பெரியார் கொள்கைகளைக் கொண்டு சேர்க்கும் பொறுப்பு

செப்டம்பர் 23 விழா!

பெரியார் சுயமரியாதைப் பிரச்சார நிறுவனத்தின் 60ஆம் ஆண்டு வைர விழா திருச்சியில் பெரியார் நூற்றாண்டுக் கல்வி வளாகத்தில் கடந்த செப்டம்பர் 23ஆம் தேதியன்று வெகு நேர்த்தியாக நடைபெற்றது.

பல ஆண்டுகளாக தந்தை பெரியார் அவர்களின் எண்ணத்தில் உதித்திருந்த கருத்துக்கு 1952 செப்டம்பர் 23ஆம் தேதியன்று பெரியார் சுயமரியாதைப் பிரச்சாரம் என்ற அமைப்பைப் பதிவு செய்ததன் மூலம் சட்ட ரீதியான வடிவத்தைக் கொடுத்தார்கள்.

அன்னை மணியம்மையார் அவர்கள் திருமணம் என்பதுகூட இந்த எண்ணவோட்டத்திற்கான ஒரு முக்கிய அம்சமாகும்.

தந்தை பெரியார் அவர்களின் எண்ணமும், செயல்பாடும் எத்தகு தொலைநோக்கானவை - சிறப்பானவை  என்பதற்கு - பெரியார் நிறுவனங்கள் வளர்ந்தோங்கி நிற்கும் காட்சிகள் கட்டியங்கூறிக் கொண்டு நிற்கின்றன.

இயக்க வெளியீடுகள் விடுதலை (இரு இடங்களில் பதிப்பு) உண்மை, பெரியார் பிஞ்சு, தி மாடர்ன் ரேஷனலிஸ்ட் போன்ற ஏடுகளும், இதழ்களும் அகப் பொலிவிலும், தோற்றத்தின் பொலிவிலும், புதிய தலைமுறையினர் மத்தியிலும் பெரும் தாக்கத்தை ஏற்படுத்தியுள்ளன.

வேறு எந்தக் காலத்திலும் இல்லாத அளவுக்குச் சந்தாக்களின் எண்ணிக்கை உயர்ந்து பல்லா யிரக்கணக்கான வாசகர்களை ஈர்த்து, தந்தை பெரியார் அவர்களின் சிந்தனை மணம் தமிழர் களின் வீடுகளில் கமழும் நிலை என்பது சாதாரண மானதல்ல.

அதிகார மய்யங்களைக் கைகளில் வைத்துக் கொண்டுள்ள அமைப்புகளே ஆச்சரியப்படும் அளவுக்கு இந்தியாவின் தலைநகரமான டில்லியில் கேந்திரமான இடத்தில் பெரியார் மய்யம் செம்மாந்து நிற்கிறது.

அதை மய்யப்படுத்தி பல்வேறு ஆக்கப் பணிகள் மேற்கொள்ளப்பட்டு வருவதோடு மேலும் விரிவாக்கப் பணிகள் திட்ட அளவில் உள்ளன.

மண்டைச் சுரப்பை உலகு தொழும் என்று பகுத்தறிவுப் பகலவனான தந்தை பெரியார்  அவர்களைப்பற்றி புரட்சிக் கவிஞர் பாரதிதாசன் இன்றைக்கு 55 ஆண்டுகளுக்கு முன் கணித்துச் சொன்னது கனிந்திருக்கும் கால கட்டம் இது.

மதவாதம் உலகப் பந்தை சீரழித்துக் கொண்டிருக்கும் ஒரு கால கட்டத்தில், மதமற்ற உலகு ஒன்றின் மூலம் தான் சமத்துவ, சமாதானம், ஒப்புரவு உலகினைக்  காண முடியும்.

சச்சரவுகளும், சுரண்டலும், ஆதிக்க வெறியும், அமைதி தொலைந்த வாழ்வும், மூடத்தனமும், பெண்ணடிமைத்தனமும் பின்னிப் பிணைந்து கிடக்கும் உலக மக்களுக்குத் தந்தை பெரியார் கொடுக்கும் சிந்தனை ஒளிதான் அதற்கான திறவு கோலாகும்!
இந்தத் திசையில் தந்தை பெரியார் அவர்களின் கொள்கைகளைக் கொண்டு சேர்க்கும் மிகப் பெரிய பொறுப்பு இந்த இயக்கத்திற்கு இருக்கிறது.

கல்வியின் மூலம்தான் ஒடுக்கப்பட்ட எந்த ஒரு சமுதாயமும் முன்னேற முடியும் என்ற உறுதியான எண்ணத்தின் அடிப்படையில் பெரியார் அறக்கட்டளை மூலம் ஒரு தொடக்கத்தைக் கொடுத்தார்கள்.

இருபால் ஆசிரியர் பயிற்சி பள்ளி, தொடக்கப் பள்ளி, நாகம்மையார் குழந்தைகள் இல்லம் என்ற தொடக்கம், அன்னை மணியம்மையார் காலத்தில் வளர்த்து இன்று தமிழர் தலைவர் தலைமையில் வானுற உயர்ந்து கண்டோர் களிக்கவும், சரியாகக் கணிக்கவும், மாற்றார் மலைக்கவுமான ஒரு பெரு நிலையை எட்டியுள்ளது.

நிறுவனப்படுத்தப்படாத எந்த ஒரு செயலுக்கும் ஆயுள் காலம் குட்டையாகும். இதனை மிக ஆழமாக உணர்ந்து, காலா காலத்துக்கும் அய்யாவின் தத்துவம் நிலை பெற்று, இயக்கம் வலு பெற்று நிற்பதற்கான அடிப்படைப் பணிகளை பெரியார் சுயமரியாதைப் பிரச்சார நிறுவனம் திட்டமிட்டுச் செய்துள்ளது.

அந்த வரலாற்று உண்மையைப் பதிவு செய்யும் நிகழ்ச்சிதான் கடந்த 23ஆம் தேதி திருச்சியில் நடைபெற்ற விழாவாகும். பல்வேறு சிறப்பு அம்சங்களோடு அது நடைபெற்றுள்ளது. அந்த நிறுவனம் மேலும் வலுப் பெற, ஒளி பெற ஒல்லும் வகைகளில் எல்லாம் உதவ வேண்டியது ஒடுக்கப்பட்ட மக்களின், தமிழினப் பெரு மக்களின் முக்கிய கடமையாகும்.
                     ------------------------"விடுதலை” தலையங்கம் 25-9-2012