ஞானசூன்யமா இந்த ஜெகத்குரு?ஜெயேந்திர சரஸ்வதி

காஞ்சிபுரம் சங்கராச்சாரியார் என்று கூறப்படும் ஜெயேந்திர சரஸ்வதி என்பார் கொலைக் குற்றத்தின் கீழ் பிணையில் நடமாடும் பேர் வழி.

கிரிமினல் குற்றத்தின்கீழ் 61 நாள்கள் சிறையில் கம்பி எண்ணி விட்டு வந்துள் ளோமே என்கிற வெட்கம் சிறிதும் இல்லாத ஆசாமி இவர்!
அது ஒருபுறம் இருக்கட்டும்; ஆன்மீக சம்பந்தப்பட்ட விஷயங்களிலாவது ஞானம் உண்டா என்று கேட்டால் அதிலும் சைபர்தான்!

காஞ்சி மடத்தின் பிரதான ஆதரவோடு நடைபெற்றுவரும் காமகோடி மே மாத இதழில் பேட்டி ஒன்று கொடுத்துள்ளார்.

கேள்வி: ஆஸ்திகம், நாஸ்திகம் பற்றி ஸ்வாமிகளின் விளக்கம் என்ன? உண்மை யான ஆஸ்திகன் எப்படி இருக்கவேண்டும்?

ஜெயேந்திர சரஸ்வதி பதில்: நாஸ்திகம் என்று சொல்லும்போதே அது ஆஸ்திகத்தின் எதிர்மறையானது என்பது புரியும். கடவுள், கர்ம சித்தாந்தம், பாவ புண்ணியங்கள் இவைகளை ஏற்றுக் கொண்டவர்கள் ஆஸ்திகர்கள்; இவைகளை ஏற்றுக் கொள்ளாதவர்கள் நாஸ்திகர்கள்; உண்மையான ஆஸ்திகர் அனுஷ்டானங்களையும், கர்மாக்களையும் விடாமல் செய்வர் என்று ஜெயேந் திரர் கூறியுள்ளார்.

இவர் இப்படி சொல்ல, இவரின் குருநாத ரான மறைந்த காஞ்சி சங்கராச்சாரியார் சந்திரசேகரேந்திர சரஸ்வதி ஆஸ்திகம், நாஸ்திகம் என்பதற்கு என்ன விளக்கம் சொல்லுகிறார்?

இதோ அவரின் தெய்வத்தின் குரல் பேசுகிறது. (இரண்டாம் தொகுதி பக்கம் 407-408).

நாஸ்திகம் என்றால் ஸ்வாமியில்லை என்று சொல்கிற நிரீஸ்வரவாதம் என்று தானே இப்போது நாம் நினைத்துக் கொண்டிருக்கின்றோம். இது தப்பு. ஸ்வாமி யில்லை என்று சொல்லிக் கொண்டேகூட ஆஸ்திகர்களாக இருக்க முடியும்.

அப்படிப்பட்ட பல பேர் இருக்கின்றார்கள். இது என்ன வேடிக்கையாக இருக்கிறது? அப்படியானால் ஆஸ்திகம் என்றால் என்ன? ஆஸ்திகம் என்றால் வேதத்தில் நம்பிக்கை இருப்பது என்றுதான் அர்த்தம்.

வைதிக வழக்கை ஆட்சேபிப்பதுதான் நாஸ்திகம் என்பதே ஞான சம்பந்தரின் கொள்கையாகவும் இருந்திருக்கிறது. ஈசுவர பக்தி இல்லாமலிருப்பதால் கூட அல்ல... என்று கூறுகிறாரே!

இதில் யார் சொல்லுவது உண்மை?

கடவுள் நம்பிக்கை இல்லாமலிருப்பதுதான் நாஸ்திகம் என்கிறார் ஜெயேந்திர சரஸ்வதி.

கடவுள் நம்பிக்கை இல்லாவிட்டாலும் வேதத்தை நம்பினால் அவர் ஆஸ்திகர் தான்.

நாஸ்திகர் என்பது கடவுளை மறுப்பதல்ல. வேதத்தை மறுப்பதுதான் என்கிறார் சந்திரசேகரேந்திர சரஸ்வதி? எது உண்மை?

ஜெயேந்திர சரஸ்வதி கூறுவதுதான் தவறு - அவருக்குத் தெரிந்ததெல்லாம் காமாந்தகார சமாச்சாரங்கள்தாம் - விட்டால் அதுபற்றி மனுஷன் மணிக்கணக்கில் பேசுவார். மாமிகளிடம் செல்போன்களில் பேசவே அவருக்கு நேரம் போதவில்லை; அப்படி இருக்கும்போது சாஸ்திரத்தைப் படிக்க அவருக்கு நேரம் ஏது?

இந்து மத சாஸ்திரங்கள் என்ன கூறுகின்றன? குறிப்பாக இந்து மதத்தின் மனுதர்ம சாஸ்திரம் என்ன சொல்லுகிறது?

வேதம் (சுருதி) தரும சாஸ்திரம் (ஸ்மிருதி) இவ்விரண்டையும் தர்க்க யுக்தியைக் கொண்டு மறுப்பவன் நாஸ்திகனாகின்றான் (மனுதர்மம்: அத்தியாம் 2 சுலோகம் 11)

கடவுளை மறுத்தாலும் பரவாயில்லை வேதத்தை ஏன் மறுக்கக் கூடாதாம்?

அங்கேதான் இருக்கிறது தங்கமலை இரகசியம்! வேதம்தான் நான்கு வருணாசிரம தர்மத்தை வலியுறுத்துகிறது. அந்த வர்ணா சிரமம் நிலைத்தால்தான் பார்ப்பான் பிராமணர் ஆகிறான்; பிர்மாவின் முகத்தில் பிறந்தவன் ஆகிறான்.

அதன் காரணமாக பிராமணனுக்கு என்ன லாபம்?

இதோ அதே மனுதர்ம சாஸ்திரம்தான் கூறுகின்றது!

பிராமணன் முதல் வருணத்தான் ஆனதாலும், பிரம்மாவின் உயர்ந்த இடத்தில் (முகத்தில்) பிறந்ததனாலும் இந்த உலகத்தில் உண்டாயிருக்கிற சகல வருணத்தாருடைய பொருள்களையும் தானம் வாங்க அவனே பிரபுவாகிறான்
(மனுதர்மம்: அத்தியாயம் - 1 சுலோகம் 100)

இந்த வசதியும், வாய்ப்பும் வேதத்தில் இருப்பதால் கடவுளைவிட பார்ப்பனர்களுக்கு வேதம்தான் அவசியமாகிறது.

திராவிடர் கழகம் மனுதர்ம சாஸ்திரத்தை ஏன் கொளுத்தியது என்பது இப்பொழுது புரிகிறதா?

இன்னொன்றும் முக்கியம்.

சங்கராச்சாரியாருக்குள்ளேயே ஒரு முக்கிய விஷயத்தில் முரண்பாடு! ஞான சூன்யங்கள்தான் அவாளுக்கு லோகக் குருவோ!

-----------------------"விடுதலை” 6-6-2012