நெய்வேலி மின்சாரத்தை கருநாடகத்திற்குக் கொடுக்கக் கூடாது!நெய்வேலி முற்றுகை ஏன்?

நெய்வேலி முற்றுகை ஏன்?

மேட்டூரில் நேற்று (8.10.2012) நடைபெற்ற பொதுக் கூட்டத்தில் உரையாற்றிய திராவிடர் கழகத் தலைவர் மானமிகு கி.வீரமணி அவர்கள் தமிழ்நாட்டுக்கு ஒரு சொட்டுத் தண்ணீர்கூடக் கொடுக்க மாட்டோம் என்று அடாவடித்தனமாகப் பேசும் அம்மாநிலத்திற்குப் பாடம் கற்பிக்கும் வகையிலும், ஒரு நெருக்கடியைக் கொடுக்கும் வகையிலும், தன் தவறைக் கருநாடகம் உணர்வதற்கான ஒரு வாய்ப்பைக் கொடுக்கும் தன்மையிலும் ஓர் அறிவிப்பினை வெளியிட்டார்.

தமிழ்நாட்டுக்குக் கருநாடகம் ஒரு சொட்டுத் தண்ணீரைக்கூட கொடுக்க முடியாது என்று சொன்னால், தமிழ்நாட்டில் நெய்வேலி பழுப்பு நிலக்கரி நிறுவனத்தில் உற்பத்தி செய்யப்படும் மின்சாரத்தை கருநாடகத்திற்குக் கொடுக்கக் கூடாது என்று வற்புறுத்தும் வகையில் வரும் 15ஆம் தேதி நெய்வேலியில் முற்றுகைப் போராட்டத்தை அறிவித்துள்ளார்.

தமிழ்நாட்டில் 88 லட்சம் மக்கள் விவசாயத் தொழிலை நம்பியே வாழ்கிறார்கள். பெரும்பாலும் தாழ்த்தப்பட்ட மக்களே விவசாய தொழிலாளர் களாகவும் இருக்கின்றனர்.

இந்த ஆண்டு கருநாடகம் குறிப்பிட்ட காலத் தில் தண்ணீரைத் திறந்து விடாததால் 4.15 லட்சம் ஏக்கர் குறுவை நாசமாயிற்று. 14 லட்சம் ஏக்கர் சம்பாவின் கெதி என்ன என்பது தமிழ்நாட்டு மக்களின் கழுத்துக்கு மேல் தொங்கும் கொடுவாள் கேள்வியாக உள்ளது.

மேட்டூரில் திராவிடர் கழகத் தலைவர் குறிப் பிட்டது போல தமிழ்நாட்டில் உணவுப் பஞ்சம், விவசாயிகள் தற்கொலை ஏற்பட்டால் ஆச்சரியப் படுவதற்கில்லை.

28 லட்சம் ஏக்கர் நிலங்கள் காவிரி நீரால் பாசன வசதி பெற்று வந்த தமிழ்நாடு, கருநாடக மாநிலத்தின் அடாவடித்தனம். சட்டம் - நியாயம் மீறல் காரணமாக 16 லட்சத்து 36,000 ஏக்கர் விவசாய நிலங்களாகக் குன்றிப் போய்விட்டது.

நடுவர் மன்ற தீர்ப்பின்படி கருநாடக மாநிலம் 10 லட்சத்து 20 ஆயிரம் ஏக்கர் நிலங்களில் தான் காவிரி நீரைப் பாசனத்துக்குப் பயன்படுத்திட வேண்டும். ஆனால் இன்றைய நிலையில் 19 லட்சம் ஏக்கர் நிலங்களுக்குக் காவிரி நீர் மூலம் விவசாயத்தை விரிவுபடுத்தியுள்ளது.

நடுவர் மன்றம் இடைக்கால தீர்ப்பாக அளித்த ஆண்டு ஒன்றுக்கு 205 டி.எம்.சி. தண்ணீரை - எந்த கால கட்டத்திலும் கருநாடகம் தமிழ்நாட் டுக்கு அளித்ததேயில்லை.

எடுத்துக்காட்டாக
2001 - 2002இல் 162.73 டி.எம்.சி.,
2002 - 2003இல் 94.86 டி.எம்.சி.,
2003 - 2004இல்    65.13 டி.எம்.சி.,
2004 - 2005இல் 124.58 டி.எம்.சி.

தண்ணீரைத்தான் வழங்கி இருக்கிறது. இதில்கூட பெரும்பாலும் கருநாடகத்தில் பெரு மழை பெய்து அணை வழிந்த நிலையில் வடிகாலாக வந்து விழுந்ததுதான்.

இடைக்கால 205 டி.எம்.சி. தண்ணீரையே கொடுக்க மனம் இல்லாத கருநாடக மாநிலம், நடுவர் மன்றம் அளித்த இறுதித் தீர்ப்பான 419 டி.எம்.சி. தண்ணீர்பற்றி கனவிலும் நினைத்துத் தான் பார்க்க முடியுமா?

நடுவர் மன்றம், உச்சநீதிமன்றம், காவிரி நதி நீர் ஆணையம் இவற்றின் தீர்ப்புகளை மதிக்காமல் அலட்சியப்படுத்தினால் அதற்கான தண்டனை கிடையாதா? மேல் நடவடிக்கை என்ற நிலை இந்தியாவில் இல்லையா? என்கிற அரசமைப்புச் சட்ட குழப்ப நிலை இன்றைக்கு ஏற்பட்டுள்ளது என்றே கருத வேண்டும்.

இப்படி ஒரு நிலையை ஏற்படுத்தியுள்ளது - மாநிலக் கட்சிகளல்ல; அகில இந்தியா என்று பேசும் தேசியக் கட்சிகள்தான். புரியும் படியாக எளிதாகச் சொன்னால் பிரிவினைக்கு வித்திடு பவை இந்தத் தேசியக் கட்சிகளே! ஒருக்கால் கருநாடகமும் தமிழ்நாடும் தனித்தனி சுதந்திர நாடுகளாக இருந்திருந்தால் காவிரி நீர்ப் பிரச்சினை எளிதாக தீர்ந்திருந்தாலும்  ஆச்சரியப்படுவ தற்கில்லை. பந்து இப்பொழுது மத்திய அரசின் வசம் உள்ளது - என்ன செய்யப் போகிறது என்று நாடே எதிர்பார்க்கிறது. இதன் மேல் ஓர் அழுத்தம் தான் அக்டோபர் 15 அன்று அறிவிக்கப்பட்டுள்ள நெய்வேலி முற்றுகைப் போராட்டமாகும். தோழர்களே தயாராவீர்!

                     --------------------”விடுதலை” தலையங்கம் 9-10-2012