பெரியார் பாடங்கள் நீக்கத்திற்கானகாரணம் என்ன? மூல ஊற்று எது?

பிப்ரவரி 2 ஆர்ப்பாட்டம் - ஏன்?

திருநெல்வேலி மனோன்மணீயம் சுந்தரனார் பல்கலைக் கழகத்தின் பாடத் திட்டத்திலிருந்து தந்தை பெரியார் மற்றும் திராவிட இயக்கத் தொடர்பான பாடங்கள் நீக்கப்பட்டுள்ளன என்ற தகவல் நிச்சயம் தமிழ் நாட்டு மக்களைச் சூடேற்றும் என்பதில் அய்யமில்லை.

இந்த நிலைக்குக் காரணம் என்ன? மூல ஊற்று எது? என்பது வெளியில் வந்தாக வேண்டும்.

நீராரும் கடலுடுத்த என்ற பாடலை எழுதிய பேராசிரியர் சுந்தரம்பிள்ளையின் பெயரால் அமைந்த பல்கலைக் கழகத்தில் இப்படி ஒரு நிலையா என்ற கேள்வி எழுவது இயல்பே!

தமிழைப் பற்றிச் சொல்லும் பொழுதுகூட ஆரியம் போல் உலக வழக்கொழிந்ததல்ல என்று தெளிவாகவே சொல்லியுள்ளார். இப்படி சொல்லுவதற்கு அறிவு மட்டும் போதாது - துணிவும் தேவையாகும்.

அப்படிப்பட்ட பல்கலைக் கழகத்தில் ஆரியத்தின் அடி வேர் - ஆணி வேர் வரைத் துப்புரவாகத் தோண்டி, எடுத்துத் தூக்கி எறிந்த பகுத்தறிவுப் பகலவன் பற்றிய பாடம் இடம் பெறக் கூடாது என்று நினைப்பதன் பின்னணியில் ஆரியம் இருந்தால் ஆச்சரியப்படுவதற்கில்லை.

சூத்திரனுக்கு எதைக் கொடுத்தாலும் கல்வியைக் கொடுக்காதே எனும் சதுர் வர்ணச் சமூக அமைப்பில் அதன் வேரைக் கெல்லி எறிந்து, உச்சரிக்கும் உதட்டையும், பற்களையும், நாவினையும் பிடுங்கி எறிந்த இந்தத் தேசத்தின் பெருந் தந்தை - தத்துவப் போதகர் - இனம், மொழி, பண்பாடு மீட்பர் சுய சிந்தனையாளர் தந்தை பெரியார் பற்றிய பாடங்கள், தத்துவங்கள் போதிக்கப்படாத பல்கலைக் கழகம் ஒரு கல்வி நிறுவனமாகவே இருக்க முடியாது.

தமிழ் நாட்டுக்குரிய மார்க்சியம் என்று சொன்னாலும் அது தந்தை பெரியார் அவர்களின் சுயமரியாதைப் பகுத்தறிவியல் தானே! மறுக்க முடியுமா?
பிறவிப் பேதத்தை வீழ்த்தும் தத்துவத்தைச் சொன்ன ஒரு தலைவரின் அறிவியல் சிந்தனைகளை மாணவர்கள் மனதில் விதைக்காவிட்டால் களைகளும்,  முட்செடிகளுமாகத் தானே வளருவார்கள்?

ஒருமுறை ஆனந்த விகடன் இதழ் கல்விக்குக் காரணம் பெரியார், காரியம் காமராசர் என்று எழுதி இருந்ததே - அக்கிரகார இதழுக்கே தெரிந்த உண்மை இன்றைய பல்கலைக் கழகப் பொறுப்பாளர்களுக்குத் தெரியாமல் போன மர்மம் என்ன?

திராவிடர் இயக்கம் என்று எடுத்துக் கொண்டாலும், இந்த மண்ணுக்கு உரியது. கல்வியைக் கடை கோடி மனிதர்க்கும் கொண்டு செல்லக் காரணமாக இருந்தது. சமூக  நீதிக்கான முதல் சட்டத்தை தோற்றுவித்தது திராவிடர் இயக்கம்.

பள்ளிகளில் தாழ்த்தப்பட்டவர்களைக் கட்டாயம் சேர்க்க வேண்டும் என்று ஆணை பிறப்பித்தது நீதிக்கட்சி - திராவிடர் இயக்கம் தானே.

தேவதாசி ஒழிப்புச் சட்டம் கொண்டு வந்து பெண்கள் விடுதலைத் திசையில் புதிய மைல் கல்லைக் கொடுத்தது நீதிக்கட்சி ஆட்சிதானே.

இந்த வரலாறுகளை எல்லாம் நீக்கிவிட்டு மாணவர்களைப் பழைய புராணக் குப்பைத் தொட்டியில் ஊற வைக்கப் போகிறார்களா? விஞ்ஞான மனப்பான்மையை அவர்களுக்கு வளர்க்க வேண்டாமா? அப்படியென்றால் பகுத்தறிவு இயக்கம் நடந்து வந்த பாதைகளை பாடங்களாக வைக்க வேண்டாமா?

தென் கிழக்கு ஆசியாவின் சாக்ரடீஸ் என்று அய்.நா. மன்றம் விருது கொடுத்த தலைவரை, தமிழ் நாட்டில் உள்ள ஒரு பல்கலைக் கழகம் புறந்தள்ளப் பார்ப்பது - புத்திசாலித்தனமல்ல - புத்தி பேதலித்த நிலைதான்.

அப்பல்கலைக் கழக செனட் மற்றும்  சிண்டிகேட் உறுப்பினர்கள் உடனடியாக இதில் தலையிட்டு, நீக்கப்பட்ட பாடங்களை மறுபடியும் இடம் பெறச் செய்யும் கடமையைச் செய்து, அவப் பெயரிலிருந்து மீள வேண்டும் என்று கேட்டுக் கொள்கிறோம்.

பிப்ரவரி  2ஆம் தேதி தமிழ்நாடெங்கும் மாவட்டத் தலை நகரங்களில் இதுகுறித்து ஆர்ப்பாட்டம் ஒன்றை திராவிடர் கழகத் தலைவர் அறிவித்துள்ளார். அந்தப் போராட்டத்துக்கு வேலையில்லாமல் செய்தால் நல்லது; இல்லையெனில் இந்தப் பிரச்சினைக்கு சரியான தீர்வு காணப்படும் வரை போராட்டம் தொடர்வது தவிர்க்கப்படவே முடியாது. எச்சரிக்கை!

                   -------------------------"விடுதலை” தலையங்கம் 29-1-2013