அப்பம் பெருகிய அதிசயம்! பகுத்தறிவுக்கு ஒவ்வக் கூடியதுதானா?

நிரூபிப்பார்களா?

அப்பம் பெருகிய அதிசயம்!

மலையின்மேல் பகுதி. இயேசு கிறிஸ்துவின் சொற்பொழிவில் ஆழ்ந்து ஒன்றியிருந்தனர் ஆயிரமாயிரம் பேர்.

அவர்களது ஆன்மீகத் தேவையை மட்டுமல்ல; உடல் ரீதியான குறைகளையும் இயேசு களைந்தார். பார்வையற்றோர் பார்வை அடைந்தனர். காது கேளாதோர் காது கேட்கும் சக்தி பெற்றனர். வாய் பேசாதவர்கள் பேசினர். முடவர்கள் நடந்தனர். இப்படி அவரது அற்புதங்கள் ஏராளம்!

நேரம் கடந்து கொண்டே இருந்தது. அனைவருக்கும் பசி உண்டாயிற்று. இயேசு தன் சீடர்களை அழைத்தார். என்ன செய்யலாம்? என்று கேட்டார்.

பிலிப் என்பவர், இத்தனை பேருக்கும் வெளியில் உணவு வாங்கினாலும் போதாதே! என்றார்.
இன்னொரு சீடரான அந்திரேயா என்பவர், இங்கே ஒரு சிறுவன் இருக்கிறான். அவனிடம் 5 அப்பங்களும், 2 மீன்களும் இருக்கின்றன. ஆனாலும் இத்தனை பேருக்கும் அவை போதாதே என்று கூறினார்.

அதைக் கேட்ட இயேசு பெருமான், அனைவரையும் பந்தியில் அரும்படி சொன்னார். சிறுவன் தன்னிடம் இருந்தவற்றை அவரிடம் கொடுத்தான். இயேசு கிறிஸ்து அதை வாங்கி ஆசீர்வதித்தார்.

என்னே ஆச்சர்யம்! அந்த அய்ந்து அப்பங்களும் ஆயிரமாயிரம் அப்பங்களாக மாறின. பந்தியில் அமர்ந்திருந்த அனைவரும் திருப்தியாக சாப்பிட்டு முடித்தனர். அதோடு மாத்திரமல்ல, 12 கூடை அப்பங்கள் மீதியாயின.

------------------பால்மர் பரமதாஸ்

இந்த வாரம் வெளிவந்த ஓர் இதழில் இந்தச் செய்தி இடம் பிடித்திருந்தது.
இது அந்த இதழின் கற்பனையல்ல பைபிளில் இருக்கும் ஒன்றுதான்.
கிறித்துவ மதத்தைச் சேர்ந்தவர்கள் இன்றைக்கும் இதனை நம்பிக் கொண்டுதானிருக்கின்றனர்.
ஆனாலும் இது பகுத்தறிவுக்கு ஒவ்வக் கூடியதுதானா? நடக்கும் என்று நம்புவார்களேயானால் ஞாயிறன்று கூடும் திருச்சபையில் இயேசுவிடம் மன்றாடி, நிரூபித்துக் காட்டுவார்களா?


---------------------"விடுதலை" ஞாயிறுமலர் 4-7-2009