2009 இல் தி.மு.க. விலகியிருந்தாலும் எந்த மாற்றமும் வந்திருக்காது!

இதயத்தில் ஏந்திய இலட்சியச் சுடர் தனியே எரியட்டும்!

• காங்கிரசின் கொள்கைதான் பி.ஜே.பி.க்கும்
  
• தி.மு.க. விலகியிருந்தாலும் எந்த மாற்றமும் வந்திருக்காது
  
• தனியீழத்துக்கு இடதுசாரிகளின் இசைவு இல்லை

எல்லாவற்றையும் மறந்து திமுகவை குறை கூறுவதா?

இதயத்தில் ஏந்திய இலட்சியச் சுடர் தனியே எரியட்டும்! ஈழத் தமிழர்கள் பல்லாயிரக்கணக்கில், ராஜபக்சே அரசின் பயங்கரவாத ஒழிப்புப் போர் என்ற போர்வையில் - கொன்று அழிக்கப்பட்ட இனப்படுகொலைக்கும், போர்க் குற்றங்களுக்கும் மனித உரிமை மீறல்களுக்கும், பதில் கூற வேண்டிய நெருக்கடி பன்னாடுகளின் மூலமே அய்.நா. மனித உரிமை ஆணையத்தின் மூலமும் இரண்டாவது முறையாக (ஓராண்டில்) வந்துள்ளது. இந்திய அரசு - ஈழத் தமிழர்களின் தொப்புள் கொடி உறவுக்காரர்களான தமிழ்நாட்டுத் தமிழர்களின் வாக்குகளால் அமைந்ததைக் கூட மறந்துவிட்டு, போரின்போது இராணுவ உதவிகளை இலங்கைக்குத் தாராளமாகச் செய்த கொடுமை போதாது என்று, அய்.நா. மனித உரிமை ஆணையத் தீர்மானத்தை - அமெரிக்கா கொண்டு வந்த நிலையில், தலையிட்டு நீர்த்துப் போகச் செய்துள்ளதைவிட, தமிழினத்திற்கும், மனித உரிமைப் போராளிகளுக்கும் செய்த மகத்தான துரோகம் வேறு இருக்க முடியாது.

தி.மு.க.வின்  பேருதவியாலும், இக்கட்டான கட்டங்களிலும் தந்த ஆதரவினாலும், ஆட்சியில் இன்னமும் நீடிக்கும் காங்கிரஸ், இப்பிரச்சினையால் பச்சையாகவே தமிழர் விரோதப் போக்கைத்தான் கடைப்பிடித்துள்ளது! மிகவும் வெட்கக் கேடானதாகும்!

தி.மு.க.வும் மற்ற சில கட்சிகளும் விடுத்த வேண்டுகோளையோ,  மாணவர்கள் பொங்கி எழுந்து காட்டிடும் உணர்வுகளையோ அது மதித்து நடந்து கொள்ளவில்லை! வெளியுறவுத்துறை அமைச்சர், நிதியமைச்சர் மற்றும் சில அமைச்சர்கள் கொடுத்த வாக்குறுதி, எல்லாம் காற்றில் பறந்து விட்டன!

கெட்டிக்காரன் புளுகுக்குக்கூட எட்டு நாள்கள் தான் கெடு; காங்கிரஸ் ஆட்சி சார்பில் எந்தத் திருத்தங்களும் அமெரிக்கத் தீர்மானத்திற்குத் தரப்படவே இல்லை என்ற உண்மையை, அமெரிக்க அதிகாரி நேற்று அம்பலப்படுத்தி விட்டார்!

 இதை அறிந்த நிலையில்தான், தி.மு.க. இதுவரை எத்தனையோ சோதனைகள் வந்த நேரத்தில்கூட, தனது கட்சிக்கார அமைச்சர்கள் எம்.பி.கள் கூட அவமதிப்புக்கும் ஆண்டுக்கணக்கில் டில்லி சிறையில் வதியும் நிலை ஏற்பட்ட போதுகூட, நாட்டின் பொது நலம் - மதச் சார்பின்மைக் கொள்கைக் கொடி தாழ்ந்து விடக் கூடாதே என்ற பெரு நோக்கில், எங்கள் கட்சி நலனைவிட நாட்டு நலனே முக்கியம் என்று கருதி, மத்தியில் காங்கிரஸ் தலைமையில் உள்ள அய்க்கிய முற்போக்குக் கூட்டணி அரசை விட்டு வெளியேறாமல் உள்ளோம் என்று உறுதி காட்டினார்கள். அவப்பெயர்களைக் காங்கிரசுடன் சேர்ந்து தூக்கிச் சுமந்தனர். எதற்கும் ஓர் எல்லை உண்டு அல்லவா?

ஈழத் தமிழர் வாழ்வுரிமையைப் பறிப்பதில் ஒரு நாடகத்தைத் தான் காங்கிரஸ் அரங்கேற்றியதே தவிர, இதய சுத்தியாக எந்த உதவியும் செய்யவில்லை.  அதற்குக் முக்கிய காரணம் என்னவென்பது உலகறிந்த ஒன்று!

பல வெளி நாட்டவர்கள் - போர் நடக்கும் போது எடுத்த சமாதான முயற்சிகளைக்கூட இந்தியா செய்தது இல்லை; மாறாக இராணுவ உதவி, இராஜபக்சேக்களை தலைமை விருந்தினராக அழைத்து, தமிழர்களின் வெந்த புண்ணில் வேலைச் சொருகிய கொடுமையே மிஞ்சியது! தி.மு.க.வின் தலைவர் கலைஞரும், பொதுச் செயலாளர் இனமானப் பேராசிரியரும் மற்றும் பொறுப்பாளர்களும் சரியான நேரத்தில் சரியான முடிவாக - அய்க்கிய முற்போக்குக் கூட்டணி அரசிலிருந்தே விலகுகிறோம்; எக்காரணம் கொண்டும் அரசினை ஆதரிக்க மாட்டோம் என்று கூறி, குடிஅரசுத் தலைவரிடமே கடிதம் தந்து தெரிவித்து, தி.மு.க.வின் தலைமைச் செயற்குழுவும் அதனையே அப்படியே ஏற்றதன் மூலம், வெறும் பதவிக்காக இருக்கும் கட்சி அல்ல; தமிழர்களின் நலன் காக்கும் லட்சியத்தை மூச்சாகக் கொண்டது என்பதை அகிலத்திற்கும், எப்போதும் இவர்கள் நம்மிடம்தான் இருப்பர் என்ற ‘Take  it for granted’ மனப்பான்மை கொண்ட காங்கிரஸ் கட்சிக்கும் சிறப்பாக  உணர்த்தி விட்டனர்!

இதைப் பாராட்டி வரவேற்க மனமில்லாத வன்நெஞ்ச அரசியல் வக்கணையாளர்களும் வாய்சவடால்காரர்களும் தி.மு.க.மீது சேற்றை வரி இறைப்பதையே தமது பிறவிப் பெருங் கடமையாகக் கொண்ட இன எதிரிகளின் ஊடகங்களும் ஏன் இவர்கள் 2009இல் வெளியே வந்திருக்க வேண்டாமா? என்றுதான் இன்னமும் குறுக்குசால் ஓட்டி வருகின்றனர்!

இதற்கு எத்தனையோ முறை பதில் அளித்து விட்டாகி விட்டது; முன்பு வெளியே வந்திருந்தால் அது யாருக்கு லாபம் - மதவெறி சக்திகளுக்கு லாபமாக அமைந்து காவிமயமாக்கிடும் ஆட்சி அமையவே அப்போது அது வாய்ப்பை ஏற்படுத்தியிருக்கும்!

இந்திய அரசியலில் ஒரே பிரச்சினை ஈழத் தமிழர் பிரச்சினை மட்டும்தானா? இங்குள்ள தமிழர்கள் - பார்ப்பனரல்லாதார் நலம் - உரிமைகள் காக்கப்படல் முக்கியமல்லவா? அனைவரும் அனைத்தும் பெற வேண்டாமா?

இவ்வளவு நெருக்கடியான சூழ்நிலையில்கூட, மனம் மாறாத, குணம் மாறாத காங்கிரஸ் ஆட்சி அப்போது மட்டும் மாறி உடனே தனது இலங்கை ஆதரவுப் போக்கை  மாற்றிக் கொண்டிருக்கும் என்று எவராவது உறுதியாகக் கூற முடியுமா?

அதன் விளைவு... பா.ஜ.க. போன்ற மதவாத ஆட்சி மீண்டும் அரியணை ஏறியிருக்கும். ஆனால் இவர்களால் வெளிஉறவுக் கொள்கைதான் மாறியிருக்குமா? சில அறிவு ஜீவிகள் சொல்லட்டும்! இன்றுள்ள இக்கட்டான சூழ்நிலையில்கூட பிஜேபியின் இலங்கை பற்றிய நிலைப்பாடு என்ன? திருமதி சுஷ்மாசுவராஜ் - எதிர்க்கட்சித் தலைவர் - நாங்கள் போர்க் குற்றம் புரிந்தது இலங்கை என்றே ஒரு போதும் கூற மாட்டோம் என்கிறாரே!

வெளிஉறவுக் கொள்கையை மாற்றிக் கொள்ளச் சொல்ல மாட்டோம் என்கிறார்களே; ஏற்கெனவே அவர்கள் ஆட்சியில் இருந்தபோதும் இதே வெளி உறவுக் கொள்கைதானே செயல்பாடாக இருந்தது!

அவர்கள் (பா.ஜ.க.) பாகிஸ்தானைப் பார்க்கும் கண்ணாடி வேறு, இலங்கையைப் பார்க்கும் கண்ணாடி வேறு என்ற ஒன்றைத் தவிர வேறு என்ன பெரிய மாற்றத்தை ஏற்பார்கள்?

இடதுசாரிக் கட்சிகள் - ஏதோ தமிழ்நாட்டில் சிலர்  பேசுகிறார்களே தவிர - ஈழத்தை ஆதரிக்கின்றனரா? அய்க்கிய ஸ்ரீலங்கா என்பதன்மீது தான் எங்கள் நிலைப்பாடு இருக்கும் என்றுதானே தலைகள்பேசுகின்றன. இங்குள்ள வால்கள் ஆடினால் போதுமா? நல்லெண்ணம் படைத்தவர்களுக்குத்தான் நமது இந்த விளக்கமே தவிர, விஷமப் பிரச்சார விதண்டாவாத விவேக சிந்தாமணிகளுக்கு அல்ல!

தி.மு.க.வின் தலைமைச் செயற்குழு தீர்மானம் ஒருமனதாக நிறைவேறியுள்ள தீர்மானம்! சருகுகளின் சலசலப்பு, இதை வைத்து தி.மு.க.வில் ஓட்டை போடலாமா என்ற சேட்டை செய்யும் செய்தி ஏடுகள்பற்றி திமுக தலைமை சற்றும் யோசிக்க வேண்டியதே இல்லை! எந்தக் காலத்திலும் தன் உழைப்பை மட்டும் தந்து கொள்கைக்காக தனது உயிரையும் தரத் தயாராக இருக்கும் கட்டுப்பாட்டின் கவசங்களான லட்சோப லட்சம் திமுக தொண்டர்கள் பட்டாசு வெடித்து மகிழ்ச்சி பொங்க இம்முடிவினை வரவேற்று, புதிதாக களம் காண புத்துணர்ச்சி பொங்கத் தயாராகி உள்ளனர். அதுதான் கணக்கில் கொள்ளப்பட வேண்டுமே தவிர, மற்றவை அல்ல.  அண்மையில், வங்கத்து சிங்கக் கவிஞர் இரவீந்திரநாத் தாகூர் அவர்களின் றுயடம ஹடடிநே தனித்தே நடங்கள் என்ற கவிதை ஒன்றின் உயிரோட்டமான வரிகளை திமுக விற்கு தாய்க்கழகம் என்ற உரிமையோடும் பாசத்தோடும் சுட்டிக் காட்ட விழைகிறோம்.

“if they answer not your call walk alone
with the thunder flame of pain ignite thine own heart,
And let it burn alone

- Ravindranath Tagore, ‘Walk Alone’

(இதன் தமிழாக்கம்)

உங்கள் அழைப்புக்கு அவர்கள் பதில் அளிக்காவிட்டால் (நீங்கள்) தனியே நடங்கள்!

உங்கள் உள்ளத்தில் எரி இடி போன்று ஏற்பட்ட வலி இதயத்தில் ஏற்றிய அந்தச் சுடர் தனியே எரியட்டும்!..

------------------------- கவிஞர் இரவீந்திரநாத் தாகூர்  

தனித்தே நடங்கள் கவிதையில்

இன்னமும்கூட தி.மு.க. எனும் யானையைப் பார்த்து வர்ணித்த அய்வர்கள் இனிமேல் புரிந்து கொள்ளும் நிலையை வரலாற்றின் அடுத்தக் கட்டம் உருவாக்குவது உறுதி! டெசோவைப் பற்றிய திண்ணைப் பேச்சுக்காரர்களின் வெண்ணெய் வெட்டிப் பேச்சு என்ற மாயத்தில் கிழிந்து தொங்குகிறது! போலி எது? உண்மை எது என்பதைப் புரிந்து கொள்ளும் காலம் ஞாலத்திற்கு இதன் மூலம் ஏற்பட்டுள்ளது!

                              -----------------------------கி.வீரமணி  தலைவர்,  திராவிடர் கழகம்-"விடுதலை” 29-03-2013