Search This Blog

7.12.10

பெயர் மாற்றத்தால் தாழ்த்தப்பட்டோர் நிலை உயர்ந்துவிடாது!

வெறும் பெயர் மாற்றத்தால்

தாழ்த்தப்பட்டோர் நிலை உயர்ந்துவிடாது!

(27.12.1936 அன்று சென்னை - கோடம்பாக்கம் பகுத்தறிவு சங்க நான்காவது ஆண்டில் ஈ.வெ.ரா. ஆற்றிய உரை)

தோழர்களே!

இன்று இவ்வாண்டு விழாவில் தோழர்கள் ஊ.பு.அ. சவுந்தரபாண்டியன், என்.சிவராஜ், எஸ்.குருசாமி. டி.என்.ராமன், குஞ்சிதம், வித்துவான் முனிசாமி, ஆரோக்கியசாமி, கல்யாணசுந்தரம் ஆகியவர்கள் பேசினார்கள். என்னுடைய முடிவுரையுடன் ஆண்டு விழா நிகழ்ச்சி முடிவுபெற்றதென்றே கருதுகிறேன். ஆனால், நான் பேசவேண்டும் என்று கருதி இருந்த வற்றை எல்லாம் உபன்யாசகர்கள் பேசி விட்டார்கள். ஆதலால் நான் அதிகம் பேசுவேன் என்று நீங்கள் எதிர்பார்க்க மாட்டீர்கள். நீங்கள் ஒற்றுமையாய் இருக்க வேண்டும். பெண்களை அதிகமாக அங்கத்தினர்கள் ஆக்க வேண்டும்.

பகுத்தறிவு

உண்மையிலேயே எல்லோரும் பகுத்தறிவுக்கு இடம் கொடுக்கவேண்டும். பகுத்தறிவை வளர்க்க வேண்டும். எந்த விஷயத்தையும் ஆராய்ச்சி செய்து பார்க்க வேண்டும். மனதிற்குத் தோன்றியதை எல்லாம் பகுத் தறிவு என்று சொல்லி விடக்கூடாது. புஸ்தகத்தைப் படித்து ஒப்புவிப்பது பகுத்தறிவாகிவிடாது. சாத்தியம் அசாத்தியம் இன்னதென்று அறியவேண்டும். அனுபவ பலன் இன்னதென்று தெரியவேண்டும். நமது சக்தி எப்படிப்பட்டது? அது எவ்வளவு? என்பதை உணர வேண்டும். கால தேச வர்த்தமானங்களைக் கவனிக்க வேண்டும். நமது அறிவுக்கு ஒரு காரியம் சரி என்று பட்டாலும் மேல்கண்ட அநேக விஷயங்களை உணர்ந்தே அதைப்பிரயோகிக்க வேண்டும். அதாவது பகுத்தறிவை பிரயோகிக்க பகுத்தறிவு வேண்டும்.

உங்கள் கொள்கை

இங்குப் பேசிய பலர் சுயமரியாதையைப் பற்றியும், அரசியலைப் பற்றியும் பேசினார்கள். இச்சங்கத்தைச் சேர்ந்த மக்கள் பெரிதும் தாழ்த்தப்பட்ட மக்களாகக் காணப்படுகிறபடியால் உங்களுக்கு அரசியல் - அரசாங்கத்தைத் தழுவிப் போவதுதான் பயன்படத் தக்கதாகும். அரசியலில் உங்கள் வகுப்பைத் தனியாகப் பிரிக்கப்பட்டாய் விட்டது. மற்ற வகுப்புகள் லட்சியத் திற்கும் நிலைக்கும் உங்கள் வகுப்பு லட்சியத்துக்கும் பெரியதொரு நிலைக்கும் வித்தியாசம் இருப்பதாலேயே அரசியலில் நீங்கள் தனி உரிமை கேட்க வேண்டிய தாயிற்று. அந்தப்படியே அரசாங்கம் உங்களுக்குத் தனி உரிமை அளித்தும் நீங்கள் மற்ற மேல் ஜாதி மக்கள் என்பவர்களால் ஏமாற்றப்பட்டு விட்டீர்கள். மேல் ஜாதியாருக்குத் தந்திரமும், சூழ்ச்சியும் இயற்கை யாகவே உண்டு. அதனால்தான் அவர்கள் மேல் ஜாதிக்காரர்களாய் இருக்கிறார்கள். அதில்லாத தினால்தான் நீங்கள் கீழ் ஜாதி என்பதில் சேர்க்கப்பட்டு அதற்குண்டான பயனை அனுபவித்து வருகிறீர்கள். உங்களைத் தாழ்த்தப்பட்டவர்கள் என்று குறிப்பிட்ட தற்கே தோழர் ஆரோக்கியசாமி கோபித்துக் கொண் டார். கோபித்து என்ன செய்வது? பிரத்தியட்சத்தில் நீங்கள் தாழ்த்தப்பட்டு இருக்கிறீர்களா - இல்லையா? அந்தப்படி இல்லையானால் உங்களுக்குத் தனி உரிமையே வேண்டியதில்லை அல்லவா? சமூக வாழ்வில் உங்களுக்கு எவ்வளவு இடையூறு சட்டப்படி இருக்கிறது என்று பாருங்கள். உங்களுக்குக் கோவில் பிரவேச உரிமை கிடையாது. தெரு, குளம், பள்ளிக் கூடம்ஆகியவைகளின் பிரவேச உரிமைகூட இப்போது ஜஸ்டிஸ்கட்சி ஏற்பட்ட பிறகு உங்களுக்கு உண்டாகி இருக்கிறது. அதற்கு இன்னும் பல இடங்களில் தடை இருந்து வருகிறது.

கோவில் பிரவேசம்

திருவாங்கூர் கோவில் பிரவேச உரிமையைப் பற்றிப் பாராட்டிப் பேசினீர்கள். அதனால் உங்களுக்கு என்ன லாபம்? உங்கள் தாய்நாட்டில் உங்கள் நிலை என்ன? உங்களைவிட இன்னும் மேல் ஜாதிக்காரர்கள் என்பவர்களுக்கே நமது நாட்டில் பல இடங்களில் கோவிலின் மதில் பிரவேச உரிமை கூட கிடை யாது.இந்த நிலையில் உள்ள மக்கள் சிலர் சிறிது கூட மானமில்லாமல் அரசியலைப்பற்றிப் பேசுகிறார்கள். அவர்கள் மனித உரிமைக்கு லாயக்கற்றவர்கள் என்பதற்கு இதுவே போதிய உதாரணமாகும்.

நியாயமாய்ப் பேசப் போனால் நீங்கள் மாத்திரம் தாழ்த்தப்பட்டவர்கள் அல்லர். சில இடங்களில் கோவில் உரிமை இல்லாதவர்கள் மாத்திரம் தாழ்த்தப்பட்டவர்கள் அல்ல. சகலகோவில்களிலும் பிரவேசிக்க உரிமை உள்ள நாங்களும் தாழ்த்தப்பட்டவர்களேயாவோம். கோவில்களில் எங்களுக்கும் உரிமை இல்லாத இடம் பல உண்டு. காப்பிக்கடை, ஓட்டல் முதலிய இடங்களில் நாங்கள் ஒதுக்கப்பட்டவர்களாகவும், சில அறை களுக்குள் செல்லப்படாதவர்களாகவும்தான் இருந்து வருகிறோம். உங்கள் இழிவைப்பற்றிப் பேசுவதால் எங்கள் இழிவும் நீங்கலாம் என்பதே எங்கள் அனு தாபத்தின் கருத்தாகும். பந்தியில் சாப்பிடும்போது தனக்கு வேண்டிய பதார்த்தத்தைப் பக்கத்து இலையில் இருக்கிறவர்களுக்கு வேண்டும் என்று சொல்லிப் பரிமாறுகிறவனைக் கூப்பிட்டு பிறகு தனது இலைக்கும் வாங்கிக்கொள்ளுகிற தந்திரத்தை நீங்கள் அறிந்த தில்லையா? அது போல்தான் உங்கள் குறையோ, இழிவோ நீங்கினால் கூடவே எங்கள் குறையும் இழிவும் தானாகவே நீங்கிவிடும். அதனாலேயே உங்கள் குறைகளைப்பற்றி நாங்கள் சதா பேசிக்கொண்டே வருகிறோம்.

காங்கிரசில் சேருவது...

நீங்கள் எவ்வளவுக்கு எவ்வளவு அரசியல் கூப்பாடுகளை வெறுக்கிறீர்களோ, எவ்வளவுக்கு எவ்வளவு அரசியல் கட்சிகளுடன் சேராமல் இருக் கிறீர்களோ அவ்வளவுக்கு அவ்வளவு உங்களுடைய குறைகள் நிவர்த்திக்கப்படலாம் என்பது எனது அபிப்பிராயம். உங்கள் தலைமேல் கால் வைத்து ஏறிப்போகிறவர்களுக்கு இடம் கொடுக்காமல் இருப்பீர்களேயானால் உங்கள் கொடுமை சீக்கிரத்தில் கவனிக்கப்படும். இல்லாவிட்டால் நீங்கள் படிக் கல்லாக விழுந்து கிடக்க வேண்டியதுதான். காங்கிரஸ் ஏற்பட்டு 50 வருஷகாலம் ஆகியும் ஜஸ்டிஸ்கட்சி ஏற்பட்டு பங்கு கேட்க ஆரம்பித்த பிறகே சமுதாயத் துறையில் பெரியதொரு மாறுதல் ஏற்பட முடிந்தது. அதன்பிறகுதான் உங்கள் நிலையும் இந்த 10 வருஷகாலத்தில் எவ்வளவோ மாறுதலை அடைய முடிந்தது. அப்படிக்கில்லாமல் காங்கிரசுக்கே கை தூக்கி வந்திருப்பீர்களேயானால், மேல் ஜாதிக்காரர்கள் பின் னாலேயே கோவிந்தாப் போட்டிருப்பீர்களேயானால் உங்கள் நிலை எப்படி இருக்கும் என்பதை யோசித்துப் பாருங்கள்.

திருவாங்கூர் பிரகடனம்

திருவாங்கூர் ஆலயப் பிரவேச விளம்பரத்தைக் கவனித்துப் பாருங்கள். அது எப்படி ஏற்பட்டது? தோழர் சர்.சி.பி.ராமசாமி அய்யரைப்பற்றி நமக்குத் தெரியாதா? அவர் சர்க்கார் பராமரிப்பிலிலுள்ள சகல வீதிகளிலும், சகல பிரஜைகளும் நடக்கலாம் என்று ஜஸ்டிஸ் கட்சி மந்திரிகள் செய்த சட்டத்திற்கு மதிப்புக் கொடுக்காமல் தடுத்தவரல்லவா? அதாவது கல்பாத்தியில் ரோட்டில் ஈழவர்கள் நடக்கக்கூடாது என்று ஒரு பார்ப்பன மேஜிஸ்திரேட் 144 தடை உத்தரவு போட்டு தடுத்ததைப் பற்றி சட்டசபையில் கேள்வி கேட்கப்பட்டபோது சர்.சி.பி.அய்யர் என்ன பதில் சொன்னார்? அந்தத் தடை உத்தரவு சரியானதுதான் என்று ஆதரித்துப் பதில் சொன்னார். அதாவது அந்தப் பிரவேச சட்டத்திற்கு ஒரு புது வியாக்கியானம் செய்தார். என்னவென்றால் ஏதாவது ஒரு வேலையின் பேரில் அவசியத்தின் பேரில் தெருவில் நடப்பவனுக்குத்தான் அந்தச் சட்டம் இடம் கொடுக்குமே ஒழிய அனாவசியமாய் வேலை இல்லாமல் நடப்பவனுக்கு அச்சட்டம் இடம் கொடுக்காது என்று சொல்லி குறிப்பிட்ட 144 தடை உத்தரவு, வேண்டுமென்ற அவசியம் இல்லாமல் நடந்து மேல் ஜாதிக்காரர்களின் மனத்துக்கு சங்கட முண்டாக்குவதைத் தடுப்பதற்கு ஆக போடப்பட்ட உத் தரவு என்றும், அது அவசியம்தான் என்றும் சொன்னார்.

ஆகவே, திருவாங்கூர் திவான் சர். சி.பி. அய்யரின் தாராள நோக்கம் இதிலிருந்து தெரிந்து கொள்ளலாம். அப்படி இருக்க திருவாங்கூர் கோவில் கதவு எப்படி உடைக்கப்பட்டது என்று யோசித்துப் பாருங்கள். அங்குள்ள தாழ்த்தப்பட்ட மக்களும், ஈழவர்கள் நாடார்கள் உள்பட உள்ள மற்ற மக்களும், மதத்தையும், கோவிலையும் சாமியையுமே உடைக்கப் பார்த்தார்கள். இந்துமதம் புரட்டு, கோவில் புரட்டு, சாமியே புரட்டு என்று மகாநாடுகள் கூட்டி பதினாயிரக்கணக்கான பேர்கள் சேர்ந்து தீர்மானம் செய்தார்கள். பலர் முஸ்லிமாக துருக்கி தொப்பி போட் டார்கள். பலர் தாடி வளர்த்து தலைமுடி வளர்த்து கிருபான் (கத்தி) கட்டித் தொங்கவிட்டுக்கொண்டு சீக்கி யர்கள் ஆனார்கள். சிலர் குடும்பத்தோடு கிறிஸ்தவர்கள் ஆனார்கள். அதன் பிறகே கோவில் கதவு திறக்கப் பட்டது. தமிழ் நாட்டில் உள்ள சகல மேல் ஜாதிக்காரர் களும் பார்ப்பனர்கள் உள்பட திருவாங்கூர் ராஜாவை வாழ்த்தி விட்டார்கள். வெற்றி பெறும் இரகசியம் எங்கே இருக்கிறது பாருங்கள். அதுபோலவே நீங்கள் காங்கிரஸ் மதம், கோவில், சாமி ஆகியவைகளையெல்லாம் உடைக்க ஆரம்பித்தீர்களேயானால் உங்களுக்கு யாருடைய தயவும் இல்லாமல் சகல சுதந்திரமும் சகல உரிமையும் தானாக உங்களைக் தேடிக் கொண்டுவரும்.

பட்டம் மாற்றுவதில் பயனில்லை

அப்படிக்கு இல்லாமல் தாழ்த்தப்பட்டவர்கள் என்று உங்களைக் கூப்பிடுவதற்கு ஆக நீங்கள் கோபித்துக் கொள்வதால் ஒரு காரியமும் ஆகிவிடாது. பறையர்கள் என்கின்ற பட்டம் மாறி ஆதிதிராவிடர்கள் ஆகி இப்போது அரிஜனங்கள் என்கின்ற பட்டம் வந்ததுபோல்வேறு ஏதாவது ஒரு பெயர் ஏற்படலாமே ஒழிய குறையும், இழிவும் நீங்கி விடாது. விபசாரிகளுக்கும், குச்சிகாரிகளுக்கும் தேவதாசி, தேவ அடியாள் என்கின்ற பெயர்கள் இருப்ப தால் அவர்களுக்கு சமுகத்தில் இழிவு இல்லாமல் போய் விடவில்லை.

அதுபோல பார்ப்பானல்லாதவர்களுக்கு நாயகர், முதலியார், தேவர், வேளாளர், ராஜா, ராயர் என்கின்ற தான பல பெயர் இருந்ததாலேயே சமுக வாழ்வில் சூத்திரன் என்கின்ற பெயர் போய்விடவில்லை. ஆதலால், பெயரைப் பற்றிக் கவலைப்படாதீர்கள். இழிவும், குறையும் போக்க வழி பாருங்கள். அதற்கு அம்மாதிரி நம்மை குறைவுபடுத்தும் மக்களுடன் ஒத்துழையாமை செய்வதும் அவர்களுடைய முன்னேற்றத்துக்கு நாம் முட்டுக்கட்டை போடுவதும்தான் சரியான மருந்தாகும்.

கோடரிக்காம்புகள்

சில கோடாலிக் காம்புகள் அவர்களுடன் ஒத்து ழைப்பதால் நாம் ஏமாந்துவிடக்கூடாது. அப்படிப்பட்ட இழி மக்கள், மானமற்றவர்கள் நம்மில் பலர் இருப்பதாலேயே நாம் இம்மாதிரி சங்கம் ஸ்தாபனம் பல வைத்துக்கொண்டு அவஸ்தைப்பட வேண்டியிருக்கிறது. எல்லோருக்கும் சுயமரியாதை உணர்ச்சி இருக்குமானால் தாழ்த்தப் பட்டவர்கள் சங்கமோ. பார்ப்பனரல்லாதார் சங்கமோ எதற்கு ஆக இருக்க வேண்டும்? நம்மில் எத்தனையோ பேர் உதைத்த காலுக்கு முத்தமிட்டு வாழவேண்டிய வர்களாக இருக்கிறார்கள். அப்படிப்பட்டவர்களின் இழி தொழிலுக்கெல்லாம் நாம் பரிகாரம் செய்யவேண்டிய வர்களாய் இருக்கிறோம். அந்தப் பரிகாரம் நம்முடைய உறுதியும் தைரியமும் கொண்ட ஒத்துழையாமையிலும் முட்டுக்கட்டையிலும்தான் இருக்கிறது. சுயமரியாதை இயக்கத்தைப்பற்றி சிலர் பேசியதோடு என்னையும் சில கேள்விகள் துண்டுச்சீட்டு மூலம் கேட்டிருக்கிறார்கள்.

கேள்விகள்

1. தோழர் ஜீவானந்தம் முதலியவர்களுக்கும் உங் களுக்கும் என்ன வித்தியாசம் என்று ஒருவர் கேட்கிறார். இப்போது ஒரு வித்தியாசமும் இல்லை. முன்பு அவர்கள் தேர்தல் பிரசாரம் ஊசிப்போனது என்றும், நாற்ற மடிக்கிறது என்றும் சொல்லிக்கொண்டு இருந்தார்கள். ஆனால், இப்போது அவர்களும் தேர்தல் பிரசாரத்தில் இறங்கிவிட்டதாகப் பத்திரிகைகளில் பார்க்கிறேன். நான் ஜஸ்டிஸ் கட்சிக்கு தேர்தல் பிரசாரம் செய்கிறேன். அவர்கள் காங்கிரஸ்கட்சிக்கு தேர்தல் பிரசாரம் செய் கிறார்கள். மற்றபடி வித்தியாசமில்லை.

2. இரண்டாவதாக ஜஸ்டிஸ் கட்சிக்கும் ஜனநாயகக் கட்சிக்கும் என்ன வித்தியாசம் என்று ஒரு தோழர் கேட்டிருக்கிறார். அதற்கும் பதில் - ஒரு வித்தியாசமும் இல்லை என்று தான் சொல்ல வேண்டும். இன்றுள்ள ஜஸ்டிஸ் கட்சியின் முக்கிய கொள்கையாகிய வகுப்புவாரிப் பிரதிநிதித்துவம் உத்தியோக விஷயங்களில் அனுபவத்தில் சிறிதாவது இருக்கிறது என்றால் அது ஜனநாயக கட்சியின் மூல புருஷரான தோழர் எஸ்.முத்தையா முதலியார் அவர்களின் தொண்டினால் என்று தான் சொல்லுவேன். ஜஸ்டிஸ் கட்சி பிரமுகர்களில் பலரும், பார்ப்பனரல்லாத மக்களில் பலரும் அவருக்கு போதிய நன்றி விசுவாசம் காட்டாவிட்டாலும், நான் என்னைப் பொறுத்தவரை எப்போதும் ஒரு அளவுக்கு நன்றியு டையவனே ஆவேன். மற்றபடி ஜனநாயகக் கட்சியார் அரசியல் நிபுணத்துவத்தை உத்தேசித்து ஜஸ்டிஸ் கட்சிக்கும், மிதவாதக் கட்சிக்கும், தங்கள் கட்சிக்கும் ஏதோ வித்தியாசமிருப்பதாக கூறலாம். ஆனால், அது என் சிறிய கண்ணுக்குத் தென்படவிலலை.

இந்தியாவில் ஒரே கட்சிதான்

இன்று இந்தியாவில் அரசியல் கொள்கையில் ஒரே கட்சிதான் உண்டு. அதாவது தேர்தலில் வெற்றி பெற்று, மந்திரி பதவியை அடைந்து, பணமும் அதிகாரமும் பெற வேண்டும் என்கின்ற கவலை கொண்ட ஒரே கட்சிதான் உண்டு. அதை அடைவதற்குப் பல மார்க்கங்கள், பல தந்திரங்கள் கொண்டிருப்பதன் மூலம் பல கட்சிகள் இருப்பதாய்க் காணப்படலாம். அதோடு கூடவே அவை பெரிதும் சமுதாயத் துறையில் ஒன்றுக்கொன்று நேர்மாறான கொள்கை கொண்ட கட்சிகளாய்க் காணப்படலாம். அதன் பயனாய் சில கட்சி உண்மை பேசலாம், சில கட்சி புரியாத மாதிரி பேசலாம், சில கட்சி அடியோடு பொய்யும் புரட்டும் பித்தலாட்டமும் பேசலாம். இதுதான் இன்று அரசியல் கட்சிகளின் நிலைமை.

ஜஸ்டிஸ் கட்சி

ஆனால், ஜஸ்டிஸ் கட்சி தனது கொள்கைகளில் திட்டத்தில் உண்மை பேசுகிறது. அதுவும் சாத்தியமானால் மட்டும்தான் நடத்திக் கொடுப்பதாய் பச்சையாய் அதில் உள்ள சில கட்சி சொல்லுகிறது. தலைவர்களுக்குள்ளோ, அங்கத்தினர்களுக்குள்ளோ கட்சி கொள்கை விஷயத்தில் அபிப்பிராய பேதமில்லை. தலைவர்களில் பின்பற்றுபவர் களில் ஒருவருக்கொருவர் ஒற்றுமை இல்லாதவர்களாகவும், பொதுநோக்குடையவர்கள் அல்லாதவர்களாகவும், சுயநலத்துக்கு ஆக எதையும் செய்யக்கூடியவர்களாகவும் இருக்கலாம். அதைப்பற்றி நமக்குக் கவலையில்லை. அம்மாதிரி நபர்கள் எல்லாக் கட்சியிலும் உண்டு. அவர்களால் நேரும் கெடுதிக்கு எல்லாக் கட்சியாரும் சிறிது மார்ஜின் (இடம்) விட்டுத்தான் தீரவேண்டும். மற்றபடி இன்று சமுதாயத் துறையில் பிற்பட்டு அடிமைப்பட்டு இழிவுபட்டுக் கிடக்கும் மக்களுக்கு ஜஸ்டிஸ் கட்சி தான் சஞ்சீவி மருந்து என்று சொல்லுவேன்.

காங்கிரஸ் கட்சிக்கு உத்தியோகமும் பதவி ஆசையும் இருப்பதாலேயே நான் அதை குறைகூறவில்லை. ஆனால், அது பிற்படுத்தப்பட்டு இழிவுபடுத்தப்பட்டு இருக்கும் மக்களுக்குச் சமஉரிமை அளிக்க மறுப்பதையும், மற்றவர்கள் அளிப்பதைக் கெடுப்பதையுமே முக்கியக் கொள்கையாய்க் கொண்டு இருக்கிறபடியால் அதை ஒழித்து ஆக வேண்டும் என்கின்றேன். அதன் தலைவர் கள் பழைமை விரும்பிகளாக இருப்பதாலேயே வருணாசிரம தர்மிகளாக இருப்பதாலேயே அவர்களிடத்தில் எனக்கு நம்பிக்கையும் மதிப்பும் இல்லை. மற்றபடி கட்சிகளைப் பற்றி நான் கவலைப்படவில்லை.

சுயமரியாதைப் பிரசாரம்

3. சுயமரியாதை இயக்கப்பிரசாரம் ஏன் செய்ய வில்லை என்று கேட்கப்பட்டிருக்கிறது. நானும், எனது தோழர்களும் ஒரு அளவுக்கு செய்து கொண்டுதான் வருகிறோம். ஆனால், முக்கிய கவனம் ஜஸ்டிஸ் பிரசாரத்தில்தான் இருக்கிறது. சுயமரியாதை இயக்கத்தின் நன்மையைக் கோரி அது அவசியம் என்று கருதுகிறேன். எப்படியானாலும் இன்னும் ஒன்றரை மாதங்களில் ஜஸ்டிஸ் தேர்தல் பிரசாரம் தீர்ந்துவிடும். அதற்கப்புறம் அக்கட்சி தேர்தலில் வெற்றி பெற்றாலும் சரி, தோல்வி அடைந்தாலும் சரி. நானும் எனது தோழர்களும் தனி சுயமரியாதை இயக்கப் பிரசாரம்தான் செய்வோம்.

தோற்குமா? ஜெயிக்குமா?

4. ஜஸ்டிஸ் கட்சி வெற்றி பெறுமா? என்று கேட்கப் பட்டிருக்கிறது.

ஜஸ்டிஸ் கட்சி தோல்வியடைந்தால், நான் மகிழச் சியடைவதோடு சுயமரியாதை இயக்கப் பிரசாரத்துக்கு பார்ப்பனரல்லாத மக்களால் அதிக ஆதரவு கிடைக்கக் கூடும் என்கின்ற தன்மையால் இயக்கப் பிரசாரம் பலமாய் நடக்கவும் இடம் ஏற்படும் என்று கருதுகிறேன். ஜஸ்டிஸ் கட்சி ஜெயித்தால் தலைவர்கள், பதவி பெற்றவர்கள் ஆகியவர்களினது அனாதரவு ஏற்பட்டாலும் ஏற்படலாம். ஏனெனில், சிதறிக் கிடக்கும் பார்ப்பனரல்லாத மக்கள் ஒன்று சேர்ந்து பலமாய் வேலை செய்ய தோல்வி ஒரு சாதனமாகும். ஆனால், ஜஸ்டிஸ் கட்சி தோல்விய டையாது. ஏனெனில் அதற்கு எதிரான கட்சி எதுவும் கொள்கையில் பலம் பொருந்தியதாக இல்லை. ஜஸ்டிஸ் கட்சித் தலைவர்களில் சிலர் இப்போது இருக்கும் அலட்சியப் புத்தியும் பொறுப்பற்ற தன்மையும், சுயநல சூழ்ச்சியையும் விட இன்னும் கேவலமாய் நடந்து கொண்டாலும் அக்கட்சிக்கு தோல்வி ஏற்பட்டுவிடும் என்று நான் கருதவில்லை. ஏனெனில், அதற்கு கொள்கை பலம் உண்டு. காங்கிரசுக்கு அது அடியோடு பூஜ்ஜியம். ஆதலால், ஜஸ்டிஸ் கட்சி தோல்வி அடையாது என்று கருதுகிறேன்.

சமதர்மம்

5. சமதர்மத்தைப் பற்றி ஒரு தோழர் குறிப் பிட்டிருக்கிறார். ஜஸ்டிஸ் கட்சி சமதர்மக் கட்சி என்பதை ஞாபகத்தில் வையுங்கள். அது தோன்றிய பிறகுதான் இன்று பறையனும், பார்ப்பானும் ஒரு ஸ்தானத்தில் சரிசமமாய் வீற்றிருக்கிறார்கள். புலியும், பசுவும் ஒரு துறையில் தண்ணீர் குடிப்பதுதான் சமதர்ம ராஜ்ஜியம் என்பது பழங்கால பேச்சு. ஆனால், அது இன்று சர்க்கஸ் கொட்ட கைகளில் நடைபெறுகிறது. அதனாலேயே, நாம் அதை சமதர்ம ராஜ்ஜியம் என்று சொல்லுவதில்லை. ஆனால், இன்று பறையனும், பார்ப்பானும், சாஸ்திரியும், சங்க ராச்சாரியும், சக்கிலியும் ஒரு பீடத்தில் அமர்கிறார்கள், ஒரு பதவியில் இருக்கிறார்கள். எப்படி? சவுக்கினாலா? ரிவால்வார் பயத்தினாலா? இல்லவே இல்லை. தாங்களாகவே ஆசைப்பட்டு அதுவும் பத்தாயிரம், இருபதாயிரம் செலவு செய்து கொண்டு போய் அமர ஆசைப்படுகிறார்கள். பறையனை பார்ப்பான், பிரபுவே! எஜமானே! என்று நின்று கொண்டு கெஞ்சிப் பேசு கிறான். இதெல்லாம் எப்படி ஏற்பட்டது? ஜஸ்டிஸ்கட்சி ஏற்படுவதற்கு முன் தாழ்த்தப்பட்ட வகுப்புகளைப் பற்றிய ஒரு வார்த்தையாவது காங்கிரஸ் கூட்டத்தில், நட வடிக்கையில், ஆதாரத்தில், திட்டத்தில், கொள்கையில் இருந்ததா என்று யோசித்துப் பாருங்கள். ஆகவே, ஜஸ்டிஸ் கட்சி சமதர்ம கட்சி என்பதில் உங்களுக்கு இன்னும் சந்தேகம் உண்டா என்று கேட்கிறேன். ஆகையால் சமுதாய சமதர்ம வேலையேதான் நான் இப்போதும் இன்றும் செய்து வருகிறேன். பொருளாதார சமதர்ம வேலை செய்ய எனக்கு ஆசைதான். ஆனால், காங்கிரஸ் அதுக்குப் பரமவிரோதி என்பதோடு, அது ஒரு காட்டிக்கொடுக்கும் ஸ்தாபனமாகும். அது ஒழிந்தால்தான் பொருளாதார சமதர்மம் பேச சவு கரியப்படும் என்றாலும் சட்டத்துக்கு மாறாய் இல்லாமல், அதாவது சர்க்கார் அடக்குமுறைக்கு ஆளாகாமல் எவ்வளவு சமதர்ம பிரசாரம் செய்யலாமோ அவ்வளவையும் செய்துதான் வருகிறேன். செய்யத்தான் போகிறேன். மற்றபடி நீங்கள் எனக்கு இவ்வளவு கவுரவம் செய்து இவ்வளவு தூரம் எனது அபிப்பிராயத்தை எடுத்துச் சொல்ல வசதி அளித்ததற்கு எனது நன்றியறிதலைத் தெரிவித்துக் கொள்ளுகிறேன்.

--------------------தந்தைபெரியார் - “ குடிஅரசு” - 10.1.1937

3.12.10

பெரியார் உச்சி முகர்ந்து பாராட்டியிருப்பார்

தமிழர்களின் இறையாண்மையைக் காக்க, தமிழ் மொழியைக் காக்க, தமிழின உரிமைகள் காக்கப்பட தமிழர் தலைவர் நீண்ட காலம் வாழவேண்டும்

திராவிடர் கழகம் இருக்கவேண்டும்

திராவிடர் கழக தலைவர் தமிழர் தலைவர் கி.வீரமணி அவர்களின் 78ஆம் ஆண்டு பிறந்தநாள் விழாப் பொதுக்கூட்டத்தில் பங்கேற்ற தொல். திருமாவளவன் எம்.பி., அவர்களுக்கு கழகப் பொதுச்செயலாளர் கவிஞர் கலி. பூங்குன்றன் பொன்னாடை அணிவித்து நூல்களை வழங்கினார். விழா மேடையில், இனமுரசு நடிகர் சத்யராஜ், கழகப் பொருளாளர் வழக்கறிஞர் கோ. சாமிதுரை, கழகப் பிரச்சார செயலாளர் வழக்கறிஞர் அருள்மொழி ஆகியோர் உள்ளனர் (சென்னை பெரியார் திடல், 2.12.2010).


தமிழும், தமிழினமும் காக்கப் பட தமிழர் தலைவர் வீரமணி அவர்கள் நீண்ட நாள் வாழவேண்டும்; திராவிடர் கழகம் இருக்க வேண்டும்; தமிழர் தலைவரின் கொள்கை வளர்ச் சிப் பணி, கல்வி - நிறுவனப் பணிகளை எல்லாம் தந்தை பெரியார் உயிரோடு இருந்திருந்தால் அவரை உச்சி முகர்ந்து பாராட்டியிருப்பார். அதுமட்டுமல்ல தமிழர் தலைவரின் பிறந்தநாளை நாடெங்கும் எழுச்சி விழாவாக கொண்டாட வேண்டும் என்று விடுதலை சிறுத்தைகள் கட்சித் தலைவர் தொல். திருமாவளவன் கூறி விளக்கவுரையாற்றினார்.

திராவிடர் கழக தலைவர் தமிழர் தலைவர் கி.வீரமணி அவர்களின் 78ஆம் ஆண்டு பிறந்தநாள் விழா சென்னை பெரியார் திடலில் (நேற்று) 2.12.2010 இரவு 7 மணிக்கு நடைபெற்ற கட்டுக்கடங்காத கூட்டத்திற்கிடையே விடுதலை சிறுத்தைகள் கட்சித் தலைவர் தொல். திருமாவளவன், நாத்திக நன்னெறிச் செம்மல் இனமுரசு சத்யராஜ் ஆகியோர் கலந்து கொண்டு உரையாற்றினர்.

தொல். திருமாவளவன்

விடுதலை சிறுத்தைகளின் தலைவர் நாடாளு மன்ற உறுப்பினர் தொல். திருமாவளவன் ஆற்றிய உரையில், குறிப்பிட்ட முக்கிய செய்திகள் வருமாறு:-

தமிழர் தலைவர் அய்யா வீரமணி அவர்களின் 78ஆம் ஆண்டு பிறந்தநாள் அன்று லட்சோப லட்சம் விடுதலை சிறுத்தைகள் சார்பில் எங்களு டைய பிறந்தநாள் வாழ்த்துகளை முதற்கண் தெரி வித்துக் கொள்கிறேன். (கைதட்டல்) அதே போல நம்முடைய தமிழர் தலைவர் ஆசிரியர் அவர்களை உருவாக்கிய ஆ.திராவிடமணி அவர்களுக்கும் இன் றைக்குப் பிறந்தநாள் என்பதை அறிந்து எங் களுடைய வீர வணக்கத்தை அவர்களுக்கும் தெரி வித்துக் கொள்கின்றோம்.

தமிழர் தலைவரிடம்
தொலைபேசியில் பேசினேன்

தமிழர் தலைவர் ஆசிரியர் அவர்கள் ஒரு தொலைநோக்காளர். நான் இன்று காலையில் அவ ரிடம் தொலைபேசியில் பிறந்தநாள் வாழ்த்து களைச் சொல்லி இன்றைக்கு மாலையில் நடை பெறுகின்ற பொதுக்கூட்டத்தில் வந்து சந்திக்கிறேன் என்று சொன்னேன். நான் இப்பொழுது வெளியூரில் இருக்கின்றேன். பிறந்தநாள் விழா கொண்டாடு வதை நான் விரும்புவதில்லை என்று அடக்கத் தோடு சொன்னார். பொதுவாக பிறந்தநாளை விரும்பாத தலைவர்களே இருப்பதில்லை. நம் முடைய உணர்வுகள் பட்டை தீட்ட வேண்டு மானால் நம்முடைய ஆசிரியர் அவர்கள் நீடூழி வாழ வேண்டும். ஆகவே நம்மை நாமே பட்டைத் தீட்டிக் கொள்ள அவருடைய களப்பணி நமக்குத் தேவைப்படுகிறது.

பெரியார், ஆசிரியரை அடையாளம் கண்டார்

தந்தை பெரியார் பேரறிஞர் அண்ணா அவர் களை அடையாளம் கண்டார். அதே போல தந்தை பெரியார் நம்முடைய தமிழர் தலைவரை அடை யாளம் கண்டார். பேரறிஞர் பெருந்தகை அண்ணா அவர்களும் நம்முடைய கலைஞர் அவர்களை அடையாளம் கண்டார். தந்தை பெரியார் அவர்கள் உயிரோடு இருக்கிற காலத்தில் நமக்கு தமிழர் தலைவரை அடையாளம் காட்டினார். அவருடைய இயக்கம் இன்றைக்கு எல்லா வகைகளிலும் தமிழர் தலைவருடைய கடும் உழைப்பால் சிறப்பாக வளர்ந்திருக்கிறது. ஆனால் புரட்சியாளர் அம்பேத்கர் அவர்களால் தொடங்கப்பட்ட இயக்கம், அவருடைய வாரிசு களாலேயே தொடரப்பட முடியாமல் இருக்கிறது. தேங்கியிருக்கிறது. புரட்சியாளர் அம்பேத்கர் அவர்களுடைய இடம் அய்யா அவர்களுடைய இயக்கத்தைப் போல் அல்லாமல் ஒரு வெற்றிட மாகவே இருப்பதை நம்மால் உணராமல் இல்லை.

பெரியார் திடலுக்கு நானே தேடி வந்தேன். பெரியார் நூலக வாசகர் வட்ட நிகழ்ச்சியில் கருத்துகளை கேட்டேன். தமிழர் தலைவர் அவர்கள் பேசுகின்ற கூட்டத்தில் அவருடைய உரையை தூர இருந்து கேட்டிருக்கின்றேன். பிறகு பகுத்தறிவாளர் கழக மாநாடு, வழக்காடு மன்றம் போன்றவை பெரியார் திடலில் நடைபெறுகின்ற நிகழ்ச்சிகளில் எல்லாம் கலந்து கொண்டிருக்கின்றேன். ஆசிரியர் அவர்களை எனக்கு அவ்வளவாக அப்பொழுது தெரியாது. பழக்கம் இல்லை.

பெரியார் திடலில் இருந்து பெற்ற கருத்துக்கள்தான்

பெரியார் திடலிலிருந்து பெற்ற கருத்துக்கள் என்னை ஊக்கப்படுத்தின. அந்த வகையிலே இங்கே என்னை ஊக்கப்படுத்தி பேசியதைக் கண்டு ஆறுதல் அடைகின்றேன். நம்பிக்கை பெறுகின்றேன்.

தேர்தல் அரசியலால் துணிந்து கருத்துகளைச் சொல்ல முடியவில்லை என்ற மன உளைச்சல் எங்களுக்கு இருக்கிறது. அதனால்தான் தந்தை பெரியார் அவர்கள் தேர்தல் பக்கமே தலை வைக்காமல் சுழன்று சுழன்று தனது இறுதிக்காலம் வரை பணியாற்றினார். தந்தை பெரியாரின் நெஞ்சுரம், போர்க்குணம் நம்முடைய தமிழர் தலைவரிடத்திலே இருக்கிறது.

பெரியாரின் மறுபிறவி

ஆசிரியர் தமிழர் தலைவர் அவர்கள் தந்தை பெரியாருடைய கொள்கை வாரிசாக மட்டுமல்ல, மறு பிறவியிலே நமக்கு நம்பிக்கை இல்லை என்று சொன்னாலும் தந்தை பெரியாரின் மறுபிறவியாகவே நமக்குக் காட்சி அளிக்கிறார். (கை தட்டல்)

தமிழ் ஈழ தேசிய தலைவர் பிரபாகரனால்தான் தமிழ் ஈழம் கிடைக்கும் என்பதை முதன் முதலில் நமக்கு அடையாளப்படுத்திக் காட்டியவர்.

என் வாழ்நாளில் தி.க. போராட்டத்தில் முதன்முதலாக கைது ஆனேன்

ஈழப்பிரச்சினைக்காக சென்னை பெரியார் திடலில் ஆலோசனைக் கூட்டம் நடைபெற்றது. யார் யார் எந்தக் குழு ரயில் மறியல் போராட்டத்தில் ஈடுபடுவது என்று முடிவெடுக்கப்பட்டது. அந்தக் கூட்டத்தில் நானும் கலந்து கொண்டேன். நானும் ஒரு குழுவும் சென்று சைதாப்பேட்டையில் மின்சார ரயிலை மறித்தோம். உடனே காவல்துறையினர் எங்களை கைது செய்து பல்லாவரம் காவல் நிலையத்தில் வைத்தார்கள். என் வாழ்நாளில் திராவிடர் கழகம் நடத்திய ரயில் மறியல் போராட்டத்தில்தான் முதன் முதலாக கலந்து கொண்டு கைது செய்யப்பட்டேன். இரவு எங்களை விடுதலை செய்தார்கள். இரவு 8 மணிக்கு கைதான தோழர்கள் எல்லாம் விடுதலை செய்யப் பட்டு பெரியார் திடலுக்கு இரவு வந்து சேர்ந்தோம்.

அன்றைக்கு இரவு 8 மணிக்கு மேல் நம்முடைய தமிழர் தலைவர் ஆசிரியர் அவர்கள் பெரியார் திடலுக்கு வந்து கைது செய்யப்பட்டு விடுதலையாகி வந்தத் தோழர்களைப் பாராட்டி பேசினார்கள்.

இன்றைக்கும் அவருடைய பேச்சு ஞாபகம் இருக்கிறது. பிரபாகரன் அவர்களால்தான் தமிழ் ஈழப் போராட்டத்தை முன்னெடுத்துச் செல்ல முடியும் என்று தெளிவாகப் பேசினார்கள்.

கடலூர் திருப்பாதிரிப்புலியூரில் நடைபெற்ற மாநாட்டில் நமது ஆசிரியர் அவர்கள் பத்து வயது சிறுவனாக இருந்து பேசினார். அப்பொழுது தந்தை பெரியார் அவர்களும், பேரறிஞர் அண்ணா அவர்களும் அவரை அடையாளம் கண்டு பாராட் டிப் பேசினார்கள். திராவிடர் இயக்கத்து திரு ஞானசம்பந்தன் வீரமணி என்று பேரறிஞர் பெருந் தகை அண்ணா பாராட்டி பேசினார்.

அப்படிப்பட்ட ஆசிரியரை அவருடைய 78ஆம் ஆண்டு பிறந்தநாளில் இந்தத் திருமாவளவன் வந்து பாராட்டுவது பெரிய செய்தியே அல்ல.

இந்தியாவிலே சமூக நீதிக்காக

இன்றைக்கு இந்தியாவில் சமூகநீதியை கட்டிக் காப்பாற்றுகின்ற ஒப்பற்ற தலைவராக விளங்கு கிறார். நம்முடைய முதல்வர் கலைஞர் அவர்களே அதைப் பாராட்டிச் சொல்வதை நாம் பார்க் கின்றோம்.

எம்.ஜி.ஆர் பிற்படுத்தப்பட்டோருக்கு வருமான வரம்பு ஆணையைக் கொண்டு வந்தார். அதை அன்றைக்கு கடுமையாக தமிழர் தலைவர் ஆசிரியர் அவர்களும், கலைஞர் அவர்களும் எதிர்த்தார்கள்.

எம்.ஜி.ஆர். படுதோல்வியை சந்தித்தார்

அதன் விளைவு தோல்வியே கண்டிராத தலைவர் என்று சொல்லப்பட்ட எம்.ஜி.ஆர். நடைபெற்ற நாடாளுமன்ற தேர்தலில் தோல்வியை சந்தித்தார். இரண்டே இடங்களில் தான் வெற்றி பெற முடிந்தது.

69 சதவிகிதத்திற்கு ஆபத்து என்று தெரிந்தவுடன் முதல் குரல் கொடுத்தவர் நம்முடைய ஆசிரியர். திரா விடர் கழகமும், திராவிட முன்னேற்றக் கழகமும், இரட்டைக் குழல் துப்பாக்கியாக செயல்பட்டு 69 சதவிகித இட ஒதுக்கீட்டை காத்தார்கள்.

ஒரு தாழ்த்தப்பட்ட வரதராஜன், உச்சநீதிமன்ற நீதிபதியாக வர முடிந்தது என்று சொன்னால் அது தி.க., தி.மு.க., செய்த அரிய சாதனை.

பிரபாகரனின் ஆயுதங்கள் பறிப்பு

தந்தை பெரியார் கொள்கைக்குக் கிடைத்த மாபெரும் வெற்றி, எம்.ஜி.ஆர். ஆட்சியில் பிரபாகரன் மற்றும் அவர்களுடைய போராளிகளின் ஆயுதங்கள் ஒயர்லெஸ் போன்ற கருவிகளை எல்லாம் காவல்துறையினர் பறித்துச் சென்றபொழுது சென்னை மந்தைவெளி பி.எஸ்.எஸ். மருத்துவ மனையில் இருதய நோயால் தாக்கப்பட்டு இருந்த தமிழர் தலைவர் அவர்கள் பிரபாகரன் அவர்கள் உண்ணாவிரதம் இருந்த செய்தியைக் கேள்விப்பட்டு சென்னை அடையாறு இந்திரா நகரில் தங்கியிருந்த பிரபாகரன் வீட்டிற்குச் சென்றார்.

அப்பொழுது நான், அருள்மொழி போன்றவர் கள் சட்டக்கல்லூரியில் படித்துக் கொண்டிருந்த நிலையில், சட்டக்கல்லூரி மாணவர்கள் எல்லாம் திரண்டு சென்று பிரபாகரன் வீட்டிற்கு முன்பு வந்து ஒலி முழக்கம் எழுப்பினோம். அதற்கு முன்பே தமிழர் தலைவர் அவர்கள் ஆயுதம் ஏந்திய நாம் உண்ணா விரதம் இருக்கக் கூடாது என்று பிரபாகரன் அவர்களிடம் வற்புறுத்திச் சொல்லியிருந்தார்.

நாங்களோ, ஆயுதம் ஏந்திய கைகள் அகிம்சை கைகளை ஏந்த வேண்டாம் என்று ஒலி முழக்கம் எழுப்பிக் கொண்டிருந்தோம்.

தொலைபேசியில் எம்.ஜி.ஆர்.

அறையில் இருந்த தமிழர் தலைவர் அவர்களும், பிரபாகரன் அவர்களும் வெளியே வந்து எங்களிடம் பேசிக் கொண்டிருந்தனர்.

அப்பொழுது தொலைபேசி மணி ஒலித்தது. நமது ஆசிரியர் அவர்களும், பிரபாகரன் அவர்களும் உள்ளே சென்று பேசிவிட்டு வெளியே வந்து சொன்னார்கள். உதகமண்டலத்திலிருந்து எம்.ஜி.ஆர். தொலை பேசியில் பேசினார். நான் ஆயுதங்களை திரும்ப உங்களிடமே கொடுக்கச் சொல்லிவிட்டேன் என்றார். உண்ணாவிரதப் போராட்டம் தேவை யில்லை என்று சொல்லி மேதகு பிரபாகரனுக்கு பழச்சாறு கொடுத்து உண்ணாவிரதத்தை முடித்து வைத்தவர் நம்முடைய தமிழர் தலைவர் ஆசிரியர் அவர்கள்.

அதே போல ஈழத் தமிழர்கள் செத்துக் கொண்டிருக்கிறார்களே அதைத் தடுக்க வேண்டும் என்பதற்காக நான் மறைமலை நகரில் உண்ணா விரதம் இருந்தபொழுது முதன் முதலில் ஓடோடி வந்து தடுத்து அறிவுரை சொன்னார்.

எனது உடல்நிலை தொடர்ந்து பாதிக்கும் என்று கவலைப்பட்டு இரண்டு மூன்று நாட்கள் தொடர்ந்து தொலைபேசியில் தொடர்பு கொண்டு உண்ணாவிரதத்தை முடிக்கச் சொல்லி என்மீது பாச உணர்வைக் கொட்டியவர் தமிழர் தலைவர் ஆசிரியர் அவர்கள் (கைதட்டல்).

கலைஞர் - தமிழர் தலைவர்

தலைவர் கலைஞர் அவர்களும், ஆசிரியர் அவர்களும் பெரியார் இயக்கத்தின் மிகப்பெரிய தூண்கள். மகத்தான தலைவர்கள். ஒரு தாழ்த்தப் பட்ட சகோதரன் உயர்பதவியில் அமர்ந்திருப்ப தற்காக ஊழல் என்று பேசுகிறார்கள். பணம் வாங்கியிருப்பார்கள் என்று பேசுகிறார்கள்.

இப்படி பேசுகிற அணி யார்? அ.தி.மு.க, பாரதீய ஜனதா கட்சி, சுப்பிரமணிய சாமிகள்.

இதே தொலைத் தொடர்பு துறையிலே பிரமோத் மகாஜன், அருண்ஷோரி காலத்திலே அவர்கள் அமைச்சராக இருந்த பொழுது ரூ.36 ஆயிரம் கோடி இழப்பு ஏற்பட்டிருக்கிறதே அதைப்பற்றி இவர்கள் ஏன் வாய் திறக்கவில்லை?

ஆசிரியர் 100 ஆண்டுகள் வாழ்க

சமூக நீதி குரல் தொடர்ந்து ஒலிக்க வேண்டும். இந்துத்துவ மேலாண்மை சக்திகளின் ஆதிக்கத்தை முடியடிக்க வேண்டும். இந்தப் பணிகளை எல்லாம் தொடர்ந்து களத்தில் நின்று போராட நம்முடைய ஆசிரியர் தமிழர் தலைவர் அவர்கள் நூறு ஆண்டு கள் நல்ல உடல் நலத்துடன் வாழ வேண்டும்.

தமிழர்களின் இறையாண்மையைக் காக்க, தமிழ் மொழியைக் காக்க, தமிழர் இனத்தின் உரிமை களைக் காத்திட திராவிடர் கழகமும், தமிழர் தலைவரும் வேண்டும். பொடா, கிடா என்ற எந்த அச்சுறுத்தலுக்கும் பெரியார் திடல் மிரண்டதில்லை. திராவிடர் கழகத் தோடு விடுதலை சிறுத்தைகள் இயக்கம் என்றைக்கும் உறு துணையாக இருந்து களப்பணி ஆற்றும்.

பெரியார் உச்சி முகர்ந்து பாராட்டியிருப்பார்

இன்றைக்கு ஆசிரியர் ஆற்றி வருகின்ற சமுதாயப் பணி, கல்விப் பணிகளை எல்லாம் பார்த்தால் தந்தை பெரியார் உயிரோடு இருந்தால் உச்சி முகர்ந்து பாராட்டியிருப்பார். ஆசிரியரும், கலைஞரும் ஒரே மாதிரியான சிந்தனை ஓட்டத்தில் சென்று கொண்டிருக்கிறார்கள். ஜாதியை ஒழிக்க முன் வருபவர்கள் யார்?

இன்றைக்கு ஜாதியை ஒழிக்க யார் முன் வருவார்கள்? கலைஞர் வருவார். தமிழர் தலைவர் வருவார். ஜாதி ஒழிப்பை தங்களது கொள்கையாக ஏற்றுக் கொள்கிறோம் என்று எத்தனை கட்சிக் காரர்களால் சொல்ல முடியும்?

தமிழர் தலைவரின் பிறந்தநாள் விழா தமிழகம் எங்கும் எழுச்சி விழாவாகக் கொண்டாட வேண்டும். - இவ்வாறு தொல். திருமாவளவன் பேசினார்.

------------------------"விடுதலை” 3-12-2010

2.12.10

வாழ்க தந்தை பெரியார்! வாழ்க தமிழர் தலைவர்!!



தமிழர் தலைவர் வாழ்கவே!

அகவை 78 இல் அடியெடுத்து வைக்கிறார் திராவிடர் கழகத் தலைவர் - தமிழர் தலைவர் மானமிகு கி. வீரமணி அவர்கள் (2.12.2010).

பத்து வயது சிறுவனாக இருந்தபோதே கழக மேடையில் கர்ச்சனை புரிந்து படிப்படியாக தன் உழைப்பால், அளப்பரிய ஆற்றலால், விசுவாசமான நடவடிக்கைகளால் இன்று கழகத்தைக் கட்டிக் காக்கும் தலைவராக மிளிர்கிறார்.

தந்தை பெரியார் அவர்கள் இருந்த காலகட்டத்திலேயே அவரால் அடையாளம் காட்டப்பட்டவர். 1960 இல் திராவிடர் கழகப் பொதுச் செயலாளராக அறிவிக்கப்பட்டார்.

விடுதலையின் ஆசிரியராகவும், அய்யா அவர்களின் வேண்டுகோளை ஏற்றுக்கொண்டார் (1962).

இல்லறத்தின் துணையைத் தேர்வு செய்து கொடுத்ததிலிருந்து அவருக்கு எல்லாமே அய்யாவேதான்.

உங்கள் அடிமையை விட்டுவிட்டுச் சென்றீர்களே அய்யா! என்று அய்யா மறைந்தபோது அவர் கதறியபோது உதிர்த்த வார்த்தை கலப்படமற்ற உண்மை, உண்மையே!

விளையும் பயிர் முளையில் தெரியும் என்பார்கள். அது யாருக்குப் பொருந்துகிறதோ, பொருந்தவில்லையோ, மானமிகு வீரமணி அவர்களுக்குப் பொருந்தும் - முக்காலும் பொருந்தக் கூடியதாகும்.

கடலூர் மாநாட்டில் மேசைமீது ஏறி நின்று முழங்கிய சிறுவன் வீரமணியை திராவிடர் கழகத்தின் திருஞான சம்பந்தன் என்று அண்ணா கூறியதும், மிக முக்கியத்துவம் வாய்ந்த - நீதிக்கட்சி திராவிடர் கழகமாகப் பெயர் மாற்றம் பெற்ற மாநாட்டில் (1944) ஒரு தீர்மானத்தின் மீது அவருக்குப் பேச வாய்ப்பு அளிக்கப்பட்டதும் அசாதாரணமானவை!

வாழ்க்கையின் கஷ்டங்களை சிறு வயதிலேயே அனுபவித்தவர்! கல்வி முதல் அனைத்திலும் அவருக்கிருந்த கடமை உணர்ச்சி, உழைப்பு அவரை மேலே மேலே வளர்த்துக் கொண்டு உச்சத்தில் அமர்த்தின. எதிலும் முதல் நிலை, எந்த இடத்திலும் அதே நிலை என்ற நிலையிலே முத்திரைகள் பொறித்தவர். எதிலும் துல்லியம் இருக்கவேண்டும் என்பதிலே கூர்மையான எண்ணம் கொண்டவர்.

அண்ணாமலைப் பல்கலைக்கழகத்தில் மாணவர் மணியாகத் திகழ்ந்தவர்; பி.ஏ. (ஆனர்சு), பொருளாதாரத்தில் பல்கலைக் கழகத்தில் முதல் மாணவராகத் தேர்ச்சி பெற்று இரண்டு தங்க மெடல்களைத் தட்டிச் சென்றவர்.

பேச்சுப் போட்டிகளில் கலந்துகொண்டு பரிசுகளைப் பறித்துக் கொண்டு வந்தவர். படிக்கும்போதே அண்ணாமலைப் பல்கலைக் கழக அரங்குகளில் மாணவர் வீரமணி பேசுகிறார் என்றால், அதற்கென்று பெருந்திரள் கூடும் என்கிற அளவுக்குப் பேசும் கலை வளர்த்தவர்.

அவர் மேடைப் பேச்சாளர் மட்டுமல்ல; களப்பணியாளர்; மேடை களைக் கட்டக் கூடியவர், பேச்சாளர்களை அழைத்துக் கூட்டங்களை நடத்தக் கூடியவர் - பேச்சாளராகவும் வெளியூர்களுக்குச் சென்று வந்தவர்.

இயக்க வரலாற்றில் இந்தத் தன்மையில் படிப்படியான பரிணாமம் பெற்ற பெருஞ்சிறப்பு என்பது இவருக்கு மட்டுமேதான் உண்டு.

அந்தப் படிப்படியான பயிற்சிகளில் அத்துப்படியான காரணத்தால் தான் தந்தை பெரியார், அன்னை மணியம்மையார் ஆகியோர் மறைவிற்குப் பின்னால், இயக்கத்தை மிகப்பெரிய உயரத்துக்கு வளர்த்து எடுக்க அவரால் முடிந்தது.

ஏடுகள், இதழ்கள், வெளியீடுகள் என்று எதை எடுத்துக் கொண்டாலும், திராவிடர் கழகத்திற்கு இணையாக யாரையும், எந்த அமைப்பையும் ஒப்பிட முடியாது என்கிற அளவுக்கு ஏற்றத்தை ஏற்படுத்திக் கொடுத்திருக்கிறார்.

தந்தை பெரியார் தொடங்கிக் கொடுத்த கல்விப் பணியை - பல்கலைக் கழகம் என்ற அளவுக்குப் பரிணமிக்கச் செய்த பாங்கு - கண்ணுள்ளவர்களுக்குத் தெரியும்; கருத்துள்ளவர்கள் கைகுலுக்கிப் பாராட்டுகிறார்கள்.

கல்வி நிறுவனங்களை எப்படி நடத்தவேண்டும் என்பதை நண்பர் வீரமணியிடம் தெரிந்துகொள்ளுங்கள் என்றாரே சமூகநீதிக் காவலர் மாண்புமிகு வி.பி. சிங் - அது என்ன சாதாரணமா?

கழகத்திற்காக அவர் அமைத்துள்ள கட்டுமானப் பணிகள் (Infrastructure) கம்பீரமானவை.

தலைநகரமான புதுடில்லியில் நடுநாயகமாக அய்ந்து அடுக்குப் பெரியார் மய்யம் அசோகன் கல்வெட்டுப் போல காலாகாலத்திற்கும் பேசிக்கொண்டே இருக்கும்.

பெரியார் பன்னாட்டு மய்யத்தை உருவாக்கி, அமெரிக்கா, கனடா, இங்கிலாந்து, பிரான்சு, சிங்கப்பூர், மியான்மா, துபாய், குவைத் முதலிய நாடுகளில் தந்தை பெரியார் கொள்கைகளைப் பரவச் செய்து மண்டைச் சுரப்பினை உலகைத் தொழச் செய்த நேர்த்தியை நேர்மை கொண்ட நெஞ்சங்கள் வாழ்த்திக் கொண்டு இருக்கின்றன.

சாதனைகள் என்று எடுத்துக்கொண்டால், அத்தியாயம் அத்தியாயமாகச் சொல்லிக் கொண்டே போகலாம்.

தந்தை பெரியார் காலத்தில் மாநில அளவில் மட்டுமே இருந்த இட ஒதுக்கீடு இன்றைக்கு மத்திய அரசு அளவில் கிடைப்பதற்காக இவர் பட்டபாடு, மேற்கொண்ட முயற்சிகள் என்ன என்பதை ஒரு பிரதமராக இருந்தவரே (வி.பி. சிங்) ஒப்புக்கொண்டு பாராட்டினார்.

சமூகநீதியின் கழுத்தை நோக்கி சங்கு சக்கரம் வரும்பொழுதெல்லாம் தலை கொடுத்துக் காப்பாற்றிக் கொடுத்த காரியத்தை ஒடுக்கப்பட்ட மக்கள் உணர்கிறார்கள்.

கிராமப் பிரச்சாரத் திட்டம், கல்வி நிறுவனங்கள் முன் பிரச்சாரம், நடமாடும் புத்தகச் சந்தைகள், வீதி நாடகங்கள், பிரச்சினைகளின் அடிப்படையில் தொடர் கூட்டங்கள், அடுக்கடுக்கான மாநாடுகள், மூட நம்பிக்கை ஒழிப்புப் பேரணிகள், மகளிர் சங்கமம், குழந்தைகள் முகாம், பெரியார் சமூகக் காப்பு அணி, மாநிலம் தழுவிய பேச்சுப் போட்டிகள், பெரியார் வீர விளையாட்டுக் கழகத்தின் செயல்பாடுகள், விடுதலையும், பெரியார் பல்கலைக் கழகமும் இணைந்து வாகை சூட வாரீர்! எனும் புதிய அணுகுமுறைகள் மூலமாகக் கழகம் மக்கள் நெஞ்சில் மலிவுப் பதிப்பாக மணம் வீசி நிற்கிறது என்றால், எல்லாவற்றிற்கும் அடிப்படைக் காரணம் இந்தத் தலைவர் அல்லவா? பெரியார் திரைப்படம் - நாம் கனவில்கூட நினைத்துப் பார்க்காத ஒன்றாயிற்றே!

தமிழர் தலைவர் என்று திராவிடர் இயக்கத்தின் மூத்த தலைவர்களாக இருக்கக் கூடிய கலைஞர் போன்றவர்கள் அங்கீகரிக்கும் தலைவராக ஒளிவீசிக் கொண்டு இருக்கிறார்.

78 வயதில் 68 ஆண்டு பொது வாழ்க்கை என்ற விகிதாச்சாரம் இந்தத் தலைவருக்குத்தான் உண்டு.

இன்னும் எத்தனையோ கூறலாம்; இந்த இயக்கத்தில் இருப்பது, இந்தத் தலைமை நமக்குக் கிடைத்திருப்பது, இந்தக் கொள்கையை நாம் பற்றிக் கொண்டது என்பதெல்லாம் வேறு யாருக்கும் கிடைக்காத - கிடைக்க முடியாத பெருஞ்செல்வமாகும்.

அந்தத் தலைவரின் ஆணையை ஏற்று அய்யா பணி முடிக்க நம்மை நாம் அர்ப்பணித்துக் கொள்வோம்!

வாழ்க தந்தை பெரியார்! வாழ்க தமிழர் தலைவர்!!

--------------------- “விடுதலை” தலையங்கம் 1-11-2010

1.12.10

சங்கர மடம் முன் பெரியார் - மகாவிஷ்ணுவின் முன் பெரியார்

சிலைகள் பேசுகின்றன!

தந்தை பெரியார் 1973 டிசம்பர் 24 இல் தம் அசைவைத் துறந்தார். இனத்தின் கதி என்ன? இயக்கத்தின் கதி என்ன? என்ற எரிமலைக் கேள்வி அனைவர் உள்ளத்திலும் தகித்தது!

அதுவரை தந்தை பெரியாரைத் தாயாகப் பேணுவதில் மட்டுமே தன் சிந்தனையையும், மூச்சையும் செலுத்திக் கொண்டிருந்த அன்னை மணியம்மையார் கழகத்தின் தலைமைப் பொறுப்பை ஏற்றார்.

தந்தை பெரியார் உடல் அடக்கம் முடிந்த நிலையில், திராவிடர் கழகப் பொதுச்செயலாளர் கி.வீரமணி அவர்களிடம் ஒரு கேள்வியை செய்தியாளர்கள் அப்பொழுது முன்வைத்தனர்.

அதற்கு விடை பகன்றார் - சற்றும் தாமதிக்காமல்! திராவிடர் கழகம் யாருடனும் இணையாது - கலையாது என்றார். அய்யா காட்டிய வழியில் நூலிழை பிறழாமல் நடப்போம் என்றார்.

தந்தை பெரியார் மறைந்து 37 ஆண்டுகள் பறந்தோடி விட்டன. இந்தக் கால கட்டத்தில் ஜாதி ஒழிப்புக் களத்தில், சமூக நீதிக் களத்தில், பெண்ணுரிமைக் களத்தில், மூடநம்பிக்கை ஒழிப்புக் களத்தில் எத்தனை எத்தனையோ வெற்றிகள் குவிக்கப்பட்டுள்ளன.

இவற்றுள் சில வரலாற்றுக் குறிப்பு நினைவுச் சின்னங்கள்; சில முக்கியமானவை.

சங்கரமடம் முன் பெரியார் சிலை!

காஞ்சிபுரம் சங்கர மடம் என்பது ஆதிசங்கரரால் நிறுவப்பட்டதல்ல - அவர்களாகவே உருவாக்கிக் கொள் ளப்பட்ட புரட்டு மடம் என்பது ஒரு புறம் இருந்தாலும், பார்ப்பனர்களைப் பொறுத்தவரை அதனைக் கண்டு கொள்வதில்லை.

குடியரசுத் தலைவர், பிரதமர் வரை காஞ்சி மடத்துக்கு ஓடோடி வந்து, சங்கராச்சாரியாரின் பாதார விந்தங்களில் தங்கள் முகங்களைப் புதைத்துக் கொள்வார்கள். தரையில் உட்கார்ந்து அந்த ஜெகத் குருவை தரிசிப்பார்கள்.

இந்தியாவுக்கு டில்லி தலைநகரம் என்று சொல்லப் பட்டாலும், மானசீகமாக காஞ்சிபுரம்தான் அவர்களுக்குத் தலைமைப் பீடமாக இருந்து வந்திருக்கிறது.

அந்த மடத்தின் முன் பகுத்தறிவுப் பகலவன் தந்தை பெரியார் சிலையை நிறுவினாரே திராவிடர் கழகப் பொதுச் செயலாளர் மானமிகு கி.வீரமணி அவர்கள் - அது எத்தனைக் கோடி பெறும் என்பதைப் பார்க்க வேண்டும்.

அந்த இடத்தில் தந்தை பெரியார் சிலை வைக்க அனுமதி பெற்றிருந்தாலும், அ.இ.அ.தி.மு.க. அரசு அனுமதியை மறுத்தது.

அந்த இடத்தில் அய்யா சிலையை வைத்தால் உடைத்தெறிவோம் என்று அ.இ.அ.தி.மு.க. சட்டமன்ற உறுப்பினர்கள் சட்டமன்றத்திலேயே குரல் கொடுத்து என்றென்றைக்கும் வரலாற்றில் அவமானத்தைத் தேடிக் கொண்டனர்.

எம்.ஜி.ஆர்.அரசின் அனுமதி மறுப்பினை எதிர்த்து செங்கற்பட்டு மாவட்ட திராவிடர் கழகத் தலைவர் மானமறவர் காஞ்சி சி.பி. இராசமாணிக்கம் சென்னை உயர்நீதிமன்றத்தில் வழக்கொன்றைத் தொடர்ந்தார்.

வழக்கினை விசாரித்த மாண்புமிகு நீதியரசர் வீ.இராமசாமி அரசுக்கு மூன்று வாரத்தில் பதில் மனு தாக்கல் செய்யுமாறு தாக்கீது பிறப்பித்தார். (7.9.1979)

தடைகளையெல்லாம் கடந்து காஞ்சி சங்கர மடத்தின் திருமுன்னே வருணாசிரமக் கோட்டைக்கு முன்னால் தந்தை பெரியார் அவர்களால் அடையாளம் காட்டப்பட்ட ஆசிரியர் கி.வீரமணி அவர்கள், வைதிகத்தைத் தூள் தூளாக்கும் வெடிகுண்டாம் வரலாற்று நாயகர் தந்தை பெரியார் சிலையைத் திறந்து வைத்தார். (இப்பொழுதுகூட உணர்ச்சிப் பெருக்கால் கை தட்டலாம் - ஆர்ப்பரிக்கலாம்!)

இதன்மூலம் தந்தை பெரியார் இயக்கத்தின் தன்மானத் தலைவர் மானமிகு கி.வீரமணி அவர்களும் வரலாற்றில் இடம் பெற்றார்.

சங்கர மடம் முன் பெரியார் சிலையா? நினைத்துப் பார்க்க முடியுமா ஆரியக் கூட்டத்துக்கு?

ஜீரணிக்க முடியாமல் தவியாய்த் தவித்தார்கள். தூக்கமின்றிப் புரண்டு புரண்டு படுத்தார்கள்.

ஆளுநர் ஆட்சி வந்தது. உயர்நீதிமன்றத்தில் மேல் முறையீடு செய்தார்கள். சிலை அமைக்க இடைக்காலத் தடை விதிக்க வேண்டும் என்று கோரினர்.

உயர்நீதிமன்றத் தலைமை நீதிபதி மாண்புமிகு எம்.எம்.இஸ்மாயில், மாண்புமிகு ரத்தினம் ஆகியோர் முன்னிலையில் வழக்கு வந்தது. சிலையை அந்த இடத்தில் வைக்கக்கூடாது என்று கோரி உச்சநீதிமன்றத்தில் மேல் முறையீடு செய்யவிருப்பதால் இடைக்காலத் தடை விதிக்க வேண்டும் என்று கோரப்பட்டது. அரசு சார்பில் தலைமை வழக்கறிஞர் வி.பி. ராமன் (அட்வகேட்ஜெனரல்) வாதாடினார்.

ஏற்கெனவே சிலை வைக்கப்பட்டு விட்டதால், இந்தக் கேள்வியே எழவில்லை என்று நமது தரப்பில் எடுத்துக் கூறப்பட்ட நிலையில், அரசு தரப்பு மனு நிராகரிக்கப் பட்டுவிட்டது. (18.3.1980)

ஆம், தந்தை பெரியார் தான் வென்றார். திராவிடர் கழகப் பொதுச் செயலாளர் மானமிகு வீரமணி அவர்களின் முயற்சிதான் வென்றது.

கடவுள் மறுப்பு, ஆன்மா மறுப்பு வாசகங் கள் தமிழில் மட்டுமல்ல; ஆங்கிலத்திலும் பொறிக்கப்பட்டன.

பக்த கோடிகள் நாட்டின் பல பகுதிகளிலிருந்தும் வரக்கூடிய இட மாயிற்றே - வெளி நாட்ட வர்களும் வந்து பார்க்கும் இடமாயிற்றே. அவர்களுக்குத் தெரிய வேண்டாமா?

காஞ்சிபுரம் ஒரு காலத்தில் பவுத்தர்களின் கோட்ட மாக விளங்கிய பவுத்தப் பூமியாயிற்றே!

கி.பி. 640 இல் காஞ்சிபுரத்திற்கு வந்த யுவான்சுவாங் என்ற சீன யாத்திரீகர் காஞ்சிபுரத்தில் நூறு பவுத்தப் பள்ளி களும், ஆயிரம் பிட்சுகளும் இருந்ததாகக் குறிப்பிட் டுள்ளார்.

காஞ்சிபுரத்தில் கச்சீஸ்வரர் எனும் பெயரில் உள்ள சிவன் கோயில் தொடக்கத்தில் புத்தர் கோயிலாக இருந்தது. இக்கோயிலின் முன் கோபுரத்து அஸ்திவாரக் கல் கட்டடத்தில் சில புத்த விக்கிரகங்கள் இருப்பதை இன்றும் காணலாம். காஞ்சி காமாட்சியம்மன் கோயில் ஒரு காலத்தில் பவுத்தரின் தாராதேவி ஆலயமாகும்.

பிற்காலத்தில் இவை எல்லாம் அடிச்சுவடு தெரியாமல் ஆரிய சதிகாரர்களால் அழிக்கப்பட்டு விட்டன என்பது தான் வரலாறு. மேலும் தகவல் அறிய விரும்புவோர் மயிலை சீனி. வேங்கடசாமி அவர்களால் எழுதப்பட்ட ஆய்வு நூலான பவுத்தமும் தமிழும் என்ற நூலைப் படித்துத் தெரிந்து கொள்ளலாம்.

பவுத்தத்தை வீழ்த்தி ஆரியம் குடி கொண்ட - அதன் வெறி கொள் சின்னமான காஞ்சி சங்கரமடத்தின் வாயில்முன் புத்தரின் மறுபதிப்பான தந்தை பெரியார் சிலையை நிறுவியது - வரலாற்றுக் கண்ணோட்டத்தில் முக்கியத்துவம் வாய்ந்த ஒன்றாகும். இந்த அரும் பெரும் வரலாற்று நிகழ்வைச் சாதித்தவர்தான் தமிழர் தலைவர் மானமிகு கி.வீரமணி ஆவார்.

மகாவிஷ்ணுவின் முன் பெரியார்

அதேபோல மகாவிஷ்ணு குடிகொண்டிருக்கும்(?) சிறீரங்கம் கோயில் முன் தந்தை பெரியார் சிலை நிறுவப்பட்டதுமாகும்.

சிறீரங்கத்தில் திறக்கப்படவிருந்த தந்தை பெரியார் சிலையை இரவோடு இரவாக சில சமூக விரோதிகள், கோழைகள் சேதப்படுத்தினர் (7.12.2006).

அவ்வளவுதான், திரண்டு எழுந்தது கருஞ்சட்டைப் பட்டாளம். கட்சிகளைக் கடந்து தமிழர்கள் போர்க் கோலம் பூண்டனர். சட்டப்பேரவையில் ஒருமித்த முறையில் புயல் வீசியது.

வழக்கம் போலவே பார்ப்பனர்கள் நீதிமன்றத்திற்குப் படையெடுத்தனர். பெரியார் சிலை திறப்பினைத் தடை செய்யக் கோரினர். சென்னை உயர்நீதிமன்றம் கோரிக்கையாளர்களின் மூக்கை வெட்டி அனுப்பிவிட்டது. (12.12.2006)

வேறு என்ன? தந்தை பெரியார் சிலை திறப்பு விழா - முழு நாள் விழாவாக மாபெரும் மூடநம்பிக்கை ஒழிப்பு ஊர்வலத்துடன் ஓகோ என்று நடைபெற்றது.(16.12.2006) தமிழகப் போக்குவரத்துத் துறை அமைச்சர் கே.என்.நேரு அவர்களின் தலைமையில் தமிழர் தலைவர் மானமிகு கி.வீரமணி அவர்கள் திறந்து வைத்தார்.

இந்தச் சிறீரங்கம் கோயிலும் ஒரு காலத்தில் பவுத்தக் கோயிலாகவே இருந்திருக்கின்றது என்று ஆதாரங்கள் பேசுகின்றன. நாகைப்பட்டினத்தில் இருந்த அய்ம் பொன்னாலான பவுத்த சிலையைத் திருடிக் கொண்டு வந்து சிறீரங்கம் ரெங்கநாதர் கோயிலுக்கு மதில்சுவர் எழுப்பினான் பன்னிரு ஆழ்வார்களில் ஒருவரான திருமங்கை ஆழ்வார்.(ஆதாரம் : தஞ்சைவாணன் கோவை).

இந்த ரெங்கநாதன் கோயிலுக்கு நாடெங்கிலும் இருந்து பக்தர்கள் வருவதுண்டு.

காஞ்சிபுரத்தில் சங்கரர் இருப்பது போல இங்கு ஜீயர் இருக்கிறார்.

ரெங்கநாதனைத் தரிசிக்க வரும் பக்தர்கள், முதலில் தந்தை பெரியார் சிலையைத் தரிசித்துவிட்டுத்தான் உள்ளே போகவேண்டும். அதிலும் கடவுள் மறுப்பு, ஆத்மா மறுப்பு வாசகங்கள் அடங்கிய கல்வெட்டு உண்டு.

அசோகனுக்குப் பிறகு கொள்கைக் கல்வெட்டுகளை நிறுவி வருவது திராவிடர் கழகமே!

தந்தை பெரியார் அவர்கள் மறைந்து 37 ஆண்டுகளில் ஏராளமான எண்ணிக்கையில் தந்தை பெரியார் சிலைகள் திறக்கப்பட்டுள்ளளன. பெரியார் படிப்பகங்கள் உருவாக்கப் பட்டுள்ளன.

வாழ்க தமிழர் தலைவர்!

புத்தர் தோன்றி, பவுத்த பள்ளிகளை நிறுவி கருத்துப் பிரச்சாரம் செய்யப்பட்டதுபோல அதே அச்சில், காலத்திற்கேற்ற கூடுதல் கவனத்துடனும், கருத்துடனும் தந்தை பெரியார் கருத்துகளை, சிந்தனைகளை உலக அளவில் பரப்பும் பணியைத் தன்மேல் போட்டுக் கொண்டு செய்து வருகிறார் தமிழர் தலைவர் கி. வீரமணி அவர்கள்.

வாழ்க தந்தை பெரியார்!

வாழ்க தமிழர் தலைவர்!!

----------------------- தி.க.பொதுச் செயலாளர் கவிஞர்.கலி.பூங்குன்றன் அவர்கள் 1-12-2010 “விடுதலை” யில் எழுதிய கட்டுரை

இன்னமுமா பார்ப்பனப் பத்திரிகைகளை ஆதரிக்கிறீர்கள்?


(1927 ஆம் ஆண்டு பெரியார் எழுதிய இத்தலையங்கம் 2010 இலும் எப்படிப் பொருந்த்தி வருகிறது என்பதை இன்றைய நாட்டு நடப்புக்களுடன் மூலம் அறியலாம். )

நமது நாட்டுப் பார்ப்பனர்கள் தங்களது விஷங்களை பெரும்பாலும் பார்ப்பனப் பத்திரிகைகள் மூலமாகவே கக்கி பார்ப்பனரல்லாத மக்கள் அதுகளைப் படிப்பதாலேயே அவ்விஷம் ரத்தத்தில் ஊரிப் போகின்றது. இதை பல தடவைகள் சொல்லியும் எழுதியும் வந்திருக்கிறோம். இப்பொழு தும் நமது பார்ப்பனர்களின் பிழைப்புக்கான சகல ஆயுதங்களும் அதாவது தேசத்தின் பேரால் காங்கிரஸ் சுயராஜ்ஜியம் என்னும் ஆயுதமும் மதத்தின் பேரால் மோக்ஷம் என்னும் ஆயுதமும் ஏறக்குறைய அடியோடு மழுங்கிப் போய் வருகிறதென்றே சொல்லலாம். காங்கிரஸ் சுயராஜ்ஜியம் என்பதன் மூலம் அல்லாது வயிறு வளர்க்க மார்க்கமில்லாத சில வயிற்றுச் சோற்று கூலிகள் தவிர மற்றவர்கள் இதை மதித்திருந்த காலம் மலையேரிப் போய் விட்டது. அது போலவே - மதத்தின் பேரால் அல்லது வாழ முடியாத - வெளியில் தலைகாட்ட முடியாத - சில பாஷாண்டிகள் தவிர மற்றவர்கள் பார்ப்பனர் மூலம் அடையும் மோட்சத்தை மதிக்கும் காலமும் மலையேறிப் போய் விட்டது. ஆகவே இது சமயம் நமது பார்ப்பனர்களுக்கு மிஞ்சி இருப்பது அவர்கள் பத்திரிகை விஷமப்பிரசாரந்தான். அதன் மூலம் அவர்கள் பிரசாரம் செய்யும் யோக்கியதையை இரண்டொரு உதாரணத்தால் எடுத்துக் காட்டுவோம்.

சென்ற வாரம் திருவண்ணாமலையில் ஸ்ரீமான் ஈ.வெ.ராமசாமி நாயக்கர் முதலானவர்கள் பேசியதை பொதுஜனங்கள் ஆதரிக்கவில்லை என்றும் ஏதோ ஒரு சில ஆசாமிகள் மாத்திரம் தான் கேட்டதாகவும் வாத்தியமில்லாமலும் போலீஸ்காரர்கள் பந்தோபஸ்துடனும் வீடு சென்றதாகவும் அதே சமயத்தில் இதற்கு எதிரிடையாய் கூட்டப்பட்ட கூட்டத்தில் பெருந்திரளான ஜனங்கள் வந்திருந்ததாகவும் அதில் நாயக்கர் முதலானவர்கள் பதில் சொல்ல முடியாத அநேக கேள்விகள் கேட்கப்பட்டதாகவும் நாயக்கர் வாயை மூடிக் கொண்டு போய் விட்டதாகவும் இன்னும் சில பொய்யுரைகள் முன்னுக்குப் பின் சம்மந்தமில்லாமல் உளரிக் கொட்டிவிட்டு கடைசியாக எழுதியிருப்பது என்னவென்றால் “ஞாயிற்றுக்கிழமை நடத்திய திராவிட கூட்டத்தில் சுயநலக்காரரான நாயக்கர் முதலானவர்கள் கக்கிய விஷப்புகை திருவண்ணாமலை நகர முழுதும் பரவி எங்கும் பிராமணத்துவேஷம், பிராமணத்தூற்றல் தேசீய பத்திரிகை வெறுப்பு, காங்கிரஸ் மீது குறை கூறல், சுயராஜ்ஜிய கக்ஷியை வைதல் காங்கிரஸ் திட்டங்களை பரிகாசம் செய்தல், ஆலயம் செல்லல் வீண் சிலவெனல், கடவுளுக்கும் திராவிடருக்கும் இடையில் பார்ப்பனத் தரகர் வேண்டாம் எனல், அந்த மூட வழக்கத்தை ஒழிக்க வேண்டுமெனல், கண்ட கண்ட விடங்களில் பார்ப்பனரைப் பரிகசித்தல், காங்கிரசை விட்டு திராவிடக் கூட்டத்தில் சேரவேண்டுமெனல் ஆகிய இதுபோன்ற விஷயங்களே நகர முழுதும் சீறி நிற்கின்றன’’ என்று தனது நிரூபர் பேரால் 11. 2. 27 தேதி தமிழ் சுயராஜ்ஜியா பத்திரிகையில் குறிப்பிட் டிருப்பதாக ஒரு நண்பர் நமக்கு அனுப்பியிருக்கிறார். இது முன்னுக்குப் பின் எவ்வளவு முரணானதும் அயோக்கியத்தனமானதுமான பிரசாரம் என்பதை நேயர்கள் கவனிக்க வேண்டும்.

நாம் பேசிய கூட்டத்தில் யாரும் இல்லையென்றும் ஏதோ காங்கிரஸ் விரோதிகள் சிலபேர் இருந்தார்கள் என்றும் அதுவும் போலீஸ் பந்தோபஸ்துடன் நடந்தது என்றும் வாத்தியங்கள் கூட இல்லாமல் வீட்டிற்கு போனதாகவும் எழுதிவிட்டு தாங்கள் போட்ட கூட்டத்தில் ஏராளமான ஜனங்கள் வந்திருந்ததாகவும் எழுதிஇருக்கிறது. அப்படியானால் அவ்வளவு “ரகசியத்தில் கக்கிய விஷப்புகை” ஊர் முழுவதும் எப்படி பரவி மேல்கண்ட பலன்கள் ஏற்பட்டிருக்கும்? என்பதை வாசகர்கள் தான் உணரவேண்டும். இதுதவிர சுதேசமித்திரனோ “ நாயக்கர் தனது வாய் வலிக்குமட்டும் இரண்டரை மணிநேரம் 3 மணி நேரம் 5 மணி நேரம் பார்ப்பனர்களையும் புரோகிதர்களையும் வைதுப் பேசினார்’’என்று எழுதுகிறதே அல்லாமல் என்ன பேசினார் என்பதை இச்சந்தர்ப்பங்களில் குறிப்பிடுகிறதேயில்லை. இன்னும் இதுபோல் மீட்டிங் போட்டதாகவும் கூட்டம் கூடினதாகவும் என்ன என்னமோ பேசினதாகவும் எழுதிவிடுகிறது. இதைப்பற்றி எத்தனையோ தடவை எழுதியிருக்கிறோம். பேசியும் இருக்கிறோம். கொஞ்சமாவது மானம் வெட்கம், சுத்த ரத்த ஓட்டம் முதலியதுகள் இருக்குமானால் இனியும் 10 தலைமுறைக்கு இந்தக் கூட்டம் இவ்வித இழிவான காரியங்களில் தலையிடவே தலையிடாது. அப்படிக்கு இல்லாமல் “தாயாரை பெண்டாட்டி ஆக்கிக் கொண்டாலும் நாள் வந்து தானே சாக வேண்டும்” என்கிற தூர்த்த வாக்கியத்தை தனக்கு ஆதரவாய் வைத்துக் கொண்டு நாம் என்னதான் எழுதினாலும் நம்மை யார் என்ன செய்யக்கூடும் என்கிற தைரியத்தில் எல்லாவற்றையும் மறந்து இதே வேலையில் ஈடுபட்டிருக்கிறதுகள்.

இவைகளுக்கு இனி நாம் மறுப்பு எழுதுவதாலோ அல்லது கண்டிப்பதாலோ ஒருக்காலும் புத்தி வரும்படி செய்யமுடியவே முடியாது. மானமுள்ள ஆயிரம் பேரையும் ஒருவன் எதிர்த்து போர் புரிய முடியும். மானமில்லாத ஒருவனை வெல்ல ஆயிரம் பேராலும் ஆகாது என்கிற முதுமொழிப் படி மானம், ஈனம், தைரியமற்ற கூட்டத்தை நாம் எப்படி சமாளிக்க முடியும் என்று பார்ப்போமேயானால் அம்மாதிரிப் பத்திரிகைகளை பார்க்காமலி ருப்பதனால்தானே ஒழியும். மற்றபடி இதற்கு வேறு மார்க்கம் இல்லை என்றுதான் நாம் சொல்லுவோம். இதையே பல தடவைகள் சொல்லி யுமிருக்கின்றோம். அநேக ஜனங்கள் அப்பத்திரிகைகளுக்கு புத்தி வரும்படி செய்வதற்காக அதைப் பஹிஷ்கரித்திருப்பதாய் நமக்கு எழுதியும் வருகிறார்கள். ஆனபோதிலும் அது தகுந்த பலனை அளிக்கவில்லை என்றே தோன்றுகிறது. ஆதலால் இனியாவது இவ்வித பத்திரிகைகளை ஆதரிப்பதன் மூலம் நமது சமூகத்திற்கு கேடு வருவித்துக் கொள்ள கூடாது என்பதை தெரிவித்துக் கொள்வதோடு இவ்விதப் புரட்டுகளையும் விஷமப் பிரசாரத்தையும் ஒழித்து மக்களுக்கு உண்மையை விளக்கி சுயமரியாதையை உண்டாக்கவென்றே பாடுபட்டு வரும் “திராவிடனையே” ஒவ்வொரு தமிழ்மக்களும் அனைவரும் ஆதரிக்க வேண்டுமென்று வேண்டுகிறோம்.

-------------------தந்தைபெரியார் - "குடி அரசு" - துணைத் தலையங்கம் - 20.02.1927