சோதிடம் பற்றி உச்சநீதிமன்ற முன்னாள் நீதிபதி மார்க்கண்டேய கட்ஜு

சோதிடம்பற்றி மார்க்கண்டேய கட்ஜு 

இந்திய மக்கள் மத்தியில் விஞ்ஞான பூர்வமான சிந்தனையைத் தூண்டிட வேண்டும். நாட்டில் 90 சதவிகித மக்கள் சோதிடம் உள்ளிட்ட மூடநம்பிக்கைகளில் மூழ்கிக் கிடக்கின்றனர்; மோசடி சாமியார்களை நம்புகின்றனர். விஞ்ஞான மனப்பான்மை நம்மிடம் ஏற்படா விட்டால்   தரித் திரக்காரர்களாகத்தான் இருப்போம்; அதன் மூலம் பணக்கார நாடுகளோடு ஒப்பிடும் பொழுது, நாம் பின்னுக்குத் தள்ளப்படும் பட்டியலில் தான் இடம் பெறுவோம்!

இப்படிப் பேசி இருப்பவர் சாதாரணமானவர் அல்லர்; உச்சநீதிமன்ற நீதிபதியாக இருந்த வரும், இப்பொழுது இந்தியாவின் பத்திரிகைக் கவுன்சிலின் தலைவருமான மார்க்கண்டேய கட்ஜு அவர்கள்தான்.

அவர் கூறிவரும் கருத்துக்கள் மிகவும் முற்போக்குத் தன்மை கொண்டதாகவும், மதவாதத்தை அடித்து வீழ்த்தக் கூடியதாகவும் இருந்து வருகின்றன.

குஜராத் மாநில முதல் அமைச்சர் நரேந்திர மோடியைப் பற்றியும் பச்சையாக அண்மையில் தோலுரித்தார் - அதனால்தான் பிஜேபியை சேர்ந்தவர்கள், அவர் பதவி விலக வேண்டும் என்று கூச்சல் போட்டனர்.

தொலைக்காட்சிகளில் மூடநம்பிக்கை சரக்குகளை அவிழ்த்துக் கொட்டுவதையும் அவர் கண்டித்து வந்துள்ளார்.

சோதிடம் குறித்து தந்தை பெரியார் அவர்களின் கருத்து உலகம் அறிந்ததே! ராஜாஜி, நேரு போன்றவர்கள்கூட சோதிடத்தை எதிர்த்து, வெறுத்துக் கருத்துக் கூறியுள்ளனர்.

ராஜாஜியோ சோதிடர்களைத் தூக்கில் போட வேண்டும் என்று கூறியுள்ளார்.

அலகாபாத்தில் (11.1.1962) பேசிய பிரதமர் நேரு அவர்கள்  சோதிடம் பற்றிக் கூறிய கருத்தும் குறிப்பிடத்தக்கது.

இந்த எட்டுச் கிரகச் சேர்க்கை என்னை ஒன்றும் செய்யாது. இதனால் ஆபத்து ஏற்படுமென்று சில சோதிடர்கள் கூறுவதைக் கேட்டு பீதி அடையாதீர்கள். நம்முடைய தலை விதியை ஆக்குவதோ அழிப்பதோ இந்தக் கிரகங்களின் வேலையல்ல. நம் தலை விதியை நிர்ணயிப்பது நம் கையில்தான் இருக்கிறது - என்று பேசினார் பிரதமர் ஜவகர்லால் நேரு.

நேரு அவர்களை வேறு பிரச்சினைகளுக் கெல்லாம் எடுத்துக்காட்டிப் பேசுவோர், கல்வி யாளர்கள், அவர்தம் பகுத்தறிவுக் கருத்துக் களை மட்டும்  மூடிப் போட்டு மறைத்து விடுவார்கள்.

மார்க்கண்டேய கட்ஜு ஒன்றும் கருப்புச் சட்டைக் காரர் அல்லர். திறந்த மனதோடு கட்டுக்குள் தன்னைப் பூட்டிக் கொள்ளாமல் சிந்தனையை உலவ விடுவதால் இவ்வாறு கூற முடிகிறது.

சோதிடம் மற்றும் மூடநம்பிக்கைகள் பேராசையைத் தூண்டக் கூடியதாகவும், சோம் பேறித்தனத்தை வளர்க்கக் கூடியதாகவும் தன்னம்பிக்கையையும், உழைப்பையும் உருக் குலைப்பதாகவும் இருப்பதால் முன்னேற்றமும், வளர்ச்சியும் தடுக்கப்படுகின்றன.

இவை இல்லாத இடத்தில் வறுமைதானே தாண்டவம் ஆடும்? அதனால் தான் நீதிபதி மார்க்கண்டேய கட்ஜு வளர்ந்து வரும் நாடுகளின் மத்தியில் வறுமைக்கு ஆட்பட்டு இந்தியா பின் தள்ளப்படும் என்று எச்சரிக்கிறார்.

மக்கள்மீது உள்ள அக்கறையினால் சொல்லப்படும் இந்தக் கருத்தினைக் கொச்சைப் படுத்தத்தான் இந்த நாட்டு ஊடகங்கள் இருக்கின்றன என்பது வெட்கக் கேடாகும்.

என்றாலும் உச்சநீதிமன்ற முன்னாள் நீதிபதி என்ற முறையில் அவர் சொல்லும் கருத்துக்கள் வலு உடையன ஆயிற்றே. அதற்குரிய தாக்கம் குறிப்பிட்ட அளவில் ஏற்படத்தானே செய்யும் -அந்த வகையில் வரவேற்கிறோம்.

             -------------------------------- 'விடுதலை” தலையங்கம் 01-04-2013