ஜாதி ஒழிய நாம் என்ன செய்ய வேண்டும்?மதத்தை ஏற்காதவர்கள் என்ன குறிப்பிடலாம்?

ஜாதி ஒழிய நாம் என்ன செய்ய வேண்டும்?

குற்றாலம் பயிற்சி முகாமில் தமிழர் தலைவர் ஆசிரியர் அளித்த பதில்கள்

 

குற்றாலம் பெரியாரியல் பயிற்சி முகாமில் (ஜூன் 29) திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்களிடம் பயிற்சி மாணவர்களால் கேட்கப்பட்ட கேள்விகளுக்கு அளிக்கப்பட்ட பதில்கள்.

ஆந்திரா, கருநாடகா, கேரளா போன்ற மாநில மக்கள் அவர்களுக்கு ஆதரவாக நிற்கவில்லையா?

கேள்வி: நாம் அனைவரும் திராவிடர் என்று கூறுகிறோம்; ஆனால், நம்மிடம் இருக்கின்ற உணர்வு தமிழ் உணர்வுதான்; திராவிடம் என்றால் ஈழத் தமிழர் பிரச்சினையில், ஆந்திரா, கருநாடகா, கேரளா போன்ற மாநில மக்கள் அவர்களுக்கு ஆதரவாக நிற்கவில்லையே!

                                                                                                         ----------- கோபி, சென்னை

பதில்: குழப்பத்தை அடிப்படையாகக் கொண்ட கருத்து இது. தயவு செய்து இந்தக் கருத்துள்ளவர்கள் மாற்றிக் கொள்ளவேண்டும். இதுவரையில் அவர்கள் சொன்ன கருத்து, ஈழத் தமிழர் பிரச்சினையில், யார் ஆதரிக் கிறார்கள்? யார் ஆதரிக்கவில்லை? என்பது அதற்கு அடிப்படையான கருத்தல்ல. திராவிடர் கழகம் என்று பெயர் மாற்றியதற்குக் காரணமே, ஒரு கலாச்சார அடிப்படையில், திராவிட மொழிகள், திராவிடக் கலாச்சாரம் வேறு. ஆரிய கலாச்சாரம் வேறு; என்ற ஒரு தெளிவான அடிப்படையில்தான் திராவிடர் என்பது புகுத்தப்பட்டது - 1944 இல்.

தென்னிந்திய நல உரிமைச் சங்கம் - அவர்கள் ஏற் கிறார்கள், ஏற்கவில்லை என்பது முக்கியமல்ல; திரா விடர்கள் ஒரு காலத்தில் இந்தியா முழுவதும் இருந்தவர் கள். நாகர்களுக்கே திராவிடர்கள் என்று பெயர் என்று அம்பேத்கர் அவர்கள் எழுதிய நூலில் தெளிவா கவே எழுதியிருக்கிறார்கள்.

ஆகவே, திராவிடர் என்பதை, தெளிவாகப் புரிந்து கொள்ளுங்கள்.

இங்கே இருக்கின்ற குழப்பவாதிகள் சில பேர், தமிழுக் காக, தமிழ்த் தேசியவாதிகள் என்றெல்லாம் முகமூடி அணிந்துகொண்டு, திராவிட இயக்கத்தை அழிக்க வேண்டும் என்று நினைக்கின்றவர்கள் சொல்கின்ற தவறான கருத்துக்குப் பலியாகிவிடாதீர்கள்.

திராவிடர் என்று சொல்வதே, பார்ப்பனர்களை இணைக்கக்கூடாது; தமிழர்கள் என்று சொன்னாலே, நிச்சயமாகப் பார்ப்பனர்களும் தமிழர்கள்தான் என்று புகுந்து வருகிறார்கள். அவர்களும் தமிழ் பேசுகிறார்கள். தமிழர்கள் என்றால் யார்? நாம் தமிழர்கள் என்று சிலர் சொல்கிறார்களே, அவர்கள் பார்ப்பனர்களை நீக்கிச் சொல்கிறார்களா? பார்ப்பனர்களையும் சேர்த்துச் சொல்கிறார்களா? அதனை நீங்கள் தெளிவாகப் புரிந்துகொண்டாலே, அந்தச் சூது உங்களுக்குப் புரிந்துவிடும்.

பார்ப்பனர்களைப் பொறுத்தவரையில் அவர்களும் தமிழர்கள் என்று சொல்கிறார்கள், தமிழ்த் தாத்தா உ.வே.சாமிநாதய்யர்; மீசை வைத்தியநாதய்யர், அவரும் உச்சகட்டத் தமிழராக உருவாகிக் கொண்டிருக்கிறார் பல வித்தைகள் மூலம்!

ஆகவே, நம்முடைய பண்பாடு என்பதிருக்கிறதே, அதனை அடிப்படையாகக் கொண்டுதான் தந்தை பெரியார் அவர்கள், திராவிடர் என்று சொன்னார்.

அது ரத்தக் கலப்பைப் பொறுத்ததும் அல்ல; திராவிடம், திராவிடர், திராவிடர் கழகம் என்பது இருக்கிறதே, ஒரு இனத்தின் அடிப்படையைக் கொண்டது; ஆரியத்திலிருந்து வேறுபட்டது; தனித்த கலாச்சாரம்; தமிழ் அதில் ஒரு மூலப் பகுதியே தவிர, வேறொன்றும் இல்லை.

இதிலே,

பண்டைத் தமிழும் தமிழில் மலர்ந்த   பண்ணிகர் தெலுங்கு துளுமலை யாளம்   கண்டை நிகர்கன் னடமெனும் மொழிகள்    கமழக் கலைகள் சிறந்த நாடு. வாழ்க வாழ்கவே...!

என்று சொன்னார்கள்.

ஆகவே, மற்றவர்கள் தமிழ் ஈழத்தை ஏற்கிறார்களா, இல்லையா என்பதைப்பற்றி கவலையில்லை.

உதாரணமாக, தமிழ் ஈழத்தை ஏற்காதவர்கள் ஈழத்திலேயே இருக்கிறார்கள். கருணாவினுடைய தத்துவம் என்ன? மிகப்பெரிய அளவிற்கு இப்பொழுது வழக்கில் மாட்டிக் கொண்டுள்ள டக்ளஸ் தேவானந்தம் போன்ற வர்கள் இங்கே வந்து செல்கிறார்களே, பிரபாகரனுக்கு எதிராக இருக்கக் கூடியவர்கள் ஈழத்தை ஆதரிக் கிறார்களா? அங்கே, ஈழத் தமிழர்கள்தானே அவர்கள். தமிழர்கள் என்கிற பெயராலே அங்கே அமைச்சரவை யிலே இடமும்பெற்றிருக்கிறார்களே!

ஆகவேதான், தமிழ் ஈழப் பிரச்சினையை வைத்துக் கொண்டு, ஒரு குறுகிய வட்டத்திலே நின்று மட்டும் இதனைப் பார்க்காதீர்கள். பல பிரச்சினைகளிலே, தமிழ் ஈழப் பிரச்சினை ஒன்று. இது இப்பொழுது தோன்றிய பிரச்சினை அல்ல. 25 ஆண்டுகளுக்கு முன்பு தோன்றிய பிரச்சினை.

திராவிடர் கழகம் என்பது முழுக்க முழுக்க அடிப்படை யிலேயே திராவிடர் இனம், திராவிடர் கலாச்சாரம், திராவிடர் மொழி, ஆரியத்திற்கு முற்றிலும் மாறுபட்டது என்பதைத் தெளிவாக வைத்திருப்பது - தமிழன் என்று சொன்னால், பார்ப்பனர்களும் தமிழர்தான் என்ற அளவிலே வந்திருப்பார்கள், மிகத் தெளிவாக.

மறைமலையடிகளார் போன்றவர்கள் பார்ப்பனர் தமிழர் அல்லர் என்று தெளிவாகவே எழுதினர். ஆனாலும், இன்றைக்கு எல்லா பார்ப்பானையும் தமிழன், தமிழன் என்று எழுதுகிறார்கள்.

அதற்கு ஒரு உதாரணத்தை சொல்லவேண்டுமானால், மன்னார்குடியில் இருக்கின்ற அய்யர், கோபால் சுப்பிரமணியம் அவர்களுக்கு நீதிபதியாக வாய்ப்பில்லை என்று சொன்னால், தினமணி என்ன எழுதுகிறது, தமிழருக்கு வாய்ப்பில்லாமல் போய்விட்டது என்று மிகக் கவலையோடு எழுதுகிறது. 

தமிழர்கள் என்கிற போர்வை யில் யார் வருகிறார்கள்? பார்ப்பனர்கள் வருகிறார்கள். ஆகவேதான், முழுக்க முழுக்க திராவிடர் என்று சொன்னால் அவர்கள் வருவதில்லை; தமிழன் என்று சொன்னால், அவர்கள் வருகிறார்கள். எனவேதான், தெளிவாகவே இந்த அமைப்பை வைத்திருக்கிறோம். 

அதுமட்டுமல்ல, திராவிடர் கழகத்தைப் பொறுத்தவரையில், பார்ப்பனர்களை சேர்த்துக் கொள்ளாத இயக்கமாகவும் திராவிடர் கழகம் இருக்கிறது என்பது இருக்கிறதே, நம்முடைய தனித்தன்மையை அது காட்டக்கூடியதாக இருக்கிறது. மற்ற இயக்கங்களுக்கு இந்த உரிமையும், இந்தத் தெளிவும், இந்தக் கருத்தும் உண்டா? ஆகவேதான், தயவு செய்து அந்தக் குழப்பத்தில் யாராவது இருந்தால், இது சரியான நேரம்! அந்தக் குழப்பத்தில், மயக்கத்தில் இருந்து வெளியே வாருங்கள்!

தமிழ்நாட்டைத் தவிர வேறு எங்கெங்கே இருக்கிறது?

கேள்வி: திராவிடர் கழகம், தமிழ்நாட்டைத் தவிர வேறு எங்கெங்கே இருக்கிறது?

                                                                                      ------------------- சசிக்குமார், சென்னை

பதில்: மும்பை மகாராஷ்டிரத்திலே திராவிடர் கழகம் இருக்கிறது. அதேபோல், கருநாடகத்திலே திராவிடர் கழகம் அமைப்பு இருக்கிறது. இன்னுங்கேட்டால், மற்ற இடங்களில் சுயமரியாதை உணர்வு படைத்தவர்களும், நம்மை ஒத்த கருத்துள்ளவர்களும் ஏராளமாக இருக்கிறார்கள். நம்மைப் பொறுத்தவரையில், சுயமரியாதை இயக்கம் என்கிற ஒரு பண்பாட்டு அமைப்பு இருக்கிறது, அந்த உணர்வுகள் உலகம் முழுவதும் இருக்கிறது. பெரியார் பன்னாட்டமைப்பு இருக்கிறது. திராவிடர் கழகம் என்ற பெயரில் இருக்காதே தவிர, பன்னாட்டமைப்பு இருக்கிறது. மலேசியாவில் திராவிடர் கழகம் ஏறத்தாழ நூறு கிளைகளுக்குமேல் இருக்கிறது. ஆனால், நம்முடைய அமைப்பினுடைய கிளைகள் அல்ல. பெரியாருடைய கொள்கைகளை, அந்த நாட்டில் சுதந்திரமாக, அந்த நாட்டின் சூழ்நிலைகளுக் கேற்ப சொல்லக் கூடியவர்கள்.

சிங்கப்பூரில் பெரியார் மய்யம் - பெரியார் சமூக சேவை அமைப்பு என்கிற பெயரால் இருக்கிறது. பெரியார் பன்னாட்டு மய்யம், இப்பொழுது ஜெர்மனி யில்கூட தொடங்கப்பட்டது.

நாம் அகில இந்திய திராவிடர் கழகம் என்று சொல்வது கிடையாது. 

நம்முடைய பண்பாடு, நமது தேவைக்கேற்ப இதனை நாம் செய்துகொண்டிருக்கிறோம். கருநாடகத்தில் இருக்கின்ற தோழர்கள், அங்கே கருநாடக திராவிடர் கழக அமைப்பை வைத்திருக்கிறார்கள். மகாராஷ்டிரத்தில் உள்ள தோழர்கள் மராட்டியத்திலே அமைப்பு வைத்திருக் கிறார்கள்.

நீதிமன்றங்களில் தமிழ் மொழி வரவில்லை...

கேள்வி: தமிழ்நாட்டில் மருத்துவம், பொறியியல் போன்ற படிப்புகளில் தமிழ் இல்லை. வழக்கு மொழி யாக நீதிமன்றங்களில் தமிழ் மொழி வரவில்லை - அதுபற்றி உங்கள் கருத்து என்ன? 

--------------- எ.தினகரன், சென்னை

பதில்: நாம் தொடர்ந்து அதுபற்றி விடுதலையில் எழுதி வருகின்றோம். விடுதலையைத் தொடர்ந்து படித்திருந்தால் உங்களுக்குத் தெரிந்திருக்கும். பயிற்று மொழியாக இருந்தாலும், ஆட்சி மொழியாக இருந்தாலும் தமிழுக்கு முன்னுரிமை கொடுக்கவேண்டும் என்பதுதான் இருமொழிக் கொள்கையாகும். இரு மொழிக் கொள்கையில், தமிழ் , ஆங்கிலம் என்று வருகின்றபொழுது, தமிழை செயல்படுத்தாதது, அதுவும் உயர்நீதிமன்றத்தினுடைய நீதிபதிகள் தமிழிலேயே வாதாடுவதற்கும், தீர்ப்பு எழுதுவதற்கும் இடமில்லை சட்டத்திலே என்று சொல்கிறார்கள். கலைஞர் அவர்கள் ஆட்சியில் இருந்தபொழுது அதனை வலியுறுத்தி, மதுரையில் இருந்த நம்முடைய தோழர்கள், வழக்குரைஞர்கள், சென்னையில் இருந்த வழக்குரைஞர்கள் எல்லோரும் முயற்சி எடுத்த நேரத்தில், அது குடியரசுத் தலைவர் வரையில் சென்று, இன்னமும், மத்திய அரசாங்கத்தினுடைய அனுமதி இல்லாமல், கிடப்பில் கிடக்கின்ற செய்தியாக இருக்கிறது.

அதேநேரத்தில், இந்தி மொழியில், பல மாநிலங்களில் நிகழ்ச்சிகள், நீதித்துறை வாதங்கள் நடக்கின்றன. ஆங்கிலத்தையே அவர்கள் தவிர்த்திருக்கிறார்கள். ஆனால், உச்சநீதிமன்றம், பல உயர்நீதிமன்றங்களில் இன்னமும் ஆங்கிலம் இருக்கிறது. அந்தந்த மாநிலங்களில் இந்தியில் பேசுவதற்கு அனுமதிப்பதுபோல, நம்முடைய  தாய்மொழியான தமிழை நீதிமன்றங்களில் அனுமதிக்க வேண்டும். கேள்வி கேட்டவர் ஒன்றை மறந்துவிட்டார்; நீதிமன்றங்களில் தமிழ் மொழி வரவேண்டும் என்று போராடுகிறார்கள்; அதேபோல், மருத்துவம், பொறியியல் படிப்பிலும் வரவேண்டும்  என்று போராடுகிறார்கள். ஆனால், கோவிலில் தமிழ் இருக்கிறதா? நாம் கேட்ட பிறகுதான், தமிழிலும் அர்ச்சனை செய்யலாம் என்று எழுதி வைத்தார்கள். தமிழ்நாட்டில் ஏன், தமிழிலும் அர்ச்சனை செய்யலாம் என்பது  தேவையா? என்று கேட்ட பிறகு, உம்மை எடுத்து விட்டார்கள். தமிழில் அர்ச்சனை செய்யலாம் என்று எழுதி வைத்தார்கள்.

அதுவும் கேட்டால்தான் செய்வார்களே தவிர, கேட்கா விட்டால், கிடையாது. அந்த அளவிற்கு அங்கே சமஸ்கிருத ஆதிக்கம்.

எனவேதான், எந்த மொழியினுடைய ஆதிக்கம் - ஆங்கில மொழியின் ஆதிக்கமும் இருக்கக்கூடாது; சமஸ்கிருத ஆதிக்கமும் இருக்கக்கூடாது; அதே நேரத்தில், இந்தி மொழி ஆதிக்கமும் இருக்கக்கூடாது; அதேநேரத்தில், ஆங்கிலம் என்பது உலக சாளரம்; உலக அறிவுக்குத் தேவை என்று சொல்கிற அளவிற்கு, நாம் அதனை அறவே ஒதுக்கிவிடக் கூடாது என்பதில் மிகத் தெளிவாக இருக்கக் கூடியவர்கள்.

ஆட்சி மொழி தமிழாக இருக்கவேண்டும் என்பதில், அந்தப் போராட்டத்திற்கு ஆதரவு கொடுக்கக் கூடிய வர்கள். ஆட்சிமொழி தமிழாக எல்லாத் துறைகளிலும் இருக்கவேண்டும் என்பதற்கு மாற்றுக் கருத்தே இல்லை!

 

இளைஞர்களை எழுச்சியாளர்களாக மாற்ற உதவுவீர்களா?

கேள்வி: அய்யா, இளைஞர்கள் இன்று எழுச்சியை விரும்புகிறார்கள். திராவிடர் கழகம் வருங்காலங்களில் எழுச்சிமிகு போராட்டங்களை நடத்தி, இளைஞர்களை எழுச்சியாளர்களாக மாற்ற உதவுவீர்களா?

                                                                         ---------------- மாணிக்கம், ரிஷிவந்தியம்

பதில்: இப்பொழுதே உங்களுக்கு முன்புதானே ஒரு ஆகஸ்ட் போராட்டத்தை அறிவித்தோம். சற்று நேரத்திற்கு முன்பு செய்தியாளர்களிடம் உரையாற்றினேன். இந்தித் திணிப்பை எதிர்க்கக் கூடிய வகையில், அவர்கள் தொடர்ந்து வலை தளத்தில் அந்த முயற்சிகளை செய்துகாண்டிருப்பார்களேயானால், தந்தை பெரியார் அவர்களின் இயக்கம் ஆகஸ்டு ஒன்றாம் தேதி நடைபெறும் போராட்டத்தில், தார்ச்சட்டியும், பிரசையும் எடுத்து, ரயில்வே நிலையங்களில் உள்ள இந்தி எழுத்தை அழிப்போம் என்கிற போராட்டத்தினை அறிவித்துள்ளோம். இளைஞர்களான உங்களுக்கு நிறைய வாய்ப்புகள் உண்டு. தாராளமாக அந்தப் போராட்டத்திற்கு நீங்கள் வரலாம். ஆகவே, இப்பொழுதே நீங்கள் வீட்டிற்குச் சென்றவுடன் தார்ச் சட்டியையும், பிரசையும் தயார் படுத்தி வைத்துக் கொள்ளுங்கள்.

அலகாபாத் உயர்நீதிமன்றம் அளித்த தீர்ப்பு என்ன?

கேள்வி: அலகாபாத் உயர்நீதிமன்றத்தில் இந்திரா காந்திக்குக் கிடைத்த தீர்ப்பு என்ன?

                                                                                                  ----------- ம.தேன்மொழி, திருச்சி

பதில்: இந்திரா காந்தியினுடைய தேர்தல் வெற்றி செல்லாது என்பது தீர்ப்பு. ராஜ் நாராயணன் என்பவர் வழக்குத் தொடர்ந்திருந்தார். சின்கா என்பவர் நீதிபதியாக இருந்தார். இந்திரா காந்தியினுடைய வெற்றி செல்லாது என்று சொன்னவுடன், தலைவணங்கி அதனை ஏற்பதற்குப் பதிலாக, நாட்டில் உள்ளவர்கள் அதைப்பற்றி பேசக்கூடாது என்று சொல்லி, நெருக்கடி நிலையைக் கொண்டு வந்தார்கள். பலரை சிறைச்சாலைக்குக் கொண்டு சென்று மிசா கைதிகளாக ஆக்கியதும், எழுத்துச் சுதந்திரம், பேச்சுச் சுதந்திரத் தைப் பறித்ததும்,  நீதிபதிகளையே மிரட்டி, அவர்களை மாற்றியதும், இப்படி தொடர்ந்து பல கொடுமைகள் நிகழ்வதற்கு அந்தத் தீர்ப்புதான் காரணமாக அமைந்தது.

மதத்தை ஏற்காதவர்கள் என்ன குறிப்பிடலாம்?

கேள்வி: அரசே விண்ணப்பங்களில் எந்த மதம் என்று கேட்குபொழுது, மதத்தை ஏற்காதவர்கள் என்ன குறிப்பிடலாம்? 

                                                                                     ------- தமிழ்ச்செல்வம், திருவரங்கம்

பதில்: தாராளமாக, மதம் பிடிக்காதவர்கள் என்று எழுதலாம். 

எங்களுக்கெல்லாம் மதம் பிடிக்காது; பிடிக்க விடமாட்டோம் என்று எழுதலாம்.

கேள்வி: தமிழகத்தில் காணப்படும் திராவிட இயக்கக் கட்சிகளை ஒருங்கிணைத்து செயல்படுத்த வாய்ப்பு உண்டா?

                                                                                      -------------------- பிரபாகரன், கோவை

பதில்: அவசியம் வரும்பொழுது தாராளமாக வரலாம். ஆனால், ஒன்றே ஒன்று, தலைமைத்துவ வியாதி நமக்குள் இருக்கக்கூடாது, அதுதான் மிக முக்கியம். ஏனென்றால், பொதுவாக தமிழர்களைப்பற்றி ஒரு கருத்துண்டு. அது என்னவென்றால், ஆறு தமிழர்கள் இருந்தால், ஏழு கருத்துகள் இருக்கும் என்று சொல்வார்கள். ஆகவே, அப்படி இருந்தாலும், நாம் மிகத் தெளிவாக ஒரு பொதுக் கருத்தை நோக்கி, பொது இலக்கை நோக்கி, கூட்டமைப்பை உருவாக்குகின்ற காலம் கனியும்பொழுது, நிச்சயம் திராவிடர் கழகம் முன்னின்று அதனை செய்யும் என்பது உறுதி.

பார்ப்பனர்களை நம்முடைய இயக்கத்தில் சேர்த்துக் கொள்ளலாமா?

கேள்வி: பார்ப்பனர் நம்முடைய கொள்கைகளை ஏற்றுக் கொண்டால், நம்முடைய இயக்கத்தில் சேர்த்துக் கொள்ளலாமா?

                                                                                 ---------------- தேவா, திருவானைக்காவல்

பதில்: இதற்குண்டான பதிலை முன்பே சொல்லி விட்டேன். பார்ப்பனர் நமது கொள்கையை ஏற்றுக் கொண்டால், அவரைப் பாராட்டலாம், ஒரு பயனாடை அணிவித்து, சிறப்பாக வாழுங்கள் என்று வாழ்த்தலாம். ஆனால்,அவர் அங்கேயே இருக்கவேண்டுமே தவிர, ஏன் அவர் இங்கே வந்து, நமக்கு அவர் ஏன் சந்தேகத்திற் குரியவராக ஆகவேண்டும்? அது தேவையில்லை. அவர் திருந்தினார் என்றால், திருந்தி வாழ்வதற்கு வாழ்த்து சொல்வோம்.  

எவ்வளவோ பேர் திருந்தியிருக்கிறார்கள். எல்லோரும் நம் வீட்டுக்குள்ளேயே வந்திருக்கிறார்கள். எதிர் வீட்டுக்காரர் திருந்திவிட்டார் என்றால், உடனே நாம் உங்கள் வீட்டை விட்டு, எங்கள் வீட்டிற்கு வந்துவிடுங்கள் என்று நாம் கூப்பிடவேண்டிய அவசியம் இல்லை. அவர் திருந்திவிட்டார் என்றால், நமக்கு நண்பராக இருப்பார்; நமக்குத் தொந்தரவு கொடுக்கமாட்டார். அவரை மதிப்போம்; வாழ்த்துவோம்; பாராட்டுவோம். நீங்கள் உங்கள் இடத்திலேயே இருங்கள்; நாங்கள் எங்கள் இடத்திலேயே இருக்கிறோம். இரண்டு பேரும் ஒருவருக்கொருவர் சந்தேகக் கண்கொண்டு பார்க்கவேண்டாம் என்று சொல்லக் கூடிய நிலையில் இருப்போம். பழைய வரலாற்றிலிருந்து பாடம் பெறவேண்டாமா?

ஜாதி ஒழிய  நாம் என்ன செய்யவேண்டும்?

கேள்வி: ஜாதி ஒழிய  நாம் என்ன செய்யவேண்டும்? அரசு என்ன செய்யவேண்டும்?

                                                                                     --------------------- சரவணன், பெரம்பலூர்

பதில்: ஜாதி ஒழிவதற்கு நீங்கள் சுலபமாக செய்யவேண்டிய வழி இருக்கிறது. எங்கள் ஜாதிகளில் நான் திருமணம் செய்துகொள்ளமாட்டேன் என்று உறுதி எடுங்கள்; யார் சொன்னாலும், அதனை செய்யமாட்டேன் என்று உறுதி எடுங்கள். கவுரவக் கொலை, அது, இது என்று மிரட்டினார்கள் என்றால், நாங்கள் ஒரு கை பார்ப்போம் என்று சொல்வதற்குத் துணிவு கொள்ளுங்கள். அதுதான் மிக முக்கியம். ஏனென்றால், தற்காப்பிற்கு சட்டத்தில் உரிமை உண்டு. அதில் ஒன்றும் சந்தேகமில்லை.

ஆகவே, உங்களைப் பொறுத்தவரையில், ஜாதி உணர்வுக்கு நான் ஆளாகமாட்டேன்; என் ஜாதி, உன் ஜாதி என்கிற பிரிவினைக்கு ஆளாகமாட்டேன் என்பதில் தெளிவாக இருக்கவேண்டும்.

அடுத்தபடியாக, அரசாங்கத்தைப் பொறுத்தவரையில், ஜாதி ஒழிப்பிற்கு சட்டம் - நாம் ஏற்கெனவே சொல்லியிருக்கிறோம் - மத்திய அரசாங்கம் அரசியல் சட்டத்தைத் திருத்தவேண்டும். அதில் 18 இடங்களில் ஜாதி என்ற சொல் இருக்கிறது. அந்த வார்த்தையை எடுக்கவேண்டும். ஜாதி தடை செய்யப்பட்டது என்று போடவேண்டும்.

இட ஒதுக்கீடு ஜாதி அடிப்படையில் இருக்கிறதே என்று சில பேர் கேட்கலாம். தீண்டாமை ஒழிக்கப்பட்டுவிட்டது - ஆனால், அதன் காரணமாக கீழே உள்ளவர்களுக்கு வாய்ப்புக் கொடுப்பவர்களுக்காக சில ஆண்டுகள் வரையில் சலுகைகள் கொடுக்கலாம்.

ஆகவே, மத்திய அரசு அரசியல் சட்டத்தைத் திருத்தி, மத்திய அரசு சட்டமாகவே, இந்தியாவில் ஜாதி கூடாது; ஜாதி தடை செய்யப்படுகிறது என்று வந்தால், தானாகவே இந்தப் பிரச்சினைக்குத் தீர்வு ஏற்படும்.

                         ----------------------------------"விடுதலை” 10-07-2014

Read more: http://viduthalai.in/page-4/83751.html#ixzz374ZZxwHR