தலப்புராணங்களால் தலைக்கு ஆபத்து!

கோயில் என்பது ஒரு வியாபாரக்கடைதான். அதில் ஒன்றும் அய்யத்திற்கு இடம் இல்லை. ஆண்டவன் எங்கும் நிறைந்து நிற்கிறான் என்று ஒரு பக்கத்தில் பிரச்சாரம் செய்துவிட்டு, இன்னொரு பக்கத்தில் ஒரு கட்டடத்தைக் கட்டி அதற்குள் செதுக்கி வைத்த சிலைதான் கடவுள் என்று சொல்லுவது அசல் மோசடி - பித்தலாட்டம் அல்லவா! வணிகர்கள் தங்கள் சரக்குதான் உயர்ந்தது என்று பிரச்சாரம் செய்வது போல ஒவ்வொரு ஊரிலும் உள்ள கோயில்பற்றிப் பெரும் அளவில் பிரச்சாரம் செய்து வைத்துள்ளனர்.

இந்தவூரில் உள்ள கைலாசநாதர் எப்படிப் பட்டவர் தெரியுமா? இந்தத் தலத்தை மிதித்தாலே போதும், நினைத்தது கை கூடும் என்பார்கள்.

வைத்தீசுவரன் கோயிலுக்கு வந்து வைத்தீஸ்வரனைச் சேவித்தால், காணிக்கை செலுத்தினால அனைத்து நோய்களும் அக்கணமே நீங்கி விடும் என்று ஒரு பிரச்சாரம்!

சுகப் பிரசவம் நடக்க வேண்டுமா? அன்னை சுகந்த குந்தனாம்பாள் சித்தன்னவாசலுக்கு வாரீர்!

ஆரூரில் பிறக்க முக்தி, தில்லையம்பதியைத் தரிசிக்க முக்தி; ஆனால் அண்ணாமலையை நினைத்தாலே முக்தி. அத்தகு பெருமை வாய்ந்த திருத்தலம் திருவண்ணாமலை என்கிறது தலப் புராணம்.  வழக்குகளில் வெற்றி பெற வேண்டுமா? கொல்லங்குடி வெட்டுடையாள் காளி (சிவகங்கை அருகில்) இன்னும் கடன் தீர்த்த விநாயகர் என்பது போன்ற அளப்புகளுக்கு அளவில்லை.

கடவுள் ஒருவர்தான் என்பதன் இலட்சணம் இதுதானா? ஒவ்வொரு கோயிலுக்கும் கூட்டம் சேர வேண்டும் - பக்தியின் பெயரால் அவர்களின் பணத்தைச் சுரண்ட வேண்டும் என்ற சூழ்ச்சி இதன் திரைமறைவில் இல்லாமல் வேறு என்ன வாம்?

திருமூலர் பாட்டு ஒன்று உண்டு:

படமாடும் கோயில் பகவர்க்கு ஒன்று ஈயில்
நடமாடும் கோயில் நம்பர்க்கு அங்கு ஆகா
நடமாடும் கோயில் நம்பர்க்கு ஒன்று ஈயில்
படமாடும் கோயில் பகவர்க்கு அது ஆமே

என்பது அந்த திருமந்திரப் பாடல்! இதன் பொருள் என்ன?

ஆண்டவனுக்கு ஒன்று நீ கொடுப்பாயேயானால், அது அடியவர்களுக்கு அளித்தது ஆகாது; மாறாக அடியார்க்கு ஒன்று கொடுத்தால், அது கடவுளுக்குக் கொடுத்ததற்குச் சமம் என்று கூறும் திருமூலர் என்ன கடவுள் மறுப்பாளரா? ஆனால் இந்தக் கோயில் அமைப்பு முறை என்பது அசல் தலைகீழாக அல்லவா உள்ளது. கோயிலுக் குச்  சென்று கொட்டிக் கொடுக்கிறார்களே தவிர பக்தர்களுக்கு, அடியார்களுக்கு, ஏழை எளிய மக்களுக்கு ஒன்றும் அளிப்பதில்லையே.

திருமூலர் பாட்டை ஏற்றுக் கொண்டால் கோயில்களை இழுத்து மூட வேண்டியதுதான்.

கோயிலைக் கட்டி அதற்கு இல்லாத பொல்லாத கதைகளைக் கட்டி விட்டதால் அந்தக் கோயில்களை நாடி இலட்சக்கணக்கில் குறிப்பிட்ட நாளில் படையெடுப்பதால் பெரும் பிரச்சினை ஏற்படுகிறது. நெரிசலில் மக்கள் சாகக் கூடிய பரிதாபம் நிகழ்கிறது.

மத்தியப் பிரதேசம் ரத்னாகர் கோயிலில் ஒரே நேரத்தில் 5 லட்சம் மக்கள் சென்றால் அதன் நிலை விபரீதம் என்பது நிரூபணம் ஆகிவிட வில்லையா?

2011 சனவரி 14 ஆம் தேதி கேரளாவில் மகர ஜோதியைத தரிசிக்கப் போகிறேன் என்று கூறி சென்ற பக்தர்களின நெரிசலால் 104 பக்தர்கள் பரிதாபகரமாகப் பலியாகிடவில்லையா? இவ்வளவுக்கும் மகரஜோதி என்பது மோசடி என்று திட்டவட்டமாகத் தெரிந்ததற்குப் பிறகு, தெளிந்த பிறகு, மூர்க்கத்தனமாக உண்மையைப் புறந்தள்ளி, அங்குப் படை எடுக்கிறார்கள் என்றால் இந்தக் கேவலத்தை - முட்டாள்தனத்தை என்ன சொல்ல!

கோயில் திருவிழா என்பதை மட்டுப்படுத்த வேண்டும்; எந்த நேரத்திலும் வந்து கும்பிட்டுப் போகலாம் என்று குறைந்தபட்சம் புதுத்தல புராணமாவது எழுதித் தொலையுங்கள் - புத்தி பறி போனாலும் உயிராவது பறி போகாமல் காப் பாற்றப்படுமே!

                      ---------------------------------------------------"விடுதலை” தலையங்கம் 15-10-2013