இந்துத்துவாவாதிகளின் கரசேவை - தி.க.தோழர்களின் கரசேவை

கழகத் தோழர்களின் கரசேவை!

கழகத் தோழர்களே! தமிழர் தலைவர் மானமிகு கி.வீரமணி அவர்களின் 81ஆம் ஆண்டு பிறந்த நாளில் (2.12.2013) பெரியார் உலகத்திற்கு ஆயிரம் சவரன் தங்கத்திற்கான நிதியை அளிப்பது என்று கழகத்தின் தலைமைச் செயற்குழு, பொதுக் குழுவின் முடிவின்படி இயக்கத்தின் செயல்திறனை வெளிப்படுத்திக் கொண்டுள்ளோம்.

இதில் சில மாவட்டங்கள் தங்கள் ஒதுக் கீடுகளை விஞ்சி பல மடங்கு நிதியை அளித்துள்ளன. வேறு சில மாவட்டங்கள் தங்களுக்குரிய இலக்கை முடிக்கவில்லை. விழா முடிந்துவிட்ட காரணத்தால் தமது கடமையும் முடிந்து விட்டதாக பொறுப்பாளர்கள் கருதி விடக் கூடாது.

இந்த நிதி திரட்டுவதில் நமது தோழர்கள் தெரிவித்துள்ள அனுபவங்கள் மிகவும் முக்கியமானவை.

பெரியார் பேருருவச் சிலைக்காக நிதி திரட்டச் சென்ற இடங்களில்  எல்லாம் எவரும் முகம் சுளிக்கவில்லை; தந்தை பெரியார் அவர்களுக்கு நாம் செய்ய வேண்டியது நமது  அடிப்படைக் கடமை, நாம் செலுத்தும் நன்றி உணர்ச்சி என்று உள்ளமும், முகமும் மலர்ந்து நிதியை அளித்துள்ளனர்.

இதுவரை தங்கள் இலக்கை முடிக்காத மாவட்டக் கழகப் பொறுப்பாளர்களுக்கு இந்தத் தகவல் கூடுதல் தன்னம்பிக்கையை அளிக்கும் என்பதில் அய்யமில்லை. பெரியார் உலகத் திற்குத் தேவைப்படும் நிதி மிகப் பெரியது. இப்பொழுது அளித்திருப்பதோ வெறும் 5 விழுக்காடே! இத்திசையில் நாம் பயணிக்க வேண்டிய தூரம் அதிகம்.

நம்மால் முடியாதது வேறு எவராலும் முடியாது; வேறு எவராலும் முடியாதது நம்மால் மட்டுமே முடியும் என்று கழகத் தலைவர் சொன்னதை மெய்ப்பிப்பதற்கு இது ஒரு முக்கியமான தேர்வு.

இதுவரை வைக்கப்பட்ட தேர்வுகளில் இது மிகப் பெரியது; இதிலும் முதல் நிலையில் வெற்றி பெற்றோம் என்று காட்டிக் கொள்ள வேண் டாமா?

இதுவரை எப்படி இருந்தாலும் கொட்டும் மழையிலும்  நாற்காலிகளையே குடையாகப் பிடித்துக் கொண்டு கடைசிவரை விழாவில் ஆற்றப்பட்ட உரைகளைச் செவி மடுத்தவர்கள் நம் கழகத் தோழர்கள் மட்டுமல்ல - நம் தமிழினப் பெருங்குடி மக்களும்தான்.

இந்த உணர்வை நாம் சரியாகப் புரிந்து கொண்டு, இன்று முதலே எஞ்சிய இலக்கினை முடிக்க, கழகப் பொறுப்பாளர்களே, கழகத் தோழர்களே முந்துவீர்!

பெரியார் உலகம் பேரலைகளை எழுப்பப் போகிறது. இதுவரை பெரியார்பற்றி அறிந்திராத இருண்ட பகுதிகளில் எல்லாம் ஒளி பாய்ச்சப் போகிறது.

வெளிநாட்டுக்காரர்கள் எல்லாம்கூட வந்து பார்க்கும் பகுத்தறிவுச் சுற்றுலாத் தலமாக  ஆகப் போகிறது!

இந்தியாவில் சுற்றுலாத்தலம் என்றால் வெறும் கோயில் குளங்களுக்குத்தான் அழைத் துச் செல்வார்கள். அரசு சுற்றுலாத் துறையும் அதனைத் தான் செய்து கொண்டிருக்கிறது.

சிறுகனூரில் பெரியார் உலகம் உருவாக் கப்படும்பொழுது, இந்த நிலை மாற்றப்படக் கூடிய நிலை  பிறக்கும் என்பதில் அய்யமில்லை.

நாம் வாழும் காலத்தில் இப்படிப்பட்ட ஓர் அரும்பெரும் சாதனையை நமது இயக்கக் குடும்பத் தலைவர் நிகழ்த்திக் காட்டப் போகிறார்.

அந்தக் கரத்தைப் பலப்படுத்த நமக்கான கரசேவையாக இது இருக்க வேண்டாமா? இது நமக்குக் கிடைத்திட்ட மிகப் பெரிய வாய்ப்பும் பேறும் அல்லவா!

இந்துத்துவாவாதிகளின் கரசேவை என்பது நாசப் பணியைச் சேர்ந்தது; கழகத் தோழர் களின் கரசேவை என்பது ஆக்கபூர்வமானது, அறிவுப் பூர்வமானது, மனித சமூக வளர்ச்சிக் கானது, சமத்துவச் சிந்தனையை மூச்சுக் காற்றாகக் கொண்டது,  முற்போக்குத் தன்மையைக் கொண்டது.

களப்பணி ஆற்றுவோம், கடமையை நிறைவேற்றுவோம்.

தோழர்களே தயார்; தயார் தானா?

வாழ்க பெரியார்! வளர்க பகுத்தறிவு!

                                   ----------------------------- ”விடுதலை” தலையங்கம் 4-12-2013