Search This Blog

5.8.13

மதக்கொடுமை - தந்தை பெரியார்

மதக்கொடுமை


 

நம் மதமும், நம் நீதிகளும், நம் தெய்வங்களுமே நமது கல்வியற்ற நிலைமைக்குக் காரணமாகும். உதாரணமாக வேத தர்ம சாஸ்திரங் களைப் பாருங்கள் அவற்றில் இன்னார்தான் படிக்கலாம். இன்னாருக்குச் சொல்லிக்கொடுக்கக் கூடாது என்கின்றதான நிபந்தனை யிருக்கிறது. இதனாலேதான் நம் நாட்டில் கல்வி இல்லை.

சூத்திரன் படிக்கக் கூடாது. அவனுக்குப் படிப்பு சொல்லிக் கொடுக்கக் கூடாது என்று சொல் லப்பட்டிருக்கிற இந்து மதத்திற்கு நாம் கட்டுப்பட்டதால் சூத்திரா என்ற நாமத்தை நாம் ஏற்றுக் கொண்டதால் படிக்க முடியாமல் போய் விட்டது.
மிஸ் மேயோ பனகால் அரசரைக் கண்ட போது பார்ப்பனரல்லாதா ருக்கு மூளையில்லையா? ஏன் படிக்கவில்லை என்றார். அதற்கு பனகால் அரசர் அது பார்ப்பனர் மூளையின் சூழ்ச்சியாலேயே பார்ப் பனரல்லாதார் படிக்க முடியாமல் போயிற்று என்றார். அப்படியே மேயோ அம்மையாரும் எழுதி விட்டார்.

திரு. சத்தியமூர்த்தி சாஸ்திரி இந்தக் குற்றத்தை மறுக்கையில் மாட்டிக் கொண்டார். அவர் சூத் திரர்கள் வேத சாஸ்திரந்தான் படிக்கக் கூடாதே யொழிய மற்றவற்றைப் படிக்கலாம் என்று இருப்பதாகச் சொன்னார். முன் காலத்தில் வேதம், சாஸ்திரம், இவைதவிர வேறு படிக்க நூல் இல்லை. இங்கிலீஷ்காரன் வந்த பிறகு தான் புத்தகம் ஏற்பட்டது. முன் காலத்தில் படிப்புக்கு வேறு வசதி இல்லை. நீதி நூல்கள் தான் இருந்தன. புராணங்கள் தவிர வேறு இலக்கியம் இல்லை. அவைகளும் வடமொழியில்தான் இருந்தன. இப்படியெல்லாம் இருந்ததால் நாம் படிக்க முடியவில்லை வெள்ளைக் காரர்கள் வந்த பின்பே நாம் இப்போது 100-க்கு 7 சதவீதமாவது படிப்பு அனுபவிக்க முடிந்தது. இக்காலத்திலும் பார்ப்பனர்கள் கேள்வியின்றி ஆட்சியிலிருந்ததால் அவர்கள் மாத்திரமே படிக்கச் சௌகரியமாக விருக்கும் படியாக வழிகளை வகுத்து வந்தார்கள்.

வீண் செலவால் தரித்திரம்

பயனில்லாத வழியில் மதத்தின் பேரால் நமது பணத்தையெல்லாம் பாழாக்குகிறோம். ஒரு மனிதன் தினம் 8 அணா சம்பாதித்து 4 அணா மிச்சம் பிடித்தால் அவன் அதை பிதிர்களுக்கும், சடங்குகளுக்கும், சாமிகளுக்கும், பொங்கல்களுக்கும் செலவு செய்யவே வழி காட்டப் படுகிறான். அவன் ஒரு வாரத்தில் சேர்த்ததைக் குடியில் செலவு செய்கிறான். ஒரு மாதத்தின் மீதத்தைப் பண்டிகையில் செலவு செய்கிறான். ஒரு வருஷ மீதத்தைத் திதியில் செலவு செய்கிறான். 10 வருஷ மீதத்தைக் கலியாணம் கருமாதியில் செலவு செய்து விடு கிறான். இவையன்றியும் சில்லறைச் சடங்குகளும், சில்லறைத் தேவதை களும் உற்சவங்களும் நம் செல்வத்தை விழுங்கிவிடுகின்றன. மேற்கொண்டு கடனும் வாங்கச் செய்கின்றன. இவைகளே நாம் நிரந்தர கடனாளியாகவும் தரித்திர வான்களாகவும் இருப்பதற்குக் காரணங்களாகும். 

இதையெல்லாம் நாம் நினைத்துப் பார்ப்பதில்லை. படிப்புக்குப் போதுமான பணம் இல்லையா? நமது தஞ்சாவூர் ஜில்லாவை எடுத்துக்கொள்ளுங்கள். உற்சவங்கள் காரணமாய் வருடம் 40 ஆயிரம், 50 ஆயிரம், லட்சம் ரூ. வரை வருஷ வருமானமுடைய 30, 40 கோயில்கள் இருக்கின்றன. சமயங்கள் காரண மாய் வருடத்தில் 5 லட்சம், 10 லட்சம் வரும்படியை உடைய பல மடங்கள் இருக்கின்றன. கணக்குப் போட்டால் எவ்வளவு ரூபா மொத்த மதிப்பு ஆகிறது. உற்சவ செலவும்  ஜனங்கள் போக்குவரத்து, ரயில் முதலிய செலவும் சேர்த்து எல்லாம் பார்த்தால் எந்த காரணத்தினாலும் 1 கோடிக்கு குறையாது. திருச்சி ராபள்ளி ரங்கநாதர், தென்னாற்காடு நடராஜர், மதுரை மீனாட்சி, ராமனாதபுரம் ராமலிங்கம் ஆகிய சாமிகளும், மற்றும் வட ஆர்க்காடு ஜில்லா அருணாசலம், செங்கற்பட்டு வரதராஜ உடையார்; சொன்னப் பட்டினம் கபாலீசர், சித்தூர் வெங் கிடாசலபதி ஆகிய சாமிகளின் உற்சவங்கள் கணக்கு எவ்வளவு திருப்பதி கோயிலில் 20 லட்ச ரூபாய் காணிக்கை; ஏழரைக் கோடி ரூபாய் சொத்து, நகை, பாண்டுகள், வாகனங்கள், கட்டிடங்கள் இவற்றை எல்லாம் விற்றுக் கணக்குப் போட்டுப் பார்த்து 100க்கு 6 வட்டி வீதம் 40 லட்சம் ரூ வட்டி அடையலாம். இந்த ஜனங்கள் காணிக்கைகள் உண்டி யலில் கொடுத்தல் போக வர செலவு எல்லாம் 60 லட்சம் ரூபாய் ஆகும். அவ்வளவும் நம் மக்கள் வீண் செலவு  செய்து விடுகிறார்கள். திருப்பதிக் குப் போய் மொட்டை அடித்துக் கொள்ளுகிறவர்களின் செலவு எல்லாம் சேர்த்து மொத்தத்தில் 1 கோடி ரூபாய் ஆகிறது. இது போலவே இந்த இரண்டு ஜில்லா விற்கு மாத்திரம் மேற்படி 2 கோடி ரூபாயாலும் எவ்வளவு கல்வி பரப்ப முடியும்? மற்ற சாமிகள் பணத்தாலும் எவ்வளவு கல்வி பரப்ப முடியும்? என்பதை யோசித்துப் பாருங்கள். இந்த ஜில்லாவிலுள்ள மடங்கள் என்ன போதிக்கின்றன? என்ன அறிவை வளர்க்கின்றன?

தலைக்கு  நாள் ஒன்றுக்கு, 2, 5, 10, 15 ரூபாய் வரை, சராசரி சம்பாதிக்கக் கூடிய மக்களையுடைய அய்ரோப்பிய தேசங்கள் இருக் கின்றன. நம் தேசத்தில் ஒருவன் சராசரி ஒன்றரை அணாதான் சம்பாதிக்கிறான். இது கூட இரண்டரை அணா செலவு செய்யக் கற்ற பிறகுதான். இத்தனைக்கும் நாம் ஒரு செல்வக் கடவுளைக் கும்பிடுகிறோம். விளக்கமாறு, முறம், அம்மிக் குழவி, சாணிச் சட்டி உள்பட எல்லாம் லட்சுமி என்கிறோம். அப்படிக் கும்பிடும் நாம் இன்னும் ஏழையாகவே இருக்கிறோம். நம் மக்கள் சிங்கப்பூர், கொளும்பு, நேட்டால், தென்னாப்பிரிக்கா முதலிய இடங்களுக்குக் கூலி ஆட் களாகப் போகிறார்கள். இத்தனை லட்சுமிக் கடவுள்கள் இருந்தும் இந்தத் தரித்திர நிலைமையில் தான் இருக்கின்றோம். இதற்கு நம் சோம்பேறித்தனமும் நம் மக்கள் பணம் அனாவசியச் செலவு செய் யப்படுவதுமே காரணம். பணக்காரன் தொழில் துறையில் பணம் செலவு செய்வதில்லை. பணம் சேர்ந்தவன், கடவுள் தந்தார் என்கிறான். ஏழையானவன் கடவுள் நமக்குக் கொடுக்கவில்லை என்று நினைக் கிறான். ஏழை மக்கள் கடவுள் கொடுக்க வில்லை என்கின்றார் களேயொழிய அப்படிப்பட்ட கடவுளை ஒரு கை பார்ப்போம் என்று நினைப்ப தில்லை. எதற்கும் கடவுள் செய் வான் என்ற கொள்கையே இருக் கிறது.
செல்வமானது கல்விக்கும் தொழிலுக்கும் உபயோகமாகும்படி செலவு செய்யப்படாமல் பணக்காரர்களால் சாமிக்கும், கோயில்களுக்கும் சடங்கிற்கும் போய்விடுகிறது. சாமிக்கு 3 வேளை 6 வேளை பூசை செய்தல் தாசி, மேளம் ஏற்படுத்தல் மரக்கட்டைகளின் மேல் பொம்மைகளை ஏற்றி தேர் என்று சொல்லி இப்படியாக 5,000,10,000 பேர் இழுப் பதில் பணத்தைப் பாழ் செய்கிறார்கள். இது மோட்சமாம்! இப்படி யெல்லாம் ஏழை மனிதன் தலையில் கை வைத்து மேனாட்டார் சாமிக்குக் கொடுப்பதில்லை. அவர்கள் குழவிக் கல்லை நட்டு கும்பிடுவதுமில்லை. ஒரு மேல் நாட்டான் தன் சொத்தைத் தர்மம் செய்ய எண்ணினால் மருத்துவ ஆஸ்பத்திரி கல்வி அபி விருத்திக்குக் கொடுப்பான். ஒரு கண் ஆஸ்பத்திரிக்குக் கொடுப் பான். குஷ்டரோக ஆஸ்பத்திரிக்குக் கொடுப்பான். தொத்து வியாதிகள் வராமல் தடுக்கக் கூடிய ஆஸ்பத் திரிக்காகவும் கொடுப்பான். இத்து டனில்லாமல் அவன் தன் நாட் டையும் படிக்க வைத்த பின் நம் நாட்டிலுள்ள ஏழைகளும், அனாதை களும் உயர்த்தப் படுவதற்காக மிஷன் பாடசாலைகள் ஏற்படுத்தி யிருக்கிறான். தொழிற் சாலை வைக்கிறான். நாமும் அதில் பங்கு அனுபவிக்கிறோம். நம் பிள்ளைகளையும் அவர்களுடைய பள்ளிக் கூடங்களுக்கு அனுப்புகிறோம். அவர்களது ஆஸ்பத்திரிகளுக்கும் செல்லுகிறோம். நாமோ தவறான வழியாகக் குழவிக் கல்லின் தலை யில் நம் செல்வத்தைப் பாழாக்குகிறோம். நம்மிடம் அறிவு இல்லை. ஆகையினால் செல்வ விருத்தியும் இல்லை.

திருடனுக்குத் திருடி பணம் வந்தாலும் அவன் காத்தானுக்கும், காளிக்கும் பொங்கல் போட்டு பாழாக்குகிறான். புதையல் எடுத்தாலும் சாமி தலையில் போட்டு விடுகிறான். இந்த நிலைமைக் கெல்லாம் நம் மூட நம்பிக்கைகளே காரணம். மற்ற நாட்டான் நம் நாட்டின் இந்த நிலைமையைக் கண்டு சிரிக்காமல் இருக்க முடியாது. கல்லுக்கு 15 தேவடியாள், 20  ஆயிரம் ரூபாய்  செலவில் உற் சவம்! அது தினம் 10 வேளை தின்பது! இவை போன்றவைகளுக்கு நம் முட்டாள் தனமே காரணம். நம் முட்டாள் தனத்தையெல்லாம் வெள் ளைக்காரன் உணர்ந்து கொண் டான். இந்த நிலையில் அவன் எப்படி நமக்குப் பயப்படுவான்? நாம் இப்படி யிருக்க வெள்ளைக்காரனுக்குத் தான் நன்மை. இப் பொழுது எங்கும் நூல் நூற்கப்படுகிறது. ஒரு கொட்டங்கச்சியில் உப்புத் தண் ணீரை முகந்து 2 அணா விறகைச் செலவு செய்து உப்பு காய்ச்சினால் வெள்ளைக் காரன் ஓடிப் போய் விடுவானா? தக்ளியில் நூல் நூற்ப தால் வெள்ளைக்காரன் நடுங்கி விடுவானா? நமது குற்றங்களை உணர்ந்து நாம் பரிகாரம் செய்து கொள்ள வேண்டாமா?

கடவுளைப் பற்றிக் கவலை வேண்டாம்

உங்களுடைய தெய்வமும், மதமும் விடப்பட்டொழிந்தாகவே வேண்டும். நான் கடவுளை உண்டு என்றோ இல்லை என்றோ சொல்ல வரவில்லை. கடவுள் இருந்தால் அது இருக்கட்டும். அது இந்த ராமசாமிக்காக ஓடிப்போய் விடாது. அதற்கு எவனும் வக்கீலாக இருக்க வேண்டியதில்லை. ராமசாமி கடவுள் இல்லை என்கிறான். பூசை வேண் டாம் என்கிறான் என்றெல்லாம் பேசுகிறார்கள். நல்ல கடவுளாக இருந்தால் அது உங்களது பணச் செலவை எதிர்பார்க்குமா? அல்லது உங்கள் எண்ணெயையும், பாலையும் பஞ்சாமிர்தத்தையும் குளிப்பாட்டு தலையும் எதிர்பார்க்குமா? கடவுள் உண்டு, இல்லை என்ற சண்டை உலகம் தோன்றிய நாள் முதல் நடக்கிறது. நமக்கு அதை முடிவு செய்ய அவசியமில்லை. உன் அறிவையும் முயற்சியையும் உன் வாழ்க்கைக்கு உபயோகப்படுத்து. உன் செல்வத்தை வீணாக கடவுளுக் கென்று அழிக்காதே என்றே சுய மரியாதை இயக்கம் சொல்லுகிறதே தவிர வேறில்லை. உங்கள் தெய் வங்களது நிலைமையில் நான் இருக்க சம்மதிக்கமாட்டேன். ஏனெனில் நீ குளிப்பாட்டும் போது தான் குளிக்கவேண்டும். நீ வேஷ்டி கட்டிவிடும் போது தான் கட்டிக் கொள்ள வேண்டும். நீ எண்ணெய் தேய்த்து விடும்போது தான் தேய்த்துக் கொள்ள வேண்டும். இதற்கு யார் சம்மதிப்பார்கள்? கடவுள் உன் பூசையையும் உற்சவத் தையும் நகைகளையும் விரும்புகிறது என்று சொல்லுவது வெட்கக்கேடு.

ஆலயங் கட்டியவர்கள் கதி

தஞ்சாவூர் ராஜாக்களை விட உலகத்தில் இன்னொருவன் கோயில் கட்டியிருக்கிறானா? சத்திரங்கள் கட்டியிருக்கிறானா? மான்யங்கள் விட்டிருக்கிறானா? அந்த கடவுள் தர்மம் அந்த ராஜாக்களுக்கு என்ன செய்தது? வம்சம் இருந்ததா? அவர்கள் வாரிசு தாரர்களுக்குக் கடவுள் தர்மம் ஒன்றும் செய்யவில்லை. வெள்ளைக் காரன் தான் சொத்துக்கு கொடுக் கிறான். அந்த சாஸ்திரங்களுக்கு மதிப்பு இருந்தால் அந்த தஞ்சாவூர் முதலிய அரசர்கள் இப்படி அழிந்து போயிருப்பார்களா?

பழனியில் குடம் குடமாய்ப் பாலைக் கொட்டுகிறார்கள். அது தொட்டியில் விழுந்து துர்நாற்றம் எடுத்துப் போய் காலரா ஏற்பட வழியாகிறது. ஏழைகளின் குழந்தைகள் பால் இல்லாமல் குரங்குக் குட்டிப்போல் மெலிந்து தவிக்கையில் குழவிக்கல்லின் தலையில் அதைக் கொட்டி வீணாக்குகிறார்கள். அந்த குழந்தைகளின் வாயில் கொட்டு என் தலையில் கொட் டாதே என்று தான் யோக்கியமான கடவுள் சொல்லுமே யொழிய எந்த கடவுளும் அதில்லை என்று கோபித் துக் கொள்ளாது. அப்படி கோபித் துக் கொண்டால் கோபித்துக் கொள்ளட்டுமே. அது நம்மை என்ன செய்யமுடியும்? (சிரிப்பு) இப்படி இருந்தால் மக்களுக்கு ஜீவகாருண் யம், பரோபகார சிந்தை, இரக்கம் இவை எப்படி ஏற்படும்?

கைலாசம், வைகுண்டம், சொர்க்கம் என்ற இவை கற்பிக்கப்பட்டது. முதல் மனிதன் அயோக்கியனானான். இவற்றின் பெயரால் மனிதனை மனிதன் இம்சித்தான். கொடுமை செய்தான். ஒரு சிம்டா விபூதிக் காக எல்லாப் பாவமும் போக்கி மோட்சம் கொடுத்ததால் மனிதனது அறிவு மயங்கிப்போயிற்று. இந்த மோட்ச நம்பிக்கைகள் ஒரே அடியாய் ஒழிய வேண்டும். இவ்வுலக அனுபவங்கள் லட்சியம் செய்யாமல் நாம் எப்பொழுது மேல் உலகமே பெரிது என்று கருதினோமோ அப்பொழுதே ஜீவகாருண்யத்திற்கும் ஒழுக்கத்திற்கும் இடமில்லாமற் போய் விட்டது. தான் மோட்ச மார்க்கத்தை நாடுவதற்காக ஒருவன் அயோக்கியனாகவும், கொடுமை செய்பவனாகவும் இருக்க வேண்டி யதாயிற்று. இது ஒருகாலும் உண்மையான நாகரிகம் அல்ல. அன்பு அல்ல, இரக்கம் அல்ல, பரோபகாரம் அல்ல.

---------------------------- - தந்தை பெரியார் --”குடிஅரசு” - சொற்பொழிவு  10.08.1930, 17.08.1930

3.8.13

ஆடிக் கூத்து!பக்திப் படுகுழியில் விழுந்து மதியையும் நிதியையும் இழக்கலாமா?

ஆடிக் கூத்து! 


மத வியாபாரிகள் எந்தக் கழி சடையையாவது கட்டவிழ்த்து விட்டு லாபம் சம்பாதிப்பது என்பதைப் பிழைப்பாகக் கொண்டவர்கள்.

ஒவ்வொரு மாதத்திலும் ஏதாவது ஒரு பண்டிகை வைத்திருப்பார்கள். அதற்கொரு கதையைக் கட்டி வைத்திருப்பார்கள். பக்திப் போதை ஏறிய மக்களோ கஷ்டப்பட்டுச் சம்பாதித்த பணத்தை அவர்களிடம் பறி கொடுத்து ஏமாந்த சோணகிரிகளாக ஆவதுதான் மிச்சம்!

அட்சய திரிதியை என்பார்கள். அந்த நாளில் குன்றிமணி அளவாவது நகை வாங்க வேண்டும்; அப்படி வாங்கினால் கூரையைப் பிய்த்துக் கொண்டு செல்வம் கொட்டோ கொட்டென்று கொட்டும் என்று கதை அளப்பார்கள் - கடன் வாங்கி அப்படி ஒரு கிராம் அளவுக்காவது தங்கம் வாங்க ஆரம்பிக்கிறார்கள்.
கடன் வாங்கி தங்கம் வாங்கிய அந்த அப்பாவி மக்கள் அந்த ஆண்டில் குபேரர் ஆகி விட்டார்களா? 

இது ஆடி மாதம் சீசன்; எங்கு பார்த்தாலும் அம்மன் கோயில்களில் திருவிழா கூத்து. ஆடி என்றால் அதற்கொரு கதை.

ஆடி என்பது புராணங்களில் குறிப்பிடப்படும் ஓர் அசுரனின் பெயராம்; நினைத்த மாத்திரத்தில் விரும்பிய உருவத்தைப் பெறும் ஆற்றல் கொண்ட வனாம்.

சிவபெருமான் தம் நெற்றிக் கண்ணைத் திறந்து அவனை அழித்தார்.  அசுரனைஅழிப்பதுதான் இந்து மதக் கடவுள்களின் கடன்?

சிவனடையும் பக்தி ஞானம் அவனுக்கு இருந்த காரணத்தால் அன்னை உமாதேவி மனமிரங்கி, அவன் நினைவாக மாதங்களில் ஒன்றை ஆடி என்று அழைத்தாளாம். அதுவே இன்றைக்கு ஆராதனை செய்யும் மாதமாக அமைந்தது என்று ஒருகதை.

இதில் ஏதாவது பொருள் இருக்கிறதா? அறிவுக்குப் பொருந்தக் கூடிய பொருள் ஏதேனும் உண்டா?

ஏற்கெனவே ஒருவன் பைத்தியக்காரன். அவன் சாராயம் குடித்துக் கொண்டிருந்த நேரத்தில் தேள் கொட்டினால் எப்படி இருக்கும்? என்று தந்தை பெரியார் சொல்லுவாரே - அதுதான் நினைவிற்கு வருகிறது.

பூமியில் அம்மன் அவதரித்த மாதமாம் இந்த ஆடி மாதம்; இந்த ஆடி மாதத்தில் செல்வாய்கிழமை என்றால் அதற்கொரு சிறப்பு; வெள்ளிக்கிழமை என்றால் அதற்கொரு கட்டுக் கதை. வெள்ளிக்கிழமை ராகு காலத்தில் துர்க்கையம்மன் கோயிலுக்கு எலுமிச்சைத் தீபம் ஏற்றி வழிபடுதல் அதிக சிறப்பாம்! பெண்கள் குழுக்கள் குழுக்களாக 108, 1008 குத்து விளக்குப் பூஜை நடத்தினால் செல்வம் கொழிக் குமாம்; செல்வம் கொழிப்பது இருக்கட்டும்; 108, 1008 குத்து விளக்குப் பூஜைக்கு பணத்திற்கு வழி என்ன? அம்மன் ஏதாவது கடன் கொடுப்பாளா? அல்லது அம்மன் மகிமையால் பக்தை வீட்டு மாடத்தில் பணம் மாயமாக வந்து உட்கார்ந்து கொள்ளுமா?

மக்களின் உழைப்பை, ஊதியத்தைச் சுரண்ட ஏற்பாடு செய்து வைத்துள்ள தில்லு முல்லுகளுக்கு அளவேயில்லை.

வியாபாரிகள் பார்த்தார்கள். ஆடி தள்ளுபடி என்று சொல்லி, கடையில் பழைய சரக்குகளை எல்லாம் தள்ளுபடியில் விற்பனையாம்.

எந்த அளவுக்கு இந்தத் தள்ளுபடிச் சமாச்சாரம் சென்று இருக்கிறது தெரியுமா?

தூத்துக்குடி மாவட்டம் சிறீ வைகுண்டம் கைலாசநாதர் கோயிலில் ஆடிக் கிருத்திகைக்கு நெய் விளக்குப் பூஜைக்குக் கட்டணச் சலுகை  அறிவித்தனர் என்றால் (தினத்தந்தி 13.8.1998 பக்கம் 10) இந்தக் கேலிக்கூத்தை என்னவென்று சொல்ல!

வழக்கமாகக் கட்டணம் ரூபாய் அய்ந்தாம்; ஆடி மாதத்தில் ரூபாய் மூன்று தானாம்! இதுதவிர, பக்தர்களுக்கு மாதந்தோறும் பரிசுகள் வேறு உண்டாம்.

ஆக பக்தி என்பது கடவுள் சக்தி புடலங்காய் எதுவும் கிடையாது.
வியாபாரமாகி விட்டது. மக்களின் மூடத்தனம் மூலதனமாகி விட்டது.

கடவுள் ஒரே ஒருவர்தான், உருவமற்றவர்; வேண்டுதல் வேண்டாமை இலான் என்றெல்லாம் பேசுவது அசல் கப்சாதான் என்பது விளங்க வில்லையா?

பக்திப் படுகுழியில் விழுந்து மதியையும் நிதி யையும் இழக்கலாமா? சிந்திப்பீர்!

              --------------------------------"விடுதலை” தலையங்கம் 3-8-2013

அண்ணல் காந்தியார் செய்த தவறு என்ன? கொலைகளில்கூட இரட்டை வேடமா? துக்க வீட்டிலும் அரசியல் தூண்டிலா?



பந்தலிலே பாகற்காய் கதை ஒன்று தெரியுமோ? அந்நாளில் திராவிடர் கழக மேடைகளில் அடிக்கடி கூறப்படுகிற கதை இது!

ஒரு சாவு வீடு; மரணம் அடைந் தவர்தம் மனைவியும் அவரது உறவினர்களும் இறந்தவருக்காக ஒப்பாரி வைத்து (தமிழ்நாட்டின் அந்நாளைய தலை சிறந்த கவியரங்கம் - இலக்கிய கற்பனை நீர் ஊற்று பீறிட்டு அடிக்கும் மேடை களே எழவு வீடுகளில் தாய்மார்களின் எதுகைமோனை குவியும் ஒப்பாரிதானே!) அழுது கொண்டுள்ளார்கள்; துக்கத்தில் பங்கு கொள்ளுவதுபோல் வந்தனர் இரண்டு சகோதரிகள் - அக்காவும் தங்கையுமாக!


அழுது ஒப்பாரி வைக்கும்போது பந்தலில் தொங்கிய பெரிய பாகற்காயைக் கண்டு விட்டு, தங்கைக்காரிக்கு ஆசை;  கண் வைத்தார்; அதை அறுத்துக் கொண்டு போக அக்காவிடம் ஒப்பாரியிலே சொன்னாளாம் தங்கை;

பந்தலிலே பாகற்காய் தொங் குதடி! எக்காடி, தொங்குதடி எக்காடி என்று; அதைக் கவனித்த அக் காள்காரியோ இவளைவிட சற்று புத்திசாலி, மெதுவாக அவளும் ஒப்பாரி மூலமே இவளுக்குப் பதில் சொன்னாள்; அதுக்கென்ன அவ சரம்? போகும்போது பாத்துக்கலாம்; போகும்போது பாத்துக்கலாம் என்று ஒப்பாரியிலே பதில் சொன்னாளாம்!

அந்தத் துக்கத்திலும்கூட இதைக் கேட்டுவிட்ட கணவன் சாவினால் பாதிக்கப்பட்ட மனைவி யானவள் உடனே தாமதிக்காமல் ஒப்பாரியிலேயே பதில் சொன்னாளாம்?

அய்யோ அதை விதைக் கல்லவோ விட்டிருக்கு; விதைக் கல்லவோ விட்டிருக்கு

சும்மா இருப்போமா? சுகத்தைத் தான் இழப்போமா? என்று கூறி எச்சரிக்கை செய்தாளாம்!

சேலத்தில் பா.ஜ.க.வின் செயலாளர் ஒருவர் கொல்லப்பட்டதன் உண்மைக் குற்றவாளிகள் உண் மையான காரணங்கள் இனி மேல்தான் கண்டுபிடிக்கப்பட வேண் டும்.

தமிழ்நாட்டில் கொலை, கொள் ளைகள் அன்றாட அவலங்களாகி விட்ட கொடுமை! தொடர்ந்த வண்ணம் உள்ளது.

அற்பக் காரணங்களுக்காகக் கூட கொலை செய்யும் கூலிப் படைகள் ஏவுகணைகளாகி எக்கச் சக்கமாகி விட்டன. இதை நியாய உணர்வுள்ள அனைவரும் கண்டிக் கின்றனர்!

பா.ஜ.க.வினர் 5,6 பேர் கொல் லப்பட்டுள்ளதற்கான உண்மைக் குற்றவாளிகள் கண்டுபிடிக்கப்பட வேண்டும். தண்டிக்கப்பட வேண்டும்.

அச்சுறுத்தல் உள்ள அரசியல் தலைவர்களுக்கு மட்டுமல்ல; மனிதர்கள் எவராயினும் பாதுகாப்புத் தேவை என்பதை நாம் யாரும் மறுப்பதில்லை.
அதுபோல கொலைகளைக் கண்டித்து, ஆழ்ந்த இரங்கல் தெரிவிப்பதிலும் தமிழ்நாட்டுத் தலைவர்கள் வேறுபாடுகள் உள்ளவர்கள் கொள்கை இரங்கல்  - கண்டனம்  ஒரு குரலிலேயே தெரிவித்தனர்.

இந்நிலையில் இக்கொலைகளை வைத்து அரசியல் ஆதாயம் தேடு வதற்கென்றே சேலத்தில் பா.ஜ.க.,  அஞ்சலி நிகழ்ச்சிக்கு வந்த அத்வானியின் பேச்சு அமைந்தது!

வாக்கு அங்கேயே கேட்டார்; அந்த இரங்கல் கூட்டத்தை, தேர்தல் பிரச்சாரக் கூட்டமாக்கி, அனுதாபத்தை வாககுகள் சேகரிக்கும் முதலாய், மூலதனமாய்ப் பயன்படுத்தியது - அரசியல் நாகரிகம் ஆகாது;  ஆகவே ஆகாது, தமிழக ஆட்சி யாளர் - முதல்வர்மீதுகூட செல்லக் கோபத்தைக் கூட காட்டாதது ஏன்? என்று பி.ஜே.பி. வட்டாரத்திற்குள்ளே ஒரு பேச்சு நடைபெற்றதாம்!

எவருடைய உயிரும் இழப்புக் குரியதல்ல; பறிப்பது மனிதநேயம் அல்ல.
அத்வானிகள் உருகினார்களே, தேச பக்தர்களுக்கு இப்படி நடக்க லாமா? என்று; அவர்களுக்கு ஒரு கேள்வி.

தேசப்பிதா காந்தியைக் கொன்றவர்கள் எப்படிப்பட்டவர்கள்? அவர் கொல்லக் காரணமானவர் படம் நாடாளுமன்றத்தில் தொங்க லாமா?

அண்ணல் காந்தியார் செய்த தவறு என்ன?

அத்வானி பிறந்த மண்ணுக்குரிய பாக்கியை - பிரிவினைக்குப்பின் சேர வேண்டிய தொகையைச் சொன்னதும், மதவெறியை கண்டித் ததும், வகுப்புரிமையின் நியாயத்தை உணர்ந்ததும் மதச் சார்பின்மையை வற்புறுத்தியதும் தானே காந்தியார் செய்த மாபெரும் குற்றம்.
கோட்சே என்ற மராத்திப் பார்ப் பனின் வாக்குமூலம் - இன்னமும் அவர் அஸ்தியை வைத்து நவம்பர் 26 - அகண்ட ஹிந்துஸ்தானம் உருவாக்க உறுதிமொழி எடுப்பது நியாயம் தானா?

அரசியல் தூண்டிலோடு தமிழ்நாட்டுக்கு வரும் ஹிந்துத்துவா ஏஜெண்டுகளைக் கேட்கிறோம்.

மோடி ராஜ்யத்தில் குஜராத்தில் குறி வைத்துக் கொல்லப்பட்ட பல்லாயிரக்கணக்கான சிறுபான்மை மக்களின் உயிர்கள் உயிர்கள் இல் லையா? அத்வானியின் மனச்சாட்சி பதில் அளிக்கட்டும் பார்க்கலாம்!

தமிழ்நாட்டுத் தலைவர்களே, நம் பாகற்காய் ஜாக்கிரதை!

-------- ----------------- ஊசி மிளகாய் -"2-8-2013”விடுதலை” யில் எழுதிய கட்டுரை

1.8.13

அனைத்து ஜாதியினரும் அர்ச்சகர் போராட்டம் ஏன்?-தமிழர் தலைவர் கி.வீரமணி


அனைத்து ஜாதியினருக்கும் அர்ச்சகர் உரிமைக்கான ஆர்ப்பாட்டம்!
திராவிடர் கழகத்தின் சார்பில் தமிழகம் முழுவதும் எழுச்சியுடன் நடைபெற்றது
அடுத்த கட்டமாக சிறை வழியும்  போராட்டமாக நடத்தப்படும்!
சட்டம் கருவறையின் வெளியில் நிறுத்தப்படலாமா?

தமிழர் தலைவர் எழுப்பிய வினா!
அனைத்து ஜாதியினரும் அர்ச்சகர் ஆக வேண்டும் என்ற உரிமை முழக்க போராட்டத்தில் தமிழர் தலைவர் கி.வீரமணி மற்றும் அனைத்துக் கட்சி பிரமுகர்களும் உணர்ச்சி முழக்கமிட்டனர். (1.8.2013  - சென்னை).

சென்னை, ஆக. 1- அனைத்து ஜாதியின ருக்கும் அர்ச்சகர் உரி மைக்கான ஆர்ப்பாட் டம் இன்று (1.8.2013) தமிழகம் முழுவதும் மிகுந்த எழுச்சியுடன் நடைபெற்றது. சென்னை சேப்பாக்கத் தில் விருந்தினர் மாளி கைமுன் நடைபெற்ற ஆர்ப்பாட்டத்திற்கு தலைமையேற்று பேசிய தமிழர் தலைவர் கி.வீரமணி அவர்கள் இச்சட்டத்தை செயல்படுத்தி இந் நாட்டை சமத்துவபுர மாக மாற்ற வேண்டும் என்றார்.

இல்லை என்றால் அடுத்தக்கட்ட போராட் டம் சிறை நிரப்பும் போராட்டமல்ல; சிறை வழியும் போராட் டமாகவும் இருக்கும் என அரசுக்கு எச்ச ரிக்கை விடுத்தார்.

தந்தை பெரியார் தம் வாழ்நாளில் இறுதியாக அறிவித்த தீண்டாமை ஒழிப்பு - ஜாதி ஒழிப்புப் போராட்டமான அனைத்து ஜாதியினருக் கும் அர்ச்சகர் உரி மையை வலியுறுத்தும் வகையிலும், தமிழ்நாடு அரசு இதனைச் செயல் படுத்தும் வகையில் நட வடிக்கை எடுக்க வேண் டும்.

உச்சநீதி மன்றத்தில் வழக்கைச் சிறப்பாக நடத்த வேண்டும். வெற்றி பெற வேண்டும் என் பதை வலியுறுத்தும் வகையிலும் பல கட்டப் போராட்டங்களை நடத்துவது என்று சென் னையில் கடந்த 9.7.2013 அன்று நடைபெற்ற திராவிடர் கழகத் தலை மைச் செயற்குழுக் கூட் டத்தில் திராவிடர் கழ கத் தலைவர் கி.வீரமணி அவர்கள் அறிவித்தார்.

அதன் அடிப்படை யில் முதற்கட்டமாக 1.8.2013 அன்று திராவிடர் கழகத்தின் சார்பில் கழக மாவட்டத் தலைநகரங் களில் (புதுச்சேரி / காரைக்கால் உட்பட) ஆர்ப்பாட்டம் நடத்து வது என தீர்மானிக்கப் பட்டது. இதற்கு திமுக, விடுதலை சிறுத்தைகள், திராவிடர் இயக்க தமிழர் பேரவை மற்றும் பல்வேறு அமைப்புகள் ஆதரவு தெரிவித்த நிலை யில், தமிழகம் முழுவதும் இன்று (1.8.2013) மிகுந்த எழுச்சியுடன் ஆர்ப்பாட் டம் நடை பெற்றது.

தமிழர் தலைவர் தலைமையுரை

சென்னை சேப்பாக் கத்தில் இன்று (1.8.2013) காலை 11 மணியளவில் நடைபெற்ற ஆர்ப் பாட்டத்திற்கு திராவிடர் கழகத்தலைவர் தமிழர் தலைவர் கி.வீரமணி அவர்கள் தலைமை யேற்று பேசுகையில் குறிப்பிட்டதாவது: 

 பல ஆண்டுகளாக இருக்கக் கூடிய சமூக அநீதியை ஒழிக்க, தந்தை பெரியாரின் வேண்டு கோளை ஏற்று அனைத்து ஜாதியினரும் அர்ச்சகர் ஆகலாம் என்ற சட்டம் கலைஞர் ஆட்சியில் கொண்டு வரப்பட்டது. இந்த ஆணையை எதிர்த்து பார்ப்பனர்கள் உச்சநீதிமன்றத்திற்கு சென்று தடை ஆணை பெற்றுள்ளனர். இந்த தடை ஆணை ஒழிக்கப் பட வேண்டும் என்ப தற்காக இந்த ஆர்ப் பாட்டம் நடத்தப்படு கிறது.

1969இல் இந்திரா காந்தி பிரதமராக இருந்தபோது தமிழ் நாட்டில் இளைய பெருமாள் தலைமை யில் அமைக்கப்பட்ட தீண்டாமை ஒழிப்புக் குழு அமைக்கப்பட்டது. அக்குழு பரிந்துரை களை பிரதமரிடம் அளித்தது. அதில் ஆதி திராவிடர் உள்பட அனைவரும் அர்ச்சகர் ஆக வேண்டும் என்ற கோரிக்கை அந்த அறிக்கையில் உள்ள டக்கி தந்தார்கள். அந்த  பொருளடக்கத்தை தி.மு.க. ஆட்சியில் முழு மையாக கொண்டே இச்சட்டத்தை கலைஞர் கொண்டு வந்தார்.

ஓர் இஸ்லாமியர் அதற்குரிய படிப்பைப் படித்தால் முல்லாவாக லாம், ஓர் கிறிஸ்தவர் பைபிள் படித்து பட்டம் பெற்றால் பாதிரியார் ஆகலாம். மதம் மாறிய கிறிஸ்தவர்கூட போப் ஆகலாம். இந்து மதத் தில் மட்டும் பார்ப்பனர் மட்டுமே அர்ச்சகர் ஆக முடியும் என்றால் ஒரு குலத்திற்கு ஒரு நீதியா?
யார் வேண்டுமானா லும் டாக்டர் ஆகலாம், உயர்நீதிமன்ற, உச்சநீதி மன்ற நீதிபதிகள்  ஆக லாம். பிரதமர் ஆகலாம், ஆளுநர் ஆகலாம். குடியரசுத் தலைவராக ஆகலாம் ஆனால் அர்ச்சகராக மட்டும் ஆக முடியாதா? எனவேதான் அனைத்து ஜாதியினரும் அர்ச்சகர் ஆகலாம் என கலைஞர் சட்டம் கொண்டு வந்தார்.

அரசியல் சட்டம் இயற்றிய டாக்டர் அம்பேத்கர் அதில் தீண்டாமை ஒழிக்கப்படுகிறது என எழுதினார். அந்த சட்டம் ஒரே இடத்தில் செயல்படுத்த முடிய வில்லையே - அரசியல் சட்டமே வெளியே நிற்கிறதே அது கருவறையின் வெளியே இருக்கிறதே!

செவ்வாய்க் கிரகத்திற்கே  செல்ல முடிகிறது கோயில் கருவறைக்குள் நாம் செல்ல முடியவில்லையே!

எனவே அனைத்து ஜாதியினரும் அர்ச்சகர் ஆக வேண்டும். அதன்மூலம் நாடே சமத்துவபுரமாக வேண் டும். அதற்காகத்தான் இந்தப் போராட்டம் இதை எதிர்ப்பவர்கள் யாரோ சில பூணூல் திருமேனிகள்!

எனவே இதை உடனே செயல்படுத்த வேண்டும்! இல்லை என்றால் அடுத்தக் கட்ட போராட்டம் சிறை நிரப்பும் போராட்டமல்ல; சிறை வழியும் போராட் டமாகவும் இருக்கும்.

அனைத்து ஜாதியினரும் அர்ச்சகர் ஆகலாம் என்ற இந்த சட்டம் சிலருக்கு பிடிக்காமல் இருக்கலாம். எம்.ஜி.ஆரும். இன்றைய முதல் அமைச்சரும் ஏற்றுக் கொண்டு இருக்கிறார்கள். எனவே இதை செயல்படுத்தி அதன் மூலம் நாடே சமத்துவபுரமாக மாறட்டும் என்றார் தமிழர் தலைவர். கழகத் துணைத் தலைவர்

கவிஞர் கலி. பூங்குன்றன்

இந்த மாபெரும் ஆர்ப்பாட்டத்திற்கு வந்திருந்தவர் களை வரவேற்று பேசிய திராவிடர் கழகத் துணைத் தலைவர் கவிஞர் கலி. பூங்குன்றன் அவர்கள்:
அனைத்து ஜாதியினருக்கும் அர்ச்சகர் உரிமைக் கான இந்த போராட்டம் தமிழகம் முழுவதும் இன்று (1.8.2013) கழக மாவட்டங்கள் 60 இடங்களில் மிகுந்த எழுச்சியோடு நடைபெறுகிறது.

1969ஆம் ஆண்டு தந்தை பெரியார் அவர்கள் அப்போராட்டத்தை அறிவித்தார். கலைஞர் அவர்கள் முதலமைச்சராக பொறுப்பேற்றவுடன் அனைத்து ஜாதியினரும் அர்ச்சகர் ஆகலாம் என்ற சட்டத்தை நிறைவேற்றினார். 2006ஆம் ஆண்டு மீண்டும் இச்சட்டத்தை நிறைவேற்றினார். தற்போது உச்சநீதி மன்றத்தில் வழக்கு நிறுத்தி வைக்கப்பட்டுள்ளது. இத்தடையை தமிழக அரசு நீக்கி உடனே செயல்படுத்த வைக்க இப்போராட்டம் நடைபெறுகிறது என்றார்.

சட்டமன்ற உறுப்பினர் ஜெ. அன்பழகன்

இந்த ஆர்ப்பாட்டத்திற்கு முன்னிலை வகித்துப் பேசிய தென் சென்னை தி.மு.க. மாவட்டச் செயலாளர் திருவல்லிக்கேணி சேப்பாக்கம் தொகுதி சட்டமன்ற உறுப்பினர் ஜெ. அன்பழகன் அவர்கள் பேசுகையில்:-

தந்தை பெரியார் அவர்கள் அனைத்து ஜாதியினருக் கும் அர்ச்சகர் உரிமை வேண்டும் என்ற போராட் டத்தை அறிவித்தபோது, அதை நிறைவேற்ற தி.மு.க. தலைவர் கலைஞர் அவர்கள் 1970ஆம் ஆண்டு சட்டத்தை இயற்றினார். மீண்டும் 2006ஆம் ஆண்டு அச்சட்டத்தை செயல்படுத்தி 207 பேருக்கு திமுக ஆட்சியில் அர்ச்சகர் பயிற்சி கொடுக்கப்பட்டது.

அர்ச்சகர் பயிற்சி பெற்றவர்களுக்கு தற்போது அர்ச்சகர் பணியை கொடுக்காமல் ஜெயலலிதா அரசு செயல்படாமல் இருப்பதை கண்டித்தே இந்த ஆர்ப் பாட்டம் நடைபெறுகிறது. அடுத்த கட்ட சிறை நிரப்பும் போராட்டத்திலும் திமுக பங்கேற்கும் என கலைஞர் அவர்கள் சொல்கிறார் என்றால் அந்த அளவிற்கு இந்த பிரச்சினையில் கலைஞர் உறுதியாக இருக்கிறார் என்றார்.

பேரா. சுப. வீரபாண்டியன்

இப்போராட்டத்தில் பங்கேற்று பேசிய திராவிடர் இயக்க தமிழர் பேரவைப் பொதுச் செயலாளர் பேராசிரியர் சுப. வீரபாண்டியன் அவர்கள்:

இப்போராட்டம் நீண்ட காலமாக நடைபெற்று வரும் போராட்டமாகும். கடவுள் இல்லை என்பவர்கள் நீங்கள், கருப்புச் சட்டை போடுபவர்கள் நீங்கள் யார் அர்ச்சகராக இருந்தால் என்ன? என்று கேட்கிறார்கள்.

கோயிலுக்கு செல்லும் அனைவரும் அங்கு சமமாக நடத்தப்பட வேண்டும் அனைவரும் அர்ச்சகர் ஆக உரிமை வேண்டும் என்றார் பெரியார். சட்டம் என்றால் எல்லோருக்கும் சமமாகதான் இருக்க வேண்டும்.

கடவுள் எல்லோருக்கும் சமம் என்றால் மற்றவர்கள் ஏன் கோயில் கருவறைக்குள் அனுமதிக்கப்படுவதில் லை? ஜாதி இல்லை என்றால் ஏன் நீ பூணூல் போடு கிறாய் என்றார் பெரியார்.

1924ஆம் ஆண்டு சுயமரியாதை இயக்கம் தோன்றி யதில் இருந்து முதல் போராட்டமாக நடத்தப்பட்டு வருவது அனைவரும் சமமாக நடத்தப்பட, வேண்டும் என்பதே ஆகும்.

அனைத்து ஜாதியினரும் அர்ச்சகர் ஆகலாம் என்ற சட்டம் நீதிமன்றத்தின் தீர்ப்பு நமக்கு சாதகமாக இருந் தாலும் நடைமுறைக்கு வரவில்லை அதை செயல் படுத்தவே இப்போராட்டம் என்றார் அவர்.

தி.மு.க. அமைப்புச் செயலாளர் டி.கே.எஸ். இளங்கோவன்

தி.மு.க. அமைப்புச் செயலாளர் வடசென்னை நாடாளுமன்ற உறுப்பினர் டி.கே.எஸ். இளங்கோவன் ஆர்ப்பாட்ட தொடக்கவுரையில்:

கலைஞர் கொண்டு வந்த அனைத்து ஜாதியினரும் அர்ச்சகர் ஆகலாம் என்ற சட்டத்தை அமல்படுத்த வேண்டும். உச்சநீதிமன்றம் அச்சட்டம் செல்லாது என சொல்லவில்லை. எனவே உடனே நடைமுறைப்படுத்த வேண்டும்.
வாக்குசாவடிக்கு செல்லும்போது மட்டும் இந்து என்றால் எல்லோரையும் அனுமதிக்கிறார்கள் கோயில் கருவறைக்குச் செல்லும்போது மட்டும் நீ சூத்திரன், பஞ்சமன் என்று திட்டமிட்டு தடுக்கிறார்கள். 2000 ஆண்டுகளாக நம்மை சூத்திரன் பஞ்சமன் என்று ஆரியம் வைத்துள்ளது.
நூறு ஆண்டு கண்ட திராவிட இயக்கம்தான் சமுதாயத்தில் சமூகநீதியை நிலைநாட்ட பாடுபட்டு வருகிறது. அதன் தொடர்ச்சியாக அனைத்து ஜாதியி னரும் அர்ச்சகர் ஆகும் உரிமையை பெற்றே தீருவோம் என்றார்.

எழுச்சித் தமிழர் தொல். திருமாவளவன்

இந்த ஆர்ப்பாட்டத்தில் பங்கேற்று எழுச்சியுரை யாற்றிய விடுதலைச் சிறுத்தைக் கட்சி தலைவர் தொல். திருமாவளவன்.

தமிழகத்தில் இன்று திராவிடர் கழகம் திராவிட முன்னேற்ற கழகம், விடுதலைச் சிறுத்தைகள் கட்சி, திராவிடர் இயக்க தமிழர் பேரவை ஒருங்கிணைந்து நடத்தி வரும் இப்போராட்டத்தின் மூலம் சமூக நீதி நிலை நாட்டப்பட வேண்டும்.

அனைத்து ஜாதியினரும் அர்ச்சகர் ஆகலாம் என்ற சட்டத்தை இயற்றிய கலைஞர், தலித் இளைஞர் களுக்கும், பிற்படுத்தப்பட்ட, மிகவும் பிற்படுத்தப்பட்ட இளைஞர்களுக்கும் அர்ச்சகர் பயிற்சியை அளித்தார்.
அர்ச்சகர் பயிற்சி பெற்றவர்கள் அர்ச்சகர் பணி கிடைக்கும் என காத்துக் கிடக்கிறார்கள். இச் சட்டத்தை செயல்படுத்தாமல் இந்த ஆட்சி கிடப்பில் போட்டுள்ளது. இங்கே மோடிகள் ஆட்சி செய்கிறார் களோ என நினைக்க தோன்றுகிறது.

பெரியார் கண்ட கனவை நிறைவேற்ற அனைத்து ஜாதியினரும் அர்ச்சகர் ஆகலாம் என கலைஞர் சட்டம் கொண்டு வந்தார். அதே போல் தமிழகமெங்கும் சமத்துவபுரங்களை கட்டி சாதனை செய்தவர் கலைஞர். அதை நடைமுறைப்படுத்தாமல் கிடப்பில் போட் டுள்ளது இந்த ஆட்சி. எனவே தமிழர் தலைவர் தலைமையில் அனைத்து ஜாதியினரும் அர்ச்சகர் ஆகும் உரிமை பெறும் இப்போராட்டத்தில் வென்றே தீருவோம் என்றார் தொல். திருமாவளவன்.

சென்னையில் நடைபெற்ற ஆர்ப்பாட்டத்திற்கு வட சென்னை மாவட்ட திமுக பொறுப்பாளர் ஆர்.டி.சேகர், திராவிடர் கழக தென்சென்னை மாவட்டத் தலைவர் இரா.வில்வநாதன், வட சென்னை மாவட்ட தலைவர் தி.வே.சு.திருவள்ளுவன் ஆகியோர் முன்னிலை வகித்தனர். இறுதியாக திராவிடர் கழகத் தலைமைச் செயற்குழு உறுப்பினர் க.பார்வதி நன்றி கூறினார்.

இந்த ஆர்ப்பாட்டத்தில் தி.மு.க.வைச்சேர்ந்த சென்னை மாநகர முன்னாள் மேயர் மா.சுப்பிர மணியம், முன்னாள் அமைச்சர் ரகுமான்கான், முன்னாள் சட்டமன்ற உறுப்பினர்கள் செங்கை சிவம், சேகர்பாபு, ஆயிரம் விளக்கு உகுசன் எழுத்தாளர் க.திருநாவுக்கரசு, பேராசிரியர் மங்கள முருகேசன், கயல் தினகரன், மாநிலங்களவை உறுப்பினர் வசந்தி ஸ்டாலின் மற்றும் சேலம் சுஜாதா, விஜயா தாயன்பன், கவிஞர் காசிமுத்து மாணிக்கம், எல்.பலராமன், தஞ்சை கூத்தரசன், ஈரோடு இறைவன், சதாசிவம், எழும்பூர் பகுதி ஜெ.கிருஷ்ண மூர்த்தி, தேவநிதி, சேப் பாக்கம் ஜெகதீசன், மா.பா. அப்பாதுரை, நுங்கை வி.எஸ்.ராஜ், எம்.எஸ்.காமராஜ், வி.எஸ்.கலை, ஏ.கே.கண்ணன், வெங்கடேசன், மணிவேல், ராஜசேகர், ரமேஷ்,  திராவிடர் இயக்க தமிழர் பேரவை வடக்கு மண்டல செயலாளர் மு.மாறன், மத்திய சென் னை செயலாளர் எட்வின், விடுதலை சிறுத்தைகள் கட்சி கொள்கை பரப்பு துணைச்செயலாளர் பாலாஜி மற்றும் மகளிரணி தோழியர்கள் பெரும் திரளாக பங்கேற்றனர்.

ஒலி முழக்கம்
முன்னதாக ஆர்ப்பாட்ட ஒலி முழக்கங்களை திரா விடர் கழக தென் சென்னை மாவட்ட துணைச்செய லா ளர் கோ.வீ.ராகவன் முழக்கமிட்டார். அவை வருமாறு:

தாழ்த்தப்பட்டோரும், பிற்படுத்தப்பட்டோரும் அய்.ஏ.எஸ் ஆகலாம், நீதிபதியாகலாம், அர்ச்சகர் ஆக கூடாதா? முடியதா?

ஆண்டவன் அனைவருக்கும் பொது என்றால் பிராமணன் என்றும் சூத்திரன் என்றும் பேதங்கள் ஏன்?

பெரியார் நெஞ்சில் தைத்த முள்ளை மானமிகு கலைஞர் சட்டம் இயற்றி நீக்கினார் உச்சநீதிமன்றமே தடையை நீக்கு!

கோவில் கட்ட இடம் தந்தவன் தமிழன், கட்டுமான பொருள் கொடுத்தவன் தமிழன், நன்கொடை கொடுத்தவன் தமிழன், கோயில் கட்டியவன் தமிழன், சிலை வடித்தவன் தமிழன், வர்ணம் தீட்டி யவன் தமிழன், கோவில் கட்ட இரவும் பகலும் உழைத்து உழைத்து வீதிக்கு வந்தவனும் தமிழன்.

சிறிய மணியடித்து ஊதியம் ஈட்டி வாழ்வதற்கு மட்டும் பார்ப்பனர்களா?

பார்ப்பனர்கட்கு ஒரு நீதி, பிற்படுத்தப்பட்ட, தாழ்த்தப்பட்ட மக்களுக்கு ஒரு நீதியா?

மத்திய மாநில அரசுகள் உடனே சமூக நீதி அடிப்படையில் சட்டமாக்குக

ஆகம விதிப்படி அர்ச்சகர் பயிற்சி பெற்ற 206 தமிழ் இளைஞர்களை அர்ச்சகர் பணியில் அமர்த்தி சமூக நீதியும் வாழ்வாதாரமும் வழங்குக.

என திராவிடர் கழகம், திராவிட முன் னேற்ற கழகம், விடுதலை சிறுத்தைகள் கட்சி, திரா விடர் இயக்க தமிழர் பேரவை ஆகிய கட்சிகளை சேர்ந்த தோழர் - தோழியர்கள் ஒலி முழக்கமிட்டனர்.



அனைத்து ஜாதியினரும் அர்ச்சகர் ஆகவேண்டும் என்று திராவிட முன்னேற் றக் கழகம் ஆட்சியில் இருந்தபொழுது 1970 ஆம் ஆண்டு முதல் முறையாக தந்தை பெரியார் அவர்களின் பெருவிருப் பத்திற்கேற்ப கலைஞர் அவர்கள் சட்டம் இயற்றினார்கள். அந்தச் சட்டத்தை எதிர்த்து, சங்கராச்சாரியார்கள், சில ஜீயர்கள் உள்பட சிலர் உச்சநீதிமன்றத் தில் வழக்குத் தொடர்ந்தனர்.  உச்சநீதி மன்றம் அந்தச் சட்டம் செல்லும் என்று சொல்லி, அதேநேரத்தில், அந்த சட்டத் தில் சில சந்தேகங்கள் இருக்கின்றன என்பது போன்று அந்தச் சட்டத்தை முடக்கக் கூடிய வாய்ப்பை உருவாக்கினார்கள். மீண்டும் அய்ந்தாவது முறையாக ஆட்சிக்கு வந்த கலைஞர் அவர்கள், தெளி வாக அந்த சட்டத்தில் ஒரு சிறு பிரச்சினை யில்கூட சிக்கல் இருக்கக்கூடாது என்பதற் காக ஒரு ஆணை போட்டார்கள்; அது என்ன ஆணை என்றால்,  நீதிபதி தலைமையில் ஒரு குழு அமைத்து, அந்தக் குழுவின் மூலமாக பரிந்துரைகளைப்  பெற்று  வைகனாச ஆகமம், சிவாகமம் முதலியவற்றைச் சொல்லிக் கொடுக்கும் ஆறு பயிற்சி பள்ளிகளை ஏற்பாடு செய்து, ஒன்றரை ஆண்டுகால பயிற்சிப் பெற்ற பிறகு, 206 பேர் இப்பொழுது தயாராக இருக்கிறார்கள்;  ஆதிதிராவிடர் சமுதாயத்தவர் உள்பட பார்ப்பனர்களிலிருந்து அவரவர்கள் விகிதாசாரத்திற்கு ஏற்ப 69 சதவிகித இட ஒதுக்கீடுபடி அவர்கள் பயிற்சி பெற்று, பட்டயம் பெற்றிருக்கிறார்கள்.

இந்த நிலையில், இந்தச் சட்டத்திற்கு உச்சநீதிமன்றம் சென்று மீண்டும் ஒரு தடையாணை வாங்கி நிலுவையில் இருக்கும் பொழுது, திடீரென்று இந்த வழக்கில், தமிழக அரசு சார்பாக வந்த வழக்குரைஞர்கள், நாங்கள் வெளியிலேயே இதைப்பற்றி சுமூக மாகப் பேசித் தீர்த்துக் கொள்கிறோம் என்று சொல்லி வாய்தா வாங்கியிருக்கிறார்கள்.

சுமூகமாக என்றால் என்ன? என்பதைத் தெளிவுபடுத்தப்படவேண்டும். தகுதி படைத்தவர்கள் தயாராக இருக்கிறார்கள்; ஆகமங்கள் படித்திருக்கிறார்கள். எதை தகுதியாகச் சொன்னார்களே, அந்தத் தகுதியைப் பெற்றுள்ளனர். எனவே, இரண்டு தீர்ப்புகள்; உச்ச நீதிமன்றத்தினுடைய மூன்று தெளி வான நிலைப்பாடுகள்; மூன்று உயர் நீதிமன்ற நீதிபதிகளின் பரிந்துரைக் குழுக்கள்; மூன்று முதலமைச்சர்கள் இன்றைய முதலமைச்சர் உள்பட ஒப்புக்கொண்டிருக்கின்ற செய்தியை செயலாக்கவேண்டும்; இது ஜாதி ஒழிப்பு, தீண்டாமை ஒழிப்பினுடைய அம்சம்; இன்னமும் அரசியல் சட்டத் திலிருக்கின்ற தீண்டாமை என்பது கருவறைக்குள்ளே கடைபிடிக்கப்படு கிறது. அதையும் மாற்றவேண்டும் என்பதற்காகத்தான் இந்தப் போராட்டம். அந்த வகையிலே கலைஞர் அவர்கள் பெரியார்  சமத்துவபுரங்களை உருவாக் கினார்களோ, அதுபோல், இந்தச் சட்டம் நாட்டையே சமத்துவபுரமாக ஆக்கக்கூடிய ஒரு சமத்துவ சமுதாயத்தை உருவாக்கக் கூடிய சட்டம்; எனவே, இது ஒரு அமைதிப் புரட்சிக்கு வழி வகுக்கும்; அதன்மூலம் ஜாதி, தீண்டாமை ஒழியும் என்பதற்காகத்தான் இந்தப் போராட்டம்; முதற்கட்டம் முடிந் திருக்கிறது. இப் போராட்டத்தில் கலந்து கொண்ட திராவிட முன்னேற்றக் கழகம், விடுதலை சிறுத்தைகள் அமைப்பு, திராவிடர் இயக்கத் தமிழர் பேரவை மற்றும் பங்கேற்ற அமைப்புகளுக்கும் நன்றியினைத் தெரிவித் துக்கொள்கிறேன்.

---------------------------------- ஆர்ப்பாட்டத்தின் முடிவில் செய்தியாளர்களிடம் தமிழர் தலைவர்  ---"விடுதலை” 1-8-2013

அனைத்து ஜாதியினரும் அர்ச்சகராகக் கூடாதா? சோக்களுக்கு சுரீர் என்று ஏறுகிறதோ!



இன்று வெளிவந்துள்ள துக்ளக் ஏட்டில் (7.8.2013 இதழ்) சோ இராமசாமி அய்யர்வாளுக்கு கலைஞர்மீது ஆத்திரம் (எப்போதும் உள்ளதுதான் என்றாலும்) அதிகமாக சுரீரென்று ஏறி யுள்ளது!

காரணம் இந்தக் கேள்வி - பதிலைப் படியுங்கள்!

கேள்வி: அனைத்து ஜாதி யினரும் அர்ச்சகராகலாம் என்ற கலைஞரின் நிலைப்பாட்டை நீங்கள் ஆதரிக்கிறீர்களா?

பதில்: இது வெற்று அரசியல். அனைத்து ஜாதியினரும் அர்ச்சகர்கள் ஆக விரும்புகிறார்களா? மற்றப் பணிகளைவிட மிகவும் குறைந்த ஊதியம் தரக்கூடிய இந்தப் பணியை இன்றைய இளைஞர்களில் எத்தனைப் பேர் விரும்புவார்கள்? அர்ச்சகர்களின் குடும்பங்களிலேயே மற்ற படிப்புகளில் தேறி, ஏதாவது நல்ல ஊதியம் தரக் கூடிய வேலைக்குப் போகவேண்டும் என்றுதான் இளைஞர்கள் முயற்சிக்கிறார்கள். இதில் இன்னொரு விஷயம்; அர்ச்சகர்கள் என்றால், அய்யர்கள் என்பது கழக நினைப்பு. அது தவறு. அய்யர்கள் அர்ச்சகர் ஆக முடியாது.

சிவாச்சாரியார்கள் என்ற பிரிவினர்தான் அர்ச்சகர்கள் ஆக முடியும் என்பதுதான் இதுவரை இருந்துள்ள விதிமுறை. அவர்களுக்கு உள்ள வசதி போதும் என்று நினைத்து, அந்தப் பணிக்குரிய பயிற்சியையும், வாழ்க்கை முறைகளையும் முழு மையாக ஏற்கிற மற்ற ஜாதியினர், அர்ச்சகர்கள் ஆனால் ஆகட்டுமே!
----------------------------------------- இதுதான் சோவின் பதில்.

அனைத்து ஜாதியினரும் அர்ச்சகர் என்ற பிரச்சினையில் வெகு குறைவான சம்பளம் தானாம்!

அனைவரும் விரும்புவார்களா?

என்றெல்லாம் கூறி ஆத்திரம் அறிவுக்குச் சத்ரு என்ற பழ மொழிக்கொப்ப எழுதியுள்ளார்!

அர்ச்சகராகவேண்டும் என்று நாம் கூறுவது வெறும் ஊதியத்தை மட்டும் வைத்தா?

இது ஜாதி ஒழிப்பு - தீண்டாமை ஒழிப்பு என்ற கொள்கையை அடிப் படையாகக் கொண்டதல்லவா?

அய்.ஏ.எஸ்., அய்.பி.எஸ். அதி காரிகளின் சம்பளத்தைவிட, கார்ப்பரேட் கம்பெனி நிர்வாகத் தில் அதிக சம்பளம் கிடைக்கிறது என்றாலும், ஏன் முன்னவைகளை விரும்புகிறார்கள்? வெறும் சம் பளம் மட்டுமா அளவுகோல்?
அதன் அதிகாரம், செல்வாக்கு, சமவாய்ப்பு இவை எல்லாம் உள்ளடங்கியுள்ளனவே!

அதுபோலத்தானே இதுவும்? ஏற்கெனவே தேர்வு பெற்ற 206 பேர் வேலை வேண்டும் என்று கேட்டு உச்சநீதிமன்றத்தில் உள்ள வழக்கிலேயே தங்களை இணைத் துக் கொண்டுள்ளார்களே, அதை வசதியாக சோக்கள் ஏனோ மறந்து அல்லது மறைத்து விடு கிறார்கள்?

இவர் சொல்லும் வாதம் உண்மை என்றால், அர்ச்சகர்கள் சங்கத்தவர்தானே, உச்சநீதிமன் றத்தில் வழக்குப் போட்டுள்ள வர்கள் - அவர்களிடம் உபதே சித்து வழக்கை வாபஸ் வாங்கிட சோ அய்யர்வாள் முயற்சி எடுப் பாரா?
கலைஞர் அரசியல் செய் கிறாராம்!

இதில் என்ன அரசியல் இருக்கிறது? இப்படி திசை திருப்பும் பூணூல் கூட்டம் தமது ஏகபோகம் இதில் பறிக்கப்பட்டு விடுகிறதே என்று ஆலாய்ப் பறக் கிறார்கள்; பரிதவிக்கிறார்கள்!

போராட்டம் சூடு பிடித்து விட்டது என்பதன் அடையாளமே இந்த ஜன்னி கண்ட உளறல்கள்!

புரிந்துகொள்வீர்!
--------**********************************************************************
 
முதல் அமைச்சரை மட்டம் தட்டும் அண்ணா திமுக ஏடு
அண்ணா திமுகவின் அதிகாரப்பூர்வ ஏடு டாக்டர் நமது எம்.ஜி.ஆர்., புராணம், ஆன்மீகம் பற்றி அரைகுறையாகத் தெரிந்துகொள்ள வேண்டும் என்றால் அந்தப் பத்திரிகையைப் படிக்கலாம் (வாழ்க அண்ணா நாமம்!)

திராவிடர் கழகம் தமிழ்நாடு முழுவதும் நாளை நடத்த விருக்கும் அனைத்து ஜாதியினருக்கும் அர்ச்சகர் உரிமையை வலியுறுத்தி ஆர்ப்பாட்டத்தை தமிழ்நாடு தழுவிய அளவில் நடத்த உள்ளது. தி.மு.க., விடுதலைச் சிறுத்தைகள் கட்சி, திரா விட இயக்கத் தமிழர் பேரவை மற்றும் பல்வேறு தமிழின உணர் வுள்ள  அமைப்புகள் ஆர்வமுடன் பங்கேற்க இருக்கின்றனர்.
இதில் நமது எம்.ஜி.ஆருக்கு என்ன வந்ததாம்?

ஆலயங்களில் சமத்துவம் வேண்டும் என்று கோருவதற்கு முன் அறிவாலயத்திலும், பெரியார் திடலிலும் அதனை நிறை வேற்றுங்கள் என்று அக்கிரகார (அ) திமுக எழுதுகிறது? (இந்த இடங்களில் சமத்துவத்துக்கு என்ன குறைவாம்? விளக்குவார்களா?). மொட்டைத் தலைக்கும் விளக்கெண் ணெய்த் தடவிய முழங்காலுக்கும் முடிச்சு போடப் பார்க் கிறார்களே! முதலில் இந்தப் பிரச்சினையில் எம்.ஜி.ஆர். அவர்களின் நிலைப்பாடு என்ன என்று தெரியுமா? 

முதல்வர் செல்வி ஜெயலலிதாவின் செயல்பாடு என்ன என்று தெரியுமா?
அனைத்து ஜாதியினருக்கும் அர்ச்சகர் உரிமையைச் செயல்படுத்த வேண்டி நீதியரசர்கள் மகாராஜன், கிருஷ்ணசாமி ரெட்டியார் தலைமையில் குழுக்களை அமைத்துப் பரிந்துரை களைப் பெற்றவர் முதல் அமைச்சர் எம்.ஜி.ஆர். என்பது தெரியுமா? 69 சதவீத அடிப்படையில் தாழ்த்தப்பட்டவர் உட்பட அனைத்து ஜாதியினருக்கும் அர்ச்சகர் பயிற்சி அளிக்கப் படும்; அதற்கு திருச்சியையடுத்த கம்பரசம்பேடடையில் பயிற்சி நடப்பதற்கு இடம் தேர்வு செய்யப்படுவது என்று அறிவித்தவர் அந்நாளைய முதல் அமைச்சர் மாண்புமிகு செல்வி ஜெய லலிதா என்ற தகவலாவது புரியுமா?

திராவிடர் கழகம் நடத்தும் ஆர்ப்பாட்டத்தை கொச்சைப் படுத்துவதாக நினைத்துக் கொண்டு எம்.ஜி.ஆரையும், ஜெயலலிதாவையும் மட்டம் தட்டும், இழிவுபடுத்தும் வேளையில் அண்ணா தி.மு.க.வின் நமது எம்.ஜி.ஆர். ஏடு ஈடுபடலாமா?

அடிப்படைகளையே அறிந்திராதவர்கள் தான் அந்த ஏட்டின் எழுத்தாளர்களா? அல்லது முதல் அமைச்சர் ஜெயலலிதாவை வம்புக்கு இழுக்க வேண்டும் என்ற குழிபறிப்பு வேலையில் ஈடு படுவோர் அந்த ஏட்டில் ஊடுருவி இருக்கிறார்களா? முதல் அமைச்சர் ஜெயலலிதா எதற்கும் எச்சரிக்கையாக இருப்பது நல்லது.

                           ---------------------------------------விடுதலை” 31-7-2013