ஈழத் தமிழர்ப் பிரச்சினையில் தி.க. வின் வேண்டுகோள்!

நாடாளுமன்றத் தேர்தலும் ஈழத் தமிழரும்!

15 ஆம் மக்களவைத் தேர்தலில் தமிழ்நாட்டைப் பொறுத்தவரை ஈழத்தமிழர்ப் பிரச்சினையை அரசியலாக்கப் பலரும் திட்டமிட்டுச் செயலாற்றி வருகின்றனர்.

நீண்ட காலமாக இந்தப் பிரச்சினை நிலவி வருகிறது. கட்சிகளுக்கு அப்பாற்பட்ட தன்மையில் இது அணுகப் படவேண்டும் என்பதுதான் உண்மையிலேயே ஈழத் தமிழர்கள் மீது அக்கறை கொண்டவர்களின் நியாயமான கருத்தாக இருக்க முடியும்.

இந்தப் பிரச்சினையில் அணுகும் முறைகளில் வேண்டுமானால் கருத்து வேறுபாடுகள் இருக்கலாம்.

இந்தப் பிரச்சினை என்று மட்டுமல்ல; எந்தப் பிரச்சினையிலும் அணுகுமுறைகளில் வேறுபாடு ஏற்படுவது என்பது எதிர்ப்பார்க்கப்பட வேண்டியதே!

இலங்கையில் ஈழத் தமிழர்களுக்குத் தனி நாடு வேண்டுமா? வேண்டாமா? என்பது கூட அந்நாட்டில் வாழும் பாதிப்புக்கு ஆளான மக்கள் முடிவு செய்ய வேண்டியதாகும். எடுத்த எடுப்பிலேயே தனி நாடு கோரி அம்மக்கள் போராட முன்வரவில்லை; ஆயுதங்களையும் எடுத்துக்கொண்டு களத்தில் குதிக்கவில்லை.

இலங்கை என்பது சிங்கள நாடு தான்; சிங்கள மொழிதான் ஆட்சி மொழி; பவுத்தம்தான் அதிகாரப்பூர்வ மான மதம்; அதிபராக வருபவர் பவுத்தராகத்தான் - சிங்களராகத்தான் இருக்கவேண்டும் என்று சட்ட ரீதியாக அறுதியிட்ட பிறகு அந்நாட்டில் இரண்டாவது பெரிய இனமாக வாழக்கூடிய தமிழர்கள் எந்த முடிவுக்கு வருவார்கள் என்பதை நேர்மையும், நியாயமும், மனித உரிமையும், மனிதநேயமும் உடையவர்கள் சிந்தித்துப் பார்க்கவேண்டும்.

அந்நாட்டில் தனி நாடு கோருவதற்கும், இந்தியாவில் மொழிவாரியாக மாநிலங்கள் பிரிந்து ஆட்சி முறை அமைந்ததற்கும் முடிச்சுப் போடுவது - ஈழத்தில் கேட்கப்படும் தனி நாடு கோரிக்கையின் தாக்கம் தமிழ்நாட்டிலும் எதிரொலிக்கும் என்று கற்பித்து - ஈழத் தமிழர்கள் பிரச்சினையை வேறு தளத்திற்குக் கொண்டு செல்லும் பார்ப்பனர்களை ஒதுக்கிவிட்டு, ஈழத் தமிழர்களை இரண்டாம் தரக் குடிமக்கள் என்ற நிலையிலிருந்து காப்பாற்றி வாழ்வுரிமைக்கு உத்தரவாதம் கொடுக்கும் வகையில் தமிழ்நாட்டுத் தமிழர்களின் அணுகுமுறை இருக்கவேண்டும்.

ஆட்சிப் பொறுப்பில் இருக்கக் கூடியவர்களுக்குச் சில இடர்ப்பாடுகள் இருக்கக்கூடும். இந்த நிலையில் மற்ற அமைப்புகள், அமைப்புகளைச் சாராதவர்கள் உண்மையான அக்கறையோடு ஒன்றுபட்டு நின்றால் ஆட்சியில் உள்ளவர்கள் மேலும் செயல்படுவதற்குக் கூடுதல் பலத்தைக் கொடுக்கும்.

அரசியலுக்காக ஆட்சியைக் குறைகூறி கடும் விமர்சனங்களில் ஈடுபடும்போது நமக்குள் பிளவுகளும், சச்சரவுகளும் வெடித்துக் கிளம்பும் நிலை ஏற்படுகிறது. இது இலங்கை ஆளவந்தார்களுக்கு சிங்கள இனவெறி மக்களுக்கும் ஆனந்தத்தைக் கொடுக்கக் கூடியதாக மாறிவிடுகிறது. இந்தியாவில் மத்தியில் உள்ள ஆட்சியும் இப்பிரச்சினையில் கொடுக்கவேண்டிய முக்கியத்துவத்தைக் கொடுப்பதற்குக்கூட தமிழ்நாட்டு மக்களின் ஒன்றுபட்ட ஒற்றுமை தேவைப்படுகிறது.

அனைத்துக்கட்சிக் கூட்டத்தில் நிறைவேற்றப்படும் தீர்மானத்தைச் செயல்படுத்துவதில்கூட வடக்கு, கிழக்கு பார்க்க ஆரம்பித்தால், அதன் விளைவு என்னாகும்?

இப்பிரச்சினையின் முக்கியத்துவத்தைக் கருதி, மாநில முதலமைச்சரின் தலைமையில் பிரதமரைச் சந்திக்கச் சென்றால், அந்தக் குழுவில் இடம்பெற மாட்டோம் என்று முறுக்கிக்கொள்வதால் ஏற்படும் விளைவுகளை, பொறுப்புள்ள தலைவர்கள் எண்ணிப் பார்க்கவேண்டாமா?

ஆளும் கட்சி - எதிர்க்கட்சி இணைந்து ஒரு போராட்டத்தில் ஈடுபட்டது என்ற நிலை வரும்போது, அதனுடைய பலம் எத்தகையதாக இருக்கும்!

இலங்கையில் உள்ள ஆட்சியாளர்கள் தமிழகத்தின் முதலமைச்சரை விமர்சிப்பதும் தமிழகத்தின் எதிர்க்கட்சித் தலைவரைப் பாராட்டுவதும் எந்த அடிப்படையில்?

நிலைமை இப்படி இருக்கும்போது, அந்த எதிர்க்கட்சித் தலைவருடன் கூட்டணி வைத்துக்கொண்டு, சிங்களர்களால் கண்டிக்கப்படும் முதலமைச்சர்மீது தங்கள் பங்குக்குத் தாங்களும் கல் எறிவதில் உள்ள நியாயம் என்ன?

தேர்தல் நெருங்கிவரும் ஒரு காலகட்டத்தில் திடீர் என்று எதிர்க்கட்சித் தலைவர் ஈழத் தமிழர்கள்மீது அக்கறை காட்டுவதுபோல பாசாங்கு செய்வதைப் புரிந்துகொள்ள முடியாதவர்களா அரசியல் தலைவர்களும், தமிழர்களும்?

அருள்கூர்ந்து ஈழத் தமிழர்ப் பிரச்சினையை அரசியலாக்கிக் கொச்சைப்படுத்தவேண்டாம் என்பதுதான் அரசியலுக்கு அப்பாற்பட்ட திராவிடர் கழகத்தின் கனிவான வேண்டுகோளாகும்.

----------------"விடுதலை" தலையங்கம் 2-4-2009