தருமபுரியில் ஜாதி தீண்டாமை ஒழிப்பு மாநாடு

வெற்றியின் திளைப்பில் தருமபுரி முரசு கொட்டியது

எதிர்பார்த்ததைப் போல தருமபுரியில் ஜாதி தீண்டாமை ஒழிப்பு மாநாடு நேற்று (9.12.2012) வெகு எழுச்சியுடன் நடைபெற்றது.

தமிழர் தலைவர் மானமிகு கி.வீரமணி அவர்கள் நேற்றைய மாநாட்டில் தமது உரையின் தொடக் கத்தில் குறிப்பிட்டது போல - மகிழ்ச்சியோடு இம்மாநாடு நடத்தப்படவில்லை.

தமிழ்நாட்டில் நடக்கக் கூடாதது நடந்து விட்டது. தாழ்த்தப்பட்ட மக்கள் குடியிருப்புகள் கொளுத்தப்படுகின்றன - இந்த 21ஆம் நூற்றாண் டில் அதுவும் ஒரு காதல் திருமணத்தை முன் வைத்து என்றால் இது என்ன பிற்போக்குத்தனம்!

இந்தக் குற்றத்துக்கு ஆளானவர்களே அடுத்த கட்டமாக மேலும் மேலும் தவறுகளை செய்தே தீருவது என்ற வெறியில் விளையாட ஆரம்பித்து இருக்கின்றனர் என்கிறபோது அது எவ்வளவுப் பெரிய விபரீதம்!

இந்த நாட்டில் இலட்சியங்களை, கொள்கை களை, கோட்பாடுகளை முன்னிலைப்படுத்தி ஒரு கட்சியைக் கட்டுவது எளிதானதல்ல.

அதே நேரத்தில் எளிதாக அமைப்பை உருவாக்குவது சுலபமாகத் தலைவராவது என்பதற்கு மிகவும் எளிதான - இலகுவான ஒரே வழி ஜாதி சங்கத்தை அமைத்துத் தலைவராவதாகும்.

அதைவிடப் பெரிய கொடுமை - இந்த நாட்டில் ஆண்டாண்டுக் காலமாக அடக்கப்பட்ட, ஒடுக்கப் பட்ட உரிமை மறுக்கப்பட்ட அடித்தள மக்களான தாழ்த்தப்பட்டவர்களை அந்நியப்படுத்தி அதற்காக ஓர் அமைப்பைத் தொடங்குவது என்பதாகும்.

தருமபுரி மாநாட்டில் தமிழர் தலைவர் மானமிகு கி.வீரமணி அவர்கள் குறிப்பிட்டது போல கி.மு. காலத்திற்குப் பயணம் செய்ய ஆசைப்படு கிறார்களா என்ற கேள்வி மிக முக்கியமானது.

சுயமரியாதை இயக்கம், திராவிடர் கழகம் - தந்தை பெரியார் அவர்களின் தலைமையில்  இந்த மண்ணை நன்கு பக்குவப்படுத்தி வைத்துள்ள நிலையில், இங்கே களைகளைப் பயிரிடலாம் என்று சிலர் அடம் பிடிப்பது - ஆபத்தான போக்காகும்.

தமிழ்நாட்டைப் பொறுத்தவரை ஜாதிய அமைப்புகள் துளிர்த்ததாக வரலாறு இல்லை; இதற்கு ஏராளமான எடுத்துக்காட்டுகளும்கூட உண்டு.

இதில் நாம் கவனிக்கத்தக்கது என்னவென் றால் தாழ்த்தப்பட்ட, பிற்படுத்தப்பட்ட மக்களுக் கான உரிமைகள் இன்னும் ஏராளமாக இருக் கின்றன.

அந்தத் திசையில் கவனத்தைச் செலுத்தாமல் சமூக நீதியைப் பின்னுக்குத் தள்ளும் ஒரு செயலில் பிற்படுத்தப்பட்ட சமூகத்தைச் சேர்ந்த சிலர் இறங்கும்போது, திராவிடர் கழகம் அலட்சியமாக இருக்க முடியாது.நல்லறிவு கொளுத்த வேண்டிய கடமை திராவிடர் கழகத்துக்கு உண்டு - அதுதான் தருமபுரி மாநாடு.

மக்கள் சமுத்திரத்தில் தருமபுரி படகுபோல தத்தளித்தது.

இந்த மாநாட்டின் அருமையை உணர்ந்து கொண்டு இருக்கிறார்கள் பொது மக்கள்! ஜாதி - தீண்டாமைகளுக்கு இங்கு வேலை கிடையாது - அவற்றிற்கு இடம் தர மாட்டோம் என்பதை உணர்த்துவதைத்தான் அந்த மக்கள் கடலின் எழுச்சி வெளிப்படுத்துகிறது.

ஊரே ஒரு புதிய கோணத்தில் தகத்தகாய எழுச்சியுடன் நிமிர்ந்து நின்றது. மாநாட்டுக்கு முன்பும் பேசப்பட்டது - பின்பும் பேசப்படும் என்கிற அளவுக்கு மாநாடு புத்தெழுச்சியை ஊட்டியுள்ளது.

மாநாட்டின் தீர்மானங்களும், எடுத்து வைக்கப்பட்ட கருத்துரைகளும் புத்துணர்ச்சியை மக்களுக்குக் கொடுத்திருக்கிறது.

தவறு செய்பவர்கள் கூட மறு சிந்தனைக்கு ஆளாகும் வகையில் அவை அமைந்திருந்தன என்பதுதான் மாநாட்டின் உச்சமாகும்.

குறுகிய காலத்தில், திட்டமிட்ட வகையில் மாநாட்டுப் பணிகளை நேர்த்தியாகச் செய்து வெற்றிக் கொடி நாட்டிய திராவிடர் கழகப் பொறுப்பாளர்கள், பகுத்தறிவு கழக பொறுப் பாளர்கள், தோழர்கள் மிகவும் பாராட்டுதலுக் குரியவர்கள் ஆவார்கள். வெகுவாகப் பாராட்டு கிறோம் - பாராட்டுகிறோம்!

                         --------------------------"விடுதலை” தலையங்கம் 10-12-2012