பெரியாரின் மறைவிற்குத் தலையங்கம் தீட்டாத ஒரே ஏடு!

பத்திரிகா தர்மம் - பேசுவது யார்?

தி.மு.க. ஆட்சியில் பத்திரிகையாளர்கள் மிரட்டப்படுவதாக பஞ்சத்துக்காக அரசியலுக்கு வந்த பா.ம.க. நிறுவனர் புலம்புகின்றார்.

இந்து ஏடு தலையங்கம் எழுதிவிட்டது என்று இறும்பூதெய்துகிறார்.

இதே இந்து ஏட்டை என்ன பாடுபடுத்தினார் ஜெயலலிதா என்பது ஊருக்கும், உலகுக்கும் தெரியுமே!

இந்து அலுவலகத்துக்குள்ளேயே நுழைந்து ஆளைப் பிடிக்கும் வேலையில் இறங்கவில்லையா? மைசூர், பெங்களூர்வரை இந்து முரளியை ஜெயலலிதாவின் போலீஸ் படை விரட்டிக்கொண்டு ஓடவில்லையா?

நக்கீரன் நிருபர் என்ன பாடுபட்டார்?

ஆனந்தவிகடன் ஆசிரியர் அச்சுறுத்தப்பட்டதும், உள்ளே தள்ளப்பட்டதும் எந்த ஆட்சியில்?

இந்து ஏடு குடும்பத் தொல்லையில் சிக்கி இறந்துவிடும் என்றிருந்த நிலையில், அதற்கு உயிர்ப் பிச்சை கொடுத்தது யார்? அறிஞர் அண்ணாவின் கட்டளைப்படி அதனைத் தீர்த்து வைத்தவர் கலைஞர் அல்லவா? (இது தவறு என்றுகூட இப்பொழுது நினைக்கத் தோன்றுகிறது).

புரட்சிக்கவிஞர் பாரதிதாசன், அன்னை மணியம்மையார் மறைவுகளை ஆபிச்சுவரி காலத்தில் போட்ட இந்து ஏடு - இப்பொழுது மருத்துவர் ராமதாசு போன்றவர்களுக்கு இனிப்பாக இருக்கிறது.

பனகல் அரசர், ஆர்.கே. சண்முகம் மறைவு குறித்து ஒரு வரிகூட எழுதாத ஏடு இந்து என்று தெரியுமா?

தமிழ்ப் பத்திரிகை உலகின் ஜாம்பவானான ஆதித்தனார் மறைவு குறித்து இரண்டு வரிகள் எழுதிவிட்டு, மிருதங்க வித்வான் பாலக்காட்டு மணி அய்யர் மறைவினை முதல் பக்கத்தில் போட்டு தன் இனவுணர்வை இந்து வெளியிட்டதே!

இந்துவை தேள் என்று முரசொலி எழுதிவிட்டதாம் - தேள் கொட்டியதுபோல துடிதுடிக்கிறார் மருத்துவர்.

தந்தை பெரியாரின் மறைவிற்குத் தலையங்கமே தீட்டாத ஒரே ஏடு இந்து என்கிற விவரம் எல்லாம் மருத்துவருக்குத் தெரியுமா?

இட ஒதுக்கீடு கொள்கையில் இந்துவின் நிலை என்ன? ஈழத்தமிழர்ப் பிரச்சினையில் இந்துவைவிட கொலைகார ஆயுதம் வேறு உண்டா? சிங்கள ரத்னா பெற்றவராயிற்றே!

இந்துவின் வரலாறு என்பது - தமிழினத்தை குழிதோண்டிப் புதைக்கும் குல்லுகப்பட்டர் வரலாறு.

இவையெல்லாம் மருத்துவருக்கு எங்கிருந்து தெரியப் போகிறது? அர்த்தராத்திரியில் குடை பிடித்ததுபோல அவசரத்தில் அரசியலுக்கு வந்தவர்கள் எல்லாம் எடுத்தேன், கவிழ்த்தேன் என்று பேசக் கூடாது!


-------------------"விடுதலை" 7-5-2009