ஈழத் தமிழர் பிரச்சினையிலும் பா.ஜ.க.வின் இரட்டை வேடம்!

டில்லியில் ம.தி.மு.க. சார்பில், ஈழத் தமிழர்களுக்காக நடத்தப்பட்ட உண்ணாவிரதப் போராட்டத்தில் பா.ஜ.க.வின் முன்னணித் தலைவரும், அக்கட்சியின் பிரதமர் பதவிக் கான வேட்பாளருமான எல்.கே. அத்வானி கலந்து கொண்டு பேசியிருக்கிறார். ஈழத் தமிழர்களுக்காகக் கசிந்துருகியும் பேசியிருக்கிறார். அதேபோல, பா.ஜ.க. முன்னணிப் பிரமுகரும், வெளியுறவுத் துறை முன்னாள் அமைச்சருமான யஷ்வந்த் சின்காவும் டில்லி உண்ணாவிரதக் கூட்டத்தில் உரையாற்றியிருக்கிறார்.

இலங்கை அதிபர் போரினால்தான் சாதிக்க முடியும் என்று நினைக்கிறார் என்றும், அய்க்கிய முற்போக்குக் கூட்டணி அரசு இந்தப் பிரச்சினையை சரியாகக் கையாளவில்லை என்றும் இந்திய அரசு தலையிட்டால் அது இன்னொரு நாடு தலையிட்டதாக இலங்கை அரசு கூறினாலும், அதுபற்றி கவலைப்படத் தேவையில்லை என்றும் தாராளமாகவே தலையிடலாம் என்றும் உச்ச ஸ்தாயியில் பேசியிருக்கிறார் யஷ்வந்த் சின்கா.

ஒரு சின்ன கேள்வி. இவர்கள் மத்தியில் ஆட்சியில் இருந்தபோது இதனை ஏன் செய்யவில்லை? என்ற ஒரு சிறிய கேள்விக்கு முதலில் பதிலைச் சொல்லிவிட்டு அடுத்த அடியை எடுத்து வைக்கட்டும்.

பா.ஜ.க. ஆட்சிக் காலத்தில் இலங்கை இராணுவத்துக்கு டாங்கிகளையும், பீரங்கிகளையும் தாராளமாக அனுப்பி வைத்தவர்கள்தானே! இலங்கை அரசுக்கு வட்டியில்லாக் கடனையெல்லாம் வாரி வழங்கியவர்கள்தானே?

இந்தப் பா.ஜ.க. முன்னணித் தலைவர்கள் இப்படி பேசிக் கொண்டு இருக்கும்போதே அவர்கள் முகாமிலிருந்தே முக்கியப் பிரமுகரிடமிருந்து அதிகாரப்பூர்வமான கருத்து வெளியாகியிருக்கிறதே!

இந்திய இலங்கை பிரகதி சன்சதியா என்ற ஒரு அமைப்பு இருக்கிறது. காங்கிரஸ், பி.ஜே.பி.யைச் சேர்ந்தவர்கள் இதில் உறுப்பினர்களாக உள்ளனர். இந்த அமைப்பின் சார்பில் இலங்கையில் நடந்த கூட்டத்துக்கு காங்கிரஸ் கட்சியின் வெளிவிவகாரப் பிரிவைச் சேர்ந்த ரவனிதாகூரும், பி.ஜே.பி.யின் தேசிய நிர்வாகக் குழு உறுப்பினரான சேஷாத்திரி சாரியும் சென்று வந்துள்ளனர்.

இலங்கை சென்று வந்த பின்னர் அந்த சேஷாத்திரி என்ன கூறியிருக்கிறார்?

இலங்கை விவகாரத்தில் பி.ஜே.பி.,யும், காங்கிரசும் ஒரே கொள்கையோடுதான் செயல்படுகின்றன. இப்போது இலங்கையில் புலிகளுக்கு எதிராக நடக்கும் போரில் இந்தியா நிச்சயம் தலையிடாது. இந்தியாவைச் சுற்றியுள்ள நாடுகளில் நமக்குத் தொந்தரவு இல்லாத நாடுகள் என்றால் இலங்கையும், பூடானும்தான். பாகிஸ்தான், பங்களாதேஷ், நேபாளம் போன்ற நாடுகளால் நமக்கு எப்போதும் தொந்தரவுதான். பொதுவாக இந்தியாவுக்குப் பொருளாதார ரீதியில் இலங்கையால் நல்ல பயன்பாடு உண்டு. பொருளாதார ஒப்பந்தங்களைப்போட நல்ல சூழ்நிலை வர வேண்டும். இலங்கையில் பதற்றம் நிலவும் சூழ்நிலையில் செய்துகொள்ளும் உடன்படிக்கைகளால் பலனில்லை. இலங்கையுடனான வெளியுறவுக் கொள்கை இதை மனதில் வைத்துதான் முடிவு செய்யப்பட்டது. நாங்கள் இலங்கையில் பேசும்போதும் இந்திய அரசின் நிலையை எடுத்துச் சொன்னோம். நான் இலங்கை விவகாரத்தில் பி.ஜே.பி.யின் கொள்கை என்ன என்பதையும் விளக்கினேன். அதிபர் ராஜபக்சேவையும் சந்தித்துப் பேசினோம். விடுதலைப்புலிகளை எதிர்த்து இலங்கை இராணுவம் போராடிக் கொண்டிருக்கிறது. இதில் கிட்டத்தட்ட வெற்றி கிடைத்திருக்கிறது. இந்த வெற்றியைத் தொடர்ந்து இலங்கை அரசு என்னென்ன பணிகளை மேற்கொள்ள வேண்டும் என்பதையும் அவர்களிடம் எடுத்துச் சொன்னோம்.

இலங்கையில் அரசியல் ஸ்திரத்தன்மை ஏற்பட அங்கு ஒரு பலம் வாய்ந்த அரசு தேவை. இதற்கு இரண்டு விஷயங்கள் முக்கியம். விடுதலைப்புலிகள் இயக்கம் மறுபடியும் பலம் பெற்றுவிடாமல் பார்த்துக் கொள்ளவேண்டும் (ஜூனியர் விகடன், 4.2.2009, பக்கம் 38).

பா.ஜ.க. தலைவர்கள் அத்வானி, யஷ்வந்த் சின்கா ஆகியோர் கூறும் பசப்புமொழிகளுக்கும், இலங்கைக்கு அதிகாரப்பூர்வமாகச் சென்று வந்த தேசிய நிர்வாகக் குழு உறுப்பினரின் கூற்றுக்கும் உள்ள முரண்பாடு சாதாரண மானதல்ல.

அத்வானி, சின்கா ம.தி.மு.க. உண்ணாவிரதப் போராட்டத்தில் பேசிய ஒவ்வொரு சொல்லுக்கும் இதில் மறுப்பு காணப்படுகிறதா இல்லையா?

தேர்தல் நேரத்தில் இரட்டை வேடம் போட்டு, நீலிக் கண்ணீர் வடிக்கும் இவர்களைத் தமிழர்கள் புரிந்து கொள்ளத் தவறவே மாட்டார்கள்.

------------------"விடுதலை" தலையங்கம் 2-3-2009