குறளும் - சங்கராச்சாரியாரும்

திருக்குறளை இருட்டடிப்பு செய்து பார்த்தார்கள்; இழித்தும் சொல்லிப் பார்த்தார்கள் - திரிபுவாதம் செய்து பார்த்தார்கள் பார்ப்பனர்கள். அவற்றை யெல்லாம் தாண்டி உலகக் கிரீடத்தில் ஓகோ என்று ஒளிர்கிறது வள்ளுவர் ஆசான் தந்த குறள். ஒரு கட்டத்தில் இவ்வளவு உயர்ந்த கொள்கைகளை எழுதி யிருக்கும் ஆசாமி ஒரு பார்ப்பனராகத்தான் இருக்க முடியும் என்று சொல்லிப் பார்த்தார்கள் - நன்கு வாங்கிக் கட்டிக் கொண்டனர்.

கொலை வழக்கில் சிக்கி நீதிமன்றத்துக்கும், வீதிக்குமாக அலைந்து திரிந்து கொண்டிருக்கும் (மாஜி) காஞ்சி சங்கராச் சாரியார் ஜெயேந்திர சரஸ்வதி குறளைப் பற்றிச் சொன்னதைத் தமிழர்கள் நினைவில் வைத்துக் கொள்ள வேண்டும்.

மதுரை தொழிலதிபர் ஒருவர், அவரின் பெயர் சீதாராமனாம்; அவருக்கு நடைபெற்ற பாராட்டு விழா ஒன்றில் இந்த சங்கராச்சாரி ஜெயேந்திர அய்யரும் சென்று கைங்கரிய சிரோண்மணி பட்டம் வழங்கினார். அந்நிகழ்ச்சியில் இந்த சங் கராச்சாரியார் என்ன பேசினார்?

திருக்குறளில் உள்ள அறத்துப்பால் கிட்டதட்ட பகவத் கீதையின் தமிழாக்க மேயாகும் (தினத்தந்தி 15.4.2004) என்று கூறினாரே பார்க்கலாம்.

இருள் என்றால் என்ன பொருள் தெரியுமா? வெளிச்சம் என்று பொருள் கூறுவது போன்ற மூர்க்கத்தனமும், மூடத்தனமும்தான் இது.

பிறப்பின் அடிப்படையில் பேதம் சொல்லும் கீதை எங்கே? பிறப்பொக்கும் எல்லா உயிர்க்கும் என்று சொல்லும் திருக்குறள் எங்கே? திருக்குறள் பற்றி வேறு ஒரு இடத்தில் அலர் பேசியதற்குத் தெரிவிக்கப்பட்ட கண்டனம் வருமாறு:

ஈரோட்டில் திருக்குறளார் முனுசாமி அவர்களின் தலைமை யில் திருக்குறள் பேரவை 4ஆம் ஆண்டு மாநாடு நடைபெற்றது. அம்மாநாட்டில் நிறைவேற்றப் பட்ட தீர்மானம் இதோ:

திருக்குறளில் உள்ள அறத்துப்பாலை, அதிலும் முதல் 10 குறட்பாக்களை மட்டும் மாணவர்களுக்குச் சொல்லிக் கொடுத்துவிட்டு பொருட்பாலை, காமத்துப் பாலை சொல்லிக் கொடுக்க வேண்டிய அவசியமில்லை என்று காஞ்சி மடத் தலைவரான தவத்திரு ஜெயேந் திர சரஸ்வதி துறவியார் திருக்குறளைப் பற்றி திரிபான முறையில் தம் கருத்தைக் கூறியிருப்பது, அதிர்ச்சியையும் வருத்தத்தையும் தருகிறது.

காஞ்சி மடத்தார் அடுத்தடுத்து திருக்குறளைப்பற்றி புறங்கூறி வருவதற்குக் கண்டனம் தெரிவிப்பதோடு அக்கருத்துகளை திரும்பப் பெற வேண்டுமென காஞ்சி மடத்தை ஈரோடு திருக்குறள் பேரவைக் கேட்டுக் கொள்கிறது என்ற தீர்மானம் காஞ்சி சங்கராச் சாரியார்களின் திருக்குறள் துவேஷத்தைப் படம் பிடித்துக் காட்டுகிறது.

இவர் இப்படி என்றால் இவரின் குருநாதரான மூத்த சங்கராச்சாரியார் சந்திர சேகரேந்திர சரஸ்வதி குறள் பற்றி என்ன கூறுகிறார்?

ஆண்டாளின் திருப்பாவையில் ஒரு பாடல் -நெய் உண் ணோம் என்று தொடங்கும் பாடலில், செய்யாதன செய்யோம் தீக்குறளை சென்றோதோம் என்ற ஒரு வரி வருகிறது. இதற்கு என்ன பொருள் கூறினார் இந்த மூத்தவாள் தெரியுமா? தீய திருக்குறளை - ஓத மாட்டோம் என்று பொருள் கூறினார். உண்மைப் பொருள் என்ன?

குறளை என்ற சொல்லுக்கு குள்ளம், கோட்சொல், குற்றம் என்று மதுரைத் தமிழ்ப் பேரகராதி பொருள் குறிப்பிடுகிறது. புறங்கூற மாட்டோம் என்பது அதன் பொருள்.

ஆனால்,அதுவா முக்கியம்? பெரியவாள்களுக்கு தங்கள் உள்ளத்தில் உள்ள குமுறும் அந்தக் காழ்ப்புணர்வு - பார்ப்பன உணர்வு - தமிழர்களின்மீதான துவேஷ உணர்வு தானே முக்கியம்?

--------------------- மயிலாடன் அவர்கள் 23-1-2011 “விடுதலை” யில் எழுதிய கட்டுரை