இந்து மதம் விதைத்த விஷச்செடி இன்னும் உயிரோடு இருக்கிறதே!

ஆடையூர் அவலம்

திருவண்ணாமலையை அடுத்த ஆடையூரில் ஊராட்சி ஒன்றிய நடுநிலைப் பள்ளி; அப்பள்ளியில் 135 இருபால் மாணவர்கள் படித்துக் கொண்டுள்ளனர். அப்பள்ளியில் இதுவரை தாழ்த்தப்பட்ட சமூகத்தைச் சேர்ந்த மாணவர்கள் சேர்க்கப்படவில்லை என்கிற தகவல் அதிர்ச்சி அளிக்கக் கூடியது. இச்செய்தி வெளியில் வராமல் இருந்தது எப்படி என்பது கூட திகைப்பாகவே இருக்கிறது.

ஆடையூரில் வாழும் தாழ்த்தப்பட்ட சமூகத்தைச் சேர்ந்த குமார் என்பவர் தனது மகன்கள் சதீஷை ஆறாம் வகுப்பிலும், முத்து ராஜை முதல் வகுப்பிலும் 6.5.2012 அன்று அப்பள்ளியில் சேர்த்துள்ளார்.

இதனை எதிர்க்கும் வகையில் மற்ற ஜாதியினர் தம் வீட்டுப் பிள்ளைகளைப் பள் ளிக்கு அனுப்பவில்லையாம். அனுப்பாததோடு மட்டுமல்லாமல் பள்ளித் தலைமை ஆசிரியரிடம் வந்து தகராறும் செய்துள்ளனர்.

இதுகுறித்து மாவட்ட ஆட்சியரிடம் புகார் சென்று, அதிகாரிகள் தலையிட்ட பிறகு, பிரச்சினை தீர்வுக்கு வந்துள்ளது. தாழ்த்தப்பட்ட சமூகத்தைச் சேர்ந்த மாணவர்கள் தொடர்ந்து அப்பள்ளியில் படித்து வருகின்றனர் என்பது நல்ல செய்தியாகும்.
பெற்றோர்களின் ஜாதி வெறி கண்டிக்கத் தக்கது என்றாலும், அவர்கள் நடந்து கொண்ட விதத்தால் அப்பள்ளியில் படிக்கும் தாழ்த்தப் பட்ட மாணவர்களோடு மற்ற ஜாதிகளைச் சேர்ந்த மாணவர்கள் நெருக்கமாகப் பழகிட முடியுமா?

அந்தப் பிள்ளைகள்தான் இயல்பாகக் கலந்து படிக்கக் கூடிய சூழலும், மனநிலையும் ஏற்படுமா? தங்கள் நெஞ்சில் தேக்கி வைத்துள்ள நஞ்சை தங்களோடு முடித்துக் கொள்ளாமல் அடுத்த தலைமுறையினருக்கும் தாராளமாக வழங்கும் கேவலத்தை என்ன சொல்ல! இந்த 21ஆம் நூற்றாண்டிலும் இந்து மதம் விதைத்த விஷச் செடி இன்னும் உயிரோடு இருக்கிறதே!

நீதிக்கட்சி ஆட்சிக் காலத்திலேயே இன்றைக்கு 90 ஆண்டுகளுக்கு முன், தாழ்த்தப் பட்ட சமூக மாணவர்களைச் சேர்க்காத கல்வி நிறுவனங்களுக்கு அளிக்கப்படும் மான்யம் நிறுத்தப்படும் என்றும், தாழ்த்தப்பட்டவர்களை அனுமதிக்காத பேருந்துகளின் உரிமம் ரத்து செய்யப்படும் என்றும் அறிவிக்கப்பட்டு நடைமுறைப்படுத்தப்பட்டுள்ளது.

ஆனால் ஆனந்த சுதந்திரம் அடைந்து விட்டதாக ஆடிப் பாடும் ஒரு நாட்டில் அதற்காக பொன் விழா கொண்டாடப்பட்ட இந்திய நாட் டில், இப்படி ஒரு கொடுமை என்பது மன்னிக்க முடியாத ஒன்று. ஒரு சுதந்திர நாட்டின் அரசமைப்புச் சட்டத்தில் ஜாதியைப் பாதுகாக்கும் பிரிவு இருக்கலாமா?

ஜாதி இருக்கும் நாட்டில் சுதந்திரம் இருக்குமா? சுதந்திரம் இருக்கும் இடத்தில் ஜாதிக்கு இடம் இருக்கலாமா என்ற வினாவை எழுப்பினாரே - தந்தை பெரியார். அந்தக் கேள்விக்கு இதுவரை பதில் உண்டா?

இந்தக் காரணத்துக்காகத்தான் 1957 நவம்பர் 26இல் ஜாதியைப் பாதுகாக்கும் இந்திய அரசமைப்புச் சட்டத்தின் பிரிவை எரிக்கும் போராட்டத்தை நடத்தி, அதன் காரணமாகப் பல்லாயிரக்கணக்கான திராவிடர் கழகத் தோழர்கள், கருஞ்சட்டையினர் மூன்று ஆண்டுகள் வரை கடுங்காவல் தண்டனையை அனுபவிக்க நேர்ந்ததே!

இன்றுவரை இதில் மாற்றமில்லாத நிலை தானே - அதன் தீய விளைவுதானே ஆடையூர் சம்பவம்!

ஆடையூர் பள்ளியில் தாழ்த்தப்பட்ட மாணவர்களைச் சேர்க்கக் கூடாது என்று தகராறு செய்தவர்கள்மீது. தீண்டாமை ஒழிப்புச் சட்டத்தின் கீழ் வழக்குப் பதிவு செய்து உரிய தண்டனையைப் பெற்றுத் தர வேண்டும். அப்பொழுதுதான் ஜாதி வெறியர்களுக்கு மனத்தளவிலாவது ஓர் அச்சம் ஏற்படும். மயிலே மயிலே என்றால் இறகு போடாது என்பது நம் நாட்டுப் பழமொழி!
--------------------"விடுதலை”தலையங்கம் 15-6-2012