தினமணியோடு தினத்தந்தி கைகோக்கலாமா?

பி.ஜே.பி.யின் தேர்தல் அறிக்கை குறித்து உண்மையான மதச் சார்பற்ற சக்திகள் கடுமையான குரலை உயர்த்தியுள்ளன. இந்தத் தேர்தல் அறிக்கையின் மூலம் ஒளிவு மறைவின்றி - தனது இந்துத்துவா முகத்தைக் காட்டி விட்டது பி.ஜே.பி., புரியும் படிச் சொன்னால் மீண்டும் மனுதர்மக் கொடியை ஏற்றத் துடியாய்த் துடிக்கிறது - இதன் ஆதரவு சக்திகளும் தங்களை மூடி மறைத்துக் கொள்ளாமல் வெளிப்படையாக ஆதரவு தெரிவிக்க முன் வந்துள்ளன.

பி.ஜே.பி.யோடு கூட்டணி வைத்துள்ள தமிழ்நாட்டு அரசியல் கட்சிகளும் அம்பலப்படுத்தப்பட்டு விட்டன. எந்த முகத்தை வைத்துக் கொண்டு தந்தை பெரியார் பிறந்த தமிழ் மண்ணில் வாக்குக் கேட்கப் போகிறார்கள் என்ற கேள்விக் குறி கிளர்ந்து எழுந்துள்ளது. மரியாதையாக இந்த நேரத்திலாவது கூட்டணியை முறித்துக் கொள்ள முன்வர வில்லையென்றால் காலா காலத்திற்கும் அவர்களைத் தமிழ்நாட்டு மக்கள் கறுப்புப் பட்டியலில் வைத்து விடு வார்கள் - அவர்களின் எதிர்காலம் ஆயுள் தண்டனைக் கைதி என்ற நிலைக்குத் தான் தள்ளப்படும்.

தொண்டை வறளக் கத்துவதாலேயே,  முகத்திரையைத் தொங்கப் போட்டுக் கொண்டு வருவதாலேயோ தமிழர்களின் அறிவு நாணயமான தாக்குதல்களிலிருந்து தப்பவே முடியாது!

தினமணி ஏடு முன் வந்து ஆர்.எஸ்.எஸ். அஜண் டாவான பி.ஜே.பி.யின் தேர்தல் அறிக்கையை வரவேற்பதைப் புரிந்து கொள்ள முடியும்; காரணம் தினமணி என்பது அதிகாரப் பூர்வமற்ற ஆர்.எஸ்.எஸ். ஏடு; அதுவும் திருவாளர் வைத்தியநாதய்யர் தட்டிப் பார்த்து தினமணி யின் ஆசிரியராகக் கொண்டு வரப்பட்டவர்; அவரின் ஆர்.எஸ்.எஸ். அபிமானமும் வெறியும் நாடு அறிந்த ஒன்றே!

அயோத்தி ராம ஜென்ம பூமி கோயில், பொதுக் குடியுரிமை சட்டம், ஜம்மு காஷ்மீருக்குச் சிறப்பு சலுகை வழங்கும் அரசியல் சட்டப் பிரிவு 370, ஆகியவை பற்றிய பா.ஜ.க.வின் நிலைப்பாடு வலியுறுத்தப்பட்டிருக்கிறது. மேலே குறிப்பிட்ட அம்சங்கள் இடம் பெறாமல் போயிருந்தால்தான் ஆச்சரியப்பட வேண்டுமே தவிர, அந்தக் கட்சியின் கடந்த தேர்தல் அறிக்கைகளில் காணப்பட்ட  இந்த மூன்று அம்சங்களும் இந்தத் தேர்தல் அறிக்கையிலும் காணப்படுவதில் வியப்பேதும் இல்லை என்று சாமர்த்தியமாக தினமணி தலையங்கம் தீட்டியுள்ளதே - இது நேர்மையானது தானா?

இதற்கு முன் நடைபெற்ற 2004, 2009 பிஜேபி தேர்தல் அறிக்கைகளில் இவை இடம் பெற்றுள்ளனவா?  இல்லையே!

அது ஒருபுறம் இருக்கட்டும்; பிஜேபியின் தேர்தல் அறிக்கையில் கூறப்பட்டுள்ள இந்தத் திட்டங்கள் சரியானவை தானா? சமூக நீதி தானா? என்று தினமணி விவாதிக்காதது ஏன்? கருத்துத் தெரிவிக்காதது ஏன்? இவற்றை அமுக்கிவாசித்து விட்டு, வேறு பிரச்சினைகளுக்குத் தாவுவது ஏன்? இதற்குப் பெயர்தான் நயவஞ்சகப் பார்ப்பனத்தனம் என்பது! தினமணிகள் என்னதான் நயவஞ்சக நாடகமாடினாலும் தந்தை பெரியாரின் தமிழ் மண் புரிந்து கொள்ளும் நிலையில்தான் இருக்கிறது என்பதை மட்டும் நினைவூட்டுகிறோம்.

அதே நேரத்தில் தினத்தந்தி என்ற பச்சைத் தமிழர் நடத்தும் ஏட்டுக்கு மிகவும் பிற்படுத்தப்பட்ட சமுதாயத்தைச் சேர்ந்த ஆதித்தனார் அவர்களால் தோற்று விக்கப்பட்ட ஏட்டுக்கு என்ன வந்தது - என்ன நேர்ந்தது?

ஆச்சரியம் - ஆனால் உண்மை என்று நினைக்கும் அளவுக்கு பிஜேபியின் தேர்தல் அறிக்கையை வரவேற்று எழுதியிருப்பது வேதனையை அளிக்கிறது. இந்த வகையில் தினமலரோடு கைகோப்பது சரியானதுதானா? நியாயம் தானா? நரேந்திரமோடி இந்தத் தேர்தல் அறிக்கையில் முத்திரை பதித்துள்ளாராம்.

பா.ஜ.க.வை காங்கிரசுடன் மற்ற எதிர்க்கட்சிகளும் குறை சொல்லும் போது இந்துத்துவா கொள்கைதான் அவர்கள் (பிஜேபி) மூச்சு; நாங்கள் மதச் சார்பற்ற ஆட்சியைத் தருவோம் என்று முழங்கி வருகிறார்கள். ஆனால் பி.ஜே.பி.யின் தேர்தல் அறிக்கையைப் பார்க்கும்போது, அந்த ராகத்தை பா.ஜ.க. கொஞ்சம் அடக்கிவாசித்திருப்பதுபோல தெரிகிறது. அயோத்தியில் ராமர் கோயில் கட்ட வேண்டும் என்பதுதான் பா.ஜ.க.வின் திட்டவட்டமான நோக்கம் என்றாலும், இந்த தேர்தல் அறிக்கையில் அரசியல் சட்ட வரைமுறைகளுக்கு உட்பட்டு அதற்கான வழிமுறைகளைக் கண்டறிவோம் என்று உறுதி அளித்து இருக்கிறார்கள் என்று தினத்தந்தி தலையங்கம் குறிப்பிட்டுள்ளது.

இதுதான் மோடியின் முத்திரையா? இந்த முத்திரை மக்கள் மத்தியில் பிளவுகளை ஏற்படுத்தாதா? ராமன் கோயிலை எங்கே கட்டப் போகிறார்கள்? பாபர் மசூதியை அவர்கள் இடித்த இடத்தில்தானே கட்டப் போகிறார்கள்! இதனை தினத்தந்தி ஏற்றுக் கொள்கிறதா?

பாபர் மசூதி இடிப்பு என்பது குற்றச் செயல் இல்லையா? அந்தக் குற்றச் செயலுக்கு மேலாக இன்னொரு குற்றமா? எப்படி அரசியல் சட்ட வரைமுறைக்கு உட்பட்டு இடிக்கப்பட்ட இடத்தில் கட்ட முடியும்? நீதிமன்றம் ஒன்றும் அப்படிக் கூறவும் இல்லையே!

பிஜேபி - சங்பரிவார்க் கூட்டத்தைப் பொறுத்தவரை இந்தப் பிரச்சினையில் நீதிமன்றம் குறுக்கிட முடியாது; இது மக்களின் நம்பிக்கையைச் சார்ந்தது என்று சொல்லி வருவதையும் நினவு கூர்ந்தால், சட்டம், நியதிகளை எல்லாம் காலில் போட்டு மிதித்து, அதி காரத்தைப் பயன்படுத்தி ராமன் கோயிலைக் கட்டுவார்கள் அப்படித்தானே! அந்த நிலை உருவாகுமானால், நாடே கலவரப் பூமியாகி விடாதா?

தினத்தந்தி இப்படி தலையங்கம் தீட்டினால் சிறுபான்மை மக்கள் என்ன நினைப்பார்கள் என்பதை நினைத்துப் பார்க்க வேண்டாமா?

தந்தை பெரியார் பற்றியும் அவர்தம் கொள்கைகள், தொண்டுகள் பற்றியும் சிறப்பாக தலையங்கம் தீட்டி வந்திருக்கிற தினத்தந்தி இப்படித் தடுமாறுவது சரியல்ல; சிந்தித்துப் பார்க்க வேண்டும் என்பது தான் நமது உரிமையோடு கூடிய வேண்டுகோள். சூத்திரன் சம்பூகன் தவமிருந்தான் என்பதற்காக ராமன் அவனை வெட் டினானே - அந்த மனுதர்மம் மீண்டும் கோலோச்ச வேண்டுமா? ஒடுக்கப்பட்ட மக்களே சிந்திப்பீர்!

                            ---------------------------------"விடுதலை” தலையங்கம் 10-04-2014

Read more: http://viduthalai.in/page-2/78476.html#ixzz2yVCxIhmX