரிவித்த தொனியை மாற்றி - இலங்கை அரசுக்குப் புரியும் மொழியில் வலிமையோடு கூறினால்தான் சரிப்பட்டு வரும்.

இந்திய அரசேகூட, இந்தப் பிரச்சினையை அய்.நா.வுக்குக் கொண்டு போகலாம்.

ஒரு இனமே மழலைகள் முதல் முதியோர்வரை பேரினவாத அரசு ஒன்றால் இராணுவப் படைகள்மூலம் அழிக்கப்படுகிறது என்பது வெளிச்சத்துக்கு வந்த பிறகு, அடுத்தகட்ட நடவடிக்கைக்கு இந்தியா தயாராக வேண்டியதைத் தவிர வேறுவழியில்லை.

தமிழ்நாடு சட்டப்பேரவையில் தீர்மானங்கள் பலமுறை நிறைவேற்றியாகிவிட்டன. மனிதச் சங்கிலி அறப்போராட்டத்தை நடத்திக் காட்டியாயிற்று.

இப்பொழுது பந்து மத்திய அரசின் கையில் இருக்கிறது. அதனைச் சரியாகப் புரிந்துகொண்டு மத்திய அரசும், ஆளும் கூட்டணியின் தலைவரான சோனியா காந்தியும் சரியான முடிவெடுத்து வெளிப்படையாக எச்சரிக்கையுடன் கலந்து வேண்டுகோளை அழுத்தமாக வைத்தே தீர வேண்டும். இந்த எதிர்பார்ப்பு உலகெங்கும் உள்ள தமிழர் களிடத்தில் மட்டுமல்ல - மனிதநேய அமைப்புகளைச் சார்ந்தவர்கள் மத்தியிலும் உள்ளது.

இதில் அரசியலைப் போட்டுக் குழப்பவேண்டாம். ஈழத் தமிழர்களைக் காப்பாற்றிட இந்தியாவுக்கே அதிகப் பாத்தியதை உண்டு.

ஏற்கெனவே இந்தியப் பிரதமர் கூறி வந்த வார்த்தைகளை இலங்கை அரசு எந்த அளவுக்குப் புரிந்துகொண்டது என்றே தெரியவில்லை.

தமிழ்நாட்டின் ஒட்டுமொத்தமான எழுச்சிக் குரலை இலங்கை அரசிடம் இந்தியப் பிரதமர் சிந்தாமல் சிதறாமல் எதிரொலித்தாலே போதும் - நெருக்கடிக்குத் தீர்வு கிடைத்துவிடும்.


------------------நன்றி:- "விடுதலை"தலையங்கம் 9-4-2009