கடவுளின் பெயரால் ஏமாற்றலாமா? கடவுள் என்பதே அசல் ஏமாற்று வேலை தானே?

கடவுளின் பெயரால் ஏமா(ற்)றலாமா? 

கடவுளின் பெயரில் ஏமாற்றலாமா? எனும் தலைப்பில் லலிதா ஜுவல்லரி என்ற நிறுவனம் முழுப் பக்க விளம்பரம் ஒன்றை ஏடுகளில் கொடுத்துள்ளது.

அதில் குறிப்பிடப்பட்டுள்ள வாசகம் வருமாறு:

கிராமுக்கு ரூ.52 தள்ளுபடி!... சவரனுக்கு ரூ.520 தள்ளுபடி!... இலவசப் பரிசு! என்று அட்சய திருதியை நன்னாளை முன்னிட்டு, பல நகைக் கடைகள் விளம்பரப்படுத்திக் கொண்டிருக்கும் சலுகைகளை நீங்கள் காணலாம். தீர விசாரிக்கும் பொழுதுதான் இதில் உள்ள தந்திரம் தெரியும்! கிராமுக்கும், சவரனுக்கும் தள்ளுபடி அளிக்கும் இக்கடைகள், நகைகளின் சேதாரத் தொகையை அளவிற்கு அதிகமாக வசூலித்து இதுபோன்ற தள்ளுபடியில் அதை மறைக்கிறார்கள் என்பதுதான் உண்மை மேலும் பல சலுகைகள் நிபந்தனைகளுக்கு உட்பட்டதாகவே இருக்கும்.

எனவே, இதுபோன்ற அட்சயதிருதியை ஆஃபர்களைக் கண்டு மயங்காமல், நீங்கள் கொடுக்கும் தொகை என்ன, அதற்கு உங்களுக்கு எவ்வளவு கிராம் தங்கம் கிடைக்கிறது என்பதைக் கணக் கிடுங்கள் என்று விளம்பரம் செய்துள்ள அந்த நிறுவனம் தனது நிறுவனத்தின் நம்பகத்தன்மை குறித்து விவரிக்கிறது.

பம்படியில் வம்படி என்பார்களே, அது போல வியாபாரத்தில் போட்டி என்று வந்துவிட்டால் இதுபோன்ற மோசடிகள் வெளி வருகின்றன என்பதை எடுத்துக் கொள்ள வேண்டும்.

அட்சய திரிதியை என்ற வியாபாரக் கரடி கடந்த சில ஆண்டுகளாகத்தான் பிரபல்யம் அடைந்து வருகிறது.

இந்த நாட்டில் தான் எதற்கும் ஒரு புராணக் கதை இருக்குமே. அதுபோலவே இந்த அட்சய திரிதியைக்கும் அளப்புகள் உண்டு.

இந்த நாள் என்பது சாதாரண நாள் அல்லாமல் இது பரசுராமனின் ஜனன நாள் என்பது மட்டுமல்ல; லட்சுமி கடாட்சம் தரும் நாள், இந்நாளில் மகாலட்சுமியையும், மகா விஷ்ணுவையும் வணங்கி, அருள் பெற்று செய்யும் செயல்கள் எல்லாம் சிறப்பினைக் கொடுக்குமாம்.

அட்சயம் என்ற சொல்லுக்கு வளரக் கூடியது என்று பொருளாம்.

மணிமேகலைக் காவியத்தில் எடுக்க எடுக்கக் குறையாத அன்னம் வரும் பாத்திரம் என்று கூறப்படுவதில்லையா?

இந்த நாளில் ஒரு குன்றி மணி அளவாவது, கடன் வாங்கியாவது தங்கம் வாங்கினால், அது வளரும் என்று கதை அளக்கிறார்கள்.

இதற்கு ஏதாவது ஆதாரம் உண்டா? ஒவ்வொரு வருடமும் இந்த நாளில் நகை வாங்கியவர்கள் வீட்டில் எல்லாம் தங்கம் குட்டிப் போட்டுள்ளதா மக்கள் மத்தியில்  ஒரு நம்பிக்கையை ஏற்படுத்தி அதன் மூலம் தங்கள் வியாபாரத்தைப் பெருக்கிக் கொள்வதுதான் இதில் உள்ள தந்திரம்.

வியாபாரியான ஒருவரே அட்சய திரியை என்ற பெயரில் மக்களை ஏமாற்றும் நகை வியாபாரிகள் குறித்து அம்பலப்படுத்தியுள்ளாரே!

எந்தெந்த வகையில் ஏமாற்றுகிறார்கள் என்பதையும் தெளிவாகக் குறிப்பிடப்பட்டுள்ளதே! அதுவும் ஒரு பக்கம் விளம்பரம் கொடுத்து (எத்தனை ஆயிரம் ரூபாயோ!) அம்பலப்படுத்தியுள்ளாரே!

விளம்பரத்தின் தலைப்பை இன்னொரு தரம் கவனத்தில் கொள்ளுங்கள்.

கடவுளின் பெயரால் ஏமாற்றலாமா? இதன் பொருள் என்ன? கடவுளின் பெயரைச் சொல்லி நகைக் கடைக்காரர்கள் பொது மக்களை ஏமாற்றுகிறார்கள்.

இதனை திராவிடர் கழகமோ, விடுதலை ஏடோ எடுத்துக் கூறினால் முகம் சுளிக்கும் மக்கள், பக்தி நம்பிக்கையுள்ள ஒரு வியாபாரியே, பக்தியை பரப்பும் ஒரு பார்ப்பன ஏட்டில்  கடவுளின் பெயரால் ஏமாற்றும் வேலை நடக்கிறது என்று முழுப் பக்கம் விளம்பரமாக வெளிப்படுத்தியுள்ளாரே!

இப்பொழுதாவது சிந்தித்துப் பார்க்க வேண் டாமா? கடவுள் பெயரால் ஏமாறலாமா? ஏமாற்றலாமா என்ற கேள்வியைக் கேட்போருக்கு ஒரு கேள்வி, கடவுள் என்பதே அசல் ஏமாற்று வேலை தானே?

மோசடிமீது இன்னொரு மோசடி அவ்வளவுதான் எங்குச் சுற்றினாலும் தந்தை பெரியார் கருத்தின் வட்டத்திற்குள் வந்துதான் தீர வேண்டும். சிந்தியுங்கள்!

               ----------------------"விடுதலை” தலையங்கம் 11-5-2013