ஹிந்துத்துவாவை ஆராயப் போகிறார்களாம்!

இந்துத்துவம் குறித்து உச்சநீதிமன்றத் தின் நீதிபதி ஜே.எஸ்.வர்மா அளித்த தீர்ப்பு குறித்து 7 நீதிபதிகள் கொண்ட அரசியல் சாசன அமர்வு விரைவில் விசாரணை நடத்தி தீர்ப்பளிக்க உள்ளதாம்.

பாரதீய ஜனதா கட்சியின் தலைவராக இருந்த முரளி மனோகர் ஜோஷி, மகா ராஷ்டிராவில் கடந்த 1990 ஆம் ஆண்டு நடந்த தேர்தலின் போது, மகாராஷ்டிரா வில் முதல் இந்து அரசு அமைய உள்ளது என்று பிரச்சாரத்தின் போது கூறினார். இது மத உணர்வுகளைத் தூண்டும் செயல். அதனால், முரளி மனோகர் ஜோஷி மீது நடவடிக்கை எடுக்க வேண்டும் என்று கூறி என்.பி.படேல் என்பவர், உச்சநீதிமன்றத் தில் வழக்கு தொடர்ந்தார். இந்த வழக்கை விசாரித்த நீதிபதி ஜே.எஸ். வர்மா, இந்துத்துவா அல்லது இந்துமதம் என்பது ஒன்றுதான். அது மதத்தின் பெயரை குறிப்பது அல்ல. இந்திய துணை கண்டத் தில் வாழும் மக்களின் வாழ்க்கை முறையைத் தெரிவிக்கும் சொல் என்று கூறி, ஜோஷிக்கு எதிராக தொடரப்பட்ட வழக்கை தள்ளுபடி செய்தார்.

இதேபோல், மகாராஷ்டிரா பேரவைக்கு 1990 ஆம் ஆண்டு நடந்த தேர்தலில், பா.ஜ. சார்பில் அபிராம் சிங் என்பவர் வெற்றி பெற்றார். தேர்தல் பிரச்சாரத்தின் போது மத உணர்வுகளைத் தூண்டும் வகையில் இந்துத்துவா பற்றி அபிராம்சிங் பேசினார் என்று கூறி அவரது வெற்றியை ரத்து செய்ய வேண்டும் என்று கூறி மும்பை உயர்நீதிமன்றத்தில் வழக்கு தொடரப் பட்டது. இந்த வழக்கை விசாரித்த மும்பை உயர்நீதிமன்றம், அபிராம்சிங் வெற்றி பெற்றது செல்லாது என்று அறிவித்தது. இதை எதிர்த்து உச்சநீதிமன்றத்தில் அபி ராம்சிங் மேல்முறையீடு செய்தார். இந்த மனுவை விசாரித்த 3 நீதிபதிகள் கொண்ட அமர்வு, இது அரசியல் சட்டம் சம்பந்தப் பட்ட விவகாரம் என்பதால், 5 நீதிபதிகள் கொண்ட அமர்வுக்கு இந்த மனுவை அனுப்பியது. இந்த மனு மீதான விசா ரணை நீதிபதிகள் ஆர்.எம் லோதா, ஏ.கே. பட்நாயக், முகோபாத் யாயா, தீபக் மிஸ்ரா, கலிபுல்லா ஆகியோர் கொண்ட அமர்வு விசாரித்து வருகிறது. இதேபோல் மத்தியப் பிரதேசத்தில் பா.ஜ., தலைவர் சுந்தர்லால் பட்வா மீது நாராயண் சிங் என்பவர் தொடர்ந்து வழக்கை விசாரித்த 5 நீதிபதி கள் கொண்ட அமர்வு, மனுவை 7 நீதிபதிகள் கொண்ட அமர்வு விசாரிக்கப் பரிந்துரைத் துள்ளது.

இந்நிலையில், அபிராம்சிங் மேல் முறையீடு மனு மீதான விசாரணை கடந்த 30 ஆம் தேதி 5 நீதிபதிகள் கொண்ட அமர்வு முன்னிலையில் நடந்தது. அப்போது, சுந்தர்லால் பட்வாவுக்கு எதிராக தொடரப்பட்ட இதேபோன்ற வழக்கு, 7 நீதிபதிகள் கொண்ட அமர்வுக்கு மாற்றப் பட்டுள்ளது என்று நீதிபதிகளுக்கு தெரி விக்கப்பட்டது. இதையடுத்து, இந்த வழக்கையும் அந்த வழக்குடன் சேர்த்து 7 நீதிபதிகள் கொண்ட அமர்வு விசாரிக்க 5 நீதி பதிகள் கொண்ட அமர்வு பரிந்துரைத் தது. அத்துடன், 7 நீதிபதிகள் கொண்ட அமர்வு, இந்த மனுக்களை விரைவில் விசாரித்து தீர்ப்பு வழங்கவும கேட்டு கொண்டது.

இதையடுத்து, 7 நீதிபதிகள் கொண்ட அமர்வை அமைக்கக் கோரி தலைமை நீதிபதி பி.சதாசிவத்துக்கு உச்ச நீதிமன்ற பதிவாளர் அறிக்கை அனுப்புவார் என்றும், அதன்பின், 7 நீதிபதிகள் கொண்ட அமர்வை தலைமை நீதி பதி அமைப்பார் என்றும் உச்சநீதிமன்ற வட்டாரங்கள் தெரி வித்தன.

நீதிபதி ஜே.எஸ். வர்மா கூறியுள்ள கருத்தைப் பகுத்தாய்வு செய்ய உச்சநீதி மன்றம் கோதாவில் குதித்தது இருக்கட்டும்; அந்த ஜே.எஸ். வர்மா அவர்களே நான் கூறிய கருத்தினை இந்துத்துவாவாதிகள் தவறாகப் பயன்படுத்துகின்றனர். (தி இந்து 6.2.2003) கூறி விட்டாரே -

அதையும் முக்கியமாகக் கவனித்துக் கொள்ள வேண்டும் - ஒன்பது நீதிபதிகள் கொண்ட அமர்வு.

1990ஆம் ஆண்டில் அளிக்கப்பட்ட தீர்ப்பினை மய்யப்படுத்தி இன்றைக்கு ஆராய்வது இருக்கட்டும்; அதற்கு நான்கு ஆண்டுகளுக்குப் பிறகு பம்பாய் நீதிமன்றத் தில் ஒரு தீர்ப்பு அளிக்கப்பட்டதே. அதை எப்படி மறந்தார்கள் என்று தெரியவில்லை.

அந்தத் தீர்ப்பை வரவேற்று விடுதலை தலையங்கம் தீட்டியதுண்டே! (16.4.1994) அது இதோ:

பம்பாய் உயர்நீதிமன்றத்திலிருந்து மற்றொரு நல்ல தீர்ப்பு வந்திருக்கிறது. நாம், மற்றொரு நல்ல தீர்ப்பு என்று குறிப்பிடுவ தற்குக் காரணம் - ஏற்கெனவே. இது போன்ற வரவேற்கத்தக்க தீர்ப்புகளை பம்பாய் உயர்நீதிமன்றம் தந்திருப்பதால் தான். தானே நாடாளுமன்றத் தொகுதியி லிருந்து - பாரதிய ஜனதா கட்சி சார்பில் தேர்ந்தெடுக்கப்பட்ட ராம்கப்சே என்ப வரின் தேர்தல் செல்லத்தக்கது அல்ல என்பது தான் அந்தத் தீர்ப்பு!

இவரை எதிர்த்துப் போட்டியிட்ட காங்கிரஸ் வேட்பாளர் ஹர்பன்சிங் - இந்த வழக்கைத் தொடர்ந்திருந்தார். விசுவ இந்து பரிஷத்தைச் சார்ந்த சத்விரித்தாம்பரா என்பவரும் பாரதிய ஜனதா கட்சியைச் சார்ந்த பிரமோத் மகாஜன் என்பவரும் - பா.ஜ.க., வேட்பாளருக்கு ஆதரவாக - இந்து மத அடிப்படையில் வாக்கு கேட்டார்கள் என்ற அடிப்படையில் காங்கிரஸ் வேட் பாளர் இந்த வழக்கைத் தொடர்ந்திருந்தார்! 1991ஆம் ஆண்டு மே 21-ஆம் தேதி விசுவ இந்து பரிஷத் ஏற்பாடு செய்திருந்த கூட்டத்தில் - சத்விரிதாம்பரா, இந்து மதத்தின் அடிப்படையில் ஓட்டுக்களைக் கேட்டது உண்மை என்றும், அந்த மேடை யில் பா.ஜ.க. வேட்பாளர் ராம்கப்சேவும் இருந்தார் என்றும் உறுதிப்படுத்திய நீதிபதி ஏ.சி. அகர்வால் மக்கள் பிரதிநிதித்துவ சட்டப்பிரிவு 123 (3)க்கு இது எதிரானது என்று கூறி - தேர்தலை, செல்லாது என்று அறிவித்திருந்திருக்கிறார்.

பா.ஜ.க.வைச் சார்ந்த மகாஜன் என்ப வரும் - வேட்பாளர் கப்சேயும், இந்துக் களுக்கு முஸ்லீம்கள் பகைவர்கள் என்று தேர்தல் பிரச்சாரக் கூட்ட மேடையில் பேசியிருப்பது மிகவும் கண்டனத்துக்கு உரியது; இந்துக்களும், முஸ்லீம்களும் நண்பர்களாக வாழும் நிலையில் - இரு சமூகத்தினருக்கும் இடையே பகையை உருவாக்குவதாகும். சர்விரிதாம்பராவும் - மகாஜனும் கூட்டு சேர்ந்து கொண்டு - மதவெறியைக் கிளப்பி விட்டிருக்கிறார்கள். அதற்கு வேட்பாளரும் துணை போயிருக் கிறார் என்று நீதிபதி அகர்வால் தமது தீர்ப்பில் சுட்டிக்காட்டி இருக்கிறார்.

முரண்பாட்டின் மொத்த உருவம்

ஹிந்து மதம் ஹிந்து மதம் என்று கதைக்கிறார்களே - அதற்கென்று ஒரு வரையறை உண்டா? வகுக்கப்பட்ட கொள்கை உண்டா? இண்டர்நேஷனல் என்சைக்ளோபீடியா ஆப் சோஷியல் சயின்ஸ் (தொகுதி 6) பக்கம் 358) என்ற நூல் இந்துமதத்தின் தன்மைபற்றி விளக்கம் அளிக்கிறது.

இஸ்லாம் கிருத்துவம்போல் ஹிந்து மதக்கோட்பாடுகள் ஒரு புத்தகத்தில் குறிக்கப்படவில்லை. அதற்குச் சரித்திர ரீதியில் ஒரு அமைப்பாளரும் கிடையாது. ஒன்றல்ல - பல கடவுள்களைக் கொண்டது. ஹிந்துவாக இருப்பதற்குக் கடவுள் நம்பிக்கை உள்ளவராக இருக்க வேண்டும் என்ற அவசியமும் இல்லை. இம்மதத்தில் முரண்பாடுகள் செழித்து மலிந்து கிடக்கின்றன. எல்லா ஹிந்துக்களுக்கும் பொதுவான நம்பிக்கைகளோ, அமைப்பு களோ ஒன்றும் கிடையாது. ஹிந்து மதத் திற்கு அடிப்படையான ஒவ்வொரு நம்பிக் கையும் - ஏதாவது ஒரு ஹிந்துக் கூட்டத் தினரால் மறுத்து ஒதுக்கப்பட்டிருக்கின்றது என்று கூறப்பட்டுள்ளது.

இந்துத்துவா பற்றி உச்சநீதிமன்ற நீதிபதிகள் சங்கப் பலகை நடத்துவது ஒரு புறம் இருக்கட்டும்; 1952ஆம் ஆண்டி லேயே பிரபல நீதிபதியாக அந்தக் காலத்தில் பேசப்பட்ட ராஜமன்னார் ஆய்ந்து கூறியுள்ளாரே, அதனை முக்கிய மாகக் கவனத்தில் எடுத்துக் கொள்ள வேண்டும்.

இந்து மதம்பற்றி நான் பேசுகையில், அந்தச் சொல்லினுடைய தெளிவில்லாத கட்டுப்பாடற்ற - பொருள் விளக்கம் பற்றிய உணர்வோடுதான் இருக்கிறேன்.

(“When I Speak of Hindu Religion I am Actually Conscious of the vague Connotation of that Word” Michael vs Venkateswaran Case - MLJ 239/1952-1)

தம்முடைய நிலைக்குப் பக்க துணை யாக நீதிபதி ராஜமன்னார் அவர்கள் இந்தியப் பண்பாட்டு மரபு எனும் நூலிலி ருந்து கீழ்வரும் சான்றினைச் சுட்டிக் காட்டியுள்ளார்.

மதம் என்ற சொல்லை இப்போது நாம் புரிந்து கொள்ளும் பொருளின்படி இந்து வியல் என்பது ஒருமதம் இல்லை. அச்சொல் இந்திய மூலத்தைக் கொண்டதன்று அல்லது இந்துக்கள் என்பவர்களால் அச்சொல் தங்களின் மதத்திற்குப் பெயராக ஒரு போதும் பயன்படுத்தப் பெற்றதே கிடையாது என்றும் குறிப்பிட்டுள்ளார்.

செத்துப் போன மூத்த காஞ்சி சங்கராச்சாரியார் சந்திரசேகரேந்திர சரஸ் வதியும்கூட இதனை ஒத்துக் கொண்டுள் ளார். அந்நிய நாட்டுக்காரர்கள் வைத்த பெயர் என்று ஏற்றுக் கொண்டுள்ளார்
.

                                        (தெய்வத்தின் குரல் முதல் பாகம் பக்கம் - 125)

கடவுளை ஏற்றுக் கொண்டவனும் இந்து மதத்தில் இருக்கலாம்; ஏற்காதவனும் இந்து மதத்தில் இருக்கலாம்; முரண்பாடுகளின் ஒட்டு மொத்த தொகுப்பு என்று ஒரு வரியில் சொல்லி விடலாம் இந்து மதத்தை.

நாத்திகத்தை ஏற்றுக் கொண்டிருக்கும் ஒரு மதத்தின் தலைவரான சங்கராச்சாரி யார் கூறுகிறார் நாத்திகனுக்கு வைத்தியம் பார்க்காதே! - என்று 

                                                      (தெய்வத்தின் குரல் - 3ஆம் பாகம் - பக்கம் 734)

இதுதான் இந்து மதத்தின் மனிதாபி மானம் - இன்னொரு பக்கத்தில் முரண் பாட்டின் மொத்தக் குத்தகை;ஹிந்துத்துவா என்ற சொல்லை அறிமுகப்படுத்திய மே(ல்) தாவி வி.டி. சாவர்க்கார். (காந்தி கொலைக்கு மூலவராக இருந்த ஆசாமி)பொதுக் கலாச்சாரம், பொது வரலாறு, பொது மொழி, பொது நாடு, பொது மதம் இவை அய்ந்தும் சேர்ந்துதான் ஹிந்துத் துவா என்று அவர் குறிப்பிட்டார்.

இந்த அளவுகோல்படி பார்த்தால் இங்கே யார் இந்து? எத்தனைப்பேர் ஹிந்து என்று தேர்வார்கள்?

இவர்கள் சொல்லும் பொது மொழி சமஸ்கிருதம் - அதுவோ செத்து ஒழிந்து விட்டது - அதற்குப் பிறகு இங்கு ஹிந்துத் துவா  என்ன வாழ்கிறது?

நடைமுறையில் சொல்ல வேண்டுமா னால் சிறுபான்மை மக்களான முஸ்லீம் களையும், கிறித்தவர்களையும் அந்நியப் படுத்துவதற்கு இந்தப் பதம் பயன்படுத்தப் படுகிறது.

அப்படிப் பிரித்துக் காட்டப்பட்ட பிறகும், இவர்கள் யார் யாரையெல்லாம் ஹிந்துக்கள் என்று சொல்லுகிறார்களோ - அவர்களிடையே பிறப்பின் அடிப் படையில் ஆயிரம் ஆயிரம் பிரிவுகள் - பிளவுகள் - உயர்வு - தாழ்வுகள்!

பிறவிப் பேதம் பேசும் அமைப்பை நிர்மூலப்படுத்த தென்னகத்தில் குறிப்பாக தமிழ்நாட்டில் தந்தை பெரியாரும், அவர்களால் தோற்றுவிக்கப்பட்ட இயக்க மும் தோள் தட்டிக் கிளம்பி ஹிந்துத் துவாவை நார் நாராகக் கிழித்து விட்டது. இந்து என்று சொல்லாதே! இழிவைத் தேடிக் கொள்ளாதே! என்ற முழக்கங்கள் தமிழ்நாட்டின் வீதிகளில் விண்ணை முட்டுகின்றன.

அப்படி என்றால் இங்கு எங்கே இருக்கிறது ஹிந்துத்துவா? இதற்குப் போய் 9 உச்சநீதிமன்ற நீதிபதிகள் கூடி முடிவு செய்வது வீண் வேலை;  இலட்சக்கணக் கில் வழக்குகள் நிலுவையில் குவிந்து கிடக்கின்றன - அவற்றில் கவனம் செலுத்துவதுதான் இந்தக் கால கட்டத்தில் மிகவும் முக்கியம் - வீணாக காலத்தை விரயம் செய்ய வேண்டாமே!!

            ----------------மின்சாரம் அவர்கள் 8-2-2014 “விடுதலை “ஞாயிறும்லரில் எழுதிய கட்டுரை

Read more: http://viduthalai.in/page-1/74922.html#ixzz2smbf0wWi