Search This Blog

8.8.10

பக்தியா? ஒழுக்கமா?


கடவுளாகட்டும், மதமாகட்டும், பக்தியாகட்டும், மோட்ச மாகட்டும் வைத்துக்கொள். எதுவானாலும் அது தனிப்பட்ட மனிதனுடைய தனிச் சொத்து. உலகத்துக்குப் பொதுச் சொத்தல்ல. ஒழுக்கம், நாணயம்பொதுச் சொத்து. நான் பக்தியில்லாமல் நரகத்திற்குப் போகிறேன் என்றால் உங்களுக்கு என்ன? நான் போய் விட்டு போகிறேன். நான் கடவுளை நம்பவில்லை, அதைக் கொழுக்கட்டை என்று சொல்லுகிறேன்; நான் போய்விட்டுப் போகிறேன். உங்களுக்கொன்றும் நஷ்டமில்லை பாருங்கள். அதனாலே எனக்குப் பக்தி இல்லை என்பதனாலே, உங்களுக்கென்ன நஷ்டம்?

ஆனால் ஒழுக்கமில்லையென்றால் என்னவாகும் பாருங்கள்? நாணயமில்லை என்றால் என்னவாகும்? உண்மை உணர்வு இல்லை என்றால் என்னவாகும்? இது மூன்றும் இல்லாதது இன்னொரு மனிதனுக்குச் செய்கிற கெடுதிக்குப் பேர்தானே?

ஒழுக்கமாக இல்லை என்றால், எங்கெங்கேயோ ஒழுக்கக் கேடாக நடந்து தொல்லை பண்ணிக் கொண்டிருக்கின்றான்; நாணயமாக இல்லையெனில், யாரையோ ஏமாற்றி வேதனையை உண்டாக்கி இருக்கின்றான்; உண்மையாக இல்லை என்றால் என்னத்தையோ, எவனையோ ஏமாற்றிப் பொய் பேசித் தப்பிக்க இன்னொரு தவறைக் கொண்டிருக்கிறான் என்றுதானே பொருள்?

ஆகவே ஒழுக்கம், நாணயம், உண்மை என்ற உயர்ந்த குணங்களெல்லாம் பொதுச் சொத்து. மனித சமுதாயத்திலே இது கேடாக இருந்தால் சமுதாயத்துக்குக் கேடு. ஒரு மனிதன் இந்தக் காரியங்களில் குற்றவாளியாக இருந்தானானால் கண்டிப்பாக இன்னொரு மனிதனுக்குக் கேடு விளைந்திருக்கும். இது முக்கியமில்லை. பக்தி, கடவுள் நம்பிக்கை, மதக் கோட்பாட்டின்படி நடக்கிறது. இவைதான் முக்கியமென்றால் மக்களுக்கு என்ன பிரயோஜனம் அதனாலே?

----------------------------தந்தை பெரியார், 24.11.1964 பச்சையப்பன் கல்லூரிப் பேருரை

பக்தர்களிட மிருந்து யானைக்குத் தொற்றுநோய் பரவுகிறதாம்!


கஜேந்திரன்!

கோயில் யானை என்றால் சாதாரணமானதல்ல அது கடவுள் அருள் பெற்றது. அதுவும் கஜேந்திரன் ஒருமுறை முதலை ஒன்று யானையின் காலைக் கவ்விப் பிடிக்க, ஆதி மூலமே! என்று கஜேந்திரனாகிய யானை அலறிய மாத்திரத்திலேயே மகாவிஷ்ணுவாகிய பெருமாள் தன் கருட வாகனத்தில் விரைந்து பறந்து வந்து, தமது கையில் வைத்துள்ள வன்முறைக் கருவியான சக்கராயுதத்தை ஏவி, முதலையை அழித்து, கஜராஜனாகிய யானைக்கு விடுதலை அளித்து முதலை வடிவத்தில் இருந்த கந்தர்வனுக்கும் சாப விமோசனம் அளித்தாராம்.

கஜராஜன் கஜேந்திரன் என்று போற்றப்படும் அந்த யானையைத்தான் அதுவும் கோயில் யானையைத்தான் கடைவீதிகளில் பிச்சை எடுக்க விடுகிறார்கள்.

கடைக்குக் கடை சென்று பழங்களைப் பெற்று வயிறு வளர்க்கிறது.

இடையில் பக்தர்கள் கொடுக்கும் பணத்தை துதிக்கையால் வாங்கி பாகனிடம் கொடுத்து, பக்தர்களின் தலையில் துதிக்கையை வைத்து ஆசிர்வாதமும் செய்கிறது (எல்லாம் சர்ச்சுகள் மாதிரி தான்!)

பசியாத வரம் தாரேன் தாயே! பழைய சோறு இருந்தால் கொஞ்சம் பிச்சை போடு! என்றானாம் ஒரு பிச்சைக்காரன். பசியாத வரம் தரும் சக்தி அவனுக்கு இருந்தால், அவன் ஏன் பிச்சை எடுக்கிறான்? என்று யாரும் சிந்திப்பதில்லை.

சரி, பிரச்சனை என்ன? காரியம் இல்லாமலா? நேற்று ஒரு செய்தி... கோயில் யானையை ஆசிர் வாதம் செய்ய அனுமதிக்கக் கூடாது. அவ்வாறு பக்தர்களின் தலையில் யானை (கஜேந்திரன்) துதிக்கை வைத்து ஆசிர்வதிக்கும் போது பக்தர் களிடமிருந்து யானைக்கு நோய் தொற்றிக் கொள்கிறதாம் அதனால் இந்து அற நிலையத்துறை அதற்குத் தடை போட்டுள்ளதாம்!

அடே, இது என்ன அனாச்சாரம்! கோயில் யானைகள் தலைமுறை தலைமுறையாகப் பிச்சை எடுப்பதும், பக்தர்களுக்கு ஆசி வழங்குவதும் நடந்து கொண்டு தானே இருக்கிறது. அப்படியிருக்கும் பொழுது யானையின் தலையில் கை வைக்கலாமா? (யானை தான் மற்றவர்கள் தலையில் கை வைக்கலாம்!) என்று இந்து மக்கள் கட்சி போர்க் கொடி தூக்கியுள்ளது.

கஜேந்திரனைக் காக்க மனிதர்கள்தான் சத்தம் போட வேண்டியுள்ளது. அது சரி, பக்தர்களிட மிருந்து யானைக்குத் தொற்றுநோய் பரவுகிறது என்று சொல்லும் கால்நடை மருத்துவர்கள் எல்லாம் கருப்புச் சட்டைக்காரர்கள் நாத்திகர்கள் என்று அக்கட்சி சொல்லப் போகிறதா?

------------------மயிலாடன் அவர்கள் 9-8-2010 “விடுதலை” யில் எழுதிய கட்டுரை

7.8.10

பாபர் மசூதி இடிப்பு வழக்கில் தீர்ப்பு எந்த நாளோ!

தீர்ப்பு வருகிறது!


1992 டிசம்பர் 6ஆம் தேதி அத்வானி தலைமையில் சங்பரிவார் வன்முறைக் கும்பலால் இடிக்கப்பட்டது _ 450 ஆண்டு கால வரலாறு படைத்த அயோத்தி பாபர் மசூதி. 18 ஆண்டுகள் உருண்டோடி விட்டன. ஆனாலும் குற்றவாளிகள் தண்டிக்கப்படவில்லை. இடைக் காலத்தில் இவர்கள் இந்தியாவின் பிரதமர், துணைப் பிரதமர் பதவி நாற்காலிகளில்கூட அமர்ந்துவிட்டனர். பலர் மத்திய அமைச்சர்களாகவும், மாநில முதல் அமைச்சர்களாகவும் படாடோபமாகப் பவனி வந்தனர். இந்தியாவில் பெரிய பதவிகளை அலங்கரிக்க வேண்டுமானால் பெரிய பெரிய கிரிமினல் குற்ற நடவடிக்கைகளில் ஈடுபட வேண்டும் போலும்!

இந்தியத் துணைக் கண்டத்தில் நிருவாகமும், நீதித்துறையும் எந்த அளவுக்குக் கிரிசை கெட்டுப் போய் விட்டன என்பதற்கு இந்த வழக்கு ஒன்று போதாதா?

அடேயப்பா! மற்றவர்கள் விடயத்தில் இந்த பி.ஜே.பி., சங்பரிவார்க் கும்பல் பேசும் வக்கணையிருக்கிறதே அது வண்டி வண்டியாகவே இருக்கும்.

ஆனால் அவர்களுக்கென்று வரும்போது தலைப்பு மாற்றிப் பேச ஆரம்பித்து விடுவார்கள்.

துக்ளக் சோ ராமசாமிகளும், குருமூர்த்திகளும் முடியைப் பிளந்து எழுவார்கள் முஷ்டியைத் தூக்கிப் பேசுவார்கள்.

பாபர் மசூதி இடம் யாருக்கு உரிமையுடையது என்ற வழக்கு 1960ஆம் ஆண்டு முதல் நடைபெற்று வருகிறது.

1949ஆம் ஆண்டு டிசம்பர் 22 அன்று நள்ளிரவில் இந்த ஆர்.எஸ்.எஸ். உள்ளிட்ட இந்துத்துவா கும்பல் திருட்டுத்தனமாக பாபர் மசூதி இருக்கும் வளாகத்துக்குள் புகுந்து ராமன்,லட்சமணன், சீதை மற்றும் அனுமான் சிலைகளை வைத்துவிட்டனர்.

நியாயமான நிருவாகம் நாட்டில் நடக்கிறது என்றால் என்ன செய்திருக்க வேண்டும்? திருட்டுத்தனமாக வைக்கப்பட்ட அந்தச் சிலைகள் அப்புறப்படுத்தப்பட்டு இருக்க வேண்டும்.

ஆனால் நடந்ததோ வேறு! இரண்டு அர்ச்சகர்கள் நாள்தோறும் சென்று அந்தச் சிலைகளுக்குப் பூஜை நடத்த உத்தரவு பிறப்பித்தார் மாவட்ட ஆட்சியர்.

இதனை எதிர்த்து முசுலிம்கள் தொடர்ந்த வழக்கு அலகாபாத் உயர்நீதிமன்றத்தில் நிலுவையில் உள்ளது.

1986 பிப்ரவரி 2இல் இன்னொரு விபரீதம் நடந்தது. பைசாபாத் மாவட்ட நீதிமன்றத்தில் உமேசு சந்திரபாண்டே என்பவரால் தொடரப்பட்ட வழக்கில் மாவட்ட நீதிபதி கே.எம். பாண்டே ஓர் ஆணை பிறப்பித்தார்.

பாபர் மசூதி பூட்டை உடைத்து ராம பக்தர்கள் உள்ளே சென்று வழிபட அனுமதித்ததுதான் அந்த உத்தரவு.

பகவான் காரியமல்லவா அதற்காக எதைச் செய்தாலும் பாவம் ஆகாதே!

ஒட்டகத்தைக் கூடாரத்தில் நுழைய அனுமதித்தால் அதன்பின் அந்தக் கூடாரம் ஒட்டகத்தின் ஒட்டு மொத்த உடைமைதானே!

பாபர் மசூதிக்குள் காலடி வைத்த காலாடிகள் 1992 டிசம்பர் ஆறாம் நாளில் அதனை அடித்தே நொறுக்கி விட்டார்கள்.

பட்டப் பகலிலேயே பகிரங்கமாக நடந்த பயங்கரம் அது!

49 பேர்கள்மீது குற்றப் பத்திரிகை. சாதாரண குற்றங்கள் அல்ல. குற்றப் பிரிவு (இ.பி.கோ) 147, 153(ஏ) 149, 153(பி) மற்றும் 505.

கலகம் விளைவித்தல், மதக் குரோத உணர்வைத் தூண்டுதல், சட்ட விரோதமாகக் கூடுதல், தேசிய ஒருமைப்பாட்டுக்குக் குந்தகம் விளைவித்தல் _ ஒரு சமுதாயத்துக்கு விரோதமாகக் குற்றஞ் செய்யத் தூண்டுதல், மக்களிடையே பீதியை ஏற்படுத்துதல் என்கிற பிரிவுகளின்கீழ் இவர்கள்மீது குற்றச்சாற்று!

எல்.கே. அத்வானி, உமாபாரதி, முரளி மனோகர் ஜோஷி, வினய் கட்டியார், வி.எச்.பி. தலைவர் அசோக் சிங்கால், கிரிராஜ் கிஷோர் விஷ்ணுஹரி டால்மியா, சாத்வி ரீதாம்பரா உள்ளிட்ட 49 பேர்கள் மீது குற்றப் பத்திரிகை.

சாட்சியங்கள் மிகப் பலமாக இருக்கின்றன. வீடியோ க(ச)ட்சிகள் உண்டு.

பாபர் மசூதியை இடிக்கத் தூண்டும் அத்வானிகளின் உரைகள் அதில் உண்டு.

அத்வானியுடன் பாதுகாப்புக்குச் சென்ற அய்.பி.எஸ். அதிகாரி அஞ்சுகுப்தா என்ற அம்மையார் ரேபரேலி சி.பி.அய். சிறப்பு நீதிமன்றத்தில் சாட்சிக் கூண்டில் ஏறி, நடந்ததை அப்படியே வெளிப்படுத்தினார். அத்வானி உள்ளிட்டோர் பாபர் மசூதியை இடிக்கத் தூண்டும் வகையில் பேசினார்கள் என்று விலாவாரியாகப் பிளந்து தள்ளி விட்டாரே! (தினமணி 27.3.2010)

வாஜ்பேயி மட்டும் விதி விலக்கா? பாபர் மசூதி இடிக்கப்படுவதற்கு முதல் நாள் (5.12.1992). லக்னோவில் வாஜ்பேயி என்ன பேசினார்?

அயோத்தியில் நாளை நடைபெறும் கரசேவையின்போது என்ன நடக்கும் என்று எனக்கே தெரியாது. முட்களைப் போன்ற கற்களின்மீது நின்று கொண்டு பக்திப் பாடல்களைப் பாட முடியாது. அமைதியாக உட்கார்ந்து பாடுவதற்கு ஏற்ற வகையில் மண்ணை சமன் செய்ய வேண்டும் என்று பேசினாரே!

கவிஞர் அல்லவா தளுக்காகப் பேசினார். பாபர் மசூதியை நொறுக்கிச் சமன் செய்து அதன்மேல் அமர்ந்து கொண்டு பஜனை பாட வேண்டுமாம்.

இருப்பதிலேயே யோக்கியமான, அமைதியான மனிதரின் வாயிலிருந்து வந்த வார்த்தைகளான வன்முறை வெடிகுண்டுகள் இவை!

பாபர் மசூதி இடிப்பில் வாஜ்பேயிக்கு சம்பந்தம் உண்டா என்ற ஆராய்ச்சிக் கடலில் நாம் முழுக வேண்டாம்! விசுவ ஹிந்து பரிஷத்தின் தலைவர் அசோக் சிங்காலே வாஜ்பேயியின் சம்பந்தத்தைக் கறாராகச் சொல்லி விட்டாரே!

ஏதோ ஒரு மூலையில் அல்ல; இந்தியாவின் தலைநகரமான புதுடில்லியில் செய்தியாளர்களிடத்திலேயே கூறியது _ உண்டா இல்லையா?

நீதிபதி லிபரான் ஆணையத்தின் அறிக்கை யிலும் பாபர் மசூதி இடிப்பில் வாஜ்பேயிக்குச் சம்பந்தம் உண்டு என்று கூறப்பட்டுள்ளது. இதுகுறித்து நாடாளுமன்றத்தில் பிஜேபியினர் துள்ளிக் குதிக்கவில்லையா? ரகளையில் ஈடுபடவில்லையா? (23.11.2009).

இதற்கு மேலும் வலுவான தன்னிலை ஒப்புதல் வாக்குமூலம் ஒன்று உண்டு.

யாருடைய ஒப்புதல் வாக்குமூலம்? நாடாளுமன்றத்தின் மக்களவையின் பா.ஜ.க.வின் தலைவர் சுஷ்மா சுவராஜ் பகிரங்கமாகப் பிரகடனப்படுத்தி விட்டாரே!

ஆம்! பாபர் மசூதியை இடித்தது நாங்கள் தான்! தண்டனை ஏற்கத் தயார்! தயார்! உங்களால் எங்களைத் தண்டிக்க முடியுமா? முடிந்தால் தண்டித்துப் பாருங்கள்! என்று நாடாளுமன்றத் திலேயே நாதடிக்க முழங்கு முழங்கு என்று முழங்கினாரா இல்லையா?

(தினமலர் 9.12.2009 _ பக்கம் 11)

லிபரான் ஆணையத்தின் அறிக்கையும் நீண்ட கால விசாரணைக்குப் பிறகு அளிக்கப்பட்டு விட்டது.

தீர்ப்பு எப்பொழுது கிடைக்கும் என்று தெரியவில்லை.

இதற்கிடையே இன்னொரு தீர்ப்பு வரும் செப்டம்பர் இறுதியில் வரவிருக்கிறது. பாபர் மசூதி இடம் யாருக்குச் சொந்தம் என்ற வழக்கின் தீர்ப்புதான் அது.

இந்த வழக்கில் இந்துக்கள் சார்பாக 54 சாட்சிகளும், முசுலிம்கள் சார்பாக 33 சாட்சிகளும் விசாரிக்கப்பட்டுள்ளனர்.

முசுலிம்கள் தரப்பு சாட்சிகளில் பெரும்பாலோர் இந்துக்கள் என்பது கோடிட்டுக் காட்டத் தக்கதாகும்.

முசுலிம்கள் சார்பாக பிரபல வழக்கறிஞர் ஜவர்யாப் ஜீலானி வாதாடியுள்ளார்.

செப்டம்பர் 15 க்குப் பிறகு எந்த நேரத்திலும் தீர்ப்பு வெளியாகலாம்.

பாபர் மசூதி இடிப்பு வழக்கில் தீர்ப்பு எந்த நாளோ!

----------------மின்சாரம் அவர்கள் 7-8-2010 “விடுதலை” ஞாயிறுமலரில் எழுதிய கட்டுரை

அய்யப்பனைவிட ஏழு மலையானைவிட தீவிரவாதிகள் தீர மிக்கவர்களா?


கண்காணிப்பு!

சபரிமலைக் கோவிலில் கூடுதல் கண்காணிப்புக் கேமிராக்களைப் பொருத் திட கேரள உயர்நீதிமன்றம் அனுமதித்துள்ளது.

எதற்காக இந்த ஏற்பாடாம்? பயங்கரவாதி களின் அச்சுறுத்தல். உண்டியல் பணம் எண்ணப்படு வதைக் கண்காணித்தல் உள்ளிட்டவைகளுக்காக இந்த ஏற்பாடாம்.

இதுபோல திருப்பதி ஏழுமலையான் கோவிலிலும் கண்காணிப்புக் கேமிராக்கள் ஏற்கெனவே பொருத்தப்பட்டுள்ளன.

இவை குறித்து யாராவது மூளையைப் பயன் படுத்தியதுண்டா? இந்த ஏற்பாடுகள் கடவுளின் சக்தியைக் கேலி செய்வது ஆகாதா? பக்தர்களின் ஒழுக்கத்தைக் கொச்சைப் படுத்துவது ஆகாதா என்பதைக் கொஞ்சம் சிந்திப்பது நல்லது.

நாத்திகர்கள் நையாண்டி செய்கிறார்களே என்று சினம் கொள்ளாமல் ஆறுவது சினம் என்று ஆற்றுப்படுத்தி அவர்களைச் சிந்திக்க வைப்பதுதான் எங்களின் தலையாய நோக்கம்.

தீராத வினையெல்லாம் தீர்த்து வைப்பான் கோவிந்தன் என்று பாட்டுப்பாடி பக்தர்கள் செல்லுகிறார்களே - இந்தச் சொற்களுக்கு உள்ளார்த்தமான பொருளும், நம்பிக்கையும் இருந்தால், வழியில் சிறுத்தை அடித்துவிடுமே - புலி பாய்ந்து கொன்று விடுமே என்ற அச்சம் வரலாமா? அதுவும் அய்யப்பன் புலி மீது சவாரி செய்பவன் ஆயிற்றே!

இதில் தீவிரவாதிகளின் அச்சுறுத்தலிலிருந்து பக்தர்களைக் காப்பாற்றவும் இந்த ஏற்பாடாம்.

அய்யப்பனைவிட ஏழு மலையானைவிட தீவிரவாதிகள் அவ்வளவு தீர மிக்கவர்களா? எல்லாம் அய்யப்பன் பார்த்துக் கொள் வான் - ஏழுமலையான் கவனித்துக் கொள்வான் - இந்த ஏற்பாடுகள் எல்லாம் வேண்டாம் - வேண்டவே வேண்டாம் என்று அடித்துச் சொல்ல நாட்டில் ஒரே ஒரு பக்தன்கூட இல்லாமற் போய்விட்டானா?

நம்பிக்கைக்கும், நடப்புக்கும் சம்பந்தமில்லாத இதனை நாங்கள் சுட்டிக்காட்டும்போது நாத்திகர்களை நாக்கில் நரம்பின்றித் திட்டித் தீர்க்கலாமா?

சபரிமலையில் கண்காணிக்க கேமரா என்ற சேதியை வெளியிட்ட தினமலர் (6.8.2010) பழைய ஒரு தகவலையும் நினைவூட்டியுள்ளது.

கடந்த மார்ச் மாதம் கோவில் உண்டியல் பணத்தை எண்ணும் பணியில் ஈடுபட்டு இருந்த கோவில் ஊழியர் ஒருவர் ஆயிரம் ரூபாய் நோட்டை வாய்க்குள் திணித்ததை கண்காணிப்புக் கேமரா காட்டிக் கொடுத்துவிட்ட தாம்.

பலே, பலே! பகவானின் பக்கத்தில் இருப்பவர்களின் ஒழுக்கமே இப்படித்தான் இருக்கிறது! பக்தி ஒழுக்கத்தை வளர்க்குமா? எண்ணிப் பாரீர்!

--------------------- மயிலாடன் அவர்கள் 7-8-2010 “விடுதலை” யில் எழுதிய கட்டுரை

1929 லேயே கிறித்துவ பாதிரியார்களை கண்டித்த பெரியார் இயக்கம்


பதிலடிகள் கொடுக்கும் மாநாடு வாலாஜாவில்!

கழக வரலாற்றில் வடஆற்காடு மாவட்டத்துக்கு என்று ஒரு தனி முத்திரையும், அத்தியாயங்களும் உண்டு! கண்டிப்பாக உண்டு.

இன்னும் சொல்லப்போனால் 1929 செங்கற்பட்டில் முதல் சுயமரியாதை மாநாடு (பிப்ரவரி 17,18) நடைபெற்றது என்றால்- அதனையும் முந்திக்கொண்டு 1929 சனவரி 4,5 ஆகிய நாள்களில் வடஆற்காடு மாவட்ட முதல் சுயமரியாதை மாநாடு வேலூரில் நடந்தது என்றால், இம் மாவட்டத்தின் ஏற்றத்தை எளிதில் உணர்ந்திடலாம்.


வாலாஜாவுக்கு வா ராஜா வா என்று வரவேற்புக் குழுவினர் வாஞ்சையுடன் அழைக் கிறார்கள், வாருங்கள்! வாருங்கள்!! அரசின் விதிமுறைகளுக்கு விரோதமாக வாலாஜா அரசு மருத்துவமனையில் கோவில் எழுப்பப் பட்டுள்ளது. தினமலர் நிருபர் நாள்தோறும் பூஜை செய்கிறார். சட்டம் தன் கடமையைச் செய்யுமா?

1929 செங்கற்பட்டு முதல் சுயமரியாதை மாநாட்டுத் தீர்மானங்களுக்கு முன்னோடியாக வேலூர் மாநாட்டில் பல அரிய பெரிய தீர்மானங்கள் நிறைவேற்றப்பட்டுள்ளன.

நமது பெண்களுக்குச் சொத்தில் ஆண்களைப் போலவே சரி பங்கு இருக்க வேண்டும்.

விதவைகள் என்பவர்களுக்கும் அவர்களின் புருசர்களுடைய சொத்துகள் முழுவ திலும் பூரண சுதந்திரம் இருக்க வேண்டும்.

பிரியாத குடும்பங்களிலும் புருசர்களுக்குக் கிடைக்கக் கூடிய சொத்துகளின் உரிமை முழுவதும் அவர்கள் இறந்த பிறகும் அவர்களின் மனைவிகளுக்குக் கிடைக்க உரிமை இருக்க வேண்டும்.

ஆண்கள் தங்கள் மனைவிகள் காலம் சென்று விட்டால், மறுவிவாகம் செய்துகொள்ள உரிமை இருப்பது போலவே, எல்லா பெண்களுக்கும் புருஷன் இறந்து போனால் மறுவிவாகம் செய்துகொள்ள உரிமை வேண்டும்.

-என்கிற தீர்மானங்கள் எல்லாம் வ.ஆ. வேலூர் மாவட்ட முதல் மாநாட்டில் நிறைவேற்றப் பட்டு இருப்பதை அறியும்போது அந்த மாவட் டத்தைப் பற்றிய மரியாதை மிகவும் உயருகிறது.

சர்க்கார் உதவிபெறும் பள்ளிகளில் பார்ப்பனர் அல்லாத மாணவர்களும், பார்ப்பனர் அல்லாத உபாத்தியாயர்களும் விகிதாச்சாரப்படி நியமிக்கப்பட வேண்டும்.

ஒவ்வொரு ஜில்லாவிலும் பார்ப்பனர் அல்லாத வாலிபர்களில் உத்தியோகத் திற்கு லாயக்காய் உள்ள உத்தியோகம் வேண்டி யவர்களின் ஜாப்தா ஒன்று பதிவு செய்து வைத்திருப்பதுடன், ஒவ்வொரு வருஷமும் அந்தப் பதிவு அறிக்கை சென்னையில் இருக்கும் மத்திய உத்தியோக ஸ்தாபனத்திற்கும், சர்க்கார் இலாகா தலைமை அதிகாரி களுக்கும் முறையாக அனுப்பிக் கொண்டு வரவேண்டுமாய் தீர்மானிக்கிறது.

81 ஆண்டுகளுக்கு முன் கற்பனை செய்துகூடப் பார்க்க இயலாத தீர்மானங்கள் வ.ஆ.வேலூர் மாநாட்டில் நிறைவேற்றப்பட்டன என்றால்-அதன் சிறப்புகளை எடுத்தோத வார்த்தைகளுக்கு வலு இல்லை. திராவிட இயக்கம் என்ன செய்தது என்று பிதற்றும் பித்துக்குளிகளின் செவுளில் அறைவதுபோல இத்தீர்மானங்கள் இருக்கவில்லையா?

வ.ஆ.திருப்பத்தூர் தாலுகா முதல் சுயமரியாதை மாநாடு வாணியம்பாடியில் நடைபெற்றுள்ளது. (8, 9.10.1933) சுயமரியாதை மாநாட்டுக்கு எஸ்.இராமநாதன் எம்.ஏ., பி.எல்., வாலிபர் மாநாட்டுக்கு இந்திராணி பாலசுப்பிரமணியம், லேவாதேவிக்காரர் அல்லாத மாநாட்டுக்கு ஏ.இராகவன் ஆகியோர் தலைமை வகித்துள்ளனர்.

சென்னை அரசாங்கத்தார் கர்ப்பத் தடையைப் பிரச்சாரம் செய்ய உத்தேசித்தி ருப்பதை இம்மாநாடு ஆதரிக்கிறது மேலும் இதனை மதத்தின் பெயரால் எதிர்க்கும் கத்தோலிக்கப் பாதிரியார்களை இம்மாநாடு கண்டிக்கிறது என்று தீர்மானம் நிறைவேற்றப்பட்டுள்ளது.

இந்து மதத்தினைத் தானே விமர்சனம் செய்கிறீர்கள் என்று இந்து முன்னணிகள் மாநாடு போட்டு நம்மை நோக்கிக் கேள்விகளைக் கிளப்புகின்றனர். இந்த இந்து முன்னணி சிறுவர்கள் பிறக்காத காலத்திலேயே கத்தோலிக்கக் கிறித்துவர்களை -பாதிரியார்களை கண்டித்த பாரம்பரிய இயக்கம் நம்முடையது என்பதை எடுத்துச்சொல்லுவோம் வாருங்கள் தோழர்களே, வாலாஜாவுக்கு.

திருப்பத்தூர் தாலுகா முதல் சுயமரியாதை மாநாடு இரண்டாம் மாநாடு சு.ம.மாநாடு, மூன்றாம் சு.ம. மாநாடு என்ற ஒரு தாலுகாவுக்குள்ளேயே கூட அலை அலையாக மாநாடுகள் வரிசையாக நடைபெற்றுள்ளன. ஆம்பூரில் ஆதி திராவிடர் மாநாடு என்று கூட நடைபெற்றிருக்கிறது.

ஜோலார்பேட்டை, திருவத்திபுரம், குடியாத்தம் போன்ற இடங்களிலெல்லாம் எல்லாம் கல்வெட்டுகள் போல செதுக்கப்பட வேண்டிய இயக்க நிகழ்ச்சிகள் ஏராளம்! ஏராளம்!

திருவத்திபுரம் பொங்கல்விழா என்பது அந்த காலகட்டத்தில் புகழ் பெற்றதாகும்.

சின்னராசு (சி.பி.சிற்றரசு) செய்யாறு புலவர் கோவிந்தன், வடசேரி சபாரத்தினம், ஆம்பூர் பெருமாள், ஜோலார்பேட்டை கே.சி, தங்கவேல், கே.சி. சின்னராசு, திருப்பத்தூர் ஏ.டி.கோபால், வேலூர் திருநாவுக்கரசு, வேலூர் வி.எஸ். கனகசபை (அன்னை மணியம்மையாரின் தந்தையார்) ஜோலார்பேட்டை வி.பார்த்தசாரதி, (சமதர்மம் இதழ் நடத்தியவர்), ஆம்பூர் மணிவாசகம், வடசேரி து.ஜெகதீசன்-என்று என்றும் நெஞ்சில் நிலைத்து நிற்கும் சுயமரியாதைச் சுடரொளிகள் வரிசை மிகவும் நீண்டதாகும்.

இந்த வரலாற்றுச் சிறப்புமிக்க மாவட்டத்தில் வாலாஜா நகரில் திராவிடர் கழகத்தின் மண்டல மாநாடு மிக எழுச்சியுடன் வரும் ஞாயிறன்று நடைபெற உள்ளது.

அந்தக் காலகட்டத்தில் கருத்துக் கண் ணாடிகளாகத் தீர்மானங்கள் நிறைவேற்றப்பட்டன என்றால், இக்காலகட்டத்திற்குத் தேவையான கருத்துகளை உள்ளடக்கிய தீர்மானங்கள் நிறைவேற்றப்பட உள்ளன.

திராவிடரா? தமிழரா? என்று கிறுக்குப் பிடித்த சிலர் கிழிக்கும் வார்த்தைகளை விளம் பரப்படுத்துவதற்கென்று இந்நாட்டில் பார்ப்பன ஊடகங்கள் உண்டு.

எல்லாவற்றிற்கும் சேர்த்து மொத்துக் கொடுக்க முரசொலித்துக் கிளம்புங்கள் தோழர்களே! அனைத்துத் தரப்பினரின் ஆதரவும் பொங்கி வழிகிறது. புத்தம் புது இளைஞர்கள் புரட்சிகரமான நமது இயக்கத்தை நோக்கி சிறகடித்து வருகிறார்கள்.

மாநாட்டுக்கான ஏற்பாடுகளோ தடபுடல்! எங்கு பார்த்தாலும் சுவர் எழுத்து முழக்கங்கள். ஊரே கழகக் கொடிக்காடென்னும் குடை பிடித்து நிற்கிறது. நேரில் பார்த்தால்தான் இச்சிறப்புகளின் அணிவகுப்பைச் சுவைக்க முடியும். வரும் ஞாயிறு - கழக ஞாயிறாக-கொள்கை ஒளி வீசும் பட்டாளத்தின் பகலவனாகப் பவனி வரட்டும்!

--------------- மின்சாரம் அவர்கள் 6-8-2010 “விடுதலை” யில் எழுதிய கட்டுரை