ஆன்மிகமும், அறிவியலும்

பக்தி பரவினால்தான் பார்ப்பனர்கள் ஆதிக்கம் செலுத்த முடியும். ஆகவே எந்த வகையிலும் ஆன்மிகம், பக்தி என்பது கீழே விழுந்துவிடாமல் முட்டுக் கொடுப்பதில் மிக விழிப்பாக இருந்து அவரவர்கள் தளத்தில் நின்று செயல்படுத்திக் கொண்டு இருக்கிறார்கள்.
பக்தி மறுமலர்ச்சி என்ற பெயரால்தானே பவுத்த, சமண இயக்கங்களை இங்கு அழித்தார்கள்; பவுத்த, சமணர்கள் வீட்டு அழகிய பெண்களைக் கற்பழித்து, அருள் தருமாறு கடவுளிடம் மனு போட்டான் திருஞானசம்பந்தன் என்றால், இந்தப் பக்தியின் உள் நோக்கத்தைப் பளிச் சென்று தெரிந்து கொண்டிருக்கலாமே!

ஆன்மிகமும், அறிவியலும் எப்படி இரண்டும் கைகோத்துச் செல்லமுடியும் எதையும் சந்தேகப்படு - நம்பாதே, அறிவைக் கொண்டு ஆய்வு செய், எதற்கும் நிரூபணம் தேவை என்பது அறிவியல்.

நம்பு - நம்பினால் மோட்சம், நம்பாவிட்டால் நரகம்; கடவுள், மதப் பிரச்சினைகளில் அறிவைக் கொண்டு ஆராய்வதெல்லாம் கூடாத ஒன்று - கண்மூடித்தனமாகப் பின்பற்று என்பதுதான் ஆன்மிகம் - இந்நிலையில் பகுத்தறிவும் பக்தியும் ஆகிய இரண்டும் எப்படி ஒன்று சேர்ந்து பயணிக்க முடியும்?

எடுத்துக்காட்டாக சபரிமலை அய்யப்பன் கோயில் மகரஜோதியை எடுத்துக் கொள்வோம். அந்தக் கோயிலின் பரம்பரைத் தலைமை தந்திரி கண்டரரு மகேஸ்வரரு (வயது 84) என்ன கூறுகிறார்?

இது மக்களின் நம்பிக்கை பிரச்சினை. அய்யப்பன் சன்னதிக்குள் யாரையும் அனுமதிக்கப்படுவதில்லை, அதுபோன்றதுதான் பொன்னம்பலமேடு பகுதியும் என்று கூறியுள்ளார். மகரஜோதி வேறு, மகர விளக்கு வேறு என்றும் குழப்புகிறார். பக்தர்கள் பார்ப்பது மகர விளக்கா? மகர ஜோதியா? என்பதை ஆய்வுசெய்ய வேண்டியது தானே? அதற்குத் தயார்தானா?

மகரஜோதி மனிதர்களால்தான் ஏற்றப்படுகிறது என்பதை - பகுத்தறிவாளர்கள் - அறிவியல்வாதிகள் நேரடியாகச் சென்று நிரூபணம் செய்துவிட்டார்கள். ஆனால் ஆன்மிகவாதிகளோ இதுபோன்ற விடயங்களில் நம்பிக்கைதான் முக்கியம் அதில் ஆய்வுகள் கூடாது என்கின்றனர். பாபர் மசூதியை இடித்த இந்துத்துவாவாதிகள் என்ன சொல்லுகிறார்கள்? ராமன் பிறந்த இடம் அதுதான். அது இந்துக்களின் நம்பிக்கையைச் சார்ந்த ஒன்று; இதில் நீதிமன்றம் குறுக்கிடக் கூடாது என்றுதானே சொல்கிறார்கள்? இந்த நிலையில், ஆன்மிகமும், அறிவியலும் எப்படி இணைந்து செயல்பட முடியும்? இந்துமத மடாதிபதியாக இருக்கக் கூடிய சங்கராச்சாரியாரே கொலைக் குற்றவாளியாக நடமாடுகிறார். கோயில் அர்ச்சகப் பார்ப்பானே கோயில் கருவறையில் பக்தைகளிடம் பாலுறவு கொண்டு நிழற்படம் எடுத்துக் கொள்கிறான். அதனைக் காட்டி திருப்பித் திருப்பி சம்பந்தப்பட்ட பெண் பக்தைகளிடம் உடல் உறவு கொள்கிறான் கோயில் கருவறைக்குள் (இதில் ஒன்று மட்டும் உண்மை அவனின் ஆன்மிகத்துக்கு செல்போன் என்ற அறிவியல் பயன்பாடு இருக்கிறது.)

ஆன்மிகத்தை, ஆன்மிகத்தைக் கொண்டு காப்பாற்ற முடியாத ஒரு நிலை இன்று ஏற்பட்டு விட்டது. ஆன்மிகம் தொடர்பான தகவல்களையோ கருத்துகளையோ அப்படியே சொன்னால் மக்கள் ஏற்றுக் கொள்ளும் நிலையில் இல்லை. யானையின் தலையை வெட்டி ஒரு அழுக் குருண்டையின் தலையில் சிவபெருமான் பொருத்தினான். அந்த அழுக்குருண்டைதான் விநாயகன் என்று சொன்னால் அது எப்படி சாத்தியம் என்று கேட்கும் காலம் இது. இராவணனுக்குப் பத்து தலைகள் எனில் அது குறுக்கு வாட்டிலா? உயர வாட்டிலா? அப்படி என்றால் அவன் எப்படிப் படுப்பான்? எந்த வாயால் சாப்பிடுவான்? ஒரு மூக்கு இருந்து சளி பிடித்தாலே தாக்குப்பிடிக்க முடியவில்லை; பத்து மூக்கு இருந்தால் அவன் கதி என்னாவது என்று சிறுவர்களே கேட்கும் விழிப்புணர்வுக் கால கட்டமிது. எப்படி ஆன்மிகமும், அறிவியலும் ஒரே இடத்தில் இருக்க முடியும்? இருளும் ஒளியும் கூட்டாளியாக முடியுமா?

ஒளி இருக்கும் இடத்தில் இருள் ஒண்டிக் குடித்தனம் கூட நடத்த முடியாதே!

திருநீறு பூசுவது - துருநீரை நீக்குவதாக அறிவியலைச் சொல்லி ஆன்மிகத்தைத் தூக்கி நிறுத்தப் பார்த்ததுண்டு அப்படி என்றால் கல்லாப் பெட்டிக்கு ஏன் ஆயுத பூஜையன்று திருநீறு பூசுகிறீர்கள்? அதில் என்ன துருநீர் இருக்கிறது என்று கேட்க ஆரம்பித்தனர்.

உடலில் எத்தனை எத்தனையோ இடங்களில் எல்லாம் துருநீர் இருக்கிறது. அங்கெல்லாம் திருநீறு பூசுவதுண்டா என்ற பகுத்தறிவு வினா, சுனையாக எழுந்தது இதுவரை யார் தான் பதில் சொல்லியுள்ளனர்?

அறிவியல் கருவிகளைப் பயன்படுத்தி ஆன்மிகத்தைப் - பரப்பும் மோசடி நடக்கிறது என்பது மட்டும் உண்மை - அது ஓர் அறிவு நாணயமற்ற தன்மை என்று வேண்டுமானால் சொல்லலாம். மற்றபடி ஆன்மிகமும். அறிவியலும் இணைந்து நடைபோட முடியாது என்பதை உறுதியாகக் கூறுவோம்.

------------- "விடுதலை” தலையங்கம் 27-1-2011

மத மாற்றம் செய்யும் ஒரு கடவுள்!

இந்து மதம், சைவ சமயம் தவிர்த்த பிற மதங்களில் மத மாற்றம் என்பது அந்தந்த மதத்தைச் சேர்ந்த பக்தர்களால், தொண்டர்களால் நிகழ்த்தப் பெறுகிறது. அவர்கள் தங்கள் மத நன்மைகளையும், சீர்களையும், சிறப்புகளையும் எடுத்துச் சொல்லி, அறிவுரைகள் வழங்கி, அதன் அடிப்படையில் மத மாற்றம் செய்ய முனைகிறார்கள்.

மேலும் சிறப்பாகவும், குறிப்பாகவும், கிறித்துவ மதத்தினர் மக்களுக்குக் கல்வி தந்து - மருத்துவ வசதிகள் செய்து, பால் மற்றும் உணவுப் பொருள்கள் வழங்கி, அதன் அடிப்படையில் மக்களை நேசித்துக் கவர்ந்து தங்கள் மதத்திற்கு ஈர்க்கிறார்கள். இதுதான் உலக நடைமுறையாக இருந்து வருகிறது. ஆனால், எந்த மதத்திலும், அந்த மதக் கடவுளே முன்னின்று மத மாற்றத்திற்குக் காரணமாக இருந்ததாக வரலாறு இல்லை. இந்நிலையில், சைவ சமயத்தில்தான், சைவ சமயக் கடவுளான பரமேஸ்வரன் என்னும் சாட்சாத் சிவபெருமானே முன்னின்று மதமாற்றம் நடைபெற காரணமாக இருந்துள்ளார் என்பது தெரிய வருகிறது.

அதாவது அறிவுரை வழங்கியோ, நன்மைகளை எடுத்துரைத்தோ, மத மாற்றம் செய்ததாக தெரியவில்லை. மாறாக அடித்தும், மிரட்டியும், உதைத்தும், பயன்படுத்தியும் வழிப்பறி கொள்ளை நடைபெறுவது போல, பிற மதத்தைச் சேர்ந்தோருக்கு நோயைக் கொடுத்து மிரட்டி, அச்சப்படுத்தி தன் சமயத்திற்கு ஈர்த்ததாக வரலாறு அமைகிறது.

சைவ பக்த அடியார்கள் மிகப் பெருமையாகக் கீழ்கண்டவாறு கூறுவதை நாம் அடிக்கடி கேட்கலாம். எங்கள் சிவபெருமான் பாலைக் கொடுத்து ஞான சம்பந்தரையும், ஓலை கொடுத்து சுந்தரமூர்த்தியாரையும், நூலைக் கொடுத்து மாணிக்க வாசகரையும் தடுத்தாட்கொண்டு மீட்டது போல, - சூலைக் (சூலை என்று சொல்லக் கூடிய கடுமையான வெப்ப வயிற்று வலியை) கொடுத்து திருநாவுக்கரசரை ஆட்கொண்டார் அதாவது சமண சமயத்திலிருந்து சைவ சமயத்திற்கு மாற்றினார்.

இதற்கு மத மாற்றம் தவறு; கூடாது என்று கூச்சல் போட்டு குழப்பமும், குதர்க்கமும் செய்யும் இந்து முன்னணித் தலைவர் ஆரியப் பார்ப்பன இராம. கோபால அய்யர்வாள்தான் விடை இறுக்க வேண்டும்; பதில் சொல்ல வேண்டும்!

இதே ஆதாரம்: சமண மதம் புகுந்து, பின் சிவபெருமான் தந்த சூலை நோயால் மீண்டும் சைவ சமயம் சேர்ந்தார் திருநாவுக்கரசர்.

(மறைமலை அடிகள் எழுதிய சாதி வேற்றுமையும் போலிச் சைவமும் எனும் நூலில் பக்கம் 75, தகவல்: குடந்தை கும்பலிங்கன்)

வீரமணியின் வாழ்வும் - பணியும் முனைவர் பட்ட ஆய்வு

வீரமணியின் வாழ்வும் - பணியும் எனும் தலைப்பில்

பேராசிரியர் நம்.சீனிவாசனின் முனைவர் பட்டத்திற்கான ஆய்வு
கழகப் பொறுப்பாளர்கள் சால்வை அணிவித்துப் பாராட்டு

மிகச் சிறப்பாக தயாரிக்கப்பட்டதாக நேர்முகத் தேர்வு தேர்வாளர்களின் ஒருமித்த பாராட்டு

வீரமணியின் வாழ்வும் - பணியும் எனும் தலைப்பில் பேராசிரியர் நம்.சீனிவாசன் அவர்களால் எழுதப்பட்ட முனைவர் (பிஎச்.டி.) பட்டத்துக்கான ஆய்வேடு - கடினமான உழைப்பில் மிகச் சிறப்பாகத் தயாரிக்கப்பட்டுள்ளதாக நேர்முகத் தேர்வாளர்கள் பெரிதும் பாராட்டினர். கழகப் பொறுப்பாளர்கள், பேராசிரியர் நம்.சீனிவாசன் அவர்களுக்கு சால்வைகள் அணிவித்துப் பாராட்டினர்.

மதுரை செந்தமிழ்க் கல்லூரி வளாகத்தில் , பாண்டித்துரைத் தேவர் அரங்கில், பேரா. நம். சீனிவாசன் அவர்களுக்கு "வீரமணியின் வாழ்வும் - பணியும்" என்னும் தலைப்பில் முனைவர் பட்டத்திற்கான வாய் மொழித் தேர்வு 24.1.2011 காலை 10 மணிக்கு நடைபெற்றது. நிகழ்வுக்கு கல்லூரி முதல்வரும், ஆய்வு நெறியாளரு மாகிய முனைவர் விஜயன் தலைமை தாங்கினார். புறத் தேர்வாளராக காரைக்குடி அழகப்பா பல்கலைக் கழகத் தின் தமிழ்த்துறை தலைவர் பாண்டி கலந்துகொண்டார். தமிழ்த்தாய் வாழ்த்தோடு தொடங்கிய நிகழ்வில் பேரா. நம். சீனிவாசன் தன் ஆய்வினை விளக்கினார்.

வீரமணியின் வாழ்வும் - பணியும்" என்ற தலைப்பை எடுத்துக்கொண்ட காரணத்தை விளக்கினார். திராவிடர் கழகத்தின் தலைவர் கி.வீரமணி ஒரு சமூக இயக்கமான திராவிடர் கழகத்தின் தலைவர். எழுத்தாளர், பேச்சாளர், பத்திரிகையாளர், கல்வி நிறுவனங்களின் தலைவர், சமூக விடுதலைக்கான போராளி எனப் பல பரிமாணங்கள் கொண்டவர் . அவருடைய வாழ்க்கை என்பதும், பணி என்பதும் இன்றைய மாணவர்களுக்கு மிகப்பெரிய முன்னுதாரணமாகும். 340 பக்கங்கள் உள்ள இவ்வாய் வேடு 5 இயல்களைக் கொண்டது .

முதல் இயல் வீரமணி அவர்களின் வாழ்க்கைத் தகவல்கள் எனக் குறிப்பிட்டு 70 பக்கங்களில் அவர் ஆய்வேட்டில் குறிப்பிட்டுள்ள தமிழர் தலைவர் அவர் களின் வாழ்க்கைத் தகவல்களை அவையோர் அறிந்து கொள்ளும்வண்ணம் மட மடவென எவ்விதக் குறிப்பும் இல்லாமல் விளக்கினார்.

தமிழர் தலைவரின் பிறப்பு, வளர்ப்பு, கல்வி, 10 வயதில் மேடையில் பேசத் தொடங்கு தல், அவருக்கு அளிக்கப்பட்ட நன்கொடைகள் - எடைக்கு எடை வெள்ளி, எடைக்கு எடை தங்கம், அவர் பெற்ற பட்டங்கள், தங்கப் பதக்கங்கள், பொது வாழவில் அவர் மீது ஏவப்பட்ட வன்முறைத் தாக்குதல்கள் பட்டியல், சந்தித்த விபத்துகள், பிற தலைவர்களோடு தொடர்பு, பிற பத்திரிகைகளில் அவரைப்பற்றி வந்துள்ள கட்டுரைகள், அவருடைய பண்பு நலன் எனப் பட்டியலிட்டு தந்துள்ளேன் எனக் குறிப்பிட்டபோது அவையில் அமர்ந்திருந்த மாணவ - மாணவிகள் ஆச்சரியத்தோடு பார்த்தனர்.

இரண்டாவது இயல் "வீரமணியின் பணிகளில் தமிழர், தமிழ்நாடு, தமிழ் மொழி " எனக் குறிப்பிட்டு தமிழருக்காக, தமிழ் நாட்டுக்காக , தமிழ் மொழிக்காக தந்தை பெரியாரின் வழியில் தமிழர் தலைவர் ஆற்றி வரும் அரும் பணிகளைப் பட்டியலிட்டார்.

மூன்றாவது இயல் "வீரமணியின் எழுத்தும் பேச்சும்" என்பதில் தமிழர் தலைவர் அவர்கள் எழுதியுள்ள புத்தகங்கள் 39, அவர் பேசிய பேச்சுகளின் தொகுப்பாக வந்துள்ள புத்தகங்கள் 45 எனக் குறிப்பிட்டு அவரின் எழுத்தினைப் பற்றி, பேச்சாற்றல் பற்றி இவ்வியலில் விளக்கியுள்ளேன் எனக் கூறினார்.

நான்காவது இயல் " வீரமணியின் சமூகப் பணிகள் " எனக் கூறி , சமூக நீதிக்காக தமிழர் தலைவர் அவர்கள் பாடுபட்டதுதான் மற்ற பணிகளை விட அதிகம் என்பது எனது ஆய்வின் முடிவு எனக் குறிப்பிட்ட ஆய்வாளர் நம்.சீனிவாசன் அதற்கான ஆதாரங்களை பல்வேறு ஆய்வுத் தரவுகளோடு விளக்கினார்.

மண்டல் கமிசன் அமலாக்கம், 31-சி சட்டம் போன்றவற்றில் தமிழர் தலைவரின் அரிய பணிகளை பல்கலைக் கழக மாணவ மாணவிகளுக்கும், பேராசிரியர்களுக்கும் அற்புதமாய் விளக்கினார். அய்ந்தாவது இயலான 'வீரமணியின் நிருவாகப் பணிகள் "என்பது விடுதலை போன்ற பத்திரிகை நிருவாகம், இயக்க நிருவாகம்- திராவிடர் கழகம், பகுத்தறிவாளர் கழகம், திராவிடர் கழக இளைஞரணி, மாணவரணி, மகளிர் அணி, தொழிலாளர் அணி எனப் பல்வேறு பிரிவுகள், கல்வி நிருவாகம், பெரியார் திடல் நிருவாகம் எனப் பல்வேறு நிருவாகப் பணிகளை இவ்வியலில் விளக்கியுள்ளேன்.

முடிவாக வீரமணி அவர்களோடு கண்ட பேட்டியினை ஆய்வேட்டில் இணைத்துள்ளேன் எனக் குறிப்பிட்டு தனக்கு கொடுக்கப்பட்ட 20 நிமிடத்தில் நிறைவான உரையினை ஆய்வாளர் பேரா. நம். சீனிவாசன் நிகழ்த்தினார். பின்னர் கேள்வி நேரம் ஆரம்பித்தது.

பார்வையாளர்கள் பல்வேறு கேள்விக் கணைகளைத் தொடுத்தனர்.அனைத்து கேள்விகளுக்கும் நறுக்குத் தெறித்தாற்போல் பதில்களை பேரா.நம். சீனிவாசன் அளித்தார். (கேள்வி-பதில் தனியாக வரும்). பின்னர் புறநிலைத் தேர்வாளர் முனைவர் பாண்டி தன் மதிப்புரையை அளித்தார்.

"தமிழ் மொழிக்காக , தமிழ் இனத்துக்காகப் பாடுபடும் ஓர் அற்புதமான தலைவரைப் பற்றிய ஆய்வேடு இது. சிறப்பான களப்பணி செய்து, பல அரிய தகவலகளைத் திரட்டி ஓர் ஆய்வாளர் தந்திருக்கும் ஆய்வேடு. இளமைக் காலத்தில் தலைவர் வீரமணி அவர்கள் எப்படியெல்லாம் துன்பப்பட்டார், எப்படி உதவியெல்லாம் பெற்று படித்தார் என்பதனை ஆய்வேட்டில் நான் படித்தபொழுது கண் கலங்கினேன். சிறப்பான களப்பணி மூலம், அருமையான அணுகுமுறை மூலம், அருமையான கருதுகோள் அடிப்படையில் வாழுகின்ற ஒரு போராளியைப் பற்றிய ஆய்வேடு இவ்வாய்வேடு; இளைஞர்களுக்கு முன்னு தாரணமாகத் திகழும் ஒரு தலைவரைப் பற்றிய ஒரு முன்னுதாரண ஆய்வேடு. ஆய்வாளரின் கடுமையான உழைப்பு ஆய்வேட்டின் ஒவ்வொரு பக்கங்களிலும் தெரிகின்றது.

நல்ல அருமையான ஆற்றொழுக்கு நடை, நடையில் எந்த இடத்திலும் தடையேயில்லை. இலக்கணப் பிழையோ, சொற்றொடர் பிழையோ எந்த இடத்திலும் இல்லை. ஏதேனும் இருந்தால் சுட்டிக்காட்ட வேண்டும் என்பதற்காகவே தேடித் தேடிப் பார்த்தேன். இல்லை. பிழையே இல்லை. நல்ல இலக்கண மரபோடு அமைந் திருக்கின்ற ஆய்வேடு. தமிழ்நாட்டுக்கு கிடைத்த பொக்கிசமாய் அமைந்திட்ட தலைவரைப் பற்றிய மிக நல்ல ஆய்வேடு எனக் குறிப்பிட்ட தேர்வாளர் ஆய்வாளரான பேரா.நம். சீனிவாசன் அவர்களிடம் கேள்விகள் கேட்டார்.

அவையோர் மகிழ்வுற, தெளிவுற பதில்களை அளித்தார் ஆய்வாளர். முடிவில் புற நிலைத்தேர்வாளர் முனைவர் பாண்டி அவர்கள், ஆய்வாளர் எவ்வளவு தூரம் ஆழ்ந்து முகிழ்ந்து இவ்வாய்வேட்டை உருவாக்கி இருக்கின்றார் என்பதனை ஒவ்வொரு பதிவிலும், ஒவ்வொரு பதிலிலும் காண முடிகின்றது. என்வே இது மிகச்சிறந்த ஆய்வேடு என மதிப்பீடு அளிக்கின்றேன் என தனது மதிப்பீட்டு உரையை முடித்தார்.

முடிவில் நெறியாளர் முனைவர் விஜயன் அவர்கள், புற நிலைத் தேர்வாளர்களின் மதிப்பீட்டின் அடிப்படையில், வாய்மொழித் தேர்வின் அடிப்படையில் இது மிக சிறந்த ஆய்வேடு என மதிப்பிடப்பட்டு, முனைவர் பட்டம் பேரா.நம். சீனிவாசன் அவர்களுக்கு அளிக்க மதுரை காமராசர் பல்கலைக் கழகத்திற்கு பரிந்துரைக்கிறேன் என அறிவித்தார்.

பலத்த கைதட்டல்களுக்கு இடையில் நன்றியை எதிர்பார்க்காது நாளும் உழைக்கும் அற்புதத் தலைவருக்கு, தனது நன்றிக்கடனாய், படித்த தமிழர்களின் நன்றிக்கடனாய் அற்புதமான ஆய்வேட்டினை, தனது உன்னதமான உழைப்பால் அளித்த பேரா. நம். சீனிவாசன் அவர்களுக்கு, தி.க. தென் மாவட்ட பிரச்சாரக் குழுத் தலைவர் தே.எடிசன்ராசா, ப.க. மாநிலத்தலைவர் வா. நேரு, மண்டலத் தலைவர் வே.செல்வம், பொறியாளர் சி. மனோகரன், ஓய்வுபெற்ற நீதிபதி பொ. நடராசன், தி.மு,.க. இலக்கிய அணிஸ் செயலாளர் ச.அமுதன், மதுரை முனியசாமி, ப,க. மாவட்ட செயலாளர் பா.சடகோபன் ஆகியோர் சால்வை அணிவித்து பாராட்டி, போற்றி மகிழந்தனர். நிகழ்வில் மதுரை வானொலி இயக்குநர் முனைவர். சுந்தர. ஆவுடையப்பன், மன்னர் கல்லூரி முதல்வர் ச.நேரு, முனைவர் இராஜா.கோவிந்தசாமி, பேரா.அழகேசன் எனப் பல சான்றோர்கள் கலந்து கொண்டு சிறப்பித்தனர்.

-------------------- "விடுதலை” 26-1-2011

பெரியார் பணி என்பது எளிதானது அல்ல

மேலவன்னிப்பட்டுக்குப் போவோம் - வாருங்கள்!

தஞ்சாவூர் மாவட்டம் வெறும் நெற்களஞ்சியம் மட்டுமல்ல - தந்தை பெரியார் தம் கொள்கைக் களஞ்சியமும் கூட!

இன்று நேற்றல்ல - தந்தை பெரியார் காங்கிரசில் இருந்தபோதும் சரி, சுயமரியாதை இயக்கம் கண்டபோதும் சரி, நீதிக் கட்சியின் நிகரற்ற தலைவராக இருந்தபோதும் சரி, திராவிடர் கழகம் என்று பெயர் மாற்றம் வந்தபோதும் சரி, இம்மாவட்டம் தந்தை பெரியார் அவர்களின் பாசறையாகவே இருந்தது - இருந்து வருகிறது - நாளையும் இருக்கப் போகிறது.

தஞ்சை மாவட்டத்தைத் தாலாட்டினார் பெரியார் என்றால், தஞ்சை மாவட்டம் அவரைச் சீராட்டியது - எத்தனை எத்தனையோ பரிசுகளைக் குவித்துப் பெருமை பெற்றது.

எங்கும் இயக்கத் தோழர்கள் இருந்தாலும், என்னுடைய முயற்சிக்கும், போக்குக்கும் தஞ்சை முதன்மையானதாக உள்ளது. திராவிடர் கழகமாக ஆனபிறகு மாத்திரமல்ல, நான் காங்கிரசில் இருந்த காலத்திலும், தஞ்சை பெருமளவில் ஆதரவு அளித்துள்ளது. சுயமரியாதை இயக்கம் ஆரம்பித்த காலத்திலும், நடத்திய காலத்திலும் தஞ்சைதான் ஆதரவு அளித்துள்ளது. எதைச் சொல்கிறேனோ, எதை எதிர்பார்க்கிறேனோ, அதைத் தமிழ்நாடு முழுதும் பகுதி செய்கிறது என்றால், தஞ்சை மாத்திரம் பகுதிக்குக் குறையாமல் செய்யும் என்கிறார் பகுத்தறிவுப் பகலவன்.

தஞ்சாவூரில் தந்தை பெரியார் அவர்களுக்கு எடைக்கு எடை ரூபாய் நாணயம் வழங்கப்பட்ட விழாவில் (3.11.1957) தந்தை பெரியார் குறிப்பிட்டதுதான் மேலே காணப்படும் பகுதி.

எந்த ஒரு தலைவருக்கும் தங்களின் அன்பை, ஆதரவைக் காட்டும் வகையில் வகை வகையான பொருள்களை - தங்கள் மகிழ்ச்சியின் பெருக்கத்தைக் காட்டும் வகையில் தந்தை பெரியார் அவர்களுக்குக் கொடுத்ததுபோல உலகில் வேறு யாருக்கும் கொடுத்ததாகத் தகவல் இல்லை.

இவ்வளவுக்கும் இந்தத் தலைவர் ஆற்று நீரோட்டத்தோடு பயணம் செய்தவரல்லர் - எதிர் நீச்சல் போட்டு எதிரிகளின் குகைக்கே சென்று இடி முழக்கம் செய்த ஏந்தல்! மூல பலத்தோடு போர் புரியும் - எளிதில் புரிந்து கொள்ளப்பட முடியாத 20 ஆம் நூற்றாண்டின் புத்தர். அத்தகு தலைவர் ஒருவருக்கு இவ்வளவு சிறப்புகள் என்றால், அது என்ன சாதாரணமா?

தந்தை பெரியார் மறைவுக்குப் பிறகு, அன்னை மணியம்மையார் மறைவுக்குப் பிறகு - கழகத்தைத் தலைமை தாங்கி நடத்திச் செல்லும் தந்தை பெரியார் அவர்களின் மாணவருக்கு- தொண்டருக்கு - தமிழர் தலைவராக வளர்ந்தோங்கி நிற்கும் தலைவருக்கு அதே பாணியில், அதே அன்பில் பரிசுகளைக் குவித்துத் தருகிறார்கள் மக்கள் என்றால் அதற்குக் காரணம் என்ன?

ஒரு கணம் நினைத்துப் பார்க்கட்டும் - நெஞ்சில் நன்றி மலர் பூத்த எவரும்!

பெரியார் பணி என்பது எளிதானது அல்ல. அது ஓர் எரிமலைப் பணி. மானமற்ற எதிரிகளோடு அன்றாடம் போராடும் பணி. முதுகில் குத்தும் துரோகச் சக்திகளுக்கும் முகம் கொடுத்து முன்னேற வேண்டிய பணி.

நேற்று கெழுதகை நண்பர், இன்று கேடு விளைவிக்கத் துடிக்கும் வீடணர்!

ஊடகங்கள் உறுமும் - இருட்டடிக்கும் - திரிபு வாதங்களைச் செய்யும். இவற்றையெல்லாம் எட்டி உதைத்து விட்டு, நாளும் மக்களைச் சந்தித்து அவர்களின் சிந்தனையில் புரட்சிகர சமுதாயச் சிந்தனைகளால் சிற்பங்களைச் செதுக்கும் பணி!

அவற்றைச் செய்ய ஒருவர் வந்தார், வருகிறார் என்றால் அந்த மான மறவரின் - தலைவரின் கைத்தலம் பற்றி ஜெ போடுவதை விட வேறு என்ன வேலை?

அந்தத் தலைவரின் ஆணையை ஏற்று களத்தில் குதிப்பதை விட வேறு கடமை என்ன?

பெரியார் பரவாயில்லை - அந்தச் சிங்கம் எட்டடி பாய்ந்தது என்றால், அதன் குட்டி பதினாறு அடி பாய்கிறதே என்று அக்கிரகாரம் சர்டிஃபிகேட் கொடுக்கும் அளவுக்கு நமக்கு ஒரு தலைமை கிடைத்திருக்கிறது - தூய்மையின் இலக்கணமாகத் தொண்டர்கள் கிடைத்திருக்கிறார்கள்.

எத்தனை, எத்தனையோ செயல்பாடுகள் மூலம், சாதனைகள் மூலம் நமது தலைமையும், நமது கழகமும் எவரெஸ்டுக்கு மேலே உயர்ந்துதான் நிற்கிறது - தலைநகர் டில்லியிலும் மய்யம் கொண்டிருக்கிறது.

நிலுவையில் இருக்கும் பணிகளை நிகழ்த்தி முடிப்பதற்காக நாம் நெடும் பயணம் செய்ய வேண்டியவர்களாக இருக்கின்றோம். அதற்கான பலம் உண்டு - பணி முடிக்கும் ஆற்றல் நமக்கு உண்டு- வழி நடத்தும் விவேகமான தலைமையும் உண்டு - வினை முடிக்கும் கழகம் என்ற கம்பீரமான அமைப்பும் உண்டு.

இத்தகு இயக்கத்துக்கு மக்கள் ஆதரவு எப்படி? அதனை மெய்ப்பிக்க பிரச்சார நோக்கத்தோடு பல விழாக்களைக் கழகத் தோழர்கள் நடத்துவது உண்டு.

தந்தை பெரியாருக்கு எடைக்கு எடை ரூபாய் நாணயம் அளிக்கப்பட்ட அதே தஞ்சையில், அவரின் சீடருக்கு எடைக்கு எடை தங்கம் அளித்து தங்கள் எடையையும் காட்டிக் கொண்டனர் கழகத் தோழர்கள் (1.2.1998)

எடைக்கு எடை வெள்ளியையும் அளித்து தங்கள் செயல்திறனைக் காட்டிக் கொண்டனர் இளைஞர் அணியினர் (புதுக்கோட்டை10.8.1996).

இன்னும் இன்னும் எத்தனையோ! இதில் ஒரு சல்லிக் காசும் தமிழர் தலைவர் மானமிகு வீரமணி அவர்களின் சட்டைப் பைக்குள் போகாது.

எல்லாம் இயக்கத்துக்கே, பெரியார் நிறுவனத்துக்கே என்பது வெள்ளிடை மலை.

19.8.1973 அன்று இதே தஞ்சையிலே தந்தை பெரியார் அவர்களுக்கு நகரும்குடில் (Van) வழங்கப்பட்டது. கழகப் பொதுச் செயலாளராக இருந்து பம்பரமாகச் சுற்றிச் சுழன்று அதனை அளித்தார். அய்யா அவர்கள் ஆசிரியர் அவர்களுக்கு கணையாழி அணிவித்துத் தட்டிக் கொடுத்தார். எடைக்கு எடை வைரம் கொடுத்தாலும் அந்த வைக்கம் வீரர் நமது தலைவருக்கு அணிவித்த அந்தத் தங்க மோதிரத்துக்கு ஈடாகாது. அந்தத் தட்டிக் கொடுத்தவனுக்குத் தனிப் பாயிரமே கூட எழுதலாம்.

அன்பளிப்புகளை ஏன் தொடர்கிறோம்? இயக்கப் பணிகள் நடந்தேற, கொள்கைப் பிரச்சாரம் குன்றென நிமிர்ந்து நடைபோட, இயக்கத்துக்கு நிதி தேவையன்றோ!

அதற்கான அணுகுமுறைகள்தான் எடைக்கு எடை நாணயங்களும், வெள்ளியும், தங்கமும் நமது தலைவருக்கு வழங்குவது.

வருகிற 30 ஆம் தேதி வரலாறு படைக்கும் தஞ்சாவூர் மாவட்டத்தில், கழக அமைப்பில் பட்டுக்கோட்டை மாவட்டத்தில், உரத்தநாட்டையடுத்த மேல வன்னிப்பட்டுக் கிராமத்தில் தமிழர் தலைவருக்கு எடைக்கு எடை ரூபாய் நோட்டுகள் அளிக்கும் பெருவிழா! துணைப் பொதுச் செயலாளர் தோழர் இரா. குணசேகரன் தலைமையில் ரஞ்சித்குமார் (மாநில மாணவரணி செயலாளர்) வன்னிப்பட்டு தமிழ்ச்செல்வன் முதலிய நமது கழக செயல் வீரர்கள் பம்பரமாய்ச் சுழன்று நிதி திரட்டிக் கொண்டிருக்கிறார்கள்.

எதிலும் புதுமை இருக்கவேண்டும் அல்லவா? அதனால்தான் நமது தலைவருக்கு எடைக்கு எடை ரூபாய் நோட்டுகள்!

தந்தை பெரியார் சிலை திறக்கப்பட உள்ளது. பெரியார் படிப்பகம் - டாக்டர் கி.வீரமணி நூலகம் திறப்பு விழாக்களும் உண்டு. எந்த அமைப்பிலும் காணமுடியாத அளவுக்கு அலை அலையான பணிகள் - பிரச்சாரங்கள் - மாநாடுகள் - போராட்டக் களங்கள்!

இடையில் இளைப்பாற மேல வன்னிப்பட்டுக்கு வாருங்கள். நம் தோழர்களின் செயல் திறன்களைக் காணுங்கள். 78 ஆண்டில் 68 ஆண்டுப் பொதுப் பணிக்குச் சொந்தக்காரரான நமது அன்புத் தலைவரின் மகிழ்ச்சியைக் கண்டு நாமும் மகிழ்ச்சியில் திளைப்போம், கூடுங்கள்!

அன்று அய்யாவிற்கு எடைக்கு எடை ரூபாய் நாணயம் அளித்த கண்கொள்ளாத காட்சியைப்பற்றி நமது பாட்டனார்கள், தந்தையார்கள் நம்மிடம் கூறுவதுண்டு.

அந்தத் தலைவரின் பிரதான சீடருக்கு எடைக்கு எடை தங்கம் அளித்ததைக் கண்டு களித்தோம் - வெள்ளி அளித்ததையும் கண்டு ஆனந்தித்தோம் - இப்பொழுது எடைக்கு எடை ரூபாய் நோட்டுகள் அளிக்கப்படுவதையும் காணும் பேற்றினைப் பெற வேண்டாமா?
பார்ப்பதோடு கைகட்டிக் கொள்ளாதீர்கள். உங்கள் பங்களிப்பையும் கொடுத்து மகிழ்ச்சியின் அளவைப் பெருக்கிக் கொள்ளுங்கள். சந்திப்போம், மேல வன்னிப்பட்டில்!

-------------- மின்சாரம் அவர்கள் -20-1-2011 “விடுதலை” யில் எழுதிய கட்டுரை

தமிழ் சொல்லிக் கொடுத்ததால் சங்கராச்சாரியாருக்கு கோபம்

துவேஷ நஞ்சு!

முன்பு இருந்த ஆளுநர் திரு கே.கே. ஷா அவர்களுக்கு தமிழ் சொல்லிக் கொடுத்துக் கொண்டிருந்தேன். ஒரு நாள் நான் இந்தப் புதிய பெரியவாள் சங்கராச்சாரியாரைப் (ஜெயேந்திர சரஸ்வதியை) பார்க்கப் போனோம்!

அப்போது அங்கிருந்தவர் ஆளுநருக்கு இவர் தான் தமிழ் சொல்லிக் கொடுத்தவர் என்று அறிமுகப்படுத்தினார்.

உடனே காஞ்சிப் பெரியவாளுக்கு வந்ததே கோபம்.

நீங்கள்தான் இவருக்குத் தமிழ் சொல்லிக் கொடுத்ததா? என்று கொய்யோ முறையோ என்றார்.

உங்களை யார் இந்த வேலைகளெல்லாம் செய்யச் சொன்னது? என்றார்.

நாங்கள், இதெல்லாம் அவரைக் கேட்டுக் கொள்ளுங்கள் என்று கூறிவிட்டு வெளியே வந்தோம்.

(விடுதலை 27.12.1980 பக்கம் 2)

சென்னை- பெரியார் திடலில் திராவிடர் கழகத்தின் சார்பில் தமிழ் வழிபாட்டு உரிமை மாநாடு 25.12.1980 அன்று தவத் திரு குன்றக்குடி அடிகளார் தலைமையில் நடை பெற்றது. திராவிடர் கழகப் பொதுச் செயலாளர் கி. வீரமணி அவர்கள் வரவேற் புரையாற்றினார்.

ஆட்சி மொழிக் காவலர் கி. இராமலிங்கனார் துவக்கவுரை ஆற்றினார். மொழி ஞாயிறு தேவநேயப் பாவாணர், திருக்குறளார் வீ. முனுசாமி, பேராசிரியர் நாரண துரைக்கண்ணன் போன்றவர்கள் சொற் பொழிவு ஆற்றினார்கள். சென்னைப் பல்கலைக் கழக தமிழ்த் துறைத் தலைவர் முனைவர் சி. பாலசுப்பிரமணியம் அவர்கள் அம்மாநாட்டில் பேசினார். அப்படிப் பேசியதில் ஒரு பகுதிதான் மேலே எடுத்துக் காட்டப்பட்டுள்ள பகுதியாகும்.

சங்கராச்சாரியாரை லோககுரு ஜெகத் குரு என்று போற்றி, அவரது பாதங்களில் காணிக்கைகளைக் கொட்டிக் கொடுக்கும் தமிழர்கள் இந்த உண்மையான தகவலைத் தெரிந்து கொண்ட பிறகும், நம் தாய்மொழிமீது இவ்வளவு மோசமான துவேஷ நஞ்சைக் கக்குவதைத் தெரிந்து கொண்ட பிறகும் அவர்களை மதிப்பார்களேயானால், அதைவிட அப்பட்டமான கேவலம் - இழிவு ஒன்றும் இருக்க முடியாது - இருக்கவே முடியாது.

”தமிழைப் பழித்தவனை தாய் தடுத்தாலும் விடேன் என்ற புரட்சிக் கவிஞரின் சுனை வரிகள் தமிழர்களுக்குச் சூடு, சொரணையை உண்டாக்கும் என்று எதிர்பார்க் கிறோம். கோயிலுக்குள் தமிழ் கூடாது, கோயிலுக்குள் தமிழன்அர்ச்சகன் ஆகக் கூடாது; ஆனால் அந்தத் தமிழ்ப் பேசிடும் தமிழர்களின் துட்டு மட்டும் வேண்டும்; அதன் மூலம் வயிறு வளர்க்க வேண்டும் என்று நினைக்கிற கூட்டத்தை முற்றிலும் புறக் கணிக்கும் நாளே தமிழன் புறமுது கிடாதவன் என்ப தற்கான பொன்னாளாகும். தமிழா இனவுணர்வு கொள்! தமிழா, தமிழனாக இரு!”

----------------------- தமிழர் தலைவர் கி. வீரமணி

---------------- மயிலாடன் அவர்கள் 25-1-2011 “விடுதலை” யில் எழுதிய கட்டுரை