பிற்படுத்தப்பட்டோர்க்கு மட்டும் "கிரீமிலேயர்" ஏன்?

சமூகநீதிக்குப் போராடும் இயக்கங்களே, தலைவர்களே!

அய்.அய்.டி., அய்.அய்.எம். மற்றும் கல்வி நிறுவனங்களில் பிற்படுத்தப்பட்டோருக்கு இட ஒதுக்கீட்டில் கிரீமிலேயர் என்ற ஒரு திட்டமிட்ட சூழ்ச்சிப் பொறி, உச்சநீதிமன்றத்தால் - அரசியல் சட்டத்தால் பொருளாதார அளவுகோலுக்கு இடமில்லாமல் இருந்தபோதிலும்கூட, வலிந்து புகுத்திய காரணத்தாலும், அதற்கு வருமான வரம்பு இரண்டரை லட்சம் என்று வைக்கப்பட்டதாலும், 27 சதவிகிதத்தினை மூன்று கட்டங்களாக 9, 9, 9 என்று தருவது என்ற மத்திய அரசின் தவறான கொள்கை முடிவினாலும், பிற்படுத்தப்பட்ட மக்களுக்கு இன்றைய சூழலில் - வருமானங்கள் உயர்ந்த நிலையில், இரண்டரை லட்சம் என்பதை நான்கரை லட்சமாக்கிடவேண்டும் என்று ஜஸ்டிஸ் இரத்தினவேல் பாண்டியன் தலைமையில் அமைந்த தேசிய பிற்படுத்தப்பட்டோர் நல ஆணையம் பரிந்துரை செய்ததில், மத்திய அரசின் சமூகநலத் துறை ஏற்று - அமைச்சரவையிலே வைத்து முடிவு எடுக்கத் தாமதமானதாலும் (உரிய நேரத்தில் தமிழக முதல்வர் கலைஞர் அவர்கள் பிரதமருக்குக் கடிதம் எழுதிய நிலையிலும்), உச்சநீதிமன்றத்தில் மத்திய அரசு சார்பாக தெளிவற்ற நிலைப்பாட்டினால், இவ்வாண்டு 96 பிற்படுத்தப்பட்ட மாணவர்களின் நுழைவு வாய்ப்பு பறிக்கப்பட்டு, அது முன்னேறிய ஜாதியினரும் போட்டியிடும் பொதுப் போட்டிக்கே சென்று, அவாளுக்கு அதிகமான வாய்ப்பு ஏற்படும் அசாதாரண நிலை ஏற்பட்டுவிட்டது.

வேதனை! வேதனை!! வேதனை!!!

எனவே, இந்த கிரீமிலேயரை எதிர்த்து அரசியல் சட்டத் திருத்தத்தை வலியுறுத்த முன்வரவேண்டும் அனைத்து சமூகநீதி ஆர்வலர்களும்.

முன்னேறிய ஜாதியினர் போட்டியிடுவதற்கு கிரீமிலேயர் இல்லை.

மூன்றாவது அடுக்கான எஸ்.சி., எஸ்.டி., பிரிவுக்கு அது கிடையாத போது,OBC என்ற பிற்படுத்தப்பட்டவர்களுக்கு மட்டும் கிரீமிலேயர் என்பது அநீதி அல்லவா? யாருக்கும் தேவையில்லை, 15(4) சட்டம் எல்லோரையும் ஒரு சம அளவில்தான் பார்க்கிறது. ஏன் இந்த அவலம்?

-------------- தி.க.தலைவர் கி.வீரமணி அவர்கள் 2-10-2008 "விடுதலை" யில் விடுத்துள்ள அறிக்கை