சிங்கத்தை அதன் குகையிலேயே சந்தித்த பரம்பரையினர் தான் இந்தப் பெரியார் பெரும்படை!

எதிரிகள் அழைக்கிறார்கள்! வாருங்கள்!

அது 1929-ஆம் ஆண்டு தந்தை பெரியாரும், கி.ஆ.பெ. விசுவநாதமும் திருநெல்வேலிக்குச் செல்கிறார்கள் சுயமரியாதைப் பிரச்சாரம் செய்ய.

நெல்லைக்குச் சென்றதும் அவர்கள் கையில் கிடைத்தது ஒரு துண்டு அறிக்கை.

புராணங்களை எல்லாம் பொய்யென்று சொல்லும் நாத்திகர் ராமசாமி திருநெல்வேலிக்கு வருகிறார். அவரைப் பேச விடக் கூடாது என்ற துண்டறிக்கைதான் அது.

மாலைப் பொதுக் கூட்டம் - கூட்டத்தை ஏற்பாடு செய்தவர் களையும் காணவில்லை. ஊருக்குத் திரும்பி விடலாம் என்றார் கி.ஆ.பெ.! சரி! ஜட்கா ஒன்று கொண்டு வா என்கிறார் பெரியார். எட்டணா பேசி ஜட்கா கொண்டு வரப்பட்டது. கி.ஆ.பெ. முன்னேஉட்கார, பெரியார் பின்னே உட்கார்ந்தார். பொதுக்கூட்டம் நடக்கும் சாலை வழியாக வண்டியைப் போகச் சொன்னார்.

பொதுக்கூட்டம் நடக்கும் இடத்தில் அய்ந்நூறு, அறு நூறு பேர் கூடியிருந்தனர். மேடையில் நாற்காலியோ, மேஜையோ இல்லை.

பெரியார் என்ன செய்தார்? வண்டியை விட்டு இறங்கி விறு விறு என்று மக்கள் கூடி நிற்கும் அந்த இடத்திற்குத் தனியாகச் சென்று மேடையில் ஏறி ஒரு விளக்கத்தைச் சொல்ல ஆரம்பித்தார்.

பொது மக்களே! நான் உங்கள் முன்னால் இப்பவும் பேச வரவில்லை. ஒரு உண்மையைச் சொல்லிப் போகவே வந்தேன். புராணங்களை எல்லாம் பொய்யென்று சொன்னதாக என்னை எதிர்த்து நோட்டீஸ் போட்டிருக்கிறார்கள். அது நான் சொல்ல வில்லை.

சைவப் புராணங்களையெல்லாம் பொய்யென்று கண்டு பிடித்துச் சொன்னவர்கள் வைணவப் பண்டிதர்கள். வைணவப் புராணங்களையெல்லாம் பொய்யென்று கண்டுபிடித்துச் சொன்னவர்கள் சைவப் பண்டிதர்கள். இந்த இரண்டு புராணங் களும் பொய்யாக இருக்குமோ என்று நான் எண்ணியதுண்டு. அந்தப் புராணங்களைப் பொய்யென்று சொன்னவர்கள் சைவ - வைணவப் பண்டிதர்கள்தான். இதைச் சொல்லிப் போகவே நான் வந்தேன். என்மேல் பழி போடாதீர்கள் என்று பெரியார் சொன்ன தும், ஓயாமல் கை தட்டி மக்கள் ஆரவாரம் செய்தார்கள். அதன்பின் தந்தை பெரியார், தொடர்ந்து ஒன்றரை மணி நேரம் பேசிக் கொண்டேயிருந்தார்! மக்கள் அனைவரும் அமைதியாகயிருந்து கேட்டார்கள்.

---------------ஆதாரம்: அறிவுக் கதைகள் - கி.ஆ.பெ. விசுவநாதம்

இப்படியெல்லாம் எதிர்த்தவர்கள் மத்தியிலே சிங்கக் கர்ச்சனை செய்து மக்களைச் சிந்திக்க வைத்த தந்தை பெரியாரின் தொண்டர்கள் நாங்கள். 79 ஆண்டுகளுக்கு முன்பே - எதிர்ப்புக் கடுமையாக இருந்த கால கட்டத்திலேயே சிங்கத்தை அதன் குகையிலேயே சந்தித்த பரம்பரையினர் தான் இந்தப் பெரியார் பெரும்படை!

பெரியார் கருத்துகள் மக்கள் மத்தியிலே பரவி, எங்கள் பெரியார் - தந்தை பெரியார் - பகுத்தறிவுப் பகலவன் பெரியார் என்று தமிழனாகப் பிறந்த ஒவ்வொருவரும் கட்சிக்கரைகளை எல்லாம் உடைத்தெறிந்து பூரித்துக் கொண்டாடும் இந்தக் கால கட்டத்திலே, யாரோ சிலர் எதிர்ப்புக் காட்டுகிறார்களாம். அவர்கள் பி.ஜே.பி.யாம் - ஆர்.எஸ்.எஸ்ஸாம்!

மாண்புமிகு அமைச்சர் மைதீன் கானை எதிர்த்து தட்டி வைக்கிறார்களாம்! மதவெறியைத் தூண்டிப் பார்க்கிறார்களாம்.

சிங்கக் கூட்டத்திடம் சிறு நரிகள் கிச்சுக் கிச்சு மூட்டப் பார்க்கின்றனவா? நல்ல நகைச்சுவையப்பா!

இது பெரியார் நாடு! எங்களைச் சூத்திரர்கள் என்று கூறும் கூட்டத்தின் மதங்களுக்கு இங்கு இடமேயில்லை.

அமைச்சரை எதிர்த்து அநாகரிகமாக எழுதப்பட்டுள்ள தட்டிகளை அகற்றுவது மட்டும் காவல்துறையின் வேலையல்ல! வெறி கக்கும் வாசகங்களுக்குச் சொந்தக்காரர்கள்மீது வழக்குத் தொடர்ந்திருக்க வேண்டாமா? கைது செய்து லாக்கப்பில் தள்ளியிருக்க வேண்டாமா? ஏன் உள்ளே அனுப்ப வேண்டும்? வெளியிலிருந்து கறுஞ்சட்டைச் சிறுத்தைகளின் இராணுவ மிடுக்கையொத்த அணி வகுப்பை அவர்களும் கண்டுகளிக்க வேண்டாமா? போர் முழக்கத்தை அவர்களும் காது குளிரக் கேட்க வேண்டாமா?

ஒருக்கால் அதை நினைத்துக் காவல்துறையினர் அவர்களை வெளியிலே விட்டிருக்கலாம்.

கட்டுக்கோப்புக்கும், கொள்கை முழக்கத்துக்கும் பெயர்போன கழகத் தோழர்களே, இதற்கு மேலும் நீங்கள் வீட்டில் முடங்கிக் கிடப்பீர்களா? எதிர்ப்பு வரும் போதுதானே எழுந்து போவோம் நாம்! நாம் யார் என்று காட்ட வேண்டாமா?

கறுஞ்சிறுத்தைகளின் கர்ச்சனை என்ன என்பதை உணர்த்த வேண்டாமா?

புறப்படுவீர், புறப்படுவீர்! எதிரிகள் அழைக்கிறார்கள்! புறப்படுவீர், புறப்படுவீர்!

------------ மின்சாரம் அவர்கள் 2-10-2008 "விடுதலை" யில் எழுதிய கட்டுரை