இந்தி எதிர்ப்புக் களத்தில் பெண்கள்

1938 நவம்பர் 14 தமிழ்நாட்டின் வரலாற்றில் வீரஞ் செறிந்த ஒப்பரும் நாள். இந்நாளில்தான் இந்தி எதிர்ப்புக் களத்தில் பெண்கள் முதன் முதலாகப் போர்க் கோலம் பூண்டு, மறியல் செய்து சிறைக்கோட்டம் சென்ற மயிர்க் கூச் செறியும் மகத்தான நாள்.

இதற்கு முதல் நாள்தான் (13-11-1938) சென்னை ஒற்றைவாடை அரங்கில் நடந்த தமிழ்நாட்டுப் பெண்கள் மாநாட்டுக்கு திருவாட்டி நீலாம்பிகை அம்மையார் (மறைமலை அடிகளார் மகள்) தலைமை தாங்கி உரையாற்ற, தோழியர் மீனாம்பாள் சிவராஜ் தமிழ்க் கொடி உயர்த்த, பண்டிதை நாராயணி அம்மையார் மாநாட்டைத் திறந்து வைத்தார். தாமரைக் கண்ணி அம்மையார் வரவேற்புரை ஆற்றினார். நாகம்மையார் படத்தினை தோழியர் பார்வதி அம்மையார் திறந்து வைத்தார். டாக்டர் தருமாம்பாள், மூவலூர் இராமாமிர்தம் அம்மையார் போன்றோர் கலந்து கொண்டு சிறப்பித்தனர்.

பெரியார் பட்டம்

அம்மாநாட்டில்தான் பெரியார் என்ற பட்டம் சூட்டப்பட்டது. இந்தியாவில் இதுவரை தோன்றிய சீர்திருத்த தலைவர்களால் செய்ய இயலாமற் போன வேலைகளை நம் மாபெரும் தலைவர் ஈ.வெ.ரா. அவர்கள் செய்து வருவதாலும், தென்னாட்டில் அவருக்கு மேலாகவும், ஒப்பாகவும் நினைப்பதற்கு வேறு ஒருவரும் இல்லாமையானும் அவர் பெயரைச் சொல்லிலும், எழுத்திலும் வழங்கும்போது பெரியார் என்ற சிறப்புப் பெயரையே வழங்கவேண்டும் என்று முதல் தீர்மானம் நிறைவேற்றப்பட்டது. அம் மாநாட்டில் தந்தை பெரியார் ஆற்றிய உரை இந்தி எதிர்ப்புப் போராட்டத்தில் பெண்கள் பங்கு பெறச் செய்யத் தூண்டினார் என்று குற்றம் சாற்றப்பட்டு தண்டனை வழங்கப் பட்டது. தந்தை பெரியார் உரை கேட்டு மகளிர் போர்க் கோலம் பூண்டனர்.

1938 நவம்பர் 14 சென்னையில் பெத்து நாயக்கன் பேட்டை காசி விசுவநாதர் கோயில் அருகிலிருந்து டாக்டர் தருமாம்பாள், இராமாமிர்தம் அம்மையார், மலர்முத்தம்மையார், பட்டம்மாள் (பாவலர் பாலசுந்தரம் அவர்களின் துணைவியார்), சீதம்மாள் ஆகியோர் இந்து தியாலாஜிகல் பள்ளி நோக்கி மறியலுக்குப் புறப்பட்டனர்- கைது செய்யப்பட்டனர். நீதிபதிகள் எவ்வளவோ கேட்டுக் கொண் டும் முன் வைத்த காலைப் பின் வைக்க மறுத்தனர் வீரத்தாய்மார்கள். தொடர்ந்து ஒவ்வொரு நாளும் மறியலில் ஈடுபட்டுக் கொண்டே இருந்தனர்.

1938ஆம் ஆண்டு இந்தி எதிர்ப்புப் போரில் சிறை சென்ற வீரப் பெண்கள் 73 பேர்; அவர்களுடன் சென்ற குழந்தைகள் 32 பேர். தமிழ்நாட்டுப் பொது வாழ்வில் பெண்கள் போர்க் கோலம் பூண்டு சிறைக் கோட்டம் ஏகியது என்பது இந்த இந்தி எதிர்ப்புப் போராட்டத்திலும் என்பது குறிப்பிடத் தக்கதாகும்.

வேலூரில் மீண்டும் ஒரு முறை 1938ஆம் ஆண்டு டிசம்பர் 26-லும் நடை பெற்றுள்ளது. இந்தி எதிர்ப்புப் போரில் சிறைக் கோட்டம் ஏகிய மூதாட்டிகள் தருமாம்பாள், கொடியேற்றிட, நாராயணி யம்மாள் தலைமையில் நடைபெற்றுள்ளது. தாமரைக் கண்ணி அம்மையார் மாநாட் டுத் திறப்பாளர். இந்தி எதிர்ப்புப் போராட்டம் காரணமாக தந்தை பெரியார் அவர்கள் சிறைக் கோட்டத்தில் இருந்த அந்த கால கட்டத்தில் இந்தத் தமிழ்ப் பெண்கள் மாநாடு நடைபெற்றுள்ளது.

அந்த கால கட்டத்தில் பார்ப்பனர்கள் எவ்வளவு கேவலமாக நடந்து கொண் டனர் என்பதற்கு அம் மாநாட்டில் அமைச் சர் டி.எஸ்.எஸ்.ராஜன் பற்றி நிறைவேற் றப்பட்ட தீர்மானமே சான்றாகும்.

1. சிறை சென்ற பெரியார் ஈ.வெ.ரா. தொண்டர்கள், தாய்மார்கள் ஆகியோரை இம்மாநாடு பாராட்டுகிறது.

2. இந்தி எதிர்ப்பிற்காகச் சிறை வைக் கப்பட்டுள்ள எல்லோரையும் நிபந்தனை யின்றி உடனே விடுதலை செய்யுமாறு அரசாங்கத்தாரை வற்புறுத்துகிறது.

3. குழந்தைகட்குப் பால் கிடைக்கு மென்று கருதியே பெண்கள், குழந்தைகளுடன் சிறைக்கு வருகிறார்கள் என்று மந்திரி கனம் டாக்டர் ராஜன் கூறியதை வாபஸ் வாங்கிக் கொண்டு மன்னிப்புக் கேட்கவேண்டும்; இன்றேல் மந்திரி பதவியை விட்டு ராஜிநாமா செய்ய வேண் டும் என இம்மாநாடு தீர்மானிக்கிறது.

4. விதவை மணத்தையும், கலப்பு மணத்தையும் இம்மாநாடு பெரிதும் ஆதரிப்பதுடன் பால்யமணம் செய்தல் கூடாதெனத் தமிழ் மக்களை வேண்டிக் கொள்கிறது.

திராவிடர் கழகம்தான்

பெண்களின் உரிமைகளுக்காக மாநாடு கூட்டுவது - போர்ப்பறை கொட் டுவது - தீர்மானங்களை நிறைவேற்றுவது - பேரணி நடத்தி முழக்கமிடுவது என்பன போன்ற முற்போக்கு நடவடிக்கைகள் அனைத்தையும் செய்தது - இந்தியத் துணைக் கண்டத்திலேயே தமிழ்நாட்டில் தான் - அதற்குக் காரணம் புரட்சித் தந்தை பெரியாரும், திராவிடர் இயக்கமும்தான்.

திருவாட்டி தருமாம்பாள் தலைமையில் மகளிர் இந்தியெதிர்ப்பு மாநாடு நடை பெற்றது. தமிழ்ப் பெண்டிர் பல இந்தி எதிர்ப்பு மாநாடுகளிலும், போராட் டங்களிலும் பங்கு கொண்டாலும், பெண் களுக்கென பெண்களே நடத்திய முதல் இந்தியெதிர்ப்பு மாநாடு இதுவேயாம். தமிழ்நாட்டில் முதன் முதலாக 1938ஆம் ஆண்டு ஜனவரித் திங்கள் 3 ஆம் நாள் நடந்த இந்தியெதிர்ப்புப் போராட்டத்தில் 73 பெண்கள் கைது செய்யப்பட்டதை முன்னமே கூறினோம்.

ஜூன் 27 இரு வீராங்கனைகளை நினைவூட்டும் நாள். திராவிட இயக்க வீராங்கனை மூவலூர் ஆ.இராமாமிர்தம் (1962) அலர்மேலு அப்பாதுரையார் (2001) ஆகியோர் நினைவு நாள்.

இந்த இரு வீராங்கனைகளும் 1938 இல் நடைபெற்ற இந்தி எதிர்ப்புப் போராட் டத்தில் பங்கு கொண்டு சிறை சென்ற சீலர்கள் ஆவர். பன்மொழிப் புலவர் கா.அப்பாதுரையார் அவர்களின் இணை யரான அலர் மேலு அம்மையார் தி.மு.க. மகளிர் அணிச் செயலாளராகவும், தமிழ் நாடு சட்ட மேலவை உறுப்பினராகவும் இருந்தவர் ஆவார்.

தமிழர் பெரும்படை

1-8-1938 அன்று திருச்சி உறை யூரிலிருந்து இந்தியை எதிர்த்துத் தமிழர் பெரும்படை தஞ்சை அய்.குமாரசாமிப் பிள்ளை அவர்களின் தலைமையில், உறையிலிருந்து வெளிப்பட்ட வாளாகப் புறப்பட்டது. அஞ்சாநெஞ்சன் பட்டுக் கோட்டை கே.வி.அழகிரிசாமி படையை நடத்தும் தளபதியாகச் செயல்பட்டவர். நூறுபேர் கொண்ட அந்தத் தமிழர் பெரும் படையில் ஒரே ஒரு பெண் மூவலூர் இராமாமிர்தம் அம்மையார் என்றால்,

அந்தத் தீரத்தை என்னவென்று சொல்வது! நடைப் பயணம் என்றால் சாதாரண மானதல்ல. 577 மைல்கள். படை என்னும் அந்த நதி சென்னைக் கடற்கரையில் சங்கமித்தபோது அங்கு ஒன்றரை லட்சம் மக்களைக் கொண்ட ஒரு பெருங்கடல் உள் வாங்கிக் கொண்டது.

தமிழ்நாடு தமிழருக்கே

அந்த வரவேற்புப் பொதுக் கூட்டத்தில்தான் தந்தை பெரியார் தமிழ்நாடு தமிழருக்கே! எனும் முழக்கத்தை முதன் முதலாக முன் வைத்தார். மறைமலை அடிகள் தலைமை வகித்த அந்த மாபெரும் கூட்டத்திலும் மூவலூர் இராமாமிர்தம் அம்மையாரும் உரையாற்றினார் என்பது குறிப்பிடத்தக்கதாகும்.

திருவாரூரில் பிறந்த அம்மையாரின் பெற்றோர் கிருஷ்ணசாமி - சின்னம்மாள் வறுமையின் காரணமாக பத்து ரூபாய்க்கும், ஒரு முழம் புடவைக்குமாக விற்கப் பட்டவர் - விலைக்கு வாங்கிக் கொண் டவர் ஆச்சிக் கண்ணு.

மூவலூரில் வாழ்ந்து வந்தாலும் ஆச்சிக் கண்ணு தம்மை வளர்த்து எடுத்தாலும் நன்றி உணர்வோடு, தன் பெயரில் மூவலூர் ஆ.இராமாமிர்தம் என்று இணைத்துக் கொண்டவர்.

காங்கிரஸ் கட்சியில் மாகாணக் குழு உறுப்பினராகவும் இருந்தவர். தந்தை பெரியார் காங்கிரசை விட்டு வெளியேறி யதும் அவரும், உடன் வெளியேறி சுய மரியாதை இயக்கத் தொண்டராக, பேச்சாளராக நாட்டில் வலம் வந்தார். தேவதாசி என்று கூறப்படும் சமூகத்தில் பிறந்ததால் அதன் கொடுமைகளை உணர்ந்தவர் - தாசிகளின் மோக வலை எனும் நூலை எழுதியவர். தேவதாசி முறை ஒழிப்புக்கு டாக்டர் முத்துலட்சுமிக்கு தோள் கொடுத்த மூதாட்டியை எப்படித் தான் மறக்க முடியும்?

நம் முன்னோர்கள் - அதாவது நம் பாட்டிகள் கொளுத்திவிட்டுப் போன மொழி உணர்வுத் தீ இன்னும் அணைந்து விடவில்லை. இந்தி என்றைக்கும் நம்மை இரண்டாம் தர குடிமக்களாக ஆக்க முடியாது - நம்முடைய குழந்தைக்கும் நாம் தமிழைத்தான் பாலாக ஊட்டியிருக் கிறோம். அவர்களும் பரம்பரை நெருப்பை மொழி உணர்வு நெய்விட்டு வளர்ப்பார்கள் என்பதை உறுதியோடு தெரிவித்துக் கொள்கிறேன்.

கோட்சேக்கள் கூட்டம்
கொணர்ந்தது இந்தி
கொலைகாரக் கொள்கையினை
நடுங்கச் செய் முந்தி
- என்ற பாவேந்தரின் வரிகள் நமக்கு மொழி உணர்ச்சியினை ஊட்டியது என் பதற்கு இதைவிட வேறு என்ன சான்று இருக்க முடியும் என்று உரையாற்றினார்.

பெண்கள் சாதனை செய்வது என்பது புதிதல்ல. ஆனால் வேலூரில் 2012 மே 29 ஆம் நாளும் தமிழக சரித்திரத்தில் முக்கிய இடம் பிடிக்கப்போகிறது. இம்மாநாட்டில் படிக்கப்படும் ஒவ்வொரு தீர்மானமும் நாளை நாடாளுமன்றத் திலும், சட்டமன்றங்களிலும் படிக்கப்பட்டு சட்டங்களாக நிறைவேற்றப்படும் என்பதை உறுதியோடு தெரிவித்துக்கொள்கிறேன்.

---------------------வேலூரில் 29-5-2012 அன்று நடைபெற்ற புத்துலகப் பெண்கள் எழுச்சி மாநில மாநாட்டில், இந்தி எதிர்ப்புக் களத்தில் பெண்கள் என்ற தலைப்பில் ஆற்றிய உரை. "விடுதலை” 4-6-2012