நந்தனின் பக்திக் கதை பார்ப்பனர்களின் சதியே!

தில்லையில் ஒரு மோசடி


ஆதனூரிலே புலையர் குலத்திலே தோன்றி வெட்டியான் தொழிலைச் செய்து வந்த நந்தனின் பக்திக் கதை பார்ப்பனர்களின் சதிச் செயலையே காட்டுகின்றது. கோவிலுக்கு உள்ளே சென்று கும்பிட முடியாத சாதியாதலால் வாயிலிலேயே நின்று சிவனைக் கும்பிடும் வழக்கத்தையுடைய நந்தன், சிதம்பரம் நடராசப் பெருமானை அருகில் சென்று தரிசிக்க எண்ணினாராம். சிவன் அவருடைய கனவில் தோன்றி நெருப்பில் மூழ்கிச் சாதி நீங்கி நம் சன்னிதானத்தைச் சேர்வாய் என்று கூறினாராம். தில்லைவாழ் அந்தணர்கள் கோபுரவாயிலுக்கு முன்னே வளர்த்திருந்த அக்கினிக் குழியிலே புகுந்து அந்தண வடிவத்தோடு வெளிவந்தாராம். ஈசன் திருப்பாதத்தை அடைந்து விட்டாராம். கோயிலுக்கு உள்ளே சென்ற நந்தன் வெளியே வரவில்லையாம். சிவனோடு அய்க்கியமாகி முக்தி பெற்றுவிட்டதாகக் கதை கூறியுள்ளனர். முக்தி பெற்றாரா? இல்லை, நெருப்பிலே மூழ்கடித்து முக்தி பெற்றதாகக் கதை சொன்னார்களா? தாழ்த்தப்பட்ட ஜாதி யைச் சேர்ந்தவனுக்குக் கிடைத்த தண்டனையாக உள்ளது என்பதே பெரியாரின் கருத்து.

தாழ்ந்த ஜாதியைச் சேர்ந்தவன் கோயிலுக்கு உள்ளே போக வேண்டுமானால் உயர்ந்த ஜாதியாக ஆன பிறகே போக முடியும் என்ற வருணாசிரம தர்மத்தைப் பார்ப்பனர்கள் இக்கதை மூலம் நிலைநாட்டியுள்ளதாகப் பெரியார் கருதுகிறார்.


-----------------"விடுதலை"5-6-2009