பேய் பெண்களைத்தான் பிடித்து ஆட்ட வேண்டுமா?

சாட்டை அடிக்கு சாட்டை அடி கொடுப்பது எப்போது?

மகாராட்டிர மாநிலத்தில் மூடநம்பிக்கைகளை ஒழிக்கும் சட்டம் ஒன்று இயற்றப்பட்டுள்ளது. நரேந்திர தபோல்கர் என்ற சீர்திருத்தவாதியை - பகுத்தறிவுவாதியைப் பலி கொடுத்து, இந்தச் சட்டம் நீண்ட இடைவெளிக்குப் பிறகு உருவாகியிருக்கிறது. நியாயப்படி, இந்தச் சட்டத்தை மத்திய அரசே நிறைவேற்றியிருக்க வேண்டும்.

இந்திய அரசமைப்புச் சட்டத்தில் (51A(h) கூறப் பட்டுள்ள விஞ்ஞான மனப்பான்மையை வளர்க்க வேண்டும்; சீர்திருத்த உணர்வைத் தூண்ட வேண் டும், மனித நேயம் பேணப்பட வேண்டும். இதுபற்றிய பிரச்சாரத்தை மேற்கொள்ள வேண்டியது ஒவ்வொரு குடிமகனின் கடமை என அந்தப் பிரிவு கூறுகிறதே  - அதனைச் செயல்படுத்த வேண்டிய பொறுப்பு -மாநில அரசுகளைவிட, மத்திய அரசுக்கு உண் டல்லவா!

மகாராட்டிர மாநில அரசு அப்படியொரு சட்டத்தை இயற்றியதற்குப் பிறகாவது, மத்திய அரசுக்குப் பொறி தட்டியிருக்க வேண்டாமா?

தந்தை பெரியார் பிறந்த தமிழ்நாட்டில், இந்தச் சட்டத்தை நிறைவேற்றும் எண்ணம் ஏன் இதுவரை தமிழக அரசுக்கு வரவில்லை? என்பது, முக்கியமான கேள்வியாகும்.

நேற்று ஒரு தகவல், ஏடுகளில் படத்துடன் வெளி வந்துள்ளது. நாமக்கல் மாவட்டம் பவித்திரம் அருகே உள்ள வெள்ளாளப்பட்டியில் உள்ள ஒரு கோயில் அச்சப்பன் கோயில். ஆண்டுதோறும் - இந்தக் கோயிலில் விஜயதசமியன்று சாட்டையால் அடித்துப் பேய் விரட்டும் நிகழ்ச்சி நடைபெற்று வருகிறது. இந்த ஆண்டும் நடைபெற்றுள்ளது.

கடவுள் - மதம் - பக்தி  - இவற்றின் மூட நம்பிக்கை வரிசையில் இழைக்கப்படும் இந்தக் கொடுமையைத் தடுத்து நிறுத்த வேண்டாமா?

சாட்டையால் அடிக்கும் பூசாரி ஆண் - அடிபடுபவர்களோ அத்தனைப் பேரும் பெண்கள். அது என்ன பேய் பெண்களைத்தான் பிடித்து ஆட்ட வேண்டுமா? பெண்களிலும் படிக்காத கிராமத்துப் பெண்களைத்தான் பேய் பிடிக்குமா?

அய்.ஏ.எஸ். படித்த கலெக்டர் அம்மாவுக்கு இதுவரை பேய் வரவில்லையே ஏன்?

நாமக்கல்லில் நடைபெற்ற இந்தக் கொடுமை குறித்து மனநல மருத்துவர் சங்கர் கூறியுள்ள கருத்துக் கவனிக்கத்தக்கது.

பேய் என்பதெல்லாம் ஒன்றும் கிடையாது. பொதுவாக பேய், கடவுள் என்பது - ஒருவித மனநோய். யாரையும் பாதிக்காமல் இருக்கும் வரை தான் நம்பிக்கை. ஆனால் சாமியாடுவது, தீ மிதிப்பது போன்றவையெல்லாம் மன நோயின் அடையாளம். பணம் இருந்தாலும் வாழ்க்கையில்போதுமான எதுவும் கிடைக்காதது போன்ற பூர்த்தி அடையாத விஷயத்தால் சாமியாடுதல் போன்றவை நிகழ்த்தப் படுகின்றன. இது ஒரு பிரெய்ன் மெக்கானிசம், சாட்டையால் அடித்துத் துன்புறுத்தும் விழாவிற்குக் காவல்துறையினர் அனுமதி மறுக்க சட்டத்தில் இடம் உள்ளது. பொதுவாக பொது நல வழக்குத் தொடருதல் போன்றவற்றின் மூலம் இது போன்ற நடவடிக்கைகளை எடுக்க முடியும். அதே போல சம்பந்தப்பட்டவர்களையும் ஆலோசனை மூலம் நல்வழிக்குக் கொண்டு வர இயலும் (தி இந்து - 17.10.2013 பக்கம் 7) என்று கூறி இருக்கிறாரே! 

விஞ்ஞான ரீதியான உண்மை இவ்வாறு இருக்க, இதற்கு எதிர் மாறாக பக்தி என்ற பெயரால் எப்படி அனுமதிக்கப்படுகிறது? தடுப்பதற்குக் காவல் துறைக்கு அதிகாரம் இருந்தும் ஏன் கண்டு கொள்வதில்லை?

இதில் வேடிக்கை என்னவென்றால், இந்தச் சட்ட விரோதத்தை அனுமதிக்கும் காவல்துறை, அந்தக் கடமையைத் திராவிடர் கழகத்தார் செயல் விளக்கங்கள் மூலம் (Demonstrations) செய்தால், அதனைத் தடுப்பார்கள்; அதற்கு அனுமதியில்லை என்பார்கள்.

தங்கள் எல்லைக்குள் குற்றங்கள் பெருகுவதைத் தடுக்கக் காவல் நிலையத்திலேயே ஆடு வெட்டிப் பூஜை போடும் காவல் துறையினரிடம், இத்தகைய அறிவியல் ரீதியான செயல்பாடுகளை, எப்படி எதிர் பார்க்க முடியும்? நமது வழக்கறிஞர்கள் அந்தந்தப் பகுதிகளில் பொது நல வழக்குத் தொடுக்கலாமே!

மதுரை அருகே குழந்தைகளைக் குழியில் போட்டுப் புதைக்கும், குழி மாற்றுத் திருவிழா நடை பெற்றபோது அதனை எதிர்த்து விடுதலைதான் எழுதியது. அதற்கு வழி பிறந்தது. மகாராட்டிர மாநில அரசு போல தந்தை பெரியார் பிறந்த தமிழ்நாட்டில் தமிழ்நாடு அரசு சட்டம் கொண்டு வருவது அவசியம் - செய்யுமா அரசு? எங்கே பார்ப்போம்!

                   -------------------------"விடுதலை” தலையங்கம் 18-10-2013