பெரியார் விட்டுச் சென்ற சொத்துக்கள் எவ்வளவு? தமிழர் தலைவரின் பிறந்த நாள் சூளுரை!

எமது அசையாச் சொத்துகள்  பெரியார் தந்த கொள்கைகள்!

அசையும் சொத்துக்கள் அர்ப்பணிப்போடு உழைக்கும் கழகத் தோழர்கள்

பெரியார் உலகைக்காண சீரிளமைத் திறத்தோடு உழைப்பேன்! தமிழர் தலைவரின் பிறந்த நாள் சூளுரை!

திராவிடர் கழகத் தலைவர் தமிழர் தலைவர் விடுத்துள்ள பிறந்த நாள் சூளுரை வருமாறு:

எனக்கு நாளை 81ஆம் ஆண்டு பிறக்கிறது! அது இயற்கையின்பாற்பட்டது.

வயது கணக்குப்படி முதுமையை நோக்கிய பயணம் அது என்ற போதிலும், வாழுவது இலட்சியங்களுக்காக என்று கருதி, வாழ்க்கைப் பயணத்தைத் தொடர்ந்து அது அனுபவப் பாடங்களை அதிகம் பெற்று திளைக்கும் வாய்ப்பான பருவம் என்று கொள்ளலாம். கடந்த 25 ஆண்டுகளில் ஏற்பட்ட நலிவுகள் - மருத்துவ வளர்ச்சி யாலும் சில மருத்துவ நண்பர்களின் ஆற்றல் மிக்க சிகிச்சைகளாலும், சரி செய்யப்பட்டதால்  என் கடன் பணி செய்வதே என்றும் என்று கூவி, பணி செய்வதில் குன்றா ஆர்வம் தொடர்ந்து வருகிறது.

எனது உற்சாகப் பணிக்குக் காரணிகள்

உடல் நலம், உள்ள நலம் இவைகளைப் பெற்று மேலும் தீவிரமாக உழைக்க உறுதியுடன்  தொடர்வதற்கு காரணி களாக அமைந்தவை இவை:

1. என் வாழ்விணையர், எனது குருதிக் குடும்பத் தவர்கள் அனைவரும் எனக்கு எந்த மன உளைச்சலையோ, சங்கடத்தையோ  தராதவர்கள் மட்டுமல்ல; என் கொள்கை வழியை ஏற்று என்றும் துணையாக நிற்பவர் கள், எனது கொள்கைப் போருக்கு என்றும் ஊக்க மூட்டு பவர்கள்.

2. எனது கொள்கைக் குடும்பத்து உறவுகள் அவர்களின் நாளும் வளரும் பாசமும், வற்றாத அன்பும்,  மாறாத நம்பிக்கையும் லட்சியப் பயணத்தைத் துணிவைத் தருவ தோடு - பெரியார் பணி முடிக்க, பெரியார் புத்துலகம் காண  எம்மை சதா ஊக்கப்படுத்திய வண்ணமே உள்ளனர்.

3. சிறந்த மருத்துவர்களின் கொடைதான் இந்த வாழ்வு நீண்டு கொண்டு, பயணம் செய்திட உடல் வலிமை யோடு, வயதை மறந்து, ஓய்வைத் தேடாமல், உழைத்துக் கொண்டே இருக்க உதவியாக அமைந்துள்ளது.

இயக்கத்தின் செயற்பாடுகளை எம்மால் இயன்ற மட்டும் - செய்து கொண்டே இருக்க இந்த ஆயுள் வளர்ச்சி அற்புத வாய்ப்பாக அமைந்துள்ளது!

அறிவு ஆசான் அளித்த அரும் கொடைகள்

நன்றி பாராப் பணி, மானம் பாராத தொண்டு பதவி - புகழ் தேடாத எதிர்நீச்சல், உள்ளுக்குள் ஒன்று வைத்துப்  புறமொன்று பேசிடும் இரட்டை வாழ்க்கையை அறவே அறியாத ஓர் எளிய வாழ்க்கை - இவை களில் அடையும் எல்லையற்ற மன நிறைவு, மகிழ்ச்சி ஆகிய இவை அனைத்தும் நம் அறிவு ஆசான் தலைவர் தந்தை பெரியார் அவர்கள் எமக்க ருளிய அருட்கொடைகள்!

பயனடைபவன் என்ற முறையில் அக்கடன் தீர்க்கவே, நாளும் அலுப்பு, சலிப்பின்றி அவர்கள் விட்ட பணியை முடிக்க, உழைப்பதில் தனி இன்பம் கண்டு, மகிழ்பவனாக உள்ளேன்.

அசையாச் சொத்துகளும், அசையும் சொத்துக்களும்

சுயமரியாதையும், பகுத்தறிவும் அய்யா தந்த கொள்கை களும் எம்மிடமிருந்து இறுதி மூச்சடங்கும் வரை எவராலும் பறிக்கப்பட முடியாத அழியாச் சொத்துக்கள்! ஆம்  அவை தான் நான்  சம்பாதித்த அசையாச் சொத்துக்கள்!

அப்படியானால் அசையும் சொத்துக்கள் இல்லையா என்று நீங்கள் கேட்பது காதில் விழுகிறது; உண்டு. உண்டு. தன்னலம் துறந்து, கட்டுப்பாடு காப்பதில் இராணுவமும் தோற்கும் என்பதான எமது இயக்கத் தோழர் - தோழியர்கள்  - இளைஞர்கள் அனைவரும் தான் அந்த அசையும் சொத்துக்கள்!

பெரியார் விட்டுச் சென்ற சொத்துக்கள் எவ்வளவு இருக்கும் என்று அடிக்கடி கேட்கும் ஆவலாதிகளான அன்பர்களுக்கும்கூட இது தெளிவுபடுத்தும் விடையாகும்.

பெரியார் சொல்லிக் கொடுத்த இலக்கணம்!

இயக்கத்திற்கு வந்து உழைக்க எங்களைப் போன்ற தொண்டர்களுக்கு, நமது அறிவு ஆசான் சொல்லிக் கொடுத்த இலக்கணம் - எமக்கு என்றும் சிறந்த மறக்க இயலாத பாடமாக இருக்கும்!

இப்போது இந்த ஸ்தாபனத்தில் இருக்க வேண் டியவர்கள் முக்கியமாக மனதில் வைக்க வேண்டிய காரியம் ஒன்று உண்டு. அதாவது, பொது ஜனங் களிடத்தில் நல்ல பேர் எடுக்க வேண்டுமே என்கின்ற கருத்தோடு இந்த மாதிரியான ஸ்தாபனங்களில் வேலை செய்யவே கூடாது.

நல்ல பேர் எடுக்க கொஞ்சமும்கூட முயற்சிக் கவே கூடாது. இதுதான் என்னுடைய பொது நலத்தின் குறிக்கோள்.

பொது ஜனங்களின் யோக்கியதை எனக்குத் தெரியும். 100-க்கு 85 பேர் தற்குறிகள். தங்களுக்கு வேண்டியவை என்னவென்பதைக் கூடத் தெரியாத வர்கள். தங்கள் முன்னோர்கள் யார்? தங்கள் நாடு எது? தங்கள் (ஜாதி) இனம் என்ன? என்பதையே உணராதவர்கள்.

மீதியுள்ளவர்கள் 15 பேர்கள் சுயநலக்காரர்கள் பக்கத்து வீடு தீப்பிடித்து எரிந்தால் அதை அணைக்க ஒரு செம்பு தண்ணீர்கூடக் கொடுக்க மனம் வராதவர்கள், அதுவும் நம் வீடு எரியும்போது அணைக்கத் தண்ணீர் வேண்டாமா? என்று கருதிக் கொண்டு, அதை மிச்சப்படுத்திவைத்திருக்கும் அவ்வளவு புத்திசாலிகள்!

இந்த மாதிரி ஜனங்களிடத்தில் ஒரு மனிதன் நல்ல பேர் வாங்குவதென்றால், அது உண்மையான பொதுத் தொண்டு ஆகுமா? அந்த நல்ல பேர் பொதுத் தொண்டினால் ஏற்பட்டதாக இருக்க முடியுமா?

இவர்களில் நல்ல பேர் வாங்க அநேக பித்தலாட் டங்களும், அயோக்கியத்தனங்களும், ஏமாற்றல்களும் செய்தாக வேண்டியிருக்கும். ஆதலால் தான் பொது ஜனங்களிடம் நல்ல பேர் எடுக்க முயற்சிப்பவன், பொதுத் தொண்டுக்கு லாயக்கற்றவனாவான் என்று சொல்லி வருகிறேன்.

பாமர மக்களையும், சுயநலக்காரரையும் திருப்திப் படுத்துவதுதான் பொது நலத் தொண்டு என்று எண்ணினால், உண்மையான நல்ல காரியம் ஒன்றும் செய்ய முடியாது. இவர்களை லட்சியம் செய்யாமல் நமக்குச் சரியென்று பட்டதை, தைரியமாகச் செய்து கொண்டு போனால், அவை இன்றுள்ள மக்களால் போற்றப்படா விட்டாலும் இவர்களது பின் சந்ததியார் நன்மையடைந்து அவர்களால் போற்றப்படத் தக்கவையாக இருக்கும்

                     -----------------------(குடிஅரசு பெரியார் உரை 18.12.1943)

70 ஆண்டுகளுக்குமுன்பு அய்யா தந்த பாடம் 10 வயது சிறுவனாக இருந்து, மேடையின்மீது ஏற்றப்பட்ட காலம் முதல், 80 வயது முடிந்து 81ஆம் ஆண்டு தொடரும் இன்று வரை, எம்மை  காய்ச்சிய உலைக் கூடத்தில் அடித்து பக்குவப்படுத்தப்பட்ட கருவியாக ஆக்கியுள்ளது. மலைபோல் வரும் எதிர்ப்பும், அவ்வப்போது துளிர்க்கும் துரோகமும், பனி போல் விலகிடும் வகையில் பணி தொடரும் பக்குவத்தை எமக்கு அளித்துள்ளது!

தந்தை பெரியாருக்குப் பேருருவச் சிலை!

நம் வாழ்நாளில் நம்மை வாழ வைக்கும் தந்தை கண்ட புது உலகத்திற்கு உருவம் கொடுத்து, ஆங்கே 95 அடி உயரச்சிலை - பீடம் உட்பட 135 அடியில் உருவாக்கி, வரலாற்றுச் சின்னமாக்கிடும் திட்டத்திற்கு வாரி வாரி வழங்கும் இயக்கக் குடும்பத்தினர், பெரியார் பற்றாளர்கள், மானம் பாராது உழைக்கும் எமது கூட்டுப் பணியாளர் களான தோழர்கள் ஆகியவர்களுக்கு மகிழ்ச்சி கலந்த பாராட்டுகளைத் தெரிவித்துக் கொள்கிறேன்.

எனது சூளுரை!

ஜாதீய சக்திகள், மதவாத சக்திகள், மூடநம்பிக்கை வியாபாரிகள், பெண்ணடிமை போற்றும் பிற்போக்கு சக்திகளை எதிர்த்திடும் போரில் என்றும் இளையவ ராகவே இருந்து  பயணிப்போம் என்று சூளுரையேற்று சுயமரியாதை உலகு காண வயதை மறந்து, சீரிளமைத் திறத்தோடு போராடுவேன் என்ற உறுதியை உங்களுக் குச் சொல்கிறேன்.

உருவத்தால் நாம் பலர்; உணர்வால், உள்ளத்தால், உழைப்பால் நாம் ஒருவரே! என்பதால் இறுதி மூச்சடங்கும் வரை இயக்கப் பணியில் திளைப்போம்! உழைப்போம்.

நன்றி! நன்றி!!

வாழ்க பெரியார்!

வருக அவர் காண விரும்பும் புது உலகம்!!


 

-----------------------கி.வீரமணி தலைவர்,திராவிடர் கழகம்  1.12.2013  சென்னை 

---

தந்தை பெரியாருக்குப் பேருருவச் சிலை!

நம் வாழ்நாளில் நம்மை வாழ வைக்கும் தந்தை கண்ட புது உலகத்திற்கு உருவம் கொடுத்து, ஆங்கே 95 அடி உயரச்சிலை - பீடம் உட்பட 135 அடியில் உருவாக்கி, வரலாற்றுச் சின்னமாக்கிடும் திட்டத்திற்கு வாரி வாரி வழங்கும் இயக்கக் குடும்பத்தினர்,

பெரியார் பற்றாளர்கள், மானம் பாராது உழைக்கும் எமது கூட்டுப் பணியாளர் களான தோழர்கள் ஆகியவர்களுக்கு மகிழ்ச்சி கலந்த பாராட்டுகளைத் தெரிவித்துக் கொள்கிறேன்.