ஆயுத பூஜையும், சரஸ்வதி பூஜையும், சக்தி பூஜையும் கொண்டாடப்படும் பக்தர்கள் ஒரு கணம் சிந்தித்துப் பார்க்கக் கூடாதா?

ஒரு கணம் - ஒரே ஒரு கணம் சிந்திப்பீர்! 

மதப் பண்டிகைகளுக்காக அரசு பொது விடுமுறை விடுவதே தேவையற்றது - காலத்தைக் கரியாக்குவது  - யாரேனும் குறிப்பிட்ட பண்டிகைகளுக்காக விடுப்பு எடுத்துக் கொள்ள விரும்பினால் சிறு விடுப்பு (Casual Leave) மூலம் அதனைப் பயன்படுத்திக் கொள்ளலாம்.

தீபாவளிக்காக பொது விடுமுறை விடுவதால் கிறித்தவர்களுக்கோ, முசுலிம்களுக்கோ மதச் சார்பற்றவர்களுக்கோ என்ன பயன்? ரம்ஜானுக்குப் பொது விடுமுறை விட்டால் மற்ற மதக்காரர்கள் அன்று என்ன செய்யப் போகிறார்கள்?

உலகிலேயே மதப் பண்டிகைகளுக்காக அதிக நாட்கள் விடுமுறை விடப்படுவது இந்தியாவில் தான் என்று கூறப்படுகிறது.

இந்தப் பண்டிகையில் குறிப்பாக நவராத்திரி என்ற பெயரில் நடத்தப்படும் பண்டிகைகள் வீடுகளில் மட்டுமல்ல; அரசு அலுவலகங்களிலும் கொண்டாடப்படுகிறது. இது என்ன நியாயம்? ஓர் அரசு அலுவலகத்தில் பல மதங்களைச் சேர்ந்த வர்கள் இருக்கிறார்கள்; மத நம்பிக்கையற்ற வர்களும் இருக்கிறார்கள்.

மதச் சார்பற்ற அரசின் அலுவலகங்களில் குறிப்பிட்ட மதப் பண்டிகைகளைக் கொண்டாடு வது சட்டப்படியும் தவறு - நியாயப்படியும் தவறாகும். அரசு அலுவலகத்திற்குள் தேவையற்ற சர்ச்சைகளை அது உண்டு பண்ணுமே!

அதுவும் ஏற்கெனவே மதமாச்சரியங்கள் நிலவும் ஒரு நாட்டில் அரசு அலுவலகமே அதனைத் தூண்டும் ஒரு வேலையில் இறங்கலாமா?

அறிஞர் அண்ணா முதல்வராக இருந்தபோதே அரசு அலுவலகங்களில் எந்தவித மத சம்பந்தப்பட்ட கடவுள் படங்களும் இடம் பெறக் கூடாது என்று ஆணை பிறப்பிக்கப்பட்டுள்ளதே; தமிழ்நாடு அரசின் தலைமைச் செயலாளர் என். அரிபாஸ்கர் வெளியிட்ட சுற்றறிக்கையில்கூட (Letter No. 8472/L&OB/94-1 dated 18.8.1994) அரசு அலுவலகங்களில், வளாகங்களில் கடவுள் வழிபாடு தொடர்பான எந்த சின்னங்களோ எழுத்துக்களோ இடம் பெறக் கூடாது என்று கூறப்பட்டுள்ளதே.

சென்னை உயர்நீதிமன்றம் - மதுரைக் கிளையில் நீதிபதிகள் எஃப்.எம். இப்ராகிம் கலிபுல்லா மற்றும் கே.பி.கே. வாசுகி ஆகியோர் அடங்கிய அமர்வு, அரசு அலுவலகங்களில், வளாகங்களில் வழிபாட்டுத் தலங்களை அமைக்கக் கூடாது - மத சம்பந்தப்பட்ட நிகழ்ச்சிகள் இடம் பெறக் கூடாது  என்று திட்டவட்டமாகத் தீர்ப்புக் கூறியுள்ளனரே.

இவற்றையெல்லாம் புறந்தள்ளி, ஆயுதப் பூஜைகள் அரசு அலுவலகங்களில் கொண்டாடப் பட்டால், அது அப்பட்டமான சட்ட மீறல், வீதி மீறல், ஏன் நீதிமன்ற தீர்ப்பு மீறலாகும்.

ஆயுத பூஜையும், சரஸ்வதி பூஜையும், சக்தி பூஜையும் கொண்டாடப்படும் நாட்டின் நிலை என்ன? கல்விக்குக் கடவுள் சரஸ்வதியாம் - ஆண்டுதோறும் பூஜையாம் - எத்தனை நூறு ஆண்டுகள் கொண்டாடப்பட்டன? சரஸ்வதி என்ற பெயரைத் தாங்கியவருக்கே சரஸ்வதி என்று கையொப்பம் போடத் தெரியாத நிலைதானே!

ஆயுதப் பூஜை கொண்டாடுகிறோமே, நம் நாட்டு இராணுவத்தில் இருக்கக் கூடிய கருவிகள் எல்லாம் பெரும்பாலும் வெளிநாடுகளில் கண்டு பிடிக்கப்பட்டு அங்கு உற்பத்தி செய்யப்படுபவை தானே.

கடவுள் இல்லை இல்லவே இல்லை என்று அடித்துச் சொன்ன தந்தை பெரியார் தானே நம் மக்களின் கல்வி உரிமைக்காகப் பாடுபட்டார். கல்வி உரிமைக்கு வளர்ச்சிக்கும் நாத்திகப் பெரியார் தானே காரணக் கர்த்தா - மறுக்க முடியுமா?

யார் உன் தலையில் எழுதியது? நான் அதை மாற்றி எழுதுகிறேன் என்று கூறிய பச்சைத் தமிழர் காமராசர் தானே கல்வி வெள்ளம் கரை புரண்டு ஓடக் காரணமாக இருந்தார்.

கடவுளை மற - மனிதனை நினை என்னும் தந்தை பெரியார் அவர்களின் தத்துவம் எவ்வளவு உயர்ந்தது - மனிதர்களை வாழ வைக்கக் கூடியது என்பதைப் பூஜை கொண்டாடும் பக்தர்கள் தமிழர்கள் ஒரு கணம் ஒரே ஒரு கணம் சிந்தித்துப் பார்க்கக் கூடாதா?

             

                            ----------------------------"விடுதலை” தலையங்கம் 12-10-2013