Search This Blog

3.4.14

நிதானமாகத்தான் பேசுகிறாரா விஜயகாந்த்?


தமிழகத்தில் வெண்தாடி வேந்தர் பெரியார் என்றால், அது தந்தை பெரியார். குஜராத்தில் வெண்தாடி வேந்தர் மோடிதான்!
------------- இப்படிப் பேசி இருக்கிறார் சினிமா நடிகர் விஜயகாந்த்.
அரசியலிலே நிதானமின்றி அவர் எப்படியாவது உளறித் தொலைக்கட்டும்!
சமுதாயப் புரட்சி வீரரான ஒரு சகாப்த தலைவர் பற்றி வாய்க்கு வந்தவாறு விமர்சிக்கலாமா?

பாலும், நஞ்சும் ஒன்று என்று பேசலாமா?
கோட்சேயும், காந்தியும் ஒன்றே என்று கூறலாமா?
எலியும், பூனையும் இணையற்ற நண்பர்கள் என்று உளறலாமா?
பெரியார் யார்?

பேதங்கள் எந்த வடிவில் இருந்தாலும், அவற் றைப் பூண்டற்றுப் போகச் செய்யவேண்டும் என்று வெடித்துக் கிளம்பிய புரட்சியாளர் அல்லவா!
மனிதநேயத்தை வளர்த்த மாமனிதர் அல்லவா!

யானைக்கு மதம் பிடித்தாலும் சரி, மனிதனுக்கு மதம் பிடித்தாலும் சரி, இரண்டும் ஆபத்தே என்று அறிவுறுத்திய அறிவுலக ஆசான் அல்லவா பெரியார்!

அவரைப் போய் நரவேட்டை மனிதன் நரேந்திர மோடியுடன் ஒப்பிடலாமா?
மதவெறியர் மோடி! மனித நேயர் பெரியார்!

மனநோயாளிகளைத் தவிர இவ்விருவரையும்  வேறு யாரால் இப்படி ஒப்பிட முடியும்?

இரண்டாயிரம் இஸ்லாமியர்கள் கொன்று குவிக்கப்படுவதற்குக் காரணமாகவிருந்த ஹிட்லர் அல்லவா இந்த மோடிமஸ்தான்!
மதவெறிக் கலவரத்தில் மருண்டு உயிருக்குப் பயந்து முகாம்களில் பதுங்கிக் கிடந்த முஸ்லிம் களைப் பார்த்து குழந்தை உற்பத்தி வேலையில் இறங்கிக்கொண்டு இருக்கிறார்கள் என்று ஈவிரக்க மற்ற முறையில் விமர்சித்த விஷமத்தின் ஊற்றுக் கண்ணல்லவா மோடி!

பாபர் மசூதி இடிக்கப்பட்டபோது, இந்துக் கள்  அலிகள் அல்ல - ஆண்மை மிக்கவர்கள் என்று நிரூபித்துக் காட்டி விட்டார்கள் என்று காட்டுமிராண்டிக் கருத்தை உதிர்த்த மோடி எங்கே?
சமூகநீதியின் தந்தை பெரியார் எங்கே?

சமூகநீதிக்காக பிற்படுத்தப்பட்ட மக்களுக்கு 27 சதவிகித இட ஒதுக்கீடு தந்த பிரதமர் வி.பி.சிங் ஆட்சியைக் கவிழ்த்த பி.ஜே.பி.யின் பிரதிநிதி யல்லவா மோடி எங்கே?
உலக மக்களை எல்லாம் சகோதரத்துவம், சமத்துவம் என்ற பார்வையில் பார்த்து மனித நேயத்தையும், பகுத்தறிவையும் போதித்த புத்தரின் மறுவடிவமாம் தந்தை பெரியாரை விளையாட் டுக்குக்கூட இப்படி ஒப்பிட்டுப் பேசலாமா?
நிதானம் இழந்து பேசும் விஷம விளையாட்டு வேலைகளையெல்லாம் அரசியலோடு நிறுத்திக் கொள்ளட்டும்! கருஞ்சட்டைப் படையினரிடம் வைத்துக்கொள்ள வேண்டாம்.


ஏன்?
தந்தை பெரியார்பற்றி பொறுப்பற்றுப் பேசுவதை தமிழ்நாட்டு மக்களே பொறுத்துக் கொள்ளமாட்டார் கள். பெரியார் இந்த மண்ணை மணந்த மணாளர்; ஒடுக்கப்பட்ட மக்களின் உயிர் மூச்சு! அடக்கப்பட்ட மக்களுக்காக பொங்கி எழுந்த அரிமா!

சுண்ணாம்புக்கும், வெண்ணெய்க்கும் வித்தி யாசம் தெரியாத வெண்ணெய் வெட்டி வீரர் கள் விபரீதத்தை ஏற்படுத்தும் வார்த்தை களைக் கொட்டவேண்டாம் - எச்சரிக்கை! எச்சரிக்கை!!
              
                        --------------------------"விடுதலை” 2-4-2014

நமக்கு ஒழுக்கமான கடவுளே இல்லையே!

சிந்தனை அறிவே மனித வாழ்வை உயர்த்தும்

பகுத்தறிவு என்பது மனிதனுக்கு ஜீவநாடி - உயிர் நாடி ஆகும். ஜீவராசிகளில் மனிதனுக்குத்தான் பகுத்தறிவு உண்டு. இதில் மனிதன் எவ்வளவுக்கு எவ்வளவு தாழ்ந்த நிலையில் இருக்கின்றானோ, அவ்வளவுக்கு அவ்வளவு காட்டுமிராண்டி என்பது பொருள்.

மனிதன் எவ்வளவுக்கு எவ்வளவு பகுத்தறிவில் தெளிவு பெறுகின்றானோ, அவ்வளவுக்கு அவ்வளவு பக்குவமானவன் என்பது பொருள். பகுத்தறிவு பெறும்படியான சாதனம் நமக்கு நீண்ட நாளாகவே தடைபடுத்தப்பட்டு வந்துள்ளது, நம்மை அடிமைப்படுத்தி ஆதிக்கம் செலுத்திய பார்ப்பனர்கள் நாம் பகுத்தறிவு வளர்ச்சி அடைய ஒட்டாமல் தடை செய்து கொண்டே வந்துள்ளார்கள்.

மக்களிடையே பகுத்தறிவைத் தடைபடுத்த கடவுள், மதம், சாஸ்திரம் முதலியவைகளைப் புகுத்தி நம்பும்படிச் செய்து விட்டார்கள். பொதுவாக, கடவுளைப் புகுத்தியவன் கடவுளுக்கு முதல் நிபந்தனையாக அறிவு கொண்டு கடவுளைப் பற்றிச் சிந்திக்கக் கூடாது என்ற நிபந்தனையுடன்தான் ஏற்படுத்தினான்.

கடவுள் பஞ்சேந்திரியங்களுக்கும் எட்ட முடியாத வஸ்து; அறிவுக்கு எட்ட முடியாத வஸ்து - பஞ்சேந்திரியம் என்றால் மெய், வாய், கண், மூக்கு, செவி, இந்த அய்ந்துக்கும் எட்ட மாட்டார், இந்த அய்ந்தும் கொண்டு தேடவும் கூடாது என்பதாகும். இந்த இந்திரியங்களை எல்லாம் மீறி சிந்திக்க மனது என்று ஒன்று உள்ளது; இந்த மனதுக்கும் எட்டாதவர் கடவுள் என்று இத்தனை நிபந்தனைகளையும் போட்டு கடவுளைச் சொன்னான்.

கடவுள் என்றால் ஒத்துக்கொள்ள வேண்டும்; எங்கே? ஏன்? எப்படி? என்று கேட்கக் கூடாது என்று கூறிவிட்டார்கள்.

கடவுள் போலவே மதத்தைப் பற்றியும் என்ன என்று சிந்திக்கக் கூடாது; மதம் எப்போது ஏற்பட்டது; யாரால் ஏற்பட்டது? என்ன ஆதாரம்? என்று சிந்திக்கக் கூடாது. சிந்தித்தால் மதம் போய்விடும். எனவே, அப்படியே ஒத்துக் கொள்ள வேண்டும் என்று கூறி விட்டார்கள்.

கடவுள், மதம் போலவே சாஸ்திரத்தைப் பற்றியும் ஆராயக் கூடாது; எவன் பகுத்தறிவு கொண்டு சாஸ்திரங்களை ஆராய்கின்றானோ, அவன் நரகத்துக்குப் போவான் என்று எழுதி வைத்துள்ளார்கள். எனவே, பகுத்தறிவு என்பது ஆதாரத்தைக் கொண்டு தெளிவடைவது, மூட நம்பிக்கை என்பது ஆராயாமல் ஏற்றுக் கொள்வது ஆகும்.

நமது இழிநிலை, முட்டாள்தனம் மாற வேண்டுமானால், நாம் ஒன்றும் கஷ்டப்பட வேண்டியது இல்லை; பகுத்தறிவினைக் கொண்டு தாராளமாக பல தடவை நன்கு சிந்தித்தால் ஒவ்வொன்றும் தானாக நழுவிவிடும்.
நமது கொள்கை பகுத்தறிவு. பகுத்தறிவு என்றால் நாத்திகம் ஆகும். அறிவு கொண்டு சிந்திப்பதுதான் நாத்திகம் ஆகும்.

கடவுள் மனதுக்கும், வாக்குக்கும் எட்டாதது என்று கூறப்பட்டாலும் அதுதான் உலகத்தை உண்டாக்கி நம்மை எல்லாம் நடத்துகின்றது. எல்லாவிதமான சர்வசக்திகளும் உடையது என்று கூறப்படுகிறது.

அப்படிப்பட்ட கடவுள் நம்மைத் தவிர்த்து மற்ற உலகத்துக்கு ஒன்றுதான். ஆனால், நமக்குத்தான் ஆயிரக்கணக்கில் கடவுள்கள் _- நம்மைத் தவிர்த்த மற்ற உலகிற்கு கடவுளுக்கு உருவம் இல்லை; நமது கடவுளுக்கோ பல்லாயிரக்கணக்கான உருவங்கள்.

மற்ற நாட்டுக் கடவுள்களுக்கு ஒன்றும் வேண்டியது இல்லை, நமது நாட்டுக் கடவுளுக்கு மட்டும் மனிதனுக்கு வேண்டியது எல்லாமுமே வேண்டும்.
மற்ற நாட்டுக்காரர்கள் கடவுள் யோக்கியம், நாணயம், ஒழுக்கம் உடையது என்று உண்டாக்கி இருக்கிறார்கள். நமது நாட்டுக் கடவுள்களுக்கு இந்த ஒழுக்கம், நாணயம் எதுவும் கிடையாது. மனிதனில் கீழ்த்தரமானவனுக்கு என்ன என்ன குணங்கள் இருக்குமோ, அவைகள் அத்தனையும் கடவுளுக்கு ஏற்றி விட்டிருக்கிறார்கள்.

இப்படி ஏராளமான பேதங்களும், நடப்புக்கு ஒவ்வாத காரியங்களும், காரியத்தில் கேடான குணங்களும் கடவுளுக்குக் கற்பித்து இருக்கின்றார்கள்.
இவைகளையெல்லாம் நம்புவதுதான் மூட நம்பிக்கை; நல்லவண்ணம் சிந்தித்து ஆராய்ந்து ஏற்கின்றதை ஏற்றுக் கொண்டு மற்றதைத் தள்ளுவதுதான் பகுத்தறிவு. நாம் பகுத்தறிவு கொண்டு ஆராய்ந்து பார்த்தால் பகுத்தறிவுக்கு ஏற்ற கடவுள் இருக்கின்றதா என்பதைச் சிந்தித்துப் பார்த்தால் இல்லவே இல்லை, உண்மையில் ஒரு கடவுள் இருக்குமானால், நமக்குத் தெரியாமல் இருக்க வேண்டிய அவசியம் என்ன? அந்தக் கடவுள் தாம் இருப்பதாக நமக்காவது ஏன் தெரியப்படுத்தக் கூடாது?

நமக்கு ஒழுக்கமான கடவுளே இல்லையே. சைவ சமயத்தில் கந்தன், முருகன், சுப்ரமணியன் என்று ஒரு கடவுள். அவனுக்குப் போட்டியாக வைணவத்தில் இராமன் என்று ஒரு கடவுள், இப்படியாக பல கடவுள்கள் கூறப்படுகின்றன. இந்தக் கந்தனைப் பற்றிய கதையும் அசிங்கம், ஆபாசமாக இருக்கும். இராமனைப் பற்றிய கதையும் ரொம்பவும் ஒழுக்கக்கேடாக இருக்கும். காரணம், இந்தக் கதைகள் ரொம்பக் காட்டுமிராண்டிக் காலத்தில் எழுதப்பட்டமையால் பகுத்தறிவைப் பற்றிய கவலையே இல்லை.
மக்கள் அறிவு கொண்டு சிந்தித்தல் வேண்டும்; அதுவே பகுத்தறிவை வளர்க்கும் பகுத்தறிவுக்குத் தடையாக இருப்பது கடவுள் மூட நம்பிக்கை, சிந்திக்கவொட்டாத நிலை.

சிந்தனையே அறிவு; அதுவே மனித வாழ்வை உயர்த்தும்.

-----------------------------------தந்தை பெரியார் அவர்கள் எழுதிய தலையங்கம் 'விடுதலை' 16.8.1969)

2.4.14

சேதுசமுத்திரத்திட்டம் பயனற்ற ஒன்றா?ஊன்றிப் படித்து உண்மையை உணருங்கள்!

சேதுசமுத்திரத்திட்டம்பயனற்றஒன்றா? அரசியல் காழ்ப்புணர்வோடு முதல் அமைச்சர் குறை கூறலாமா?

ஊன்றிப் படித்து உண்மையை உணருங்கள்!
சேதுசமுத்திரத்திட்டம்பயனற்றஒன்றா?
அரசியல் காழ்ப்புணர்வோடு முதல் அமைச்சர் குறை கூறலாமா?
இத்திட்டத்தால் தமிழ்நாடு அடையும் பயன்களின் பட்டியல் இதோ!
இராமநாதபுரத்தில் மட்டும் காணாமற்போன இராமன் பாலம்!

ஆதாரங்களுடன் எடுத்துக்காட்டுகிறார் தமிழர் தலைவர்
சேது சமுத்திரக் கால்வாய்த் திட்டம் ஏதோ தோல்வித் திட்டம் என்பதைப் போலவும், சுற்றுச் சூழலுக்கும் மீனவர்களுக்கும், கேடு விளைவிக்கும் திட்டம் என்றும் முதல் அமைச்சர் ஜெயலலிதா அம்மை யார் கூறிய குற்றச்சாற்றுகளுக்கு ஆதாரங்களுடன் மறுப்புக் கூறி திராவிடர் கழகத் தலைவர் கி வீரமணி அவர்கள் விடுத்துள்ள அறிக்கை வருமாறு: இராமநாதபுரத்தில் தேர்தல் பிரச்சாரப் பொதுக் கூட்டத்தில் பேசிய தமிழ்நாட்டின் முதல் அமைச்சரும், அ.இ.அ.தி.மு.க.வின் பொதுச் செயலாளருமான மாண்புமிகு செல்வி ஜெ. ஜெயலலிதா அவர்கள் சேது சமுத்திரக் கால்வாய்த் திட்டம் குறித்து அரசியல் நோக்கத்தோடு சிலவற்றைக் கூறியுள்ளார். (29.3.2014)

1) நான் முதல் அமைச்சராக முதன் முதலாக இருந்த சமயத்தில் 1994ஆம் ஆண்டு பல்லவன் போக்குவரத்து ஆலோசனைப் பணிகள் நிறுவனம் மூலம் சேது சமுத்திரத் திட்டத்துக்கான திட்ட அறிக் கையைத் தயாரிக்க சொன்னேன். இந்த நிறுவனம் இதன் அறிக்கையை 1996ஆம் ஆண்டு அரசுக்குச் சமர்ப்பித்தது என்று கூறியுள்ளார்.

அந்த நிறுவனம் தன் அறிக்கையில் என்ன கூறியது என்று முதல் அமைச்சர் கூறாதது ஏன்? அந்த நிறுவனத்தின் திட்ட அறிக்கை சாதகமாக இருந்த காரணத்தால் தானே 1999, 2001, 2004 ஆகிய தேர்தல் அறிக்கைகளில் சேது சமுத்திரத் திட்டத்தைச் செயல்படுத்தியே தீர வேண்டும் என்று வலியுறுத்தப்பட்டுள்ளது. அதில் ஏன் இப்பொழுது முரண்பட்டு நிற்கிறார் முதல் அமைச்சர்?

சுற்றுச் சூழல் பாதிப்பு ஏற்படுமா?

2) சுற்றுச் சூழல் பாதிப்பு ஏற்படும் என்று முதல்வர் சொல்லியுள்ளாரே? இதில் உண்மை உள்ளதா?

நாக்பூரில் உள்ள தேசிய சுற்றுச் சார்புப் பொறியியல் ஆய்வு நிலையம் (Neeri  - The National Environmental Engineering Research Institute) என்கிற அமைப்பு  ஆய்வு செய்து, தொழில் நுட்ப ரீதியாக தந்த தகவல்கள் ஒப்புதல் அடிப்படையிலேயே இந்தத் திட்டம் தொடங்கப்பட்டது. சுற்றுச்சூழல் தொடர்பாக அவ்வமைப்புக் கூறிய யோசனைகள் அடிப்படையில் கீழ்க்கண்ட ஏற்பாடுகள் மேற்கொள்ளப்பட்டன.
மிக மிக முக்கியமாக மனதில் வைக்க வேண்டிய ஒன்று இந்தத்திட்டம் இப்பகுதியில் தான் அமைக்க வேண்டிய ஒன்று. இது ஒரு  Site Specific Project வேறெங்கும் இதை அமைக்க முடியாது. அதே நேரத்தில் மன்னார் வளை குடாவும், பாக்கடல் பகுதிகளும் மீன் வளமும், இயற்கை வளமும் நிறைந்த பகுதிகள். நாட்டுக்குத் தேவையான, அதே வேளையில் இந்தப்பகுதியில் தான் அமைய வேண்டிய இந்தத்திட்டம் நிறைவேற்றப்படும்பொழுது சுற்றுப்புறச் சூழல் தாக்கம்  சிறிதும் இல்லாமல் அல்லது தாக்கங்களை குறிப்பிடத்தக்க அளவு கூட இல்லாமல் குறைத்து செயல்படுத்த வேண்டியது அரசின் கடமை, இதற்காக அரசு எடுத்துக்கொண்டுள்ள முயற்சிகள்

1) மன்னார் வளைகுடாவில் ஆதாம் பாலத்தின் ஒரு சிறிய பகுதி தவிர பிற பகுதிகளில் எவ்வித ஆழப்படுத்தும் செயலும் இருக்காது.
2) செலவு கூடுதல் என்றால் கூட, கடல்வழிப்பாதையை மாற்றியமைத்து, அருகில் உள்ள கடல் வாழினத் தேசியப் பூங்காவைச் சேர்ந்த சிங்களத் தீவிலிருந்து, ஆதாம் பாலத்தில் ஆழப்படுத்தப்போகும் பகுதி ஏறத்தாழ 20 கி.மீ. தொலைவு.
3) மன்னார் வளைகுடாவில், இயற்கை ஆழம் உள்ள கப்பல் செல்லும் வழித்திட்டம் இத்தீவுகளிலிருந்து குறைந்தது 20 கி.மீ. தொலைவில் அமைத்தல்.
4) ஆழப்படுத்தும் தொழில்நுட்பம் சுற்றுப்புறச் சூழலுக்கு ஏற்ப அமைத்தல்.
5) தோண்டி எடுக்கப்படும், மணல் கொட்டப்போகும் இடங்கள்


வங்கக்கடலிலும், மன்னார் வளைகுடாவிலும் தகுந்த விஞ்ஞானப் பூர்வமான ஆய்வுகள் நடத்தி, பவளப் பாறைகளுக்கு எந்த ஒரு சிறு தாக்கமும் இல்லாத வகையில் தேர்ந்தெடுக்கப்படும் இவ்விடங்கள் 25-லிருந்து 40 மீட்டர் ஆழம் உள்ள பகுதிகளாகவும், குறைந்தது கடற்கரை யிலிருந்து 25 கி.மீ. தொலைவுள்ளதாகவும் இருக்கும்.
6) தகுந்த ஆய்வுகள் நடத்தி கால்வாய் ஏற்படுவதால் நீரோட்டத்தின் விசை, திசை மாறுமா என்று கண்டறிதல்,
ஆய்வுகள் விசையிலும், திசையிலும் எவ்வித மாறுதல்களும் இருக்காது என்று நிரூபித்துள்ளன.
NEERI gave a clean report on environmental condition/
Supreme court directed the Government of India to appoint another committee. National Institutute of Ocean at Goa under took the survey and also gave a clean report/
Jayalalitha spoke about her State Government report on environmental condition which is not necessary.

மீன்வளம்: கடற்கரை மாவட்டங்களில் நடைபெற்ற பல கூட்டங்களில் கலந்து கொண்ட மீனவர்கள் எவ்வித எதிர்ப்பும் தெரிவிக்கவில்லை. மீன்வளம் பாதிக்காது.

பவளப்பாறை: சேதுசமுத்திரக் கால்வாய் அருகில்  21 தீவுகள் உள்ளன. அதில் மிக  அருகில் உள்ளது ஷிங்கிலி (Shingley) தீவு. அந்தத் தீவுக்கருகில் பவளப்பாறைகள் பாதுகாப்பாகவும், வளமாகவும் உள்ளன. மேலும் தூத்துக்குடி துறைமுகத்திற்கு உள்ளேயே இப்போதும் பவளப்பாறைகள் நலமாகவும், வளமாகவும் உள்ளன.

கப்பல் போக்குவரத்து: உலகில் தற்போதுள்ள கப்பல்களில் 82 சதவீதம் கப்பல்கள் சேதுக்கால்வாயில் போகலாம் -  போகின்றன.
Coastal Community Development: சேதுசமுத்திரக் கால்வாய்த் திட்டச்செலவில் 2 சதவீதம் கடற்கரை ஓரத்தில் வாழும் மக்கள் நலவளர்ச்சிக்குப் பயன்படுத்தப்படுகிறது. படகு இயந்திரப் பராமரிப்பு போன்ற வேலை அங்குள்ள இளைஞர்களுக்கு கற்றுத்தரப்படுகிறது.

3) சென்னை அய்.அய்.டி. பேராசிரியர்கள் கூறியது என்ன?

சென்னை அய்.அய்.டி.யின் கடல் சார் பொறியியல் துறைத் தலைவர் டாக்டர் ஆர். சுந்தரவடிவேலு, பேரா சிரியர் எஸ்.பி. சுப்பிரமணியம் ஆகியோர் கூறிய அறிவியல் தகவல்கள் முக்கியமானவை.

இந்தத் தகவலை வெளியிட்டது கூட கல்கி இதழ்தான் (17.6.2007). அந்த நிபுணர்கள் கீழ்க்கண்டவாறு கருத்து களைக் கூறியுள்ளனர்.

சுற்றுச்சூழல் திட்டச் செலவு ஆகியவற்றைக் கணக்கில் எடுத்துக் கொண்டே சேது சமுத்திரக் கால்வாய் வெட்டப்படுகிறது. இப்போது அதன் போக்கை மாற்ற வேண்டும் என்பது சரியல்ல; ஏற்கெனவே  அப்பகுதியில் உள்ள பவளப் பாறைகள் பாதிக்கப்படக் கூடாது என்று கால்வாயின் பாதை சிறிது மாற்றி அமைக்கப் பட்டிருக்கிறது. சுற்றுச்சூழல் நிறுவனங்கள் திட்டத்திற்கு அனுமதி கொடுத்திருக்கின்றன. உலகளவில் சுற்றுச்சூழலுக்கு முக்கியத்துவம் கொடுக்கும் நாடுகளில் இந்தியாவும் ஒன்று; பா.ஜ.க. அரசாங்கம் இருந்தபோதே அனுமதி கொடுக் கப்பட்ட திட்டம். இது நிறைவேற்றப்பட்டால் தென் தமிழ்நாடு பொருளாதார வளர்ச்சியில் சிறந்தோங்கும்
சொல்லுவது கல்கி  கூறுபவர்களோ சென்னை அய்.அய்.டி. கடல் சார் பொறியியல்  துறைத் தலைவரும், பேராசிரியரும் என்பது குறிப்பிட்டத்தக்கதாகும்.

சேது சமுத்திர திட்ட சுற்றுச் சூழல் கண்காணிப்புக் குழுத் தலைவர் டாக்டர் எஸ். கண்ணையன் செய்தியாளர் களுக்கு அளித்த பேட்டியில் (25.4.2007) என்ன கூறினார்?

ராமன் பாலம் என்றழைக்கப்படும் ஆதாம் பாலத்தில் 70 இடங்களில் 20 மீட்டர் ஆழத்துக்கு பாறை மாதிரிகளை ஜியோகெமிக்கல் முறையில் சோதனை செய்தோம்; அதில் கடலில் உள்ள படிமங்கள்தான் உள்ளன. அறிவியல் ரீதியாக ராமன் பாலத்தை எவரும் உருவாக்கியதற்கான எந்த அடையாளங்களும் இல்லை. பாலம் இருக்கும் இடத்திற்குப் பதிலாக வேறு இடத்தில் கால்வாய் தோண்டினால், மன்னார் வளைகுடாப் பகுதியில் இருக்கும் 21 தீவுகளும் அழிந்துவிடும் வாய்ப்பு அதிகம் என்று தெரிவித்தார்.
இவற்றையெல்லாம் புறந்தள்ளிய நிலையில் பச்சோரி குழு சொன்னதை மட்டும் பிடித்துக்கொண்டு தொங்க லாமா?

சேதுசமுத்திரத் திட்டம் கூடவே கூடாது. அது செயல்பட்டால் அதன் பலன் அய்க்கிய முற்போக்குக் கூட்டணி அரசுக்கும், அத்துறை அமைச்சராகவிருந்து அத்திட்டத்தை வெகு சிறப்பாகச் செயல்படுத்தியதால் அதன் பலன் தி.மு.க.வுக்கும், துறை அமைச்சர் டி.ஆர். பாலு அவர்களுக்கும் போய்ச் சேர்ந்து விடுமே என்ற அரசியல் காழ்ப்புணர்ச்சி  மேலோங்கி நிற்பதால் அதற்குத் தோதாக பச்சோரி குழுவைப் பிடித்துத் தொங்குகிறார்கள் என்பதுதான் உண்மை!

பச்சோரி நிபுணர் குழுகூட திட்டமே கூடாது என்று சொல்லவில்லை - அதிக செலவுகள் பற்றிதான் குறிப் பிட்டுள்ளது. (Economic  Liability)

4) நீதிமன்றம் கூறியது என்ன?

சேது சமுத்திரத் தொடக்க விழாவைத் (2.7.2005) தடுக்க வேண்டும் என்பதற்காக சிலர் சென்னை உயர்நீதிமன்றத்தை அணுகினர். அப்போதைய தலைமை நீதிபதி கீழ்க்கண்ட வாறு கூறி மனுவைத் தள்ளுபடி செய்தார்.
தேசிய நலனுக்காக கொண்டு வரப்படும் சேது சமுத்திரத் திட்டத்தைத் தடை செய்யும் நோக்கத்தோடு மனுதாரர் நீதிமன்றத்துக்கு வந்து வழக்குத் தொடுத்துள்ளார். சேது சமுத்திரத் திட்டம் நாட்டிற்கு நல்ல பலனைக் கொடுக்கும் என்பது எல்லோருக்கும் தெரிந்த ஒன்றாகும். ஏனென்றால் தற்போது கப்பல்கள் இலங்கை நாட்டைச் சுற்றி வங்காள விரிகுடா கடலுக்கு வர வேண்டியுள்ளது. பாக் ஜல சந்தியிலே குறுக்காக கால்வாய் அமைத்தால் பெரும் அளவு பணமும், நேரமும் சேமிக்கப்பட ஏதுவாகும். ஆகவே விழாவுக்குத் தடை கிடையாது என்று தீர்ப்புக் கூறப்பட்டதே!

(5) மீனவர்கள் பாதிக்கப்படுவார்கள் என்ற குற்றச் சாற்றையும் இராமநாதபுரம் கூட்டத்தில் முதல் அமைச்சர் வைத்துள்ளாரே? 

இது அடிப்படையற்றது!
1) மன்னார் வளைகுடாவிலிருந்து பாக் கடலுக்குச் சென்று வர தடையின்றி வழி கிடைக்கும்.

2) புதிதாக மீன்பிடித்துறைமுகங்கள் உருவாவதால் அவற்றைச் சார்ந்து குளிர் சாதன சேமிப்புக் கிடங்குகள், மீன் பதப்படுத்தும் தொழிற்சாலைகள் அமையும்; அதனால் மீனவர்கள் பிடிக்கும் மீன்களுக்கு நல்ல விலை கிடைக்கும் வாய்ப்பு ஏற்படும்.

3) கால்வாய்த்திட்டம் அதைச்சார்ந்த மற்ற சிறு திட்டங்கள் ஆகியவற்றில் நேரடி வேலை வாய்ப்பு மற்றும் மறைமுக வேலை வாய்ப்புகள் கிடைக்கும். 10 ஆயிரம் பேர்களுக்கு நேரடி வேலை வாய்ப்பும், 50 ஆயிரம் பேர்களுக்கு நேர்முக, மறைமுக வேலை வாய்ப்பும் கிடைக்கும்.

4) எந்த ஒரு பகுதியும் தொழில் வளர்ச்சி அடையும் பொழுது, அதனால் உடனடியாக பயன்பெறப்போவது அப்பகுதி மக்கள் தான். அந்த வகையில் சேதுக்கால்வாய்த் திட்டத்தால் கடலோர மாவட்ட மக்கள் பெரிதும் பயன் பெறுவர். இதில் மீனவர்களும் அடங்குவர்.
5) சேது சமுத்திரக்கால்வாய் இந்திய - இலங்கை கடல் எல்லையைச் சார்ந்து அமையப் போவதால், எல்லை தெரியாமல் மீனவர்கள் இலங்கைக் கடல்பகுதியில் சென்று அங்குள்ள கடற்படையினரிடம் அவதிக்குள்ளாகும் நிலை மாறும்.

6) தூத்துக்குடி துறைமுகத்தை எடுத்துக்கொண்டால், அதனால் மிகுந்த பயன் பெற்றவர் மீனவர் இனத்தவர்தான். அங்குள்ள முகவர்களில் பெரும்பாலோர் மீனவ இனத்தைச் சார்ந்தவர்கள் தான். 30 ஆண்டுகளுக்கு முன் முகவர்களாக இருந்தவர்கள் இன்று முதலாளிகளாக இருக்கின்றார்கள். அதைப்போல சேதுக்கால்வாய்த் திட்டத்தால் இன்று சாதாரணமாய் மீன்பிடித் தொழிலில் இருக்கும் கடலோர மாவட்டங்களைச் சார்ந்த பல மீனவர்கள் தொழில் அதிபர்களாய் மாறும் வாய்ப்பு ஏற்படும்.

மேற்கண்ட காரணங்களால் சேதுசமுத்திரத் திட்டத்தால்  மீனவர்கள் வாழ்வு நிச்சயம் மேம்பாடு அடையும்.

(6) இந்தத் திட்டத்தினால் ஏதும் பயன்கள் கிடையாது என்கிறாரே முதல் அமைச்சர்?

2008 இல் 3000 கப்பல்களும், 2025இல் 8000 கப்பல்களும் பயணம் ஆகும். இத்திட்டத்திற்காக செலவு செய்யப்படும் 2427.40 கோடி ரூபாயும் 2017இல் வட்டியும் முதலுமாக வந்து சேரும். கிழக்குக் கடற்கரைப் பகுதிகளில் உள்ள துறை முகங்கள் வளர்ச்சி பெறும். தொண்டியில் ரூ.16 கோடி செல வில் சிறு கப்பல்கள் தங்கும் தளம் - முத்துப் பேட்டையில் இரு சிறு மீன் பிடி துறைமுகங்கள், தனுஷ்கோடியில் ரூ.16 கோடி செலவில் மீன்பிடி துறைமுகம் மீனவர் வளர்ச்சிக்காகச் செலவிடப்படுகிறது.
அ) இந்தியக்கடல் எல்லைக்குள் ஒரு கடல் வழி நெடுஞ்சாலை அமையும்.
ஆ) இந்தியக் கிழக்குக்கடற்கரைத் துறைமுகங்களிலிருந்து ஏற்றுமதி

இறக்குமதிச் சரக்குகளின் போக்குவரத்துச் செலவு குறையும். எனவே உலகச் சந்தையில் நம் ஏற்றுமதிப் பொருட்கள் போட்டி போடமுடியும்; இறக்குமதியாகும் கச்சாப் பொருட்களின் விலை குறையும் என்பதால் உற்பத்தியாகும் பொருட்களின் விலை குறையும்.
இ) இந்தியாவின் கடலோர வணிகம் மேம்பாடு அடையும், இதனால் எல்லாத் துறைமுகங்களிலும் வேலை வாய்ப்பும், அதைச்சார்ந்த பகுதிகளில் தொழில் உற்பத்தியும் பெருகும்.
ஈ) தமிழகக் கடலோர வணிகமும், பன்னாட்டு வணிகமும் சிறக்கும்; இதனால் புதுச்சேரி, கடலூர், நாகப்பட்டினம் ஆகிய ஊர்களில் இப்போது இருக்கும் சிறு துறைமுகங்கள் பெருமளவில் வளர்ச்சி அடையும். இராமநாதபுரம் மாவட்டத்தில் ஒரு புதிய சிறு துறைமுகம் அமையும்.
உ) மீனவர்களுக்கு நேரடியாக பயன்படும் வகையில் தூத்துக்குடிக்கும் - நாகப்பட்டினத்திற்கும் இடையில் மீன்பிடி துறைமுகங்கள் தேவைக்கேற்ப உண்டாகும்.
ஊ) தமிழகக் கடலோரப் பகுதிகளில் தொழில் வளர்ச்சி பெருகும். இதனால் பொருளாதார வளர்ச்சி அடையும். புது மீன்பிடி துறைமுகங்களால் மீனவர்கள் பிடிக்கும் மீன்களுக்கு நல்ல விலையும் கிடைக்கும்.
எ) மன்னார் வளைகுடாவிலிருந்து பாக்கடல் சென்று வர மீனவர்களுக்கு இக்கால்வாய் வசதியளிக்கும்.
ஏ) தமிழகத்தின் கடலோரப் பகுதிகளில் பாதுகாப்பு பெருகும்.
அய்) இந்தியச் சரக்குகள் அந்நியத் துறைமுகங்களில் பரிமாற்றம் செய்யப்படுவது தவிர்க்கப்படும்.
ஒ) பல்வேறு வகைகளிலும் அந்நியச் செலாவணி மீதமாகும்; அந்நியச் செலாவணி வருவாயும் அதிகரிக்கும்.
(7) இந்தத் திட்டத்தால் 20 ஆயிரம் டன் எடை கொண்ட கப்பல்கள்தான் செல்ல முடியும். 30 ஆயிரம் டன் எடை கொண்ட கப்பல்களை எடுத்துக் கொண்டால் தற்போதுள்ள கப்பல்களில் ஒரு சில கப்பல்கள் தான் செல்ல முடியும் என்று கூறியுள்ளரே முதல் அமைச்சர்?
ஆனால் உண்மை நிலை என்ன?
இந்தக்கால்வாய் அமைக்கப்பெற்று கப்பல்கள் செல்லத் துவங்கும் பொழுது 10.7 மீட்டர் மிதவை ஆழத்திற்கு ஏறத்தாழ 50,000 டன்கள் வரை சரக்குகள் கொண்ட கப்பல்கள் ஆண்டிற்கு 2000-த்திலிருந்து 3000 வரை செல்லக்கூடும். இது ஒரு நாளைக்கு கிட்டத்தட்ட 6 இல் இருந்து 9 மட்டுமே. இந்த எண்ணிக்கை தொடர்ந்து வரும் ஆண்டுகளில் மேலும் அதிகரிக்கலாம். கால்வாய் 300 மீட்டர் அகலம் இருப்பதால் ஒரே சமயத்தில் கப்பல் செல்வதற்கும், வருவதற்கும் எந்தச் சிரமமும் இருக்காது. மேலும் கால்வாயில் கப்பல்கள் தவிர மீனவர்களின் படகுகளும் செல்ல அனுமதிக்கப்படும்.
(8) பி.ஜே.பி. இத்திட்டத்தை எதிர்ப்பது சரியா?
உண்மையில் இந்தத் திட்டத்திற்கு அனுமதி அளிக்கப் பட்டதே வாஜ்பேயி பிரதமராக இருந்த பிஜேபி ஆட்சி யின்போதுதான்! முரளி மனோகர் ஜோஷி, சு. திருநாவுக்கரசர், வேத் பிரகாஷ் கோயல் ஆகியோர் இத்திட்டத்திற்கு ஆதரவாக இருந்து ஒப்புதலும் அளித்தனர்.

1998 செப்டம்பர் 15 அன்று சென்னை கடற்கரையில் ம.தி.மு.க. சார்பில் ஏற்பாடு செய்யப்பட்ட பெரியார் - அண்ணா  பிறந்த நாள் விழாவில் பங்கேற்ற பிரதமர் வாஜ்பேயி சேது சமுத்திரத் திட்டத்தை நிறைவேற்றுவோம் என்று அறிவித்தார்.
1999 பட்ஜெட்டில் நிதி அமைச்சர் (பிஜேபி) யஷ்வந்த் சின்கா சேது சமுத்திரத் திட்ட தொடக்க ஆய்வுக்காக ரூ.5 கோடி ஒதுக்கினார் என்பதும் குறிப்பிடத்தக்கது.
9) இராமன் பாலம் பற்றி  முதல் அமைச்சர் பேசாதது ஏன்?

ராமர் பாலம் குறித்து மத்திய அரசு முரண்பாடான தகவல்களைத் தருகிறது. ராமன் பாலத்தைத் தகர்த்து மதக் கலவரங்கள்  ஏற்படுத்த மத்திய அரசு எடுக்கும் முயற்சியைக் கழகம் தடுக்கும் (அதிமுக அதிகாரப்பூர்வ ஏடான நமது எம்.ஜி.ஆர்.  - 23.10.2008) என்று கூறி அதன் அடிப்படையில் உச்சநீதிமன்றத்தில் வழக்கினைத் தொடுத்த முதல் அமைச்சர் ஜெயலலிதா, ராமநாதபுரத்தில் சேது சமுத்திரத் திட்டத்தை எதிர்த்துப் பேசிய போது, ராமன் பாலம் குறித்துப் பேசாமல் திட்டமிட்டு இருட்டடித்தது ஏன்? காரணம் அத்தொகுதியில் அ.இ.அ.தி.மு.க.வின்  வேட்பாளரே அன்வர் ராஜாவாயிற்றே! முஸ்லீம்கள் அதிக வாக்காளர்களைக் கொண்ட தொகுதியாயிற்றே. அங்கே அதனால் இராமன் பாலம் வாதம் காணாமற் போயிற்றுப் போலும்! என்ன தந்திரம்! இதெல்லாம் மக்களிடத்தில் எடுபடப் போவதில்லை.
தமிழ்நாட்டு மக்கள் 150 ஆண்டு காலமாக எதிர்பார்க்கும் ஒரு திட்டத்தை அரசியல் காழ்ப்புணர்வோடும், ராமன் பெயரைச் சொல்லியும் தடுத்திடும் அ.இ.அ.தி.மு.க.வையும் இந்துத்துவா கண் கொண்டு பார்த்து ராமர் பாலத்தைத் தகர்க்கக் கூடாது என்று கூறி, திட்டத்தை முடக்கும் பி.ஜே.பி. அதற்குத் துணைபோகும் கூட்டணிக் கட்சிகளையும் தமிழ்நாட்டு வாக்காளப் பெரு மக்கள் அடையாளம் கண்டு நடக்கவிருக்கும் 16ஆவது மக்களவைத் தேர்தலில் தக்கப் பாடம் கற்பிக்குமாறு கேட்டுக் கொள்கிறோம்.

-----------------------------------------கி.வீரமணி தலைவர் திராவிடர் கழகம்-31-03-2014

சேது சமுத்திரத்திட்டம் : சில முக்கிய குறிப்புகள்

சுற்றுப்புறச்சூழலுக்கு பாதுகாப்பானதாக அமையும் விதத்தில் சேது சமுத்திரத்திட்டம் 1999 ஆம் ஆண்டு ஏப்ரல் மாதம் துவங்கப்பட்டது. அப்போது ஆட்சியில் இருந்த பாஜக அரசின் தரைவழிப் போக்குவரத்துத்துறை  அமைச்சராக இருந்த அருண்ஜெட்லி கடல்வாழ் உயிரினங்களின் பாதுகாப்புத் திட்டங்கள் குறித்த பல ஆய்வாளர்களின் ஆலோசனையைக் கேட்டு அறிந்த பிறகு இந்த திட்டம் நடைமுறைப்படுத்த தேவையான ஆய்வை மேற்கொள்ள அனுமதியளித்தார். 2001-ஆம் ஆண்டு அதிமுக அரசின் தேர்தல் அறிக்கையில் சேதுசமுத்திரத் திட்டமும் இடம்பெற்றிருந்தது. இத்திட்டத் தின்படி கோதண்டராமசாமி கோவில் பகுதியில் துவங்கி ஆதம் பாலம் எனப்படும் மணல்மேடுகளை அகற்றலாம் என்ற சுற்றுப்புறச்சூழல் அனுமதியும் கிடைத்தது. 2002 மே மாதம் கலைஞர்  அவர்கள் அப்போதைய பாஜக பிரதமர் அடல் பிகாரி வாஜ்பாயி அவர்களுக்கு கடிதம் எழுதி சேது சமுத்திரத்திட்டத்தை தாமதமின்றி விரைவில் நிறைவேற்றிட வேண்டுகோள் விடுத்தார். ஜூலை 2002ஆம் ஆண்டு கப்பல்துறை அமைச்சர் வி.பி. கோயல் தூத்துக்குடி துறைமுகத்திற்கு வருகைதந்து சேதுசமுத்திரத்திட்டம் பற்றியும், அதனால் விளையும் நன்மைகள் குறித்த அறிக்கைகள்பற்றி அதிகாரிகளுடன் ஆலோ சனை நடத்தினார்.


2002  அக்டோபர் 15 ஆம் தேதி கலைஞர் மீண்டும் பிரதமருக்கு ஒரு கடிதம் எழுதி சேதுசமுத்திரத்திட்டத்தை விரைந்து முடிக்குமாறு வேண்டுகோள் விடுத்தார். 2002 ஆம் ஆண்டு அக்டோபர்  29 அன்று கப்பல்துறை அமைச்சர் வி.பி.கோயலுக்கு மத்திய அமைச்சர் எஸ்.திருநாவுக்கரசர் சேதுசமுத்திரத்திட்டம் குறித்து விரிவான விளக்கம் ஒன்றை அளித்தார்.  2005ஆம் ஆண்டு மார்ச் 31 தேசிய சுற்றுப்புறப்பாதுகாப்பு ஆணையத்தின் அனுமதி கிடைத்தது. அதன் பிறகு மன்மோகன் சிங் தலைமையிலான யுபிஏ அரசில் கப்பல் மற்றும் நெடுஞ்சாலைத்துறை அமைச்சராக டி.ஆர்.பாலு பதவியேற்றார். அதன் பிறகு கலைஞரின் விடா முயற்சியால் சேது சமுத்திரத்திட்டத்திற்கு 2005-ஆம் ஆண்டு ஜூன் மாதம் 2427.4 கோடி ரூ. மதிப்பில் திட்டம் துவங்க நிதி ஒதுக்கப்பட்டது. இதனிடையே தமிழ்நாடு சுற்றுப்புறச்சூழல் பாதுகாப்பு நிறுவனம் 2004 ஆம் ஆண்டிலிருந்து 2005 வரை தமிழ் நாட்டின் கடற்கரையோர பகுதிகளில் வசிக்கும் மக்களிடம் சேது சமுத்திரத்திட்டத்தைப் பற்றி அவர்களின் ஆலோசனை களைக் கேட்டு அறிந்துகொண்டது.

2004 டிசம்பர் 6 ஆம் தேதி சேது சமுத்திர கால்வாய்த் திட்ட நிறுவனம் அமைக்கப்பட்டது.  இதன் துவக்கவிழா மதுரையில் 2005 ஆம் ஆண்டு ஜூலை 2 ஆம் தேதி நடைபெற்றது. துவக்கவிழாவில் காங்கிரஸ் தலைவர் சோனியா காந்தி, திமுக தலைவர் கலைஞர்,  டி.ஆர்.பாலு, பி.சிதம்பரம் போன்றோர் கலந்து கொண்டனர்.  ஆதம் பாலம் எனப்படும் மணல் திட்டுக்களைத் தோண்டும் பணி 2006-ஆம் ஆண்டு டிசம்பர் 12இல் ஆரம்பிக்கப்பட்டது.
இந்த நிலையில், இந்தத் திட்டத்திற்கு எதிர்ப்பு தெரிவித்து பலர் மதுரை நீதிமன்றத்தில் வழக்குத் தொடுத்தனர். வழக்கை விசாரித்த நீதிமன்றம் சுற்றுப்புறச்சூழல் அமைப்பின் அறிக்கை மற்றும் நாட்டு நலன் கருதி அரசு எடுத்த நடவடிக்கையை தடைசெய்ய முடியாது என்று கூறி சேதுசமுத்திரத்திட்டத்திற்கு தடைவிதிக்க மறுத்துவிட்டது.

2005ஆம் ஆண்டு ஜூலை 8 ஆம் தேதி இந்திய அரசு சேது சமுத்திரத்திட்டத்தை விரைந்து முடிக்கும் வகையில் கண்காணிப்புக் குழு ஒன்றை நியமித்தது. இதன் அடிப்படையில் பணிகள் சுமூகமாக நடைபெற்றுக்கொண்டு இருந்தன.
2007ஆம் ஆண்டு சென்னை பல்கலைகழகத் துணைவேந்தர் இராமச்சந்திரன் தலைமையில் 19 பேராசிரியர்கள் கொண்ட நாக்பூர் தேசிய சுற்றுச் சார்புப் பொறியியல் ஆய்வு நிலையம்  (Neeri) உயிர்வள ஆய்வு மய்யம் (Zoological Survey of  India) அகழ்வாராய்ச்சி மய்யம், (Archaelogical Survey of India) சென்னை பச்சையப்பன் கல்லூரி பேராசிரியர் கிருஷ்ணசாமி போன்றோர் இந்தக் கண்காணிப்பு குழுவில் இடம் பெற்றனர்.

பாரதீய ஜனதா கட்சி இந்தத் திட்டத்தை ஆரம்பத்தில் முழு ஆதரவு தந்து பிறகு மதவாத அமைப்புகளின் சூழ்ச்சிக்கு இணங்கி, சேது சமுத்திரத் திட்டம் என்பது இராமர் இலங்கைக்குச் சென்ற போது கட்டிய பாலம்;  இது இந்துக்களின் புனித சின்னங்களுள் ஒன்றாகும். இதை இடித்து சேது சமுத்திரத் திட்டம் கொண்டு வரக்கூடாது என்று கூறி சுப்பிரமணியசாமி, ஜெயலலிதா, தண்டி சுவாமி வித்யானந்தா பாரதி, ராமகோபாலன் போன்றோர் உச்சநீதிமன்றத்தில் வழக்குத் தொடுத்தனர்.  திட்டம் ஆரம்பித்து நடந்து கொண்டு இருந்த போது உச்ச நீதிமன்றம் 2007ஆஆம் ஆண்டு ஆகஸ்ட் 31  அன்று சேதுசமுத்திரத்திட்டத்திற்கு இடைக்கால தடைவிதித்தது.

பிரபல வரலாற்று ஆய்வாளர்கள் வின்சென்ட் ஏ சுமித், ஆர்.சத்யநாதய்யர் ரோமில தாப்பர் போன்றோர் சேதுசமுத்திரத்திற்கும் இராமாயணத்திற்கும் உள்ள கதையை பொய் என தங்களின் ஆய்வுகளின் மூலம் நிரூபித்துவிட்டனர். மேலும் இராமாயணம் ஒரு வரலாற்று நிகழ்ச்சி இல்லை; அது  ஒரு புனைவுக்கதை என்பது அனைவரும் அறிந்ததே, அதே போல் இலங்கை தலைமன்னார் நிர்வாகமும் ஆதம் மணல்மேட்டை இராமர் கட்டிய பாலம் என்பதை மறுத்து இது இயற்கையாக அமைந்த மணல் திட்டு என்று கூறிவிட்டது.   125 வருடங்களுக்கு முன்பு டச்சுப் பேராசிரியர்கள் ஆதம் மணல் மேடுகளை ஆராய்ந்து தங்கள் ஆய் வறிக்கையை ஜெர்மன் மொழியில் 1891ஆம் ஆண்டு பாக் நீரிணைப்பில் உள்ள ஆதம் மேடுகளும், பவளப் பாறைகளும்  என்ற தலைப்பில் நூலாக (Adam’s Bridge and Coral Reef of the Palk Strait) வெளியிட்டுள்ளனர்.
                   --------------------------------------”விடுதலை” 31-03-2014

Read more: http://viduthalai.in/page-3/77909.html#ixzz2xajarE00

1.4.14

அய்யா - அம்மா - அண்ணா! இயக்கம் - ஒரு குடும்பம் என்பது இதுதானோ!

கடந்த 28 ஆம் தேதி பெரியார் திடல் நிகழ்ச்சி என்பது எல்லா வகையிலும் வித்தியாச மாகவே அமைந்துவிட்டது - உள்ளத்தின் கழ னியில் வீரிய விதைகளையும் விதைத்துவிட்டது.

இரு நூல்கள் வெளியீடு - மருத்துவப் பேரா சிரியர் பூ.பழனியப்பன் படத் திறப்பு என்ற குடைக்குள் பல வண்ண சிந்தனைகளும், நினைவுகூரப்படவேண்டிய தகவல்களும் அணிவகுத்து வந்தன.

திராவிடர் கழகத் தலைவர் மானமிகு கி.வீரமணி அவர்களின் அய்யாவின் அடிச் சுவட்டில் (பாகம் 4, தன் வரலாறு) வெளியீட்டு விழாவும் ஒன்று.
தந்தை பெரியார் என்னும் சகாப்தத் தலை வர் கண்மூடி, அன்னை மணியம்மையார் இயக் கத்தின் தலைமைப் பொறுப்பை ஏற்று, அவர் கள் கண்மூடும் காலம் வரை 228 பக்கங்களில் வரையப்பட்ட வரலாற்றுப் பொன்னோவியம் இந்நூல்.

நான்கு ஆண்டுகள்தான் - அதற்குள்ளே எத் தனை எத்தனையோ எரிமலைகள், பூகம்பங் கள்! எல்லாவற்றிற்கும் முகம் கொடுத்து நாட்டப் பட்ட வெற்றிக்கொடிக் கம்பங்கள் ஏராளம்! ஏராளம்!!

அய்யா ஒப்புக்கொண்டு பயணத்தைத் தொடர முடியாத அந்தத் திருவண்ணாமலை யில், புறப்பட்டு விட்டேன்! என்று அறிக்கை வெளியிட்டுப் புறப்பட்டார் அந்தப் புற நானூற்றுத்தாய்.

அய்யா தொடங்கிய அனைத்து ஜாதியின ருக்கும் அர்ச்சகர் உரிமைக்காக அடுக்கடுக் கான போராட்டங்கள்.

ஈரோடு பெரியார் - அண்ணா நினைவகம் திறப்பு!

பெரியார் பகுத்தறிவு நூலகம் - ஆய்வகம் திறப்பு!

இந்தியாவையே திரும்பிப் பார்க்க வைத்த இராவண லீலா நிகழ்ச்சி!

சுயமரியாதை இயக்கப் பொன்விழா!

இந்தியாவையே இருள வைத்த அவசர நிலைப் பிரகடனம்!
கழகப் பொதுச்செயலாளரும், கருஞ்சட்டைக் கழகப் பொறுப்பாளர்களும் காராக்கிரகத்தில் (மிசா சட்டத்தின்கீழ்) னீ வருமான வரித்துறை என்னும் அக்கிர காரத்தின் ஈட்டிப் பாய்ச்சல்!

ஜனநாயகத்தின் கழுத்தை நெரித்த இந்திரா காந்திக்குக் கறுப்புக் கொடி
இவையெல்லாம் பொதுத் தலைப்புகள் - உள்தலைப்புக்குப் போனால், அது போய்க் கொண்டே இருக்கும்.

அந்நூலில் இவற்றையெல்லாம் அணி வகுக்கச் செய்துள்ளார் - இயல்பான எழுத் தோட்டம் - நாவலைப் படிப்பது போன்ற விறு விறுப்புகள் - ஆனாலும் ஒன்றுகூட மிகைப் படுத்தப்பட்ட ஒன்றல்ல.

வேண்டுமானால், தன்னைப்பற்றி என்பதால் தன்னடக்கத் தடுப்புச் சுவர்கள் ஆங்காங்கே!

இந்த நூல் வெளியீட்டு விழாவில் ஏற்புரை வழங்க வந்த கழகத் தலைவர் - அந்தக் குறுகிய நேரக் கட்டுக்குள் அம்மா என்னும் அந்தக் கொள்கைப் பாச வலைக்குள் திக்குமுக்காடி விட்டார்.

எந்த ஒரு தலைவர் மறைந்தாலும் இரங்கல் கூட்டங்கள்தானே நடக்கும் - இந்த ஈரோட்டுக் குருகுலத்திலோ எல்லாம் வித்தியாசம்தான்.

சூளுரைச் சூறாவளியாக அவை திகழ்ந் தன; மக்களைச் சந்திக்கச் சென்ற இடங்களில் எல்லாம் மக்களின் கண்களில் நீர் வீழ்ச்சிகள் - எங்கள் அய்யா மறைந்தாரே! என்ற ஆழ் கடல் துயரத்தின் வெடிப்புகள் அவை!
நாற்பது ஆண்டுகளில் நடக்கவேண்டி யவை எல்லாம் அந்த நான்காண்டுகளில் நடந்தன.

அய்யா எதிர்பார்த்தது அத்தனையும் நடந்தது! அய்யா நம்பிக்கை வைத்ததெல்லாம் அம்மா எடுத்து வைத்த ஒவ்வொரு அடியிலும் முத்திரை அடியாகக் காண முடிந்தது.

ஆனால், 59 வயதில் என் பணி முடிந்தது என்று விடைபெற்றுச் செல்லுவார் என்பதை யார்தான் எதிர்பார்த்திருப்பார்கள்?

அய்யாவின் உடலைப் பேணுவதிலேதான் அவரின் எண்ணமும், செயலும் இருந்தனவே தவிர, தன்னைப்பற்றி ஒரே ஒரு கணம்கூட எண்ணிப் பார்க்கவில்லையே - என் செய்வது!

ஒரு சமூகப் புரட்சி இயக்கத்துக்கு பெண் ணொருவர் தலைமை தாங்கிய அந்தச் சாத னையை - நிட்டூரங்களை வென்ற நிகழ்வுகளை சரித்திரத்தின் ஒவ்வொரு அசைவும், அங்குல மும் பறைசாற்றும் என்பது காலத்தின் கல் வெட்டாகும்.

துணிவு, அறிவு - இரண்டும் சேர்ந்தவர் அன்னையார் என்றார் ஏற்புரையில் ஆசிரியர் மானமிகு கி.வீரமணி அவர்கள்.

அவதூறு, பழிச் சொல் இவற்றை ஏற்றும், ஆத்திரம் கொள்ளாமல் அமைதி கொண்டதால் அன்னையார் ஒரு கின்னஸ் சாதனையாளர் என்றார். சகிப்புத் தன்மைக்கு அவர் ஓர் இலக்கணம்!

இவை எல்லாம், தாம் ஏற்றுக்கொண்ட மிகப்பெரிய பொறுப்புக்கான விலை என்றே நினைத்தார் நிலைகுலையாத அந்தத் தாய்!

அறிஞர் அண்ணா அவர்கள், அம்மா அவர்களின் தொண்டினை ஏற்று, அமைதி பெற்று ஒப்புதல் வாக்குமூலம் கொடுத்த அந்தத் தருணத்திலேயே அன்னையார் அவர் களின்மீது பாய்ந்திருந்த அத்தனைப் பழிகளும், தூற்றல்களும் தூள் தூளாகிவிட்டனவே!

அய்யா அவர்களிடம், நான் வந்து சேரும்போது, இப்போது எனக்கு என்ன வயதோ, அதே வயதுதான் அப்போது அய்யா வுக்கு. இப்பொழுது எனது உடலில் என் னென்ன கோளாறுகள் உள்ளதோ, அதைவிட அதிகமான கோளாறுகள் அய்யாவுக்கு இருந்தன.

அப்படியிருந்த அய்யாவை கடந்த முப்பது ஆண்டுகளாகக் கட்டிக் காத்து, அவரை நோயின்றி, உடல்நலத்தோடு பாதுகாத்து வரும் பெருமை மணியம்மையாரையே சேரும் என்பதுதான் அறிஞர் அண்ணாவின் அரிய வாக்குமூலம்.

இதன்மூலம் அறிஞர் அண்ணா அவர்கள் பெருமையின் உச்சியில் ஏறி பெருமகனார் என்னும் பண்பின் ஒளியானார்!

அன்னை மணியம்மையார் அவர்களோ அப்பழுக்கற்ற தூய தொண்டின் முழு நிலவாக முகிழ்த்தெழுந்து விட்டார்.

அண்ணா முதலமைச்சர்; அய்யாவை அமைச்சர் குழாமோடு சந்திக்க திருச்சியை நோக்கி பறந்து வந்தார்.

அந்த நிகழ்வும், சந்திப்பும் சரித்திரத்தின் சுகமான சங்கமம்! கடந்த 18 ஆண்டுகளைக் கெட்ட கனவாகக் கழித்துக் கட்டி, தமிழர் நலம் எனும் பார்வை ஒன்று மட்டுமே களை கட்டி யதே -  அது தமிழர்தம் வாழ்வைக் கவ்வியி ருந்த கிரகணத்தை விரட்டியடித்து, விடியல் வெளிச்சத்தை உமிழ்ந்த ஒப்பரிய நிகழ்வு!

தலைவர் தந்தை பெரியாரும் - அறிஞர் அண்ணாவும் தமிழர்களுக்குக் கற்பித்த இன மானம் என்றால் என்ன என்பதற்கான வழிகாட்டும் அடிப்படைப் பாடமாகும்.

அன்னை மணியம்மையாரை திருச்சி பெரியார் மாளிகையில் பார்த்த அண்ணா அவர்களுக்கு அந்த நொடியில் தோன்றிய மின்னல் வெட்டுப் போன்ற சிந்தனை;

அம்மா உங்களை எப்படியெல்லாமோ விமர்சித்திருக் கிறோம் என்று வார்த்தையை அண்ணா சொல்லி, வாக்கியத்தை முடிப்பதற்குள், தடுத் தாட்கொண்டவராய் அன்னையார் அவர்கள், காப்பி சாப்பிடுங்கள்! என்று  அகமும் முகமும் மலர்ந்து சொன்னார்களே! அடடா, அய்யா அவர்கள் எப்படியெல்லாம் இந்த இயக்கத்தவர்களை வார்த்து வளர்த்துக் கொடுத்திருக்கிறார்!

கடந்த வெள்ளியன்று நடந்த பெரியார் திடல் நிகழ்ச்சி - பல வகைகளிலும் சிந்தனைத் தாக்கத்தை ஆழமாக விதைத்துவிட்டது என்பதில் அய்யமில்லை!
அய்யா - அம்மா - அண்ணா இச்சொற் களில் ஒரு குடும்ப உறவு ஒட்டி உறவாடுவதைக் கவனித்தீர்களா?

இயக்கம் - ஒரு குடும்பம் என்பது இதுதானோ!
 
                   --------------------------”விடுதலை” 01-04-2014
Read more: http://viduthalai.in/page-8/77969.html#ixzz2xdtWYNDs

பெரியாரே என் தலைவர்! திராவிடர் கழகமே என் இயக்கம்!

நன்னன் அவர்களின் நளபாகம்!
பெரியார் பேருரையாளர் பேராசிரியர் முனைவர் மானமிகு மா.நன்னன் அவர்கள் கடந்த 28 ஆம் தேதி சென்னை பெரியார் திடலில் சமைத்துத் தந்த நளபாகம் இயக்க வரலாற்றில் ஒரு புதிய சிந்தனைக்கான நீரோட்டம்!
ஆழமான சிந்தனைக்கு அடியெடுத்துக் கொடுத்த அருமை! இயக்கத்தில் இருக்கிறோம் - செயல்படுகிறோம் - நம்மைச் சுற்றி, நாளும் பல நிகழ்வுகள் நிகழ்ந்து கொண்டே இருக்கின்றன. இந்த நிகழ்ச்சி நிரல்களை நாளும் நடக்கும் அன்றாட செய்திகளாகவே நினைத்துக் கொண்டு இருக்கிறோம்.

அவற்றையும் தாண்டி அரிய சிந்தனைகளுக்கான விதைகள் அவற்றில் சூல் கொண்டுள்ளன என்பதை நம்மில் எத்தனைப் பேர் அசைப் போட்டுப் பார்க்கிறோம்? அவற்றில் எத்தனைப் பாடங்களைப் படித்துக் கொள்கி றோம் - பதிவு செய்கிறோம்?

இந்தக் கேள்விகளுக்கு மிகப் பெரும்பாலோரிடம் பதில் கிடையாது என்பதை ஒப்புக்கொண்டுதான் தீர வேண்டும்.

தொண்ணூறைத் தாண்டிப் பயணம் செய்யும் அவர் தன்மான இயக்கத்தோடு நெருக்கமான தொடர்புடையவர் என்கிற முறையில் அப்படிச் சிந்திக்கவும், சிந்தித்த வற்றை - சொல்லலாமா? சொல்லக் கூடாதா? என்பதைப் பற்றிச் சிந்திக்காமல் சொல்லக் கூடியவராக இருக்கிறார். மற்றவர்களின் சிந்தனைக்கே அவற்றை விட்டுவிடுகிறார் நன்னன் அவர்கள்.
ஆரியத்தை எதிர்த்தவர்களை விட்டு வைத்தார்களா? நந்தனுக்கு என்ன கெதி ஏற்பட்டது? வள்ளலார் இராம லிங்க அடிகளாருக்கு ஏற்பட்டது என்ன?
வெகுதூரம் போகவேண்டாம். நெருக்கடி காலத்தில் என்ன நடந்தது - நம் கண்முன்னே?

ஒரு சுப்பிரமணியனும், ஒரு தவேயும் என்ன பாடுபடுத்தினார்கள்? சந்தர்ப்பம் கிடைத்தால் மறுபடியும் அப்படியே நடந்துகொள்பவர்கள்தான் அவர்கள்.
பெரியாருக்குப் பின் திராவிடர் கழகம் சோர்ந்து போயிருந்தால், தளர்ச்சி அடைந்திருந்தால் என்னவெல் லாம் நடந்திருக்கும்?

ஆனால், ஒன்று பெரியார் இயக்கம் - திராவிடர் கழகம் எப்படி உண்டானது? அது காலத்தின் கட்டாயப் பிரசவம்!

சூரியன் எப்படி உண்டானதோ அதுபோன்றே இயல் பாகவே அது தோன்றவேண்டிய அவசியம் எனும் முறை யில் முகிழ்த்தது. இயற்கையாக உண்டான இந்த இயக் கத்தை யாராலும் அழிக்கவும் முடியாது!

அண்ணா அவர்கள் மிகப்பெரிய அறிஞர். அய்யா வின் தலைமைச் சீடர். அவரும் அவரைச் சார்ந்து ஏராள மானவர்கள் பெரியாரை விட்டுப் பிரிந்த போதும், பெரியார் நின்றார் - நிலைத்து நின்றாரே! பெரியாரின் தத்துவம் தேவை என்ற நிலை இருக்கும்பொழுது, அது எப்படிப் பட்டுப் போகும்? எப்படி வீழ்ச்சிதான் அடை யும்? வீழ்ச்சி அடைய பலன் பெற்ற மக்கள்தான் எப்படி விடுவர்?

மக்கள் தொகுதி எக்குறையாலே
மிக்க துன்பம் மேவு கின்றதோ
அக்குறை தீர்க்கும் ஆற்றல் வாய்ந்தோனைச்
சிக்கென ஈன்று சீர்பெறுதல் இயற்கை

என்றார் புரட்சிக்கவிஞர் பாரதிதாசன்.

இதுதான் அப்பொழுதும் நடந்தது - இப்பொழுதும் நடந்துகொண்டும் இருக்கிறது.

பெரியாருக்கும், அண்ணாவுக்கும் பிணக்குகள் தோன் றியது போல் காணப்பட்டாலும், அந்தப் பிணக்குகள் காலவோட்டத்தில் மறைந்து போய் இணக்கமானது எப்படி?

பதவிப் பக்கம் தலை வைத்துக்கூடப் படுக்காத பெரியாருக்கு - இந்த மந்திரி சபையே காணிக்கை என்று அண்ணா அவர்கள் சட்டம் இயற்றும் ஓர் அவையி லேயே (20.6.1967) அறிவித்தது எதைக் காட்டுகிறது?

எத்தனை எத்தனையோ விமர்சனங்களுக்கு ஆளாக்கப் பட்டார் அன்னை மணியம்மையார்! அண்ணா அவர்களும் கூட அப்படி விமர்சனம் செய்தவர்கள்தாம்.

ஆனால், அந்த அண்ணா அவர்களே பிற்காலத்தில் அன்னை மணியம்மையார் அவர்களை அங்கீகரித்ததன் காரணம் என்ன? அவரின் அருமையை உணர்ந்து பாராட்டியது ஏன்?

அய்யாவின் ஆயுள் நீட்சிக்கு அவர்களே காரணம் என்று அண்ணாவே மனந்திறந்து பாராட்டியது எதைக் காட்டுகிறது? ஒரு காலத்தில் இருந்த அந்தப் பிணக்கு எப்படி இணக்கமாக வடிவெடுத்தது? தனிப்பட்ட பிரச்சினைகளாக, விரோதமாக இல்லாமல், இலட்சிய நீரோட்டம் எனும் முறையில் ஒரு கட்டத்தில் பீறிட்டு வெளிவருகிறது.

பெரியார் ஆயுள் நீட்சி என்பது சாதாரண ஒன்றா? அது சமுதாயத்தின் நலம் சார்ந்த - உரிமை சார்ந்த ஒன்றாயிற்றே!

அந்தக் கண்ணோட்டத்தில் பார்க்கும்பொழுதுதான் அந்தத் தாயின் அருமையும், அதற்குள் புதைந்திருக்கும் அந்தத் தியாகத் தீயும் தெற்றெனப் புலனாகும்.

ஒரு நிகழ்வை எடுத்துக்காட்டி விளக்கினார் பேராசிரியர் மா.நன்னன் அவர்கள்.
ஈரோட்டில் தந்தை பெரியார் அவர்களுடன் தங்கி இருந்து இயக்க இதழ்ப் பணிகளில் ஈடுபட்டார் அறிஞர் அண்ணா. சிறிது காலம் அங்கு தங்கியும் இருந்தார்.

பெரியார், அண்ணா ஆகியோர் மறைவிற்குப் பிறகு தந்தை பெரியார் அவர்கள் இல்லத்தை அவரின் பெயரால் நினைவில்லமாக மாற்ற கலைஞர் அவர்களின் தலைமை யிலான அரசு முடிவு எடுத்தது. அந்த வீட்டுக்கான விலை யையும்கூடக் கொடுக்க முன்வந்தார் முதலமைச்சர். அம்மா அவர்கள் ஏற்றுக்கொள்ளவில்லை என்பது ஒரு புறம்; அது ஒரு தனிச்சிறப்பு - பண்பு!
பெரியார் இல்லமாக மட்டும் அறிவிக்காமல், அய்யா - அண்ணா நினைவகமாக அது அமையவேண்டும் என்று நினைத்தாரே - நினைத்தபடி அரசு மூலம் செய்வித் தாரே - அது ஒன்றே ஒன்றுபோதும் அம்மா அவர்களின் பெருந்தன்மைக்கும், பெற்றிக்கும் என்று புலவர் மானமிகு நன்னன் அவர்கள் நினைத்துச் சொன்னது என்றும் நிலைத்து நிற்கும் - சீனத்து நெடுஞ்சுவர்!
திராவிடர் கழகத் தலைவர் மானமிகு கி.வீரமணி அவர் களால் எழுதப்பட்ட அய்யாவின் அடிச்சுவட்டில் (பாகம் 4 - தன்வரலாறு) எனும் நூலை வெளியிட்டவர் என்ற முறையில் நன்னன் அவர்கள் வெளியிட்ட கருத்து கள் மிகவும் கனமானவை! கருத்துப் பேழையில் வைத்துக் காக்கப்படவேண்டியவை!

தலைப்பே மிகவும் சிறப்பானது என்றார்.

தந்தை பெரியார் அவர்களின் அடிச்சுவட்டில் அளந்து நடைபோட்டு வந்தவர் ஆயிற்றே - எனக்கு என் சொந்தப் புத்தி தேவையில்லை - பெரியார் தந்த புத்தி போதும் என்று சொல்பவர் ஆயிற்றே!

சொந்த புத்திக்குச் சபலம் வரலாம் - பெரியார் தந்த புத்திக்கு சபலம் என்ற பேச்சுக்கே இடமில்லை என்று அதற்கு விளக்கம் சொன்ன தலைவராயிற்றே - அதனால் தான் அய்யாவின் அடிச்சுவட்டில்! என்று அர்த்தம் ஆழமுள்ள தலைப்பினைக் கொடுத்தார் தமிழர் தலைவர் வீரமணி அவர்கள்.

நூலாசிரியரைப்பற்றி ஒரே ஒரு கருத்துக் கூறுகிறேன் என்று ஆரம்பித்த பெரியார் பேருரையாளர் அவர்கள், ஆசிரியர் அவர்கள், இந்த இயக்கத்துக்குக் கிடைத்த மிகப்பெரிய பேறு! என்றார்.

பேருக்காகச் சொல்லப்பட்டதல்ல - பெரியாருக்குப் பிறகு இயக்க வளர்ச்சி - கொள்கைப் பிரச்சாரம் - அந்தப் பிரச்சாரத்திலும் காலத்திற்கேற்ப யுக்திகள் - இயக்க வெளி யீட்டில் பெரும் பாய்ச்சல், கல்வி நிறுவனங்களின் நெடிய பட்டியல் - இந்தியத் தலைநகரமான டில்லியிலேயே பெரியார் மய்யம், உலகளாவிய பெரியார் பன்னாட்டு மய்யம், பெரியார் மணியம்மை பல்கலைக் கழகம், பெரியார் நூலகம் - ஆய்வகம் - பெரியார் அய்.ஏ.எஸ்., அய்.பி.எஸ். பயிற்சி மய்யம், சூழியம் என்று சொல்ல ஆரம்பித்தால், மிகப்பெரிய பட்டியலாகும்.

பெரியார் நூலக வாசகர் வட்டம், புதுமை இலக்கியத் தென்றல், மூதறிஞர் குழு, சுயமரியாதைத் திருமண நிலை யம், தந்தை பெரியார் முத்தமிழ் மன்றம், பெரியார் சுயமரி யாதை ஊடகத் துறை, பெரியார் வலைக்காட்சி, பெரியார் மருத்துவ அணி, பெரியார் மருத்துவமனைகள், பெரியார் இலவச சட்ட உதவி மய்யம், மகளிர் பாசறை, பெரியார் பகுத் தறிவு கலை, இலக்கிய அணி, பெரியார் களம் என்பவை யெல்லாம் தந்தை பெரியார் மறைவிற்குப் பிறகு, இந்தத் தலைவரால் உருவாக்கப்பட்டவை. வீரியமான வகையில் செயல்படுத்தப்படுபவை என் பதை எவர் அறிந்தாலும் மலைக்கவே செய்வர்.
இவற்றின் பலன் மக்களின் செழுமையான விளைச் சலுக்குப் பயன்பட்டதே!
அவற்றையெல்லாம் உள்வாங்கிதான் குப்பிக்குள் மருந்தை வைத்துள்ளதுபோல, அவர் கிடைத்தது நமக்குப் பெரிய பேறு என்றார் புலவர் நன்னன் அவர்கள்.

அடுத்து அவர் சொன்னது மிகமிக முக்கியம். தோழர் களே! அவருக்கு எப்பொழுதும் மகிழ்ச்சியையும், உற்சாகத்தையும் ஏற்படுத்திக் கொடுக்கவேண்டுமாய் உங்களையெல்லாம் கேட்டுக்கொள்கிறேன்! என்றார்.

அவர் சொன்னது வேண்டுகோளாகக்கூட இருக்கலாம் - நம் தோழர்களோ அதனைக் கட்டளையாகக்கூட ஏற்றுக் கொள்ளத் தயார்தான்!
தந்தை பெரியார் ஒவ்வொரு இயக்கத் தோழரின் வீட்டுக்கும், குடும்பத் தலைவராகத்தான் இருந்தார்கள்.

பெண்ணுக்கு மணமகனா? மணமகனுக்கு மணமகளா? வீடு வாங்க வேண்டுமா? அல்லது வீடு கட்டவேண்டுமா? நீதிமன்றத்தில் வழக்கா? குடும்பத்தில் பிரச்சினையா? பிள்ளைகளின் படிப்பா? உத்தியோகமா? எதைக் கருஞ்சட்டைத் தோழர்கள் விட்டு வைத்தார்கள்?

அத்தனையையும் தனிப்பட்ட குடும்பப் பிரச்சினை யையும் ஒட்டுமொத்தமான மனித குலத்தைப்பற்றிச் சிந்தித்துக் கொண்டிருந்த அந்தப் பகுத்தறிவுப் பகலவன் திரு முன் அல்லவா வைத்தார்கள்? அவற்றை என் றைக்கும் அலட்சியப்படுத்தவில்லை அய்யா! அதுவும் தன் தொண்டின் முறையிலும் ஒரு கடமை என்று நினைத்தே மகிழ்ச்சியுடன் செய்து கொடுத்தார்கள் - அவற்றை விரிக்கின் விரிகடலாகும்!

தந்தை பெரியார் அவர்களால் முழுமையாகத் தயாரிக்கப்பட்ட கடைசித் தலைவர் இவர்! 81 ஆண்டில் 71 ஆண்டுப் பொது வாழ்வுக்குச் சொந்தக்காரர் - திராவிடர் கழகத் தலைவர் கி.வீரமணி அவர்கள்.

இது வேறு எவருக்கும் கிட்டிராத தனித்த முத்திரை!

தந்தை பெரியார்தம் தாக்கத்தின் முழுவடிவம்தான் இவர்! அந்தப் புவி ஈர்ப்பிலிருந்து விலகிச் செல்ல நினைத்தாலும் இவரால் முடியாது!
தொண்டர்களும் அப்படியே இருக்கிறார்கள். 50 ஆண்டு விடுதலை ஆசிரியராகப் பணியாற்றியவர் என்ப தற்காக 50 ஆயிரம் விடுதலை சந்தாக்கள் என்று திட்ட மிட்டு அதனைச் சாதித்தும் காட்டினரே!

50 ஆயிரம் சந்தாக்கள் தாருங்கள் என் ஆயுளும் நீளும் என்று வேறு சொல்லிவிட்டாரே - தூங்குவார்களா தோழர்கள்?

இன்று பெரியார் உலகம்! 30 கோடி ரூபாய்க்கான மகா திட்டமிது! நம்மால் முடியுமா என்று நினைக்க வில்லையே!

பெரியார் என்ற பெருஞ்சுடரை எடுத்துக்கொண் டல்லவா புறப்பட்டு இருக்கிறோம்! தந்தை பெரியார் தொண்டு போய் சேராத தமிழன் இல்லம் இருக்கிறதா? ஒரு கை பார்த்துவிடுவோம் என்றல்லவா தோழர்கள் புறப்பட்டுள்ளனர்.

தந்தை பெரியாரைத் தவிர்த்துவிட்டு, தமிழன் எங்கே? தமிழ்நாடு எங்கே? நமக்கு அடையாளமே பெரியார்! முகவரியே பெரியார் - பெரியார்தானே!!
அவர் உருவாக்கிய இயக்கம் - அவர் அடையாளம் காட்டிய தலைவர் - அவர் உருவாக்கிக் கொடுத்த சித்தாந்தம் - இலட்சியம் - போட்டுத்தந்த சபலமற்ற பாதை - இலட்சியத்தை நிறைவேற்றிட எந்த விலையையும் கொடுக்கச் சித்தமாக இருக்கும் தற்கொலைப் பட்டாளமாம் கருஞ்சட்டைச் சேனை -  இவை இருக்கையில் என்ன பயம்? என்ன தயக்கம்? எதைத்தான் சாதிக்க முடியாது?

பெரியார் பேருரையாளர் பேராசிரியர் முனைவர் நன்னன் அவர்கள் தெரிவித்த கருத்துகள் தோழர்களே நம் சிந்தனையில் என்றென்றைக்கும் நிலைக்க வேண்டிய அன்றாடம் பார்த்துக்கொள்ள வேண்டிய நிலைக்கண் ணாடி - தொண்ணூறைத் தாண்டிய அந்தப் பெரியார் பெருந்தொண்டருக்கு சூழியம் கண்ட அந்த சிந்தனை யாளருக்கு - பெரியார் பேருரையாளருக்கு நமது வணக்கமும், நன்றியும் உரித்தாகட்டும்!

பெரியாரே என் தலைவர்!  திராவிடர் கழகமே என் இயக்கம்!

ஒரு தொண்டனின் எளிமையான கணிப்பாக இன்னொன்றையும் எடுத்துக் கொள்ளலாம். (நிகழ்ச்சியில் இதனைச் சொன்னவர் - திராவிடர் கழகத் துணைத் தலைவர் கவிஞர் கலி.பூங்குன்றன்).

தி.மு.க. பிரிந்தபோது அவர் சிறுவன் வீரமணிதான் - வயது 16; அவரை ஆளாக்கிய அவரின் அண்ணன் சுயமரியாதைச் சுடரொளி மானமிகு கி.கோவிந்தராசன், அவரது ஆசானான ஆசான் புதூர் ஆ.திராவிடமணி அவர்கள் தெருக்காரர்கள், ஊர்க்காரர்கள். சுற்றம் எல்லாமே பெரியாரை விட்டு விலகிப் புதிய முகாமுக்குச் சென்ற நிலையில், அந்த 16 வயது மாணவன், பெரியாரே என் தலைவர்! திராவிடர் கழகமே என் இயக்கம்! என்று சிந்தாமல், சிதறாமல் உறுதியாகச் சிந்தித்தது எப்படி? செயல்பட்டது எப்படி?

பொதுவாக அந்த வயதில் மற்றவர்களைச் சார்ந்தே செல்லக்கூடிய நிலைதான் இருக்கும். இதனைப் பிஞ்சில் பழுத்தது என்று சொல்லலாம். (வழக்கமான பொருளைக் கொள்ளற்க).

இந்த இடத்தில் புரட்சிக்கவிஞரின் தொலைநோக்குக் கணிப்பையும் இணைத்துக் கொள்ளலாம்.

தமிழன் அடிமை தவிர்த்து குன்றென
நிமிர்தல் வேண்டும் என்று நிகழ்த்தும்
பெரியார் ஆணை ஒன்றே பெரிதெனக்
கருதிய கருத்து வீர மணியை
வீண்செயல் எதிலும் வீழ்த்த வில்லை!

அந்த 16 வயது சிறுவன் வீரமணி வித்தியாசமானவராக இருந்ததால், இன்றைக்குத் தமிழர் தலைவராக - திராவிடர் கழகத்தின் ஈடு இணையற்ற தலைரவாக - உலகம் போற்றும் ஒப்பற்ற ஒளியாக - பெரியார்தம் எச்சமாக - எவ்வித சபலங்களுக்கும் ஆளாகாத இலட்சிய மாந்தராக ஒளிவீசிக் கொண்டு இருக்கிறார். (துணைத் தலைவரின் இந்தக் கருத்தையும், புலவர் நன்னன் அவர்களின் கருத்துக் கோவையில் ஒரு அரைப்புள்ளியாகவாவது இருக் கட்டுமே!).

---------------------------------மின்சாரம் அவர்கள் எழுதிய கட்டுரை "விடுதலை” 31-03-2014