Search This Blog

25.7.10

பெரியார் சொத்து யாருக்கு? பெரியார் விளக்கம் - 3


நான் செய்து வந்த தொண்டும் செய்து வருகின்ற தொண்டும் நீங்கள் அறிந்ததேயாகும்.அத்தொண்டு யாருக்காக என்பதும், அதனால் நான் ஏதாவது நன்மை, சுயநலம் அடைந்தேனா என்பதும் உங்களுக்குத் தெரியும். எனது நலத்தை, செல்வத்தை, செல்வாக்கை பொதுநலத்தொண்டுக்குக் கொடுத்தேனா அல்லது எனது பொதுத் தொண்டால் எனது நலத்தை, செல்வாக்கைப் பெருக்கிக் கொண்டேனா என்பது உங்களுக்குத் தெரியும்!

இராஜாஜி அவர்களும், இரு கவர்னர்களும், இரு கவர்னர் ஜெனரல்களும் வேண்டியும், கேட்டுக் கொண்டும் மந்திரிப் பதவியை வெறுத்தவன் நான். தவிர, எந்தப்பதவியையும் நான் விரும்பியவன் அல்லன்.இன்னும் இனியும் நண்பர்களால், பெரியோர்களால் புகழுரை பெற்றதைத் தவிர யாராலும் ஒரு நலனும் பெற்றதில்லை; விரும்பியதில்லை.

எனக்குப் பொதுத் தொண்டு வரும்படி என்பது என் சொந்தக் காசில் பிரயாணம் செய்து 1930 இல் கூட்டமொன்றுக்கு 50 ரூபாய் வாங்கி, 1950 இல் 100 ரூபாய் வாங்கி 1960 இல் 150 ரூபாய் வாங்கி, 1970 இல் 200 ரூபாய் வாங்கினதுதான். மற்றும், மாநாடுகள் நடத்தியதில் சுமார் 1,00,000 ரூபாய் மீதமிருக்கும். மற்றபடி, எனக்கு இன்றுள்ள அவ்வளவும், மற்றும் இயக்கத்தின் பேரில் உள்ள சொத்துக்கள், செல்வங்கள் அவ்வளவும் என்னால் என் தகப்பனாரைக் கொண்டு செய்யப்பட்ட டிரஸ்ட் தர்ம சாசனம் ஆக்கப்பட்ட எங்கள் குடும்பச் சொத்தே அல்லாமல் பிறர் சொத்து, ஒரு காசளவும் இல்லை.அப்படி இருந்தாலும் நான் அவைகளில் இருந்து பொதுநலத்திற்கு என்று திருச்சியில் காலேஜுக்கு 5 இலட்சமும், திருச்சி குழந்தைகள் ஆஸ்பத்திரிக்கு ஒரு இலட்சமும், ஈரோடு பொது ஆஸ்பத்திரிக்கு - குழந்தைகள் வார்டுக்கு ஒரு இலட்சமும், மற்றும் இந்த 50, 60 வருடகாலமாக 1000 ரூபாய், 2000 ரூபாய், 3000 ரூபாய், 10,000 ரூபாய் என்கிற கணக்கில் பொதுநலத்திற்கு (தர்மத்துக்கு) என்று கொடுத்துவந்தது 2,3 இலட்ச ரூபாய்க்கும் குறையாது.இயக்கத்திற்கு நான் வாங்கி இருக்கின்ற சொத்துக்கள் இன்று, 30,00,000 (முப்பது இலட்சம்) ரூபாய்க்கும் குறையாமல் பெறும். எங்கள் டிரஸ்ட் சொத்துக்கள் சுமார் 20,00,000 ரூபாய் 30,00,000 ரூபாய் பெறும்.
இவ்வளவும் இயக்கத்தின் பெயராலேயே இருக்கின்றன. இருந்தாலும், தலைவன் என்கிற முறையில் என் ஆதிக்கத்தில் தான் இருக்கின்றன. இதனால் இயக்கத்திற்கு இலாபம் என்னவென்றால் வருமானம் பெருகுகின்றது; சொத்து வளருகின்றது; அவ்வளவு தான். எனக்கென்ன பயன் என்றால் கவலை, தொல்லை அதிகமாக இருப்பதுதான். ரொக்கமும் பல இலட்சம் இருக்கின்றது.சர்க்கார் சட்டத்தால், இன்கம்டாக்ஸ் கொடுமையால் இவற்றில் எவ்வளவு குறைந்தாலும் குறையலாம்.

இனி எனது தொண்டினால் ஏற்பட்ட பலன் என்ன என்பதை நீங்கள் தெரிந்து கொள்ளுங்கள் ! மற்றும் எனது தொண்டில் எனக்கு உதவியாய் இருந்தவர்கள் பலர் - அவர்களால் கனவில் கூட நினைத்திருக்க முடியாத பதவியையும், அந்தஸ்தையும் செல்வாக்கையும் அடைந்தார்கள்; அடைந்து வருகிறார்கள். இந்த நிலையில் கூட நான் யாரையும் ஒரு காசு அளவுகூடக் கேட்காமலும், எவரிடத்திலும் நானாகக் கைநீட்டாமலும் இயக்கத்துக்காக வருவாய் சம்பாதித்துக் கொண்டு தான் வருகிறேன்.

எந்த நிலையிலும் எனது நிலை ஒரு சிறிது கூடத் தாழாமல் ஏதோ சிறிதாவது வளர்ந்து கொண்டே தான் வருகிறது.நண்பர்களே! இவற்றையயல்லாம் ஏன் சொல்லுகின்றேன்? யாரிடத்திலும் எவ்வித உதவியையும் கேட்பதற்கல்ல. மற்ற எதற்கு? மன்னிப்பு கேட்பதற்கு என்ன மன்னிப்பு என்றால், நான் இனிச் சுற்றுப்பிரயாணப் பிரச்சாரத்திலிருந்து ஓய்வு எடுத்துக் கொள்ளலாம் என்று முடிவு செய்திருக்கிறேன்.

சென்னையிலோ, திருச்சியிலோ வேறு தொல்லையற்ற இடத்திலோ இருந்து கொண்டு துண்டுப் பிரசுரம், வால் போஸ்டர், சிறு சித்திரப் புத்தகம் முதலியவை பிரசுரித்துக் கொண்டு இருக்கலாம்; அலையவேண்டாம் என்று கருதுகிறேன்.ஆகஸ்ட் முடிந்தால் 93 வயது முடிந்துவிட்டது; செப்டம்பர் பிறந்தால் 94 வயது ஆண்டு பிறக்கின்றது.

யார் தயவையும் விரும்பாமல், யார் விசயத்திலும் தயவு தாட்சண்யம் காட்டாமல் சுதந்திரமாய் இருந்து பார்க்கலாம் என்று கருதுகின்றேன்.நான் சென்னைக்கு வந்தால் “உண்மை” மாத இதழையும் சென்னைக்குக் கொண்டு வந்துவிடலாம் என்று கருதுகின்றேன். சென்னைக்கு வருவதில் வேறு பல சங்கடங்களும் இருக்கின்றன. திருச்சியில் பயிற்சிப் பள்ளிகள் இரண்டு இருக்கின்றன; பிரைமரிப் பள்ளி ஒன்று இருக்கின்றது; அநாதைப் பிள்ளைகள் விடுதி ஒன்று இருக்கின்றது; வரும் ஆண்டு முதல் உயர்நிலைப் பள்ளி ஒன்று ஏற்படுத்த அனுமதி பெற்று நடத்தப்படப்போகின்றது. ஈரோட்டில் ஒன்று ஏற்படுத்த உத்தேசம். இவையயல்லாம் திருமதி. மணியம்மையார் முயற்சியில் தான் நடை பெறுகின்றன. 10, 12 ஏக்கர் தோட்டப்பண்ணை ஒன்றும் நடை பெறுகின்றது. பல ஆயிரக்கணக்கில் வாடகை வரும் பல கட்டிடங்களும் திருச்சியில் இருக்கின்றன. ஆகவே, மணியம்மை அவர்கள் திருச்சியில் இருக்க வேண்டி இருக்கிறது. நான் சென்னைக்கு வந்தால் மணியம்மையார் என்னைத் தனியாய் இருக்கச் சம்மதிக்கமாட்டார்கள்; அவர்கள் சென்னைக்கு வந்து விட்டால், திருச்சி நடப்புக்கள் பாதிக்கப்பட்டு விடும்.இது ஒரு சங்கடமான நிலைமை என்றாலும் ஏதாவது செய்தாக வேண்டியிருக்கிறது.எனது உடல்நிலை, மனநிலையைப் பொறுத்துத்தான் இந்தச் சிந்தனைகள் ஏற்பட்டன.

தமிழ்ப் படிப்புள்ள புலவர் ஒருவர் எனக்கு உதவிக்கு வேண்டியிருக்கிறது. பேச்சில் இருக்கின்றவைகளை எழுத்தில் புத்தகத்தில் ஏற்படுத்திவிட்டுப் போக வேண்டும் என்று கருதுகின்றேன். ஆகவே, தோழர்களே ! என்னைக் கூப்பிடாதீர்கள் ! கூப்பிட்டால் அது மாநாடாக இருக்க வேண்டும், பணம் ரூ.500 கொடுக்க வேண்டும் என்று நிபந்தனை வைக்கின்றேன். மன்னியுங்கள்!

நாடு பூராவும் நல்ல பேச்சாளர்கள் இருக்கின்றார்கள். நான் எதையும் குறைவில் விட்டு விட்டுப் போகவில்லை. மக்கள் நல்ல உணர்ச்சி பெற்று இருக்கிறார்கள். ஆனால் காரியத்தில் இறங்க வில்லை. அதற்குத் துண்டுப் பிரசுரம் செய்யலாம் என்று இருக்கின்றேன். மற்றொரு முக்கிய விசயம்; நமக்கு இப்போது சினிமா ஒரு தொல்லையாக ஆகிவிட்டது. அதற்காக ஒரு சினிமா பகிஷ்கார மாநாடு போட்டு சினிமா பார்க்காதே என்று வேண்டுகோள் பிரச்சாரம் ஆரம்பிக்க வேண்டும்.

கோவில் பகிஸ்காரம் சாதித்து விட்டாயா என்ற கேட்பார்கள். அது எனக்கு அவமானம்தான். ஆனாலும், நான் கலைஞர் அவர்களுக்கு ஆட்பட்டதால் ஏற்பட்ட நிலை என்றாலும், கலைஞர் தடையை நீக்கும் போது ஆரம்பிப்பேன். ஆனால், சினிமா பகிஷ்காரத்திற்கு யாருக்கும் ஆட்பட மாட்டேன். அது அண்மையில் துவக்கப்படும். இவை பற்றிய திட்டங்களை அடுத்து வெளியிட இருக்கிறேன்.


---------------- தந்தை பெரியார் - “விடுதலை” - 19-07-1972

24.7.10

உண்மையான தமிழிசை மும்மணிகள் யார்?


தமிழிசை மும்மணிகள்!


5ஆம் முறையாக முதல் அமைச்சராகப் பொறுப்பேற்ற மானமிகு மாண்புமிகு கலைஞர் அவர்கள் அடிப்படையாக பண்பாட்டு மறுமலர்ச்சித் திசையில் காலத்தை வென்று நிற்கும் அரும் பணிகளை ஆற்றி விட்டார்!

எந்த அரசு எதிர்காலத்தில் வந்தாலும் இவற்றில் கை வைக்க முடியாது என்பதான எழிலார்ந்த, ஏற்றமிகு சாதனைகள் இவை.

1) அனைத்து ஜாதியினருக்கும் அர்ச்சகர் உரிமை _ தமிழில் வழிபாட்டு உரிமை.

2) தமிழை செம்மொழியாக அங்கீகரிக்கச் செய்தது.

3) தை முதல் நாள் தமிழ்ப் புத்தாண்டு சட்டம்

4) தீட்சிதர் கைகளில் சிக்குண்டு கிடந்த சிதம்பரம் நடராசன் கோயிலை அரசின் துறைக்குக் கீழ் கொண்டு வந்தது.

5) வடலூர் இராமலிங்க அடிகளார் அவர்களால் உருவாக்கப்பட்ட சத்திய ஞானசபையிலிருந்து பார்ப்பனரை வெளியேற்றி, தமிழர் கையில் நிலை நிறுத்தியது.

6) ஏற்கெனவே தம்மால் தொடங்கப்பட்ட பெரியார் நினைவு சமத்துவப்புரங்களை மேலும் விரிவாக்கி, ஒவ்வொரு சமத்துவப்புரத்திலும் தந்தை பெரியார் சிலை நிறுவியது.

7) இத்துடன் ஏழாவது அம்சமாக தமிழிசை மூவருக்குச் சீர்காழியில் 1.51 கோடி ரூபாய் செலவில் மணி மண்டபம் கட்டும் திட்டம்.

மொழி உணர்வும், இனவுணர்வும் கொண்டவர்கள் எந்த முகாம்களில் இருந்தாலும் அவற்றையெல்லாம் கடந்து, இவற்றிற்காக மானமிகு கலைஞர் அவர்களுக்கு மகத்தான நன்றியையும் மாசுமருவற்ற பாராட்டையும் தெரிவிக்கக் கடமைப்பட்டுள்ளனர்.

தமிழிசைக்கு வித்திட்ட உண்மையான மூவேந்தர்கள் _ மும்மணிகள் சீர்காழி முத்துத் தாண்டவர் (1525_1600) அருணாசலக்கவி கவிராயர் (1711_ 1779); தில்லை விடங்கன் மாரிமுத்தாப் பிள்ளை (1712_1787)

காலத்தால் மூத்த இந்த மும்மணிகள்தான் தமிழிசையை வளர்த்தவர்கள் என்கிற உண்மை இருக்க... பொய்யை விதைத்தே பொய்யை அறுவடை செய்யும் பார்ப்பனக் கும்பல் இவர்களின் பிற்காலத்தவர்களான தியாகையர் (1767_1847); சாமா சாஸ்திரி (1763); முத்துசாமி தீட்சிதர் (1775) ஆகிய பார்ப்பனர்கள்தான் தமிழிசையின் தா(த்)தாக்கள் என்று பெரும் பிரச்சாரத்தில் ஈடுபட்டு வருகின்றனர்.

இந்தத் தியாகையர் பெயரில் ஆண்டுதோறும் திருவையாறில் தியாகபிர்மம் என்றுகூறி, ஊரில் உள்ள இசை வாணர்களை எல்லாம் கூப்பிட்டு கச்சேரி மழையைப் பொழியச் செய்து, உண்மையான தமிழிசை மன்னர்களான தமிழர்களை இருட்டடித்து வருகின்றனர். தமிழ்நாட்டில்தான் திருவையாறு இருக்கிறது. அங்கு நடைபெறும் தியாகையர் விழாவில் தமிழில் பாடக் கூடாதாம்! தமிழ் நீஷப் பாஷையாம் அப்படிப் பாடினால் தியாகையர் சந்நிதானம் தீட்டுப்பட்டு விடுமாம்.

இன்றைய தினம் நமது மானமிகு முதல் அமைச்சர் தமிழிசை மூவருக்கும் சீர்காழியில் மணிமண்டபம் கட்டுவதன் பின்னணியில் மிக முக்கியமான வரலாறு இருக்கவே செய்கிறது.


தில்லைவிடங்கன் மாரிமுத்தாபிள்ளை, சீர்காழி அருணாசலக் கவிராயர், சீர்காழி முத்துத்தாண்டவர்

1945 இல் திருவையாறு தியாகராஜ அய்யர் உற்சவத்தில் இசையரசு தண்டபாணி தேசிகர் அவர்கள் சித்தி விநாயகனே! என்ற தமிழ்ப் பாடலைப் பாடினார் என்பதற்காக, அடுத்தபடி கச்சேரி செய்ய வந்த அரியக்குடி ராமாஜானு அய்யங்கார் தேசிகர் தமிழில் பாட்டுப் பாடி சன்னிதானத்தைத் தீட்டுப்படுத்தி விட்டார்; நான் இந்த மேடையில் பாட மாட்டேன் என்று கூச்சலிட்டுத் தாம்தோம் எனத் தாண்டிக் குதித்தாராம்.

சந்நிதானத்தைக் கழுவி சடங்குகள் செய்து தீட்டுக் கழித்ததற்குப் பிறகேதான் அரியக்குடி அய்யங்கார் பாடினாராம்.

அதுகுறித்து கலைஞர் அவர்கள் அப்பொழுதே குடிஅரசு இதழில் (9.2.1945 பக்கம் 7) தீட்டாயிடுத்து! எனும் தலைப்பில் துணைத் தலையங்கம் ஒன்றினை எழுதினார்.

இது இன்று நேற்றல்ல, மனுமந்தாதா காலத்திலிருந்து தமிழ் பாஷை நீச்ச பாஷை என்றும், பிராமணாள் ஸ்நானம் செய்து விட்டு சாப்பிடும்வரை தமிழ் பேசக் கூடாது என்றும், வீட்டில் விசேஷ காலங்களில் தமிழ் வாயில் நுழையக் கூடாதென்றும் கூறி வந்ததோடு, அனுஷ்டானத்திலும் இருந்து வருகிறது. அகத்திலும், அக்கிரகாரத்திலும் இருந்துவந்த இந்த அகம்பாவம் அய்யர்வாள் உற்சவத்திலும் புகுந்துவிட்டது. தமிழ் நாட்டிலே தமிழர்கள் உயிரோடு வாழும் நாட்டிலே தமிழர்களுடைய மொழிக்குத் தடையுத்தரவு! ஆங்கில அரசாங்கமல்ல ஆரிய அரசாங்கத்தின் ஆணை! தமிழ் மொழியில் பாடியதால் மேடை தீட்டாகி விட்டது என்ற ஆணவப் பேச்சு கிளம்பியதற்குக் காரணம் தமிழர்கள் அடிமைகளாக அனுமார்களாக வாழ்வதுதான். தமிழர் இனம் சூத்திர இனமாகவும், தமிழர் மொழி தீட்டுப்பட்ட மொழியாகவும் போய் விட்டது. தியாகராஜர் திருநாளுக்கு நன்கொடை வழங்கும் முட்டாள் தமிழர்களும், தொண்டர்க்குத் தொண்டராம் சிஷ்யகோடிகளின் வரிசையிலுள்ள அழகப்ப செட்டியார் போன்ற விபீஷணர்களும் உள்ளவரை அரியக்குடிவர்க்கம் அகம்பாவத்தோடு தான் வாழும். அரியக்குடிகள் அங்கலாய்ப்புக்கு அவர் இனபந்து காந்தி மகாத்மா(?)வின் விஜயமும் ஒரு காரணமாகும்.

நம்ப வேண்டாம்!

பெரியார் அவர்களின் சொற்பொழிவுகள் தேசிய தினசரிகளில் பெரும்பாலும் திரித்தும் மறைத்தும் கண்டபடி பிரசுரிக்கப்படுகின்றன. எங்கும் பார்ப்பனர்களே நிருபர்களாயிருப்பதே இதற்குக் காரணம் ஆகையால் அவைகளை நம்ப வேண்டாம் என்று எச்சரிக்கிறோம். ஒவ்வொன்றுக்கும் சமாதானம் எழுதிக் கொண்டிருக்க முடியாததால் இதை எழுத நேர்ந்தது என்று அத்துணைத் தலையங்கத்தில் கலைஞர் அவர்கள் எழுதினார்.

இளவயதில் ஈரோட்டுப் பகுத்தறிவுப் பால் குடித்து வளர்ந்தவர் அல்லவா அந்த இனமான உணர்வினை பவள விழாவைத் தாண்டினாலும் கொஞ்சம்கூட மறந்து விடாமல், நெஞ்சப் பேழையில் பூட்டி வைத்து இன்றைக்கு உண்மையான தமிழிசை மூவேந்தர்களான தமிழர்களின் நினைவை நிலைநாட்டும் வண்ணம் மணி மண்டபத்தை உருவாக்குகிறார்.

தமிழில் இசைப் பாடல்கள் கிடையாது; அவை தெலுங்கிலும், கன்னடத்திலும், சமஸ்கிருதத்திலும்தான் குடி கொண்டு இருக்கின்றன என்று பார்ப்பனர்கள் தங்கள் ஊடகங்களால் பிரச்சாரப் புழுதி செய்து வந்துள்ளனர்.

அது உண்மையானதுதானா? இரண்டாயிரம் ஆண்டுகளுக்கு முந்தைய பரிபாடலில் இடம் பெற்ற பாடல்கள் அத்தனையும் இசையோடு பாடக் கூடியவையாயிற்றே!

பாடல்களைப் பாடியவர்கள் பெயர் மட்டுமன்றி, ஒவ்வொரு பாட்டின் கீழும் அதற்குரிய வண்ணம், தூக்கு (இராகம், தாளம் போன்றவை) ஆகியவையும் குறிப்பிடப்பட்டு இருக்கின்றன.

அண்மைக் காலத்தில்கூட கோபாலகிருஷ்ண பாரதி, மதுர கவி பாஸ்கரதாஸ், விசுவநாததாஸ் சங்கரதாஸ் சுவாமிகள் எத்தனையோ பேர் இசைப் பாடல்களை யாத்துள்ளனரே!

நாட்டுப்புறப்பாடல்களுக்குத் தமிழில் பஞ்சமா? தெம்மாங்கு, கும்மி, கோலாட்டம் ஏற்றப்பாட்டு என்று நீண்ட வரிசை உண்டே!

தந்தை பெரியார் சுயமரியாதை இயக்கம் கண்ட 1929 முதல் மாநாடுகளை நடத்தத் தொடங்கிய நிலையில் தமிழிசை மாநாட்டையும் சேர்த்து நடத்தினார்!

ஈரோட்டில் 1930, மே 12ஆம் நாள் பிற்பகல் நடைபெற்ற தமிழ் மாகாண சங்கீத மாநாட்டில் 4000 பேர் கூடியிருந்தனர். அம்மாநாட்டை தொடங்கி வைத்து தந்தை பெரியார் உரையாற்றுகையில், சங்கீதக் கலையிலும், நம்மவர்களுக்குச் சுயமரியாதை உணர்ச்சி ஏற்பட வேண்டுமென்றும், அந்தக் கலைகளை உடைய நம்மவர்கள் எந்தக் காரணத்தினாலும் தங்களுடைய சுய மரியாதையையை இழக்கக் கூடாது என்றும் கேட்டுக் கொள்கிறேன். எனக்குச் சங்கீதத்தில் எவ்வித ஞானமும் கிடையாது. சங்கீத வித்தையிலும் நம்மவர்களுடைய சுய மரியாதை குறைக்கப்பட்டிருப்பதனால், அதை நம்மவர்கள் தேடிக் கொள்ள வேண்டியது மிகவும் அவசியமாகும். அதற்காகவே இந்தக் கூட்டம் கூட்டப்பட் டிருக்கிறது என்று பேசினார் என்பது கோடிட்டுக் காட்டப்பட வேண்டிய பொன் வரிகளாகும்.

கலைஞர் அவர்கள் வரலாற்றில் இன்னொரு தடம் நினைவுபடுத்தப்பட வேண்டியதாகும்.

சென்னைத் தமிழிசைச் சங்கத்தின் சார்பில் 21.12.1989 அன்று அரசர் அண்ணாமலை மன்றத்தில் தமிழிசை விழா நடைபெற்றது. அவ்விழாவில் முதல் அமைச்சர் கலைஞர் கலந்து கொண்டு உரையாற்றினார். அவ்விழாவில் மானமிகு கலைஞர் அவர்களுக்குப் பக்கத்தில் அமர்ந்திருந்தவர்கள் யார் யார் தெரியுமா? செம்மங்குடி சீனிவாசய்யர், கல்கி சதாசிவம் அய்யரின் அருமை வீட்டுக் கிழத்தியான எம்.எஸ். சுப்பு லட்சுமி அம்மையார் ஆகியோராவர்.

நல்ல சந்தர்ப்பம் அல்லவா நழுவ விடுவாரா நமது இனமானக் கலைஞர்?

1945இல் திருவையாற்றில் நடந்த அந்தப் பழைய மலரும் நினைவுகளை அவருக்கே உரித்தான முறையில் கண்முன் கொண்டு வந்து நிறுத்தினார்.

அன்று அரியக்குடி ராமானுஜ அய்யங்கார் காட்டிய தமிழ் வெறுப்பை இன்று பக்கத்தில் அமர்ந்திருந்த செம்மங்குடி சீனிவாசய்யர் அறியும்படி இடித்துரைத்தார். என்ன செய்வார் செம்மங்குடி? நெளிந்தார். அவ்வளவு தான்!

எம்.எஸ். சுப்புலட்சுமி அம்மையாருக்கு என்ன சங்கடம்? நீராரும் கடலுடுத்த என்ற மனோன்மணியம் சுந்தரனாரின் பாடலைத் தமிழ் வாழ்த்தாகப் பாடிக் கொடுக்கும்படி முதல் அமைச்சர் கலைஞர் அவர்கள் சுப்புலட்சுமி அம்மையாரைக் கேட்டுக் கொண்டார்.

மதுரை சண்முகவடிவு சுப்புலட்சுமி என்பவர் சூத்திரப் பெண் மணியானா லும் இப்பொழுது கல்கி சதாசிவ அய்யர்வாளின் சம்சாரம் ஆயிற்றே! புடவை கட்டு முதல் மடிசார் ஆயிற்றே! பேச்சிலும் அவாள் இவாள் வந்தாச்சே!

ஒத்துக் கொள்வாரா?

தமிழ் வாழ்த்தை கடவுள் வாழ்த்துக்கு இணையாகப் பாட முடியாது என்று கறாராகவே கூறிவிட்டார்.

விழாவில் தமிழக முதல் அமைச்சர் தமிழிசையைப் பற்றி பேசிய போது அம்மையார் உள்ளத்தில் எத்தனை எத்தனை முள்கள் சுருக் சுருக்கென்று தைத்திருக்கும். ஒரு தமிழர் அதுவும் பெரியார் வழி தமிழர் ஆட்சிப் பொறுப்புக்கு வந்ததால் தான் காலங்கடந்தேனும் தமிழர்களான தமிழிசை மூவருக்கும் சீர்காழியில் மணிமண்டபம் எழுந்திட உள்ளது.

திருவையாற்றில் தியாகப்பிர்மம் நடப்பதையும் தாண்டி, சீர்காழியில் தமிழிசை விழா பெரு மழையாகக் கொட்ட வேண்டும் அதில் புதுமை மணம் வீசும் பாடல்கள் முக்கியமாக இடம் பெற வேண்டும் என்பதே தமிழர்களின் ஒட்டு மொத்த எதிர்பார்ப்பு!

மானமிகு முதல் அமைச்சர் கலைஞர் அவர்களுக்கு மீண்டும் ஒரு தன்மான வணக்கமும், இனமான நன்றியும், பாராட்டும் உரித்தாகுக!

--------------------- மின்சாரம் அவர்கள் 24-7-2010 “விடுதலை” ஞாயிறுமலரில் எழுதிய கட்டுரை

பெரியார் சொத்து யாருக்கு?


பூனைக் குட்டி வெளியில் வந்தது!

நேற்று காலை தனியார் தொலைக்காட்சி ஒன்றில் ஒரு செய்தி ஒளிபரப்பப்பட்டது.

பெரியார்தம் சொத்துக்களை யாருக்கும் எழுதி வைக்கவில்லை; அப்படி எழுதி வைக்கப்படாத நிலையில், அந்தச் சொத்துக்களை அரசாங்கம் எடுத்துக் கொள்ளலாம் என்பதுதான் சட்டத்தின் நிலை!

அப்படி அரசு எடுத்துக் கொள்ளவில்லையென்றால், உயர்நீதிமன்றத்திலும், உச்சநீதிமன்றத்திலும் வழக்குத் தொடருவோம் என்று கழகத்தால் விலக்கப்பட்ட ஒருவர் பேட்டியளித்ததாக அந்தத் தனியார்த் தொலைக்காட்சி ஒளிபரப்பியது.

இதன்மூலம் பூனைக்குட்டி வெளியில் வந்துவிட்டது; அவர்களின் ஆற்றாமையும் அப்பட்டமாகவும் தெரிந்து விட்டது.

திராவிடர் கழகம் பெரியார் கொள்கைகளை சரியாகப் பரப்பவில்லை; பெரியார் நூல்களை வெளியிடவில்லை; நாங்கள்தான் தீவிரமாகச் செயல்பட்டுக் கொண்டு இருக்கிறோம் என்று சொன்னவர்களால் பெரியார் சொத்துக்களை நாங்கள்தான் கைபற்றுவோம். மிகமிக வேகமாகப் பெரியார் கொள்கைகளைப் பரப்புவோம் என்று கூறும் திராணி நாணயம் தங்களிடத்தில் அறவே இல்லை என்பதை இதன்மூலம் ஒப்புக்கொண்டு விட்டார்களா இல்லையா?

அக்மார்க் முத்திரைத் துரோகம்!

பெரியார் சொத்துக்களை அரசு எடுத்துக் கொள்ள வேண்டும் என்று இதற்கு முன்புகூட சில துரோகிகளும், பார்ப்பன ஊடகங்களும் ஊளையிட்டதுண்டு. வழக்கு மன்றம் சென்று மூக்கறுபட்டதும் உண்டு. மக்கள் குரல் டி.ஆர்.ஆர். அய்யங்கார் போன்றவர்கள் துப்பிய அந்த எச்சிலைக் கையில் எடுத்துக்கொண்டு அவர்களின் சீடர்கள் இப்பொழுது சிலம்பம் ஆட முன்வந்து தங்களது அக்மார்க் முத்திரைத் துரோகத்தை அடையாளம் காட்டிக் கொண்டுள்ளனர்.

இதுவும் ஒரு வகையில் நன்மைதான். பெரியார் கொள்கையை எங்களால்தான் பரப்ப முடியும் என்று மார்தட்டியவர்கள் இப்பொழுது பெரியார் சொத்துக்களை அரசு எடுத்துக்கொள்ளவேண்டும் என்று சொல்லுவதன்மூலம் இவர்களின் நோக்கம் பெரியார் கொள்கைகளைப் பரப்புவதல்ல பெரியார் கொள்கைகளைப் பரப்பும் உண்மையான அமைப்பைச் சிறுமைப் படுத்தவேண்டும் என்பதுதான் என்பதைப் பொது நிலையில் உள்ளவர்கள் புரிந்துகொள்ளும் ஒரு நிலை ஏற்பட்டுவிட்டதே!

காஞ்சிமடமும் கைலாகு கொடுக்கும்

உச்சநீதிமன்றம் வரை செல்லுவார்களாம். அந்த அளவுக்குப் பொருளாதாரப் பின்னணி அவர்களுக்கு இருக்கிறது இப்படி ஒரு முயற்சி மேற்கொண்டால் காஞ்சிமடம் வரை கைலாகு கொடுக்கமாட்டார்களா?

பார்ப்பன ஊடகங்கள் ஊதிப் பெருக்கிக் காட்டாதா? அந்த விளம்பரத்தால் ஒருவருக்கொருவர் சந்தித்து கைகொடுத்துக் கொண்டு அற்ப சந்தோசம் அடைய லாம் அல்லவா!

தந்தை பெரியார் அவர்கள் கழகத்திற்கு வாரிசு ஏற்பாடு என்று செய்ததையும், அன்னை மணியம்மையார் அவர்கள் தமக்குப் பிறகு பெரியார் அறக்கட்டளையின் ஆயுள் செயலாளர் யார் என்பதையும் திட்டவட்டமாக சட்ட ரீதியாக எழுதி வைத்துத்தான் ஏற்பாடு செய்துதான் சென்றிருக்கிறார்கள். சொத்துக்களைச் சரியாகப் பதிவு செய்துதான் சென்றுள்ளனர்.

இதுபோல புல்லுருவிகள் தீட்டிய மரத்திலேயே கூர் பாய்ச்சுபவர்கள் வரக்கூடும் என்ற தொலைநோக்கோடு தான் அந்த ஏற்பாடுகளை அவர்கள் துல்லியமாகச் செய்து வைத்துவிட்டுச் சென்றுள்ளனர் போலும்!

தீட்டிய மரத்தில் கூர்பாய்ச்சுவதா?

எந்த இயக்கத்தால், எந்தத் தலைவரால் ஆளாக்கப் பட்டார்களோ, விளம்பரப்படுத்தப்பட்டார்களோ, அந்தத் தலைவர் மீதே கட்டாரியை வீசும்போது குறைந்தபட்சம் கறுப்புச் சட்டையைக் கழற்றிவிட வேண்டும்.

இதே பெரியார் அறக்கட்டளைக்காக ஒரு கால கட்டத்திலே வாதாடியதைக்கூட மறந்துவிட்டு, அதற்கு முரணாக முண்டா தட்டுவது என்றால், கூலிக்காக மாரடிப்பது என்கிற ரகத்தைச் சேர்ந்தவர்கள் அவர்கள் என்றுதானே கருதப்படவேண்டும்.

பெரியார் சொத்துக்களை அரசாங்கம் எடுத்துக் கொள்ளவேண்டும் அதன்மூலம் தமிழர்களின் மூச்சுக் காற்றான விடுதலை நாளேட்டை நிறுத்தவேண்டும்; பகுத்தறிவு இதழான உண்மையை ஊத்தி மூடவேண்டும்.

கழக வெளியீடுகள் வராமல் பார்த்துக் கொள்ள வேண்டும் அதன்மூலம் பார்ப்பனர்கள் வட்டாரத்தில் ஆழ்வார் பட்டத்தைப் பெற்றுக்கொள்ளவேண்டும் என்று துடியாய்த் துடிப்பதை தமிழர்கள் பார்ப்பனர் அல்லாத கோடானு கோடி மக்கள் சமூகநீதி தேவைப்படும் கோடானு கோடி அண்டை மாநில மக்கள்கூடப் புரிந்துகொள்ளமாட்டார்களா?

எத்தனையோ வழக்குகளைச் சந்தித்தவர்தான் தமிழர் தலைவர் மானமிகு கி. வீரமணி அவர்கள்.

இந்திய அரசமைப்புச் சட்டத்திலேயே புதிய சட்டம் ஒன்றை 31சியின் இணைப்பதற்குக் காரணமாக இருந்தவர்.

முதல் திருத்தம் தந்தை பெரியார் அவர்களால் நிகழ்ந்தது என்றால் 76 ஆவது சட்டத் திருத்தம் 31பியின் கீழ் அவரின் நம்பிக்கைக்குரிய சீடர் வீரமணி அவர்களால் ஏற்பட்டது என்பதை வரலாறு கூறிக்கொண்டே இருக்கும்.

ஆணவத்தின் சேட்டை!

ஏதோ ஒன்றில் தற்காலிக வெற்றி பெற்றுவிட்டதால், வானத்தின் கூரையே தங்கள் கைவசம் வந்துவிட்டதாக அதிகம் ஆடுவது ஆணவத்தின் சேட்டைக் குணமே!

ஒருவகையில் மகிழ்ச்சிதான். இவ்வளவு சீக்கிரம் தங்களை அங்க மச்சத்தோடு அடையாளம் காட்டிக் கொண்டு விட்டார்களே என்கிற வகையில் நமக்கு மகிழ்ச்சியோ மகிழ்ச்சிதான்!

---------------------------------------

விநாசகாலே...

பெரியார் சொத்துக்களை அரசு எடுத்துக்கொண்டு விடுதலையை நாள்தோறும் அரசு வெளியிடும்.

கடவுள் இல்லை, இல்லவேயில்லை, கடவுளைக் கற்பித்தவன் முட்டாள்; பரப்பியவன் அயோக்கியன், வணங்குகிறவன் காட்டுமிராண்டி என்று அரசு பிரச்சாரம் செய்யும் நம்புங்கள்.

ஆத்மா, மோட்சம், நரகம், மறுபிறப்பு, பிதுர்லோகம் ஆகியவற்றைக் கற்பித்தவன் அயோக்கியன், நம்புகிறவன் மடையன்; இவற்றால் பலன் அனுபவிக்கிறவன் மகாமகா அயோக்கியன் என்று அரசாங்கம் எழுதும் என்று நம்பித் தொலையுங்கள்!

பார்ப்பான் நீதிபதியாய் வாழும் நாடு கடும் புலி வாழும் காடு என்று அட்சரம் பிறழாமல் அப்படியே அப்பட்டமாக தலையங்கம் தீட்டும் இதனையும் அதிகமாகவே நம்புங்கள்! நம்புங்கள்!!

தமிழர்களே, உங்கள் சூத்திரப்பட்டம் ஒழிய, கோயிலுக்குப் போகாதீர்கள்; நெற்றிக் குறிகளை இடாதீர்கள்! மதப் பண்டிகைகளைக் கொண்டாடதீர்! பார்ப்பானை பிராமணன் என்று அழையாதீர்! என்று கண்டிப்பாக கால் புள்ளிகளை மாற்றாமல் அரசு கட்டுரை தீட்டும் என்று கண்டிப்பாக நீங்கள் நம்பியே ஆகவேண்டும்.

அட பைத்தியங்களே, எங்கே தொடங்கி, எங்கே பயணித்துக் கொண்டிருக்கிறீர்கள்?

விநாசகாலே விபரீத புத்தி!
---------------------------------------

தங்களுக்குக் கிடைக்காதது நாசமாகப் போக வேண்டும் என்று கருதுகிற பார்ப்பன மனப்பான்மை பார்ப்பனர் அல்லாதாரிடம்கூட தொற்றுநோயாக ஒட்டிக்கொண்டு விட்டதையும் இத்தகைய அனுபவங்கள்மூலம் அறிய முடிகிறது.

தந்தை பெரியார் அவர்களையும், அன்னை மணியம்மையார் அவர்களையும் மறைமுகமாகத் தாக்க ஆரம்பித்துள்ளவர்கள், அவர்கள் ஏற்பாட்டைக் கொச்சைப்படுத்தக் கிளம்பிவிட்டார்கள். அடுத்து வெளிப்படையாகவே களம் இறங்கத் தயாராகி விடுவார்கள் என்பதில் அய்யமில்லை.

பெரியார் சொந்த புத்தியில்லாதவராம்

ஏற்கெனவே கோவையில் அவர்கள் வெளியிட்ட நூலில் அதில் தந்தை பெரியார் சொந்தப் புத்தி இல்லாதவர் என்றும், அன்னை மணியம்மையார் பாண்டிமாதேவி என்னும் சூழ்ச்சிக்காரப் பெண்மணி என்றும் குறிப்பிட்டு ஆழம் பார்த்துள்ளவர்கள்தானே!

பெரியார் கொள்கைகளைத்தானே அவர்களும் பரப்புகிறார்கள் என்று மேம்போக்காக அனுதாபம் காட்டிய பொதுவானவர்கள்கூட இப்பொழுது முகம் சுளிக்கும் நிலைதான் ஏற்பட்டுள்ளது காலங்கடந்த நிலையில் அத்தகைய வர்கள் உண்மையை உணரும் நிலையை ஏற்படுத்தித் தந்தமைக்கு மிக்க நன்றி! (பலரும் தொலைப்பேசி வழியாக இந்த நிலையைக் கூறி வருகின்றனர் என்பது குறிப்பிடத்தக்க நற்செய்தியாகும்).

பெரியார் சொத்தை அரசு எடுத்துக்கொள்ள வேண்டும் அதன்மூலம் பெரியார் கொள்கைகள் முடக்கப்படவேண்டும் என்கிற திசையில் வெறிபிடித்துக் கிளம்பி உள்ளவர்கள் தங்களைத் தாங்களே குடலைக் கிழித்துக் கொண்டு அடையாளம் காட்டியதற்கு நன்றி! நன்றி!! நன்றி!!

மன்னிக்கமாட்டார்கள் தமிழர்கள்

பெரியார் நூல்களை அரசுடைமை ஆக்கவேண்டும் என்று கிளம்பி, இப்பொழுது பெரியார் சொத்துக்களையே அரசு எடுத்துக்கொள்ள வேண்டும் என்று சுவர் ஏறிக் குதிப்பவர்கள் மீது, வன்முறையில் ஈடுபடுபவர்கள்மீது சுயமரியாதைக்காரர்களும், பகுத்தறிவாளர்களும், இனவுணர்வாளர்களும், பொது நிலையில் உள்ள தமிழர்களும் எரிச்சல் கொள்வார்கள், ஏளனமும் செய்வார்கள் ஏன் மன்னிக்கவும் மாட்டார்கள் என்பதில் அய்யமில்லை!

அரசு எடுத்துக்கொண்ட பல அறக்கட்டளைகளின் நிலை கதி என்னவாயிற்று என்பது ஊருக்கும், உலகுக்கும் தெரியுமே!

கலி. பூங்குன்றன்,
பொதுச்செயலாளர்,
திராவிடர் கழகம்.சென்னை

---------------------"விடுதலை” - 24.7.2010

பெரியார் சொத்து யாருக்கு? பெரியார் விளக்கம் - 2


நான் பெரிய செல்வவான்,நல்ல செல்வாக்குள்ள வியாபாரி. எங்கள் ஈரோட்டைப் பொறுத்தவரை எல்லா கவுரப் பதவிகளையும் வைத்துக் கொண்டிருந்தவன். அதையெல்லாம் விட்டு எதற்காக இந்த வேலைக்கு வந்தேன் என்றால் நம் மக்கள் உழைப்பாளி மக்கள் -சூத்திரத் தன்மையோடு இழிநிலையில் இருக்கிறார்களே, இதை மாற்றி நம்மாலானதைச் செய்யலாம் என்று கருதித்தான் இதில் இறங்கினேன்.

என் சொத்துக்கள் பூராவையும் இயக்கத்திற்கே எழுதி வைத்து விட்டேன். இப்போது எனக்கு ஒரு காசு சொத்து கிடையாது.என்னை நம்பியே என் மீது உள்ள பற்றாலோ அன்பாலோ கழகத் தோழர்கள் என்னிடம் நிதி கொடுக்கின்றார்கள். அவற்றையெல்லாம் கொஞ்சங் கொஞ்சமாக செர்த்து வைக்கின்றேன். அப்படிச் சேர்த்த பணத்தை மக்களுக்குப் பயன்படும் படி ஏதாவது செய்ய வேண்டுமே என்று கருதி கல்லூரிக்கும் மருத்துவ மனைக்கும் கொடுத்தேன்.

----------------தந்தைபெரியார் - “விடுதலை” 15-8-1968

23.7.10

கீதையும், குறளும்! - 3


நாம் வாழ்ந்த காலத்தில் சமுதாயத்தை
மாற்றுவதற்கு என்ன பணி செய்தோம்?

நாம் வாழ்ந்த காலத்தில் சமுதாயத்தை மாற்றுவதற்கு என்ன பணி செய்தோம் என்பதை எண்ணிப் பார்க்க வேண்டுமென்று திராவிடர் கழக தலைவர் கி. வீரமணி அவர்கள் கூறி விளக்கவுரையாற்றினார்.

தஞ்சையில் (9.7.2010) அன்று நடைபெற்ற நூல் வெளியீட்டு விழாவில் திராவிடர் கழகத் தலைவர் தமிழர் தலைவர் கி.வீரமணி அவர்கள் ஆற்றிய உரையின் நேற்றைய தொடர்ச்சி வருமாறு:

பேரப் பிள்ளைகள் அப்பாக்களை விட, தாத்தாக்களைத்தான் விரும்பும். தாத்தாக்களும் பேரப்பிள்ளைகளிடம்தான் ஈடுபாட்டோடு இருப்பார்கள். தாத்தாவிடம் பேரப் பிள்ளை கேட்கும், இதுதாம்மா வள்ளுவர் எழுதிய திருக்குறள் என்று தாத்தா காட்டுகிறார்.

சின்ன பிள்ளைகளுக்கு எந்தப் புத்தகத்தைக் காட்டினாலும் படம் இருக்கிறதா என்று தான் பார்ப்பார்கள். இயல்பாக இருக்கக் கூடிய ஓர் ஆசை. உடனே பேரப்பிள்ளை தாத்தாவைப் பார்த்துச் சொல்லும்: திருக்குறளில் படம் இல்லையே என்று. உடனே தாத்தா சொல்லுவார்: இதில் படமில்லை கருத்துதான் இருக்கும் என்று. இந்த படம் எங்கேயிருக்கிறது என்று குழந்தை கேட்கும். குறளில் கோயில் இல்லையம்மா என்று தாத்தா பதில் சொல்லுவார். ஒரே வார்த்தையில் ரொம்ப அழகாக பேரப் பிள்ளைக்கு அவர் உணர்த்துகிறார். கோயில் என்பதைப் பற்றிச் சொல்லும் பொழுது புலவர் எழுதுகின்றார். கோயில் என்றால் மன்னன் இல்லம் வாழ்ந்த அரண்மனை என்ற பொருள் மறைக்கப்பட்டு கடவுள் எழுந்தருளியுள்ள இடம் என்று எல்லோரும் எண்ணும்படியான, நம்பும்படியான நிலைமை ஏற்பட்டு விட்டது.

பார்ப்பனர்கள் சூழ்ச்சிமிக்கவர்கள்

பார்ப்பனர்கள் சூழ்ச்சித் திறன் மிக்கவர்கள் என்பதையும், தமிழர்கள் ஏமாளிகள் என்பதையும் இதிலிருந்து தெளிவாகத் தெரியலாம் என்று அழகாக புலவர் சிவ.வீரையன் எழுதியிருக்கின்றார். இப்படி எத்தனையோ இருக்கிறது. கோயில்கள் எப்படி வந்தன?

சாணக்கியருடைய கவுடில்யருடைய அர்த்த சாஸ்திரம் இருக்கிறதே, அதில்தான் கோயில்கள் என்பதே வந்தன. அதற்கு முந்திய நூற்றாண்டில் கோயில்களே கிடையாது. அதுவும் எதற்காகத் துவக்கப்பட்டது என்று சொன்னால், அரசர்கள் வருமானத்தைப் பெருக்குவதற்காக உருவாக்கப்பட்டது இது. பேய் இருக்கிறது, பிசாசு இருக்கிறது என்று சொல்லி மக்களை கோவிலுக்கு வரவழைத்து அன்றைக்கு கருவூலத்தில் பணம் சேர்த்தார்கள். நீ கடவுளைக் காட்டி, ஒரு இடத்தைக் காட்டி, செய் என்று முதன்முதலில் சொல்லிக் கொடுத்தவன் சாணக்கியன் கவுடில்யன். இது அர்த்தசாஸ்திரத்திலே இருக்கக் கூடிய கருத்துகள். ஆனால் பலபேருக்கு இந்தச் செய்திகள் போய்ச் சேருவதில்லை.

பழைமைக்கு புது மெருகேற்றுவது

காரணம் நம்நாட்டின் ஊடகங்கள் மூடநம்பிக்கைகளை ஆணி அடிக்கக் கூடியவை. நம்நாட்டுப் புலவர்கள் பழைமைக்குப் புதுமை மெருகேற்றக் கூடியவர்கள். இது பெரிய ஆபத்தானது. ஆகவேததான் இப்படிப் பட்ட நூல்கள் மூலமாக துணிந்து பல கருத்துகளை வீரையன் அவர்கள் சொல்லியிருக்கின்றார்.

இன்னும் பல நூல்களை அவர் எழுத வேண்டும். வீரையன் அவர்களுக்கு அவரது குடும்பத்தினர் எல்லோரும் உறுதுணையாக இருந்து இந்த நூல்களை வெளியிட வேண்டும்.

பெரியார் நூலக வாசகர் வட்டத்தில் ஆய்வு

பெரியார் நூலக வாசகர் வட்டம் என்ற பெயராலே நாங்கள் ஒவ்வொரு வாரம் வியாழக்கிழமையும் நிகழ்ச்சிகளை நடத்திக்கொண்டு வருகின்றோம். அந்த கூட்டத்திலே பல அறிஞர்கள் பேசுவார்கள். நூல்களை ஆய்வு செய்வார்கள். பெரியார் நூலக வாசகர் வட்டத்திலே இந்த நூலைப்பற்றி அங்கும் ஆய்வு செய்யவேண்டும்.

இந்தக் கருத்துகள் பரவவேண்டும். இந்த நூலை பல ஏடுகளுக்கு மதிப்புரைக்கு அனுப்பினீர்களேயானால் அது வந்து சேர்ந்தது என்று சொல்ல மாட்டார்கள். மதிப்புரையும் எழுத மாட்டார்கள்.

அலட்சியப்படுத்தி ஒன்றுமில்லாமல் செய்வது

மதிப்புரையில் மறுப்புரை எழுதினாலும் அதை நாம் சந்திக்கலாம். ஆனால் அவர்களுக்கு என்ன முறை என்று சொன்னால் இந்தக் கருத்துகளை மறுக்கமாட்டார்கள். மறுத்தால் இது விளம்பரம் ஆகிவிடும். என்பதற்காக விளம்பரமே கொடுக்காமல் இதை மறைக்க வேண்டும் என்று நினைப்பார்கள்.

அண்ணல் அம்பேத்கர் அவர்கள் ரொம்ப அழகாகச் சொல்கிறார். ஆங்கிலத்தில் சொல்லியிருக்கின்றார். அமைதியாக அலட்சியப்படுத்தி ஒன்றும் இல்லாமல் செய்வது இதைப்பற்றி பேசினால் வெளியே போய்விடும் செய்தி. பல நூல்கள் அழிக்கப்பட்டுவிட்டன.

ஆடிப்பெருக்கில் ஆற்றில் விட்டவர்களாயிற்றே!

தமிழர்கள் தங்களுடைய எத்தனையோ நூல்களை ஆடிப்பெருக்கிலே விட்டுவிட்டார்கள். ஆற்றில் ஓலைச் சுவடியிலிருந்து பல நூல்களை விட்டுவிட்டனர். எனவே சங்கடம் ஒரு பக்கம். ஒருபக்கம் அவருடைய உடல்தான் பாதிக்கப்பட்டிருக்கின்றதே தவிர, அவருடைய அறிவு ஒவ்வொரு நாளும் கூர்மையாகிக் கொண்டேயிருக்கிறது. ஒவ்வொரு நாளும் ஒவ்வொரு எழுத்திலும் அது ஒளியூட்டக் கூடியதாகவே இருக்கிறது.

இலக்குடன் கூடிய தமிழர் சமுதாயம்

இலக்கு இயம் தமிழர் சமுதாயத்தை எந்த இலக்குக்கு அழைத்துப் போக வேண்டும் என்ற குறிக்கோளோடு அவர்களுடைய வாழ்க்கை அமைந்திருக்கிறது

எத்தனையோ பேர் நீண்ட நாள்கள்கூட வாழலாம். எவ்வளவு காலத்திற்கு நாம் வாழுகிறோம் என்பது முக்கியமல்ல,

நாம் வாழ்ந்த காலத்தில் சமுதாயத்தை மாற்றுவதற்கு என்ன பணி செய்தோம் என்பதுதான் மிக முக்கியம்.

அவர்களுக்கு நோய் ஒரு பக்கம் இருந்தாலும் சமுதாயத்தை மாற்ற வேண்டும் என்று நினைக்கின்றார்களே, அதுதான் மிக முக்கியம்.

விருதுகளைப் பற்றிக் கவலை இல்லை

இனிமேல் அவர்களுக்கு விருதுகளைப் பற்றிக் கவலை இல்லை. ஆனால், தன்னுடைய சமுதாயத்திலே இருக்கிற விழுதுகளைப் பற்றி அவர் நினைக்கிறார்.

இந்த விழுதுகள் பழுதுபடாத விழுதுகளாக ஆக வேண்டும். இவர்களுக்கு அறிவார்ந்த சிந்தனைகள் வரவேண்டும் என்று நினைத்துத்தான் நல்ல நூல்கள் எழுதியிருக்கின்றார்கள்.

பெரியார் சொல்வதுபோல சொல்லியிருக்கிறார்

ஆகவே, இந்த இரண்டு நூலும் மிகச் சிறப்பான நூல். அதற்கு முன்னால் இவர் எழுதிய நூல்களைப் பார்த்து அவரைப் பாராட்டியிருக்கிறேன். எனக்கு மிக வியப்பாக இருந்தது. அவ்வளவும் முழுக்க, முழுக்க தந்தை பெரியார் அவர்கள் எவ்வளவு துணிச்சலோடு சொல்லுவார்களோ அதேபோல அவர்கள் கொஞ்சம் கூட பின் வாங்காமல் யார் என்ன நினைக்கிறார்கள் என்பதைப் பற்றிக்
கவலைப்படாமல் தன்னுடைய கருத்தை, நெஞ்சில் நினைப்பதை செயலில் காட்டியிருக்கின்றார்.

மருத்துவ வளர்ச்சி நோயைப் போக்கும்

இப்பொழுது நாம் நல்ல மருத்துவ வளர்ச்சி காலத்தில் இருக்கின்றோம். இந்த மருத்துவ வளர்ச்சி அவர்களுடைய நோயைப் போக்குவதற்கு பயன்படும். அதைவிட நம்முடைய நல்லெண்ணமும், நம்முடைய பாராட்டும் அவரை உற்சாகப்படுத்தும். அவருடைய சிந்தனை கருத்தாழமிக்க சுரங்கமாக இருக்கிறது.

ஆகவே அடுத்துவரும் சித்திரக்குடியைச் சார்ந்த பேராசிரியர் அய்யா ராமநாதன் அவர்களை உங்களுக்குத் தெரியும்.

புலவர்களுக்கெல்லாம் புலவர் இராமநாதன்

புலவர்களுக்கெல்லாம் புலவர் என்ற பாராட்டுதலைப் பெற்றவர் புலவர் இராமநாதன் அவர்கள். பெரியார் பேருரையாளர் புலவர் இராமநாதன் அவர்கள் தன்னுடைய இறுதிக் காலத்தைப் பெரியார் திடலிலேதான் கழித்தார்கள். அவர்கள் வகுப்பெடுத்தார்கள். பெரியாரியலுக்குப் பல நூல்களை எழுதினார்கள்.

இராமநாதன் நினைவு இலக்கியப் பரிசு

பெரியார் பேருரையாளர் பேராசிரியர் இராமநாதன் அவர்களுடைய பெயராலே பேராசிரியர் இராமநாதன் அவர்களுடைய நினைவாக இலக்கியப் பரிசு என்று நாங்கள் அறிவித்தோம்.

அதிலே முதல் பரிசாக பத்தாயிரம் ரூபாய் மதிப்புள்ள பரிசாக இந்த நூல்கள் ஏற்கப்படுகின்றன. (கைதட்டல்) அதற்குரிய விழாவை நாங்கள் நடத்துவோம். அதற்குரிய வாய்ப்புகளில் அவரைத் தொல்லைப் படுத்தாமல் நடத்தவேண்டுமென்று நினைக்கின்றோம்.

திராவிடர் கழகத்தின்
சார்பில் பரிசுக்குரிய நூல்

திராவிடர் கழகத்தின் சார்பில் பரிசுக்குரிய நூலாக இது தேர்வு செய்யப்படுகிறது என்பதை மகிழ்ச்சியோடு சொல்லி, பேராசிரியர் இராமநாதன் அவர்களுடைய பெயராலே அமைந்த பரிசு இது.

ஏனென்னால் அவரும் பெரிய புரட்சியாளர். அப்படிப்பட்ட ஒருவர் துணிச்சலோடு அவர்கள் கருத்துகளை சொல்லுவார்கள்.

இராமநாதன், அய்யா அவர்கள் யாரைப்பற்றியும் கவலைப்பட மாட்டார். அதே துணிச்சலோடு புலவர் சிவ.வீரையனார் அவர்கள் நூல்களை எழுதிக் கொண்டிருக்கின்றார்கள். அவர்கள் எழுதிக் கொண்டேயிருக்க வேண்டும். அதை நாம் சுவைத்துக் கொண்டேயிருக்க வேண்டும். அதற்கு அவருடைய ஆயுள் நீள வேண்டும். நீளும் என்று நாம் நினைக்கின்றோம். காரணம் நமக்கொன்றும் மூடநம்பிக்கை இல்லை. இது அறிவியல் காலம்.

இன்றைக்கு முடியும்

எனவே தினம் தினம் புதிய கண்டுபிடிப்புகள் வந்து கொண்டேயிருக்கின்றன. நேற்று முடியாத சங்கத்திகள் எல்லாம் இன்றைக்கு முடியும் என்ற நம்பிக்கை ஊட்டக் கூடியவர்களாக இருக்கின்றன. எனவே நம்பிக்கையோடு நாங்கள் உங்களிடமிருந்து நிறைய எதிர்பார்க்கிறோம் என்று சொல்லி உங்களுக்கு வாழ்த்துகள். எங்கள் நெஞ்சம் நிறைந்த வாழ்த்துகள். தமிழ் கூறும் நல்லுலகத்தின் நன்றி என்று கூறி விடை பெறுகிறேன்.

இந்த நேரத்திலே வீரையன் அவர்களுடைய வாழ்விணையர் அவர்களை நாம் வெகுவாகப் பாராட்ட வேண்டும் (கைதட்டல்).

சுமை தாங்கியாக...

ஒவ்வொருவரும் இப்படி ஒரு வாழ்க்கை இணையரைப் பெற்றால் மற்றவருடைய துன்பம் குறையும். தன் கணவருடைய சங்கடங்களை எல்லாம் அவர்கள் சுமந்து கொண்டிருக்கின்றார்கள். சுமை தாங்கியாக இருக்கிறார்கள்.,

சங்கடங்களை எல்லாம் தாங்கிக் கொண்டிருக்கின்றார்கள். அது போலவே இந்த நூலை நான் படித்தேன்.

ஆசைத்தம்பி அவர்கள் திருவொற்றியூரிலே தங்கியிருக்கின்ற பொழுது குறிப்பிட்டிருக்கின்றார்கள். அது நமது நெஞ்சைத் தொட்டது. எனவே அவர்களுக்கும் பகுத்தறிவாளர்கள் சார்பாக நமது நன்றியைத் தெரிவித்து சிவ.வீரையன் அவர்களை வாழ வைப்போம். அவரை மகிழவைப்போம். அதன் மூலமாக நாம் அறிவு பெறுவோம், ஆற்றல் பெறுவோம், எழுச்சி பெறுவோம், மூடநம்பிக்கைகளைத் தகர்ப்போம். சுயமரியாதை வாழ்வே சுக வாழ்வு என்பதை நிறுவுவோம் என்று கூறி எனது உரையை முடிக்கிறேன்.

_இவ்வாறு தமிழர் தலைவர் கி.வீரமணி அவர்கள் உரையாற்றினார்.


---------------------"விடுதலை” 23-7-2010