சேது சமுத்திரத் திட்டத்தை செயல்பட வைக்க போர்! போர்!! போர்!!!

போர்! போர்!! போர்!!!

தி.மு.க. தலைவர் மானமிகு கலைஞர் அவர்களின் 90ஆம் ஆண்டு பிறந்த நாள் விழா நேற்று நாடு தழுவிய அளவில் மிகுந்த உணர்ச்சியுடனும், மகிழ்ச்சியுடனும் கொண்டாடப்பட்டுள்ளது.

குருதிக் கொடை - ஏழை - எளிய மக்களுக்கு நல உதவிகள் என்று பயனுள்ள வகையிலும் விழா நடைபெற்றுள்ளது.

நேற்று சென்னையில் ஒய்.எம்.சி.ஏ. திடலில் தென் சென்னை மாவட்ட தி.மு.க. சார்பில் எழிலோடும், வலிவோடும் பிறந்த நாள் விழா கொண்டாடப்பட்டது. தேனாம்பேட்டையில் இருக்கும் அண்ணா அறிவாலயத்தை இராயப்பேட்டை ஒய்.எம்.சி.ஏ. திடலில் இடம் பெயரச் செய்து விட்டார்களோ என்று யாரும் மலைக்கும் அளவுக்கு விழா மேடை அமைக்கப்பட்டு இருந்தது.

மானமிகு கலைஞர் அவர்களின் பன்முகங்களைப் பற்றி பலரும் எடுத்துக் கூறினர். திராவிடர் கழகத் தலைவர் மானமிகு கி.வீரமணி - கலைஞரின் பொது வாழ்வின் வெற்றிக்கு அடித்தளமாக இருந்தது இருப்பது தந்தை பெரியார் அவர்களிடத்தில் அவர் பெற்ற பயிற்சியும், சுயமரியாதைப் பகுத்தறிவுக் கொள்கையும் தான் என்று எடுத்துக் கூறி - கழகம் கட்டுப்பாடு கவசத்தைக் கைவிடாமல் ஒற்றுமையாக இருந்து செயல்பட்டால் எதிரிகளின் வியூகங்களை கலைஞர் அவர்கள் தூள் தூளாக்கி விடுவார் என்று சொன்ன கருத்து மிகவும் முக்கியமானது.

எழுச்சித் தமிழர் மானமிகு தொல். திருமாவளவன், தேவையற்ற சந்தேகப் புயலின் வாக்கியத்துக்கு முற்றுப் புள்ளி வைத்தார் - அரசியலில் கலைஞர் அணியில்தான் விடுதலைச் சிறுத்தைகள் கட்சி என்பதை அய்யந்திரிபற வெளிப்படுத்தினார்.

ஏற்புரை வழங்கிய தி.மு.க. தலைவர் கலைஞர் தமது பிறந்த நாள் செய்தியாக வெளியிட்ட கருத்து வியந்து வியந்து பாராட்டத் தகுந்ததும், பெருமைக்கும் உரியதாகும்.

தி.மு.க. ஆட்சியில் மக்களுக்கான சிறந்த திட்டங்களை அ.இ.அ.தி.மு.க. அரசு புறந்தள்ளிய தவறான போக்கைப் பட்டியலிட்டுக் காட்டியது மிகவும் சரியானதே!

தேர்தலில் வெற்றி பெறும் ஒரு கட்சி கடந்த ஆட்சியின் தொடர்ச்சி என்பதைப் புரிந்து கொண்டு செயல்படாத ஆட்சி, மக்கள் நல ஆட்சியாக இருக்க முடியாது.

முக்கியமாக தமது பிறந்த நாள் செய்தியாக போராட்டத்தை கலைஞர்  அறிவித்தார். தமிழர்களின் நீண்ட கால திட்டமான சேது சமுத்திரக் கால்வாய்த் திட்டத்தை செயல்படுத்த விடாமல் அ.இ.அ.தி.மு.க. அரசு - அதன் முதல் அமைச்சர் உச்சநீதிமன்றத்தில் முடக்கி இருப்பதை பல்லாயிரக்கணக்கில் கூடியிருந்த மக்கள் கடல்முன் அம்பலப்படுத்தியது சரியான செயல்பாடே!

சேது சமுத்திரக் கால்வாய்த் திட்டத்தைச் செயற்படுத்தினால் கடல் பயண நேரத்தில் 36 மணி நேரமும், 555 கி.மீ., தூரமும் மிச்சப்படும். தூத்துக்குடி அனல் மின் நிலையத்துக்கு நிலக்கரி விரைவாக வந்து சேரும். தமிழ்நாடு மின் வாரியத்துக்கு ஆண்டு ஒன்றுக்கு ரூ.24 கோடி மிச்சப்படும். ஏற்றுமதி, இறக்குமதியாளர்களுக்கு ஆண்டு ஒன்றுக்கு ரூ.700 கோடி மிச்சப்படும்.

நாட்டின் மிக நீளமான கடற்கரையைக் கொண்ட மாநிலங்களில் தமிழ்நாடும் ஒன்று என்ற நிலை ஏற்படும். சென்னை, தூத்துக்குடி, புதுச்சேரி, நாகப்பட்டினம், தொண்டி, கோடியக்கரை, இராமேசுவரம், தனுஷ்கோடி, குளச்சல் முதலிய இடங்களில் மீன்பிடித் துறைமுகங்கள் விரிவாக்கமடையும். இவற்றை எல்லாம் கடந்து பல்லாயிரக்கணக்கான இளைஞர்களுக்கு வேலை வாய்ப்பும் கிட்டும்.

அய்க்கிய முற்போக்குக் கூட்டணி அரசில் தி.மு.க.வைச் சேர்ந்த டி.ஆர். பாலு அவர்கள் கப்பல் போக்குவரத்துத்துறை அமைச்சராக இருந்து நிறை வேற்றப்பட்ட திட்டமாக இது அமைந்து விடுமே எனும் பொறாமை உணர்ச்சி  காரணமாகவும், அரசியல் காழ்ப்புணர்ச்சி காரணமாகவும்தான் நாட்டுக்கு நல்லது செய்யும் திட்டத்தை முதல் அமைச்சர் ஜெயலலிதா திட்டமே கூடாது என்று ஒற்றைக் காலில் நிற்கிறார். இவ்வளவுக்கும் இந்தத் திட்டம் செயல்படுத்தப்பட வேண்டும் என்று இரண்டு தேர்தல் அறிக்கையில் குறிப்பிட்டு இருந்தது அ.இ.அ.தி.மு.க. இன்றைக்கு அந்த நிலையிலிருந்து பிறழ்வதற்குக் காரணம் அரசியல் காழ்ப்புணர்ச்சியே!

இந்த நிலையில் அந்தத் திட்டத்தைச் செயல்படுத்த வேண்டும் என்று வலியுறுத்தும் வகையிலும், மத்திய, மாநில அரசுகளுக்கு அழுத்தம் கொடுக்கும் வகையிலும் போராட்டம் நடைபெறும் என்று, தம் பிறந்த நாள் செய்தியாக கலைஞர் அவர்கள் அறிவித்துள்ளார். அதனைத்தான் போர்! போர்!! போர்!!! என்று மூன்று முறை அழுத்தி உச்சரித்தார். பிறந்த நாள் விழாவை நாட்டு நலனுக்கான போராட்டத் திட்ட அறிவிப்பு மேடையாக மாற்றியது தனிச் சிறப்பிற்குரியது.

இதுவொரு கட்சிப் பிரச்சினையல்ல. ஒட்டு மொத்த மான தமிழ்நாட்டுப் பிரச்சினை - இதில் ஒன்றுபட்டுப் போராடி சேது சமுத்திரத் திட்டத்தை செயல்பட வைக்க உறுதி எடுத்துக் கொள்வோமாக!

                       ----------------------"விடுதலை” தலையங்கம் 4-6-2013