அது என்ன ஆவணி அவிட்டம்?

ஆவணி அவிட்டமா? 

இன்று ஆவணி அவிட்டமாம்! அது என்ன ஆவணி அவிட்டம்? பார்ப்பனர்கள் தாங்கள் பிராமணர்கள் என்றும், பிர்மாவின் முகத்திலிருந்து பிறந்தவர்கள் என்றும் காட்டிக் கொள்வதற்காக வலியுறுத்துவதற்கான நிகழ்ச்சிதானே இது?

ஆண்டுதோறும் இந்த ஆவணி மாதத்தில் குறிப்பிட்ட நாளில் பார்ப்பனர் பூணூலைப் புதுப்பித்துக் கொள்கின்றனர்.

பார்ப்பனச் சிறுவர்கள் பூணூல் அணிந்த பின்தான் பிராமணர்கள் துவி ஜாதி (இரு பிரிவு) ஆகிறார்கள்.

பூணூல் அணிவதன் மூலம் அவர்கள் உயர் ஜாதியினர் என்று அறிவித்துக் கொள்கின்றனர் என்பதைவிட, மற்றவர்களை சூத்திரர்கள் என்றும் கூறாமல் கூறுகின்றனர் என்பதை அறிய வேண்டும்.

சிலர் கூறலாம். ஆவணி அவிட்டத்தன்று பார்ப்பனர் அல்லாதாரில் சில பிரிவினர் செட்டியார், ஆசாரியார் போன்றவர்கள் பூணூல் அணிந்து கொள்கிறார்களே, அது எப்படி என்று கேட்கலாம் - ஏன் கேட்கவும் செய்கின்றனர்.

அது உண்மைதான் என்றாலும், இந்து சமூக அமைப்பில் வருணாசிரம அமைப்பின்படி சூத்திரர் பூணூல் அணிந்து கொள்ள அருகர் இல்லை. இதுகுறித்து மனுதர்ம சாஸ்திரம் என்ன கூறுகிறது?

பிராமணனுக்கு மிஞ்சிப் புல்லினாலும், க்ஷத்திரியனுக்கு வில்லின் நாணையொத்த முறுவற் புல்லினாலும், வைசியனுக்கு க்ஷணப்ப நாரினாலும், மேடு பள்ளமில்லாமல் மெல்லியதாகப்பின்னி மூன்று வடமாக மேலரை ஞாண் கட்ட வேண்டியது.

(மனு தர்மம் அத்தியாயம் 2 சுலோகம் 42)

மேலும் மனுதர்மம் கூறுவது: பிராமணனுக்குப் பஞ்சு நூலாலும், சூத்திரனுக்கு க்ஷணப்ப நூலாலும், வைசியனுக்கு வெள்ளாட்டின் மயிராலும் மூன்று வடமாகத் தோளில் பூணூல் தரிக்க வேண்டியது. (மனு தர்மம் அத்தியாயம் 2 - சுலோகம் 44).

இத்தோடு நிறுத்தினாலும் பரவாயில்லை. சூத்திரன் பிராமண ஜாதிக் குறியை - பூணூல் முதலியதைத் தரித்தால் அரசன் சூத்திரனின் அங்கங்களை வெட்டிவிட வேண்டும் (மனு அத்தியாயம் 9 - சுலோகம் 224).

இதன் மூலம் அறியப்படுவது என்ன?

நமது செட்டியாரும், ஆசாரியாரும் பூனை சூடு போட்டுக் கொள்வது போல போட்டுக் கொண்டும் பயனில்லை என்பதுதான். சாத்திர ரீதியாக அங்கீகரிக்கப் படாத ஒன்றேயாகும்.

1937 இல் சக்ரவர்த்தி ராஜகோபாலாச்சாரியார் சென்னை மாநில பிரதமராக வந்தபோது ஆசாரியார் ஆச்சாரியார் என்று தங்களை அழைத்துக் கொள்ளக் கூடாது என்று ஆணை போடவில்லையா?

ஜாதிக்கு எதிராக கடும் புயல் போன்ற எதிர்ப்பினை தந்தை பெரியாரும், திராவிடர் கழகமும் நாட்டில் எழுப்பியபோது, திரு. சோ ராமசாமி அய்யர் போன்றவர்கள்  சமாதானங்களைச் சொல்லும் நிலைக்கு அவர்கள் தள்ளப்பட்டுள்ளனர்.

பிராமணன் என்பது பிறப்பின் அடிப்படையில் வருவதல்ல; குணத்தின் அடிப்படையில் வரக் கூடியது என்று கற்பிதம் செய்ய ஆரம்பித்துள்ளனர்.
அப்படியானால் சோ ராமசாமிகளும், குருமூர்த்திகளும் குணத்தின் அடிப்படையில் பிராமணர் ஆனவர்களா? பிறப்பின் அடிப்படையில் பிராமணர்களா? என்ற கேள்வி எழவில்லையா? இதற்கு அவர்கள் தரப்பில் அறிவு நாணயமான முறையில் வைத் திருக்கும் பதில் என்ன?

பிர்மாவின் முகத்தில் பிறந்தவன் பிராமணன் என்று சாத்திரம் எழுதி வைத்து விட்டபின் இப்படி அவர்கள் பேசுவதோ எழுதுவதோ சரியானதுதானா?

பிராமணன் பிர்மாவின் முகத்தில் பிறந்தான் என்பது பிறப்பின் அடிப்படையில் அமைந்து விட்ட ஒன்றல்லவா!

மனுதர்மத்தை இந்த 21ஆம் நூற்றாண்டிலும் காப்பாற்றிட பக்கம் பக்கமாக எழுதும் திருவாளர் சோ கூட்டம் இந்தப் பிரச்சினையில் மட்டும் மனு தர்மத்தைக் கை கழுவப் போகிறதா?

பிறவியின் அடிப்படையில் வேறுபாட்டைக் கற்பிக்கும் இந்தப் பூணூல் அணியும் பண்டிகைகளை நியாயமாக  அரசு தடுத்திட வேண்டாமா?

இதில் வெட்கக்கேடு என்னவென்றால், இந்த ஆவணி அவிட்டத்திற்கு அரசு விடுமுறைகூட  விட்டது உண்டு. நாம் எதிர்க் குரல் கொடுத்த நிலையில் நீக்கப்பட்டது;  ஆனாலும் இப்பொழுதும் கூட பார்ப்பனர்கள் நடத்தும் தனியார் பள்ளிகளுக் கெல்லாம் விடுமுறை அளிக்கப்பட்டுள்ளது. மானமுள்ள தமிழர்கள் கட்சிகளுக்கு அப்பாற் பட்டு நம்மைச் சூத்திரர்கள் என்று பறைகொட்டித் தெரிவிக்கும் பூணூல் சின்னத்தை எதிர்த்துக்  கிளர்ந்தெழ வேண்டாமா?

                   -------------------------"விடுதலை” தலையங்கம் 20-8-2013