திராவிட இயக்கத்தின் பார்ப்பனீய எதிர்ப்பு - ஏன்?

திராவிட இயக்கத்தின் ஆணிவேர், அசைக்கவியலாக் கற்றூண் திராவிடர் கழகம் பார்ப்பனீயத்தைத் தொடர்ந்து எதிர்த்து, பாமரனுக்கு நல்லறிவு புகட்டி வருகிறது.

இன்றைக்கு 56 ஆண்டுகளுக்கு முன் நடைபெற்ற ஒரு நிகழ்ச்சி. அதனைப் பார்ப்-பனீயம் எப்படிப் பார்த்தது? திராவிட இயக்கம் எப்படிப் பார்த்தது? என்பதற்கான சுவையான நிகழ்ச்சி இது. நினைத்துப் பார்க்கும் வரலாற்று நிகழ்வு இது.

கவிமணி தேசிக விநாயகம் பிள்ளை என்று போற்றப் பெற்ற தமிழ்க் கவிஞர், புத்தரின் வரலாற்றைப் பாடலாக வரைந்து, புத்தரின் பெருமைகளைத் தமிழர்கள் அறிய ஆசிய ஜோதி படைத்தவர்.

ஓடும் உதிரத்தில், வடிந்தொழுகும்
கண்ணீரில் தேடிப் பார்த்தாலும்
சாதி தெரிவதுண்டோ அப்பா 

என்னும் அவர் பாடல் வரிகள் என்றும் சாதீயத்திற்கு எதிரான வரிகள். அவர் 1954 ஆம் ஆண்டு, செப்டம்பர் மாதத்தில் இயற்கை எய்தினார்.

அதே காலகட்டத்தில் சிருங்கேரி மடத்தின் தலைவர் சிருங்கேரி சங்கராச்-சாரியாரும் இறந்தார். இயற்கை எய்தவில்லை. அதாவது இயற்கையாக இறக்காமல் துங்கா ஆற்றில் 62 ஆம் வயதில் ஆற்றில் நீராடச் சென்று வெள்ளத்தில் அடித்துக் கொண்டு போகப்பட்டு இறந்தார். அவரை எடுத்து முதல் உதவி செய்தும், போன உயிர் போனதுதான். செத்துப்போனார். இதுதான் செய்தி.

இந்த இருவர்  78 வயதான தேசிகவிநாயகம், 62 வயதான சிருங்கேரி அதிபர் ஆகிய இருவரும் இறந்த செய்தியைப் பார்ப்பனீய ஏடுகளான இண்டியன் எக்ஸ்பிரஸ், சுதேசமித்திரன் ஆகிய இரண்டு ஏடுகளும் எப்படிச் செய்தி வெளியிட்டன என்று உற்றுக்-கவனித்து விடுதலை ஏடு அன்றே பார்ப்பனீயப் புத்தியை வெளிச்சம் போட்டுக் காட்டியதை இன்று படிக்கையில் சுவையாக இருக்கிறது. ஒரே சமயத்தில் இரண்டு சாவுகள். ஆனால் வர்ணனை மட்டும் இரண்டு விதம்.

சிருங்கேரி சங்கராச்சாரியார் விதேக முக்தி அடைந்தார் (27_9_1954 சு.மி,இண்டியன் எக்ஸ்பிரஸ்),

கவிமணி தேசிக விநாயகம்பிள்ளை மரணமடைந்தார்.
(27.9.1954 சு.மி. இண்டியன் எக்ஸ்பிரஸ்,)

சங்கரர் ஆற்றில் அடித்துச் செல்லப்பட்டு, முதற்சிகிச்சை செய்தும் இறந்து-போனார் 62 வயதில். கவிமணியோ 78 வயதில் இறந்து போனார்.

ஆனால் ஒருவரின் இறப்பு விதேக-முக்தி மற்றொருவரின் இறப்பு மரணம்
சங்கராச்சாரியாருக்கு ஒரு சட்டம். மற்றவர்களுக்கு ஒரு சட்டம் தண்ணீரில் விழுந்து செத்துப் போனால் சவப்பரிசோதனை செய்ய வேண்டாமா? யாராவது பிடித்துத் தள்ளியிருக்கலாமா? அல்லது தற்கொலையா? அல்லது வெளியே கொன்றுவிட்டுத் தண்ணீரில் எறிந்திருக்கலாமா? இம்மாதிரி சந்தேகங்களைத் தீர்த்துக் கொள்ளத்தானே சவப்பரிசோதனை செய்கிறார்கள்? லோகுகுருவின் மரணத்தை இவ்வளவு அலட்சியமாக விட்டு விடலாமா? என்று விடுதலை கேட்டது.

அத்தோடு பொதுவான சில வினாக்களையும் எழுப்பியது.

பார்ப்பனத்தி ஆடினால் பரத-நாட்டியக்கலை! நம் பெண்கள் ஆடியபோது அது சதிர்

பார்ப்பான் வைத்திருப்பது புரொவிஷன் ஸ்டோர்ஸ்; திராவிடன் வைத்திருப்பது மளிகைக்கடை

பார்ப்பான் உயர் பதவியில் அமர்ந்தால் அது தகுதியும் திறமையும்; திராவிடன் தன் உரிமையைக் கேட்டால் பதவி வேட்டை!

பார்ப்பான் தெலுங்குக் கீர்த்தனம் பாடினால் அது கருநாடக சங்கீதம்! 

திராவிடன் தமிழ்ப்பாட்டுப் பாடினால் வெறும் துக்கடா பாட்டு

பார்ப்பான் கெண்டியிலிருந்து விழுந்தால் தீர்த்தம்; அதையே நாம் ஊற்றினால் வெறும் தண்ணீர்.

பார்ப்பான் அரிசியையும் மஞ்சளையும் சேர்ந்து தம் தலையில் போட்டால் அது அட்சதை

அதையே அவன் தலையில் நாம் போட்டால் அரிசி.

பார்ப்பான் பசுஞ்சாணியையும் மூத்திரத்தையும் பாலையும், தயிரையும், நெய்யையும் கலந்து கொடுத்தால் அது பஞ்சகவ்யம்

இந்த அய்ந்தில் இரண்டு மாட்டுக் கொட்டிலில் கிடந்தால் அருவெறுப்பான பொருள்கள்.

பார்ப்பனப் பெண்கள் தவறாக நடந்தால் அது வேதப் பிரமாணம் அல்லது சினிமாக் கலை வளர்ச்சி அல்லது சோஷியல் நடத்தை.

திராவிடப் பெண்கள் தவறாக நடந்தால் விபச்சாரம்.

பார்ப்பான் கைபட்டால் கல், செம்பு உருவங்களெல்லாம் கடவுள்கள்; 

திராவிடன் அவைகளையே விற்றால் புதுச்சேரி பொம்மைகள்.

--------------------முனைவர் பேராசிரியர் மங்களமுருகேசன்--"விடுதலை”16-10-2010