நடிகை நந்திதாதாசுக்கு தெரிந்த உண்மை வைகோ- தமிழருவிமணியனுக்குத் தெரியவில்லையே!

பதுங்காதீர் - பதில் சொல்வீர்!

16ஆவது மக்களத் தேர்தலில் பிஜேபி தன் இந்துத்துவா அஜண்டாவை வைக்கப் போகிறது - மீண்டும் மனுதர்மக் கொடியைப் பறக்க விடப் பார்ப்பனர்கள் வரிந்து கட்டிக் கொண்டு நிற்கிறார்கள். உஷார்! உஷார்!! என்று தமிழர் தலைவர் மானமிகு கி. வீரமணி அவர்கள் தொடர்ந்து கூறிக் கொண்டே வந்தார். அபாயச் சங்கை ஊதிக் கொண்டே இருந்தார்.

சிறப்புக் கூட்டம் போட்டுப் பேசினார். உரைகளை ஒலிப் பேழைகளாக வெளி யிட்டார்; அறிக்கைகளை வெளியிட்டு விழித்தெழுவீர் தமிழர்களே என்று வேண் டுகோளும் விடுத்து வந்தார். நூல்களாகவும் தொகுத்துக் கொடுக்கப்பட்டன.

அந்தத் தலைவருக்கும், திராவிடர் கழகத்துக்கும் இந்தப் பிரச்சினையில் மகத்தான பொறுப்பு இருக்கிறது. காரணம்  தமிழ் மண்ணில் மண்டிக் கிடந்த ஆரியக் கள்ளிகளை, விஷச் செடிகளை - பார்த்தீனியங்களை மண்ணும் மண்ணடி வேருடனும் வீழ்த்தி, தமிழர்களுக்கான புதிய பூமியை உண்டாக்கிய ஏர் உழவர் தந்தை பெரியார் அன்றோ! ஏற்றம் இறைத்தது திராவிடர் இயக்கம் அன்றோ!

இந்தியாவிலேயே ஆரியத்திற்கு முதுகில் மண் காட்டிய காரியத்தைத் தமிழ் நாடுதானே செய்தது!

இந்த நாடு ஆஸ்திகாள் வாழத் தகுதி இழந்து விட்டது! என்று ஆச்சாரியார் (ராஜாஜி) கையொப்பமிட்டு அறிக்கை (கல்கி 4.4.1971) வெளியிடும் அளவுக்கு ஒடுக்கப்பட்ட மக்கள் ஓங்கி எழுந்த நிலை இங்கு தானே!  இந்தியாவின் இரண்டாயிரம் வருடத்தில் மகத்தான ஒரு சமுதாயப் புரட்சி தமிழ்நாட்டில்தான் நடந்திருக்கிறது; திராவிடர் கழகத் தலைவர் பெரியார்தான் அந்தப் புரட்சியைச் செய்தவர் என்பது அமெரிக்காவிலுள்ள மூத்த பேராசிரியர் களின் கருத்து ஆகும்.
                                    ----------------------------------- ஆனந்தவிகடன் 16.7.1972

அமெரிக்கப் பேராசிரியர் ஜான்ரைலி போன்ற அறிஞர்கள் கூறும் அளவுக்குப் பக்குவப்படுத்தப்பட்ட மண்ணிது.

தீண்டாமை, ஜாதி, மூடநம்பிக்கை, பெண்ணடிமை, ஆண்டான் அடிமை.

இவைகளின் ஆணி வேர் வரை சென்று மூலபலத்தை அழித்து முற்றிலும் புதியதோர் சமுதாயத்தை உருவாக்க ஓய்வறியாது உழைத்த உலகத் தலைவர் தந்தை பெரியார்!

கல்வி உரிமை, வேலை வாய்ப்பு உரிமை, பெண்ணுரிமை, சமூக நீதிக்கான களங்கள் கண்டு இந்தியத்  துணைக் கண்டத்திலேயே தமிழ்ப் பூமி தலை நிமிர வைக்கப்பட்டுள்ளது.

இந்தியத் துணைக் கண்டத்திலேயே  இடஒதுக்கீட்டை சட்ட ரீதியாக ஆக்கியது  தமிழ் மண் - அதற்குக் காரணியாக இருந் தது திராவிடர் இயக்கம்.

இடஒதுக்கீட்டை - எதிர்ப்பு என்னும்  காட்டுத் தீக்கு இடையே அங்குலம் அங்குலமாக வளர்த்தெடுத்த வரலாறு எம் இயக்கத்துக்கு உண்டு.

இவை எல்லாம் அழிக்கப்பட வேண் டுமா? மீண்டும் வருணாசிரமப் பாம்பு படம் எடுக்க வேண்டுமா?

இந்துத்துவா என்றால் இதன் பொருள் இதுதான்! பகுத்தறிவுப் பகலவன் - இனப் பாதுகாவலர் தந்தை பெரியார் கூறிச் சென்றாரே!

நம் மக்கள் ஆரிய சமயத்திற்கு அடிமையாய் இருக்கின்ற வரையில், நம் சமுதாயத்திற்குச் சுயமரியாதை ஏற்படப் போவதில்லை. நாம் முதலில் சமய சமு தாயத் துறையில் ஆரிய ஆதிக்கத்திலிருந்து விடுபட வேண்டும். ஆரியத்திற்கு அடிமைப்பட்டதாலேயே நமக்குச் சூத்திரப் பட்டம் கிடைத்திருக்கிறது. அதனாலே நாம் அரசியல் அடிமைகளாய் வாழ்கிறோம்         

                                   -----------------------------------(குடிஅரசு 28.7.1948).

என்று கல்வெட்டாகச் செதுக்கி வைத்து விட்டுச் சென்றுள்ளாரே வைக்கம் வீரர். இந்து ராஷ்டிரம்பற்றி அண்ணல் அம்பேத்கர் கூறுகிறார்: இந்து ராஷ்டிரம் என்பது நடைமுறைக்கு  வந்தால் அது இந்த நாட்டுக்குப் பெருங் கொடுமையாக (நிக்ஷீமீணீமீ விமீஸீணீநீமீ) அமையும். இந்துக்கள் என்ன சொன்ன போதிலும் இந்துயிசம் சுதந்திரம், சமத்துவம், சகோதரத்துவம் ஆகியவற்றிற்குக் கேடாக அமையும் என்பதில் எந்த மாற்றமும் இல்லை. அது இவ்வாறு ஜனநாயகத்தின் எதிரியாக உள்ளது. இந்து ராஷ்டிரம் எதார்த்தத்தைத் தடுக்க நாம் எல்லா முயற்சிகளிலும் இறங்க வேண்டும் என்றாரே அண்ணல் அம்பேத்கர் (பாகிஸ்தான் அல்லது இந்தியப் பிரிவினை பக்கம் 358) தந்தை பெரியாரும், அண்ணல் அம்பேத்கரும் கணித்த கணிப்பினைக் கடந்து பி.ஜே.பி.யின் இந்துத்துவாவுக்குப் பாஷ்ய கர்த்தாக்களாக ஆகப் போகிறார்களா மணியன் கம்பெனிகள்? இந்துத்துவா கூடவே கூடாது - அதன் அரசியல் வடிவமான பி.ஜே.பியும் கூடாது அதன் சுவீகாரப் புத்திரன் மோடியும் கூடாது என்பதற்கு வரலாற்று ரீதியான காரணங்கள் ஏராளம் உண்டே!

மலம் அள்ளும் மக்கள் அந்தத் தொழிலைச் செய்வது- அது ஒரு தெய் வீகப் பணி என்று அவர்கள் கருதுவதுதான்! என்று அடித்தட்டு மக்களின் அசுத்தம் நிறைந்த அடிமை வாழ்வுக்கு நியாயம் கற்பிக்கும் கடையர்தான் மோடி (மோடியின் கர்மயோக்) அந்த நூலைக் கண்டித்து அப்பொழுதே ஆர்ப்பாட்டம் நடத்தியது திராவிடர் கழகம்! (11-12-2007)

தாழ்த்தப்பட்டவர்கள் குஜராத்தில் காய்கறிகளைத் தொட்டுப் பார்த்து வாங்க முடியாது - மோடியின் குஜராத் மாநிலத்தில்.

குடி தண்ணீர்த் தொட்டிகளில்கூட தாழ்த்தப்பட்டோருக்கு ஒரு நேரம், உயர் ஜாதிக்காரர்களுக்கு வேறொரு நேரம் என்று எழுதப்பட்டுள்ள கேவலம்  அங்கே! காலை 9  மணி முதல் 10 வரை பார்ப்பனர்கள், பட்டேல்கள், 10 மணி முதல் 12 மணி வரை பார்வாகா வங்கிரீஸ் மற்றும் கும்பார் தாழ்த்தப்பட்ட மக்கள். மோடியைத் தூக்கிச் சுமக்கத் தோள்களைத் தீட்டிக் கொண்டு அலையும் பதவிப் பசிக் காரர்களுக்கு இவையெல்லாம் தெரியுமா?

அகமதாபாத்தைத் தலைமையிடமாகக் கொண்டு செயல்படும் நவ்சர்ஜன் எனும் தொண்டு நிறுவனம் நீதிக்கும் மனித உரிமைகளுக்குமான ராபர்ட் எஃப் கென்னடி மய்யம் என்ற அமைப்பு குஜராத்தில் 1600 கிராமங்களில் முறைப்படி மேற்கொண்ட ஆய்வில் 98 சதவீத தலித்துகள் தீண்டாமைக் கொடுமைக்குப் பல வகைகளிலும் ஆட்பட்டுள்ளதை விவரித்துள்ளதே!

இந்த மோடிதான் இந்தியாவை ஆள்வதற்கான தகுதி படைத்த பிரதமரா?

சங்பரிவார் - பிஜேபி என்பதெல்லாம் ஏதோ பத்தோடு பதினொன்று என்கிற கட்சியல்ல. அவைகளுக்கு அழுத்தமான சமுதாயத்தைப் பிறப்பின் அடிப்படையில் பேதப்படுத்தும் அசைக்க முடியாத அடிமன ஆழமான கோட்பாடுகள் உண்டு.

பசுவதைத் தடுப்பு என்னும் பெயரால் பட்டப் பகலில் பச்சைத் தமிழர் காமராசரை இந்தியாவின் தலை நகரில் வீட்டோடு வைத்துக் கொளுத்திக் கொலை (7.11.1966) செய்யமுயன்ற கூட்டம் இது என்பது வைகோ அவர்களுக்குத் தெரியாமல் இருக்கலாம்; காந்தி சீடர் காமராசர் பக்தர் தமிழருவி மணியனுக்குத் தெரியாமல் இருக்குமா? தெரியாது என்றால் நம்பத் தான் முடியுமா? தெரியாதது போல நடிக்கிறார் என்றால்.. அவர் நாணயத்தைச் சந்தேகிக்கும் நிலை ஏற்படாதா?

450 ஆண்டு கால வரலாறு படைத்த சிறுபான்மை மக்களின் வழிபாட்டுத் தலமான பாபர் மசூதியை இடித்த குற்றவாளிகள் - அந்த இடத்திலே ராமன் கோயிலைக் கட்டுவோம் என்று ஒரு தேர்தல் அறிக்கையிலே பகிரங்கமாக அறிவித்து ஒட்டுக் கேட்டு வருகிறார்கள் - அதற்குக் கறுப்புத் துண்டு வைகோவும், காந்திசீடர் மணியனும் சலாம் போட்டு பராக்குக் கூறுகிறார்கள் என்றால் தந்தை பெரியார் பிறந்த மண்ணில் இப்படிப் பட்டவர்களா? என்று வேதனைப்பட வேண்டியுள்ளது.

குஜராத்திலே பிறந்த பெரிய தலைவர் காந்தியார்! அவருக்குச் சிலை எடுக்காமல் பட்டேலுக்கு உலகத்திலேயே மிகப்பெரிய சிலை எடுக்க நாடு முழுவதும் இரும்பு களைத் திரட்டுகிறார் மோடி என்றால் அதன் முகாந்திரம் என்ன?

காந்தியாரைக் கொன்ற கோட்சே கூட்டத்தின் பாசக் காரர்கள் ஏன் இதனைச் செய்கிறார்கள் என்பதை காந்தீய மக்கள் கட்சி நிறுவனருக்குத் தெரியாதா? நூலிழைப் பிளந்து எழுதி வருகிறாரே - இந்த இடத்தை உள் வாங்கிக் கொள்ளும் நுட்பம் எங்கே போயிற்று?

என்ன சொன்னார் இந்த தமிழருவி மணியன்? சிறுபான்மையோர் நம்பிக்கையை முழுமையாகப் பெற வேண்டும் என்றால் மோடியும் பா.ஜ.க.வும் தங்களைப் பக்குவப்படுத்திக் கொள்ள வேண்டும். அயோத்தியைக் குறி வைத்து அரசியல் செய்யக் கூடாது. பாபர் மசூதியைப் பொறுத்தவரை உச்சநீதிமன்றத் தீர்ப்புக்குக் கட்டுப்பட வேண்டும். அனைவருக்கும் பொதுவான சிவில் சட்டம் என்ற முழக்கத்தைக் கைவிடச் செய்தல், காஷ்மீருக்கு விசேஷ சலுகைகளை அளிக்கும் அரசியல் சட்டம் 370 பிரிவின்கீழ் கை வைக்கக் கூடாது. இது போன்ற சிறுபான்மையோரின் உணர்வை மதித்து நடந்தால் காங்கிரசின் போலி மதச் சார்பின்மை கோஷம் எடுபடாது. ஆனால் இப்படி நடக்க ஆர்.எஸ்.எஸ். விட்டு வைக்குமா என்பது மில்லியன் டாலர் கேள்வி                                              

                                                               ----------------------- (கல்கி 29.9.2013 பக்கம் 6).

இப்படி சொல்லி இருப்பவர்தான் காந்தீய மக்கள் கட்சியின் நிறுவனர் திருவாளர் தமிழருவி மணியன். இந்த மில்லியன் டாலர் கேள்விக்கு பதுங்காமல், பம்மாத்துச் செய்யாமல், ஓடி ஒளியாமல் மணியன்   பதில் சொல்லட்டும் பார்க்கலாம்.

அப்படியே ஆர்.எஸ்.எஸ். சொல்லுவதை பி.ஜே.பி. அப்படியே ஒப்புக் கொண்டு தேர்தல் அறிக்கையிலும் அதிகாரப் பூர்வமாக அறிவித்துவிட்டது. மணியன் பயந்தபடியே ஆர்.எஸ்.எஸ். பிஜேபிமீது குதிரைச் சவாரி செய்வது அம்பலமாகி விட்டதே!

அறிவு நாணயம்  கிளர்ந்தெழுந்து ஆவேசப் புயலாய் அனலை நிரப்பி  ஆடித் தீர்த்திருக்க வேண்டாமா? அதுதானே இயல்பானதும்கூட!

மனிதன் எப்படி சீழ்ப் பிடித்துப் போயிருக்கிறார்  தெரியுமா?

மதங்களின் அடிப்படையில் மனி தனைப் பேதப்படுத்திப் பார்க்கும் தன்மை மோடியிடம் இல்லை. அவர் இந்தியர் நலன் என்றுதான் சொல்கிறார். ஹிந்துக்கள் நலன் என்று சொல்வதில்லை என்று ஈரோட்டில் பேசியுள்ளார்                                     

                                    -------------------------------------(தினமணி 9.4.2014) 

பி.ஜே.பி. தனது தேர்தல் அறிக் கையை வெளியிட்டு தனது அப்பட்டமான இந்து முகத்தைக் காட்டிக் கொண்ட பிறகு இப்படி அவரால் பேச முடிகிறது என்றால்... என்ன நடந்தது? கல்கியில் கூறியதற்கும் தினமணி வெளியீட்டுக்கும் இடையில் நிகழ்ந்ததென்ன என்ற வினாவுக்கு வெளிப்படையாக அவர் பதில் சொல்ல வேண்டும்.

மணியன் இப்படி என்றால் பெரிய குளத்தில் மதிமுக வேட்பாளரை ஆதரித்துப் பேசிய வைகோ அவர்கள் பாரதீய ஜனதா கூட்டணி 320 இடங்களில் வெற்றி பெறும் (மாலை மலர் 9.4.2014 பக்கம் 10) என்று மகிழ்ச்சிப் பொங்க கொக் கரித்துள்ளாரே! அதற்கு முன்பேகூட மோடி பெரும்பான்மை பெறுவார் என்று பொரிந்து தள்ளிக் கொண்டுதானே இருந் தார். பி.ஜே.பி.க்குச் சிறப்பான பிரச்சார செயலாளராகப் போய் விடலாம் - அங்கு தான் பேச்சாளருக்குப் பஞ்சமாயிற்றே!

வைகோ - மணியன் ஆகியோர் கணிப்புப் படியே பிஜேபி பெரும்பான்மை பெற்று ஆட்சி அமைக்கப் போவதாகவே வைத்துக் கொள்ளவோம்.

பெரும்பான்மை பெற்று ஆட்சியில் அமர்ந்து ராமன் கோயில் கட்டுவது உட்பட அந்த மூன்று செயல்களை முக்கியமாகச் செய்தால்...

சிறுபான்மை மக்கள் முன் மண்டியிட்டு மன்னிப்புக் கேட்பார்களா? தோளில் தொங்கும் கறுப்புச் சால்வையைத் தூக்கி எறிந்துவிட்டு தோற்றேன் தோற்றேன்!! என்று தோப்புக் கரணம் போடுவார்களா?

சிறுபான்மை மக்களை ஏமாற்றுவ தற்காகக் குடித்த நோன்பு கஞ்சி கொஞ்ச நஞ்சம் குடலுக்குள் ஒட்டியிருந்தால் அதனை எண்டாஸ்கோப் மூலம் வெளியே எடுத்து எறிந்து விடுவார்களா?

இந்த நாட்டின் கோடானு கோடி சிறுபான்மை மக்கள்பற்றி மோடிக்கும் - அவர் கூட்டத்துக்கும் இருக்கும் எண்ண வோட்டம் நாடு அறிந்த ஒன்று. சிறுபான்மை மக்கள் மத்தியில் வைகோ எந்த முகம் கொண்டு சலாம் வைப்பார்?

கொள்கைவாதிகள் என்றும், குன்று போல் நிற்பார்கள். சந்தர்ப்பவாதிகளோ இப்படித்தான் கூனிக் குறுகி நிற்க நேரிடும்.

பி.ஜே.பி. தோற்றாலும்கூட - இந்தப் பழிக் கறை இவர்களை விட்டுப் போகாது - போகவே போகாது!

சாமர்த்தியங்கள் எப்பொழுதும் கை கொடுக்காது. ஒரு கட்டத்தில் ஒளிந்து கொண்டிருக்கும் உண்மை உருவம் வெடுக்கென்று வெளியில் வநது விழுந்து விடும்.

அந்தப்  பழிப் பட்டியலில் வைகோ, மருத்துவர் ராமதாசு (பெரியாரைப் பற்றிப் பேசுபவர் ஆயிற்றே! தொண்டர்களைக் கறுப்புச் சட்டை போடச் செய்தவர் ஆயிற்றே) தமிழருவி மணியன் ஒரு தனி அணியாகவே அணி வகுத்து நிற்பார்கள்-  சந்தேகம் வேண்டாம்! விஜயகாந்த்.. பாவம் அவரை விட்டு விடுவோம் - கணக்கில் எடுத்துக் கொள்ள அவரிடம் என்ன கருத்து இருக்கிறது?

               --------------------- மின்சாரம் அவர்கள் 12-04-2014 “விடுதலை” ஞாயிறுமலரில் எழுதிய கட்டுரை

Read more: http://viduthalai.in/2011-07-25-07-58-59/78572-2014-04-12-11-27-57.html#ixzz2yfqcnwBU