பெரியார் என்னும் சகாப்தத்தின் தொடர்ச்சி

இன்று தமிழர் தலைவர் மீ.கி. வீரமணி அவர்களின் 76 ஆவது பிறந்த நாளை முன்னிட்டு இக்கவிதையை பதிப்பிக்கிறோம்.

சகாப்தத்தின் தொடர்ச்சி...



நெஞ்சில் உரம் ஏந்தி
நினைவுகளில் என்றும் மங்கா
தந்தைபெரியார்
கொள்கை ஏந்தி
தமிழகத்து
மேடைகளில்
என்றும் தரம் தாழா
சொல் ஏந்தி
அறுபத்தைந்து
ஆண்டுகளுக்கும்
மேலாய் உழைத்துவரும்
என் தலைவர்
ஆசிரியர் வீரமணி
பற்றி என்ன
தெரியும் உனக்கு
என்றேன்
என்னோடு வேலை பார்ப்பவரிடம்

பத்து வயதில்
மேடையேறி
பகுத்தறிவுக்
கருத்துக்களை
முழங்க ஆரம்பித்தவர்
இன்னும்
ஓரிரு நாளில்
வயது 76 அவருக்கு
கேட்டுப் பார்
அவரது முழக்கத்தை
கடவுள்கள் பற்றிய
கிண்டலை கேலியை
கேட்பவனின்
மூடநம்பிக்கை
அவனை விட்டு ஓடுகிறதா இல்லையா
விசாரித்துப்பார்
பகவத் கீதை
பெயரைக் கேட்டவுடன்
கன்னத்தில் போட்டுக் கொள்ளும்
நாடு இது
கொலைகார நூல்
அது என்பதை
சாதியின் பிறப்பிடமே
அதுதான் என்பதை
அக்குவேறாய்
ஆணிவேராய்
பிரித்து ஆய்ந்திருக்கும்
ஆசிரியர் வீரமணியின்
கீதையின் மறுபக்கம்
படித்துப்பார் எதிரிகள்கூட
கீதையின் மறுபக்கம்
படித்துவிட்டு
ஆதாரங்களின் அணிவகுப்பால்
அமைதிகாக்கும்
மவுனம் பார்
அய்யா பெரியார்
இராமாயணப்
பாத்திரங்களை ஆராய்ந்தார்
அதன்
பார்ப்பனத்தனத்தை
பரதேசித்தனத்தை
மக்கள் மத்தியில்
போட்டுடைத்தார்
இன்னொரு இதிகாசமாம்
மகாபாரதத்தை
தோலுரிக்க
விரும்பினார்
பெரியார்
அவர் தொண்டர்
ஆசிரியர் வீரமணி
தோலுரித்த
மகாபாரதத்தை
ஆராய்ச்சி நூல் வடிவில்
கொண்டு வந்தார்

பேரறிவாளர்
அம்பேத்கரை
தவறாக
பூஜிக்கப்படும் கடவுளென
சிறுநரிக் கூட்ட
குள்ள நரி
அருண்சொரி
எழுதிய போது
முதன்முதலாய்
மறுத்துரைத்தார்
மறுப்புரையை
நூலாக்கி
ஊர்தோறும்
பேரறிவாளர்
அம்பேத்கர்
பெருமைதனை
கொண்டுசென்றார்

பாடைகட்டி
தூக்கினார்கள்
பார்ப்பனர்கள்
பழனியில்
சினங்கொள்ளவில்லை
சிரித்தார் வீரமணி
சூத்திரன் பிணத்தை
பார்ப்பான்
தூக்கலாகாது
எனச் சொல்லும்
பார்ப்பானின் சாத்திரத்தை
பார்ப்பானே மீற
ஒரு சந்தர்ப்பம்
விட்டு விடுங்கள்
என்றார்

பெரியார் மறைந்தார்
அவரோடு அவரது
கொள்கையும் மறையும் என
நினைத்தோம்
வீரமிகு வீரமணியால்
அகிலமெல்லாம்
பரவுகிறதே பெரியார் கொள்கை
என அடிவயிற்றில்
அடித்துக்கொள்கிறார்
என்றேன்

50 ஆண்டுகளுக்குமுன்
வளமையை
விரும்பா
இளமையைக் கண்டேன்
இளவல் வீரமணியிடம்
என்றார் புரட்சிக்கவிஞர்
இன்றும்
வளமையை
விரும்பாது தொண்டரோடு
தொண்டராய்
சக தோழராய்
பழகும் தலைவரைக்
காண்கிறோம்
அய்யா விட்டுச்சென்ற
சொத்துகள்
மட்டுமல்ல
அய்யாவின்
கொள்கைகளும்
இயக்கமும் இமாலய வளர்ச்சி
காரணம்
தமிழர் தலைவர் வீரமணியின் உழைப்பு
என்றாரே கலைஞர்

சமூக நீதியின்
பிறப்பிடம் மட்டுமல்ல
இருப்பிடமும்
பெரியார் திடல்தான்
என்றாரே சமூக நீதிக்காவலர்
வி.பி.சிங்.
எனக்குச் சொந்த
புத்தியில்லை
பெரியார் தந்த
புத்திதான் என்று
எங்களை வழிநடத்தும்
தமிழர் தலைவர்
ஆசிரியர் வீரமணி
சாதாரணமாய்
பழகுவதாலேயே
அவர் சாதாரணமானவர் அல்ல
பெரியார் என்னும்
சகாப்தத்தின் தொடர்ச்சி அவர்

அவர்
பேச்சாளர்கள்
கேட்க விரும்பும்
பேச்சாளர்
எழுத்தாளர்கள்
படிக்க விரும்பும்
எழுத்தாளர்
ஆசிரியர்கள்
மட்டுமல்ல
அமைச்சர்களும்கூட
கற்க விரும்பும்
ஆசிரியர் அவர்
வயது 76 என்று
எவர் சொன்னார் ?
உழைப்பால்
உற்சாகத்தால்
தந்தை பெரியார்
கொள்கை வழி நடப்பால்
16 தான் வயது
எனக்கு
என்கின்றார்
என்தலைவர்
ஆசிரியர் வீரமணி
என்றாலும்
செப்டம்பர் 17 போலவே
டிசம்பர் 2ம்
விழா நாளாய்
விழுந்திருக்கிறது
மனதிற்குள்
நடையில் மட்டுமல்ல
சொந்தவாழ்விலும்
ஒழுக்கத்திலும்கூட
அவரைப் பின்தொடர்வது
கடினம்தான்
என்றாலும்
செயலிலும்
சிந்தனையிலும்
வேக நடை போடும்
ஆசிரியர் வீரமணி
வழி தொடர்வோம்
பெரியார் கொள்கை
வழி வாழ்வோம் என்றேன்
சரி என்றான்
சக தோழனும்.

------------------ப.க.தலைவர் - வா. நேரு அவர்கள் எழுதிய கவிதை - "விடுதலை" ஞாயிறுமலர் 29-11-2008